Jeremiah 49

Mien Bible (Thai Script) © Thailand Bible Society, 2007

← Chapter 48 Jump to: Chapter 50 →

1ก๊อง เถา อัมโมน เมี่ยน. เฒี้ยว ฮนั้ง น้าย ก๊อง, “อิสะลาเอน ไม้ ม่าย ตอน ไฟ? นิ่น ไม้ ม่าย โฮ์ ต่อย หฑิบ ไฟ? วั้ว หญู่ง มินโคม เฒี่ยน เหว่ย หาย ติ่ว หฑิบ กาด เญย เดา? นิ่น เญย แปะ ฝีง เหว่ย หาย ติ่ว เยียม เหฌี่ย กาด เญย ฒี่ง?”

2เฒี้ยว ก๊อง, “เหว่ย น้าย ฮนอย-เหญียะ อ๋อย เถา, เยีย อ๋อย ปุน เมี่ยน ไฮ์ เบ๊าะ จ๋า เญย เฉีย บุย, เซ เยีย เบ๊าะ อัมโมน เมี่ยน เญย ลับบา ฒี่ง เญย เฒี่ยง โห่. ลับบา ฯฒฯ เป๋น ป่าย ฮวาง เญย กะน้าย-ดุย, เว่ย ก๋อม เญย ล์าง หย่า อ๋อย หฒุ โต์ว ปั๊ว ชุย. ฒิ่น ด่าง ธ้าง ตุ๊ อิสะลาเอน เญย ฒี่ง วั้ว เต๋ย ต๋าว หฑวน อิสะลาเอน เมี่ยน หย่า ตุ๊ ธ้าง หฑวน.” เฒี้ยว ฮนั้ง น้าย ก๊อง.

3“เฮ้ดโบน อ้า! เม่ย อ๋อย หฒุ เญี้ยม, เหว่ย หฒุ ไอ ฒี่ง หฒุ ป่าย ฮวาง, ลับบา เญย เมี่ยน อ้า! อ๋อย หฒุ เญี้ยม, หล่ง ล่าม่า เดีย-โธว ไซ เจี๊ยน จ๊าย, เยียม เว่ย เจี๊ยน เญย ต๋อง กะญั์ว ถิว มี่ง ถิว ต้าย, เหว่ย หฒุ มินโคม เฒี่ยน เหธา เจี๊ยน นิ่น เญย ไซ เมี่ยน เหธา เจียน อ๋อย เหยียด เหฌี่ย หฒุ กว๊าด มี่ง หมี่ อ๊ะ.

4ไม้ เหฒียบ ฒัวะ เญย เมี่ยน อ้า! เม่ย บัว เหว่ย หาย ติ่ว ปู๋ง หว่า-เหมา ก๊อง เม่ย บัว เญย ฮ์อง? เม่ย บัว เขา ฒิ่น ฒ่อย ก๊อง, ‘หาย เต้า ไฮ่ ต้าย เหธา เยีย ต๋อย-เตก?’

5เฒี้ยว, เน่น เจี๋ย เญย เฒี้ยว, ฮนั้ง น้าย ก๊อง, “เยีย อ๋อย ปุน เม่ย บัว กั้ม เหฑีย ไห่, หลาย เว่ย ก๋อม เม่ย บัว เหยียด ฒู้ง เมี่ยน. เม่ย บัว อ๋อย หฒุ หฒุ่น ธ้วด, เต้าๆ แปง หฒะ เญย มี่ง วั้ว ด่าง, หย่า ไม้ ม่าย หาย เต้า เซียว ฒุ้น เปย๋า เญย เมี่ยน.

6มป่า ฆะฮ้า เยีย อ๋อย ปุน อัมโมน เมี่ยน แอ๋ง ตุ๊ หลง ฮนั้ง โล์ วั้ว นอ.” เฒี้ยว ฮนั้ง น้าย ก๊อง.

7ก๊อง เถา เอโดม. เน่น เจี๋ย เญย เฒี้ยว ฮนั้ง น้าย ก๊อง, “เยียม เทมาน บุด๋ง ไม้ แอ๋ง ม่าย ธง-เม่ง ไฟ? ธ่าง ล่าง เญย หว่า เยียม ไกว เญย เมี่ยน ด๊อด เหฑ่ง หมี่ อ๊ะ ไฟ? นิ่น บัว เญย ธง-เม่ง หฒุ เหมียด เหฑ่ง หมี่ อ๊ะ ไฟ?

8เยียม เดดาน เญย เมี่ยน อ้า! อ๋อย หฒุ กวิ้น ซิน เปย๋า, ปี๋ง เจี๊ยน โด เญย ต๋อง, เหว่ย หฒุ เยีย ตี่ง เอซาว เญย ฒุ์ย เญย เฒี่ยง โห่, เยีย อ๋อย ปุน นิ่น หฒุ เหฒะ หน่าน.

9สี ก๊อง แก๊ะ อะหงุ่น เปี๊ยว เญย เมี่ยน ต้าย ล์อ เม่ย, นิ่น บัว ไม้ เฒ์ย เลี่ยว เต๋ย อะหงุ่น เปี๊ยว ปุน เมี่ยน เฑ์า ไฟ? สี ก๊อง ลู่ง ม์วน หฒั่น ม่าย จั๋น-หฒะ ต้าย หนิ่ม, นิ่น ไม้ เฒ์ย ขูง โหฒว หว่าย เก๋า นิ่น บัว กั้น ฮนั้ง ไฟ?

10มป่า เยีย เธี้ย เอซาว ฌัง เหฑ่ง, คอย ฆอย นิ่น ปี๋ง เญย ต๋อง, นิ่น ฯฒฯ ปี๋ง ไม้ เบว์ย นิ่น กั้น อ๊ะ. นิ่น เญย เฒ้ย-ฟุน เหธา ก๋อ-โย์ว เหธา จวั่ง ล์าง เมี่ยน หฒุ เหมียด เหฑ่ง, ไม้ ม่าย นิ่น อ๊ะ.

11กวั่ง เม่ย บัว เญย กู้ ฮั่น ฝุเจว๊ย, เยีย ฯฒฯ ปุน นิ่น บัว ม่าย แหม่ง เฒี่ยง, หย่า ปุน เม่ย บัว เญย เอ๊า-กว๊า เขา เยีย.”

12เหว่ย หฒุ เฒี้ยว ฮนั้ง น้าย ก๊อง, “สี ก๊อง ไม้ หอบ หฒุ ฮบ วั้ว นอม ฒ้าน เญย เมี่ยน ฒู้ง หฒุ ฮบ, เม่ย ไฮ่ เปย๋า ตุ๊ ดุ๊ด, ไม้ หฒุ ตี่ง ฒุ์ย ไฟ? เม่ย ฒู้ง เปย๋า ไม้ ดุ๊ด, ด่ง หาย อ๋อย หฒุ ฮบ น้าย นอม ฒ้าน.”

13เฒี้ยว ก๊อง, “เยีย เฒี้ยง เจี๊ยน เยีย กั้น โฮ้ว หว่า ก๊อง, “โบซาลา อ๋อย หฒุ เป๋น ปุน เมี่ยน กั้ม เหฑีย เญย ต๋อง, หฒุ เมี่ยน ฮว้วด, หฒุ ป่าย ฮวาง หย่า หฒุ เหฒียว. นิ่น เญย เหยียด ฒู้ง ฒี่ง อ๋อย หฒุ เป๋น เหยียด ลิ์ว ป่าย ฮวาง เญย ต๋อง.”

14เยีย ตุ๊ ไฮ์ เยียม เฒี้ยว ต้าย เญย เฝียน. นิ่น พ้าย เต้า โต่ว เฝียน เมี่ยน มี่ง หม่าน กั๊วะ เมี่ยน บุด๋ง ก๊อง, “เม่ย บัว กั๊บ ฒุ้น ต้าย เบ๊าะ เอโดม, เจี์ย ต้าย เบ๊าะ จ๋า ม่าะ!”

15“เหว่ย หฒุ เยีย อ๋อย ปุน เม่ย เยียม หม่าน กั๊วะ บุด๋ง โหฒว ไฝ, เยียม ป้าม เมี่ยน บุด๋ง หฒุ หมั่ง เผีย.

16เม่ย แฮะ เมี่ยน กั้ม เหฑีย ไห่, เหธา เม่ย เฮญี้ยว เหมา เญย เจ๊า ดั๊ว เม่ย, เซ เม่ย เยียม เจี๊ยน แบ๋ง-ง่าม หย่า เยียม เจี๊ยน บง-นี้ง กู้ หงว่าย เญย เมี่ยน. ไม้ กุ๊น เม่ย ฮนั้ง ต้ม จ๊าง เยียม ฮลัง เญย ต๋อง โหฒว เล์า, เยีย อ๋อย เยียม หน่าย แปง เม่ย เหฌี่ย.” น้าย เซ เฒี้ยว ก๊อง เญย หว่า.

17“เอโดม ฯฒฯ เป๋น ปุน เมี่ยน กั้ม เหฑีย เญย ต๋อง. ตะฟ่าน เจี๋ย เจ๊า เญย เมี่ยน หฒะเก้ง กั้ม เหฑีย ไห่, แอ๋ง เหว่ย เอโดม หฒุ เญย เหยียด ฒู้ง เหฒะ หน่าน ฮว้วด นิ่น.

18ฮนั้ง โสโดม เหธา โกโมลา เหธา นิด ฟัด เญย ฒี่ง หฒุ ป่าย, ไม้ ม่าย หาย เต้า ตุ๊ เยียม หน่าย. ไม้ ม่าย หาย เต้า ตี้ง เฒ้บ.” เฒี้ยว ฮนั้ง น้าย ก๊อง.

19“ฮนั้ง เต้า เซี่ยน เยียม จอแดน ด้าย เฮลน เญย หล่ม ต้าย ป์อง ว้วน เญย ปะกี ยู่ง ล่าน, เยีย อ๋อย เลี่ยม เฒ่ย ปุน นิ่น บัว ถิว เล่ย ฆอย น้าย นอม เต่ย-ปูง, เปย๋า เอโดม. เยีย กิ๊น หาย เต้า เยีย ฯฒฯ พ้าย วั้ว เต้า กุ๊น วั้ว นอม กั๊วะ. หาย เต้า ฮนั้ง เยีย? หาย เต้า ไฮ่ เห่ว เยีย ต้าย? ม่าย หาย เต้า โก๋ว ปะกี ยู่ง เญย เมี่ยน ไฮ่ โซ้ว ตุ๊ เจี๊ยน เยีย เญย หฑะเฮมียน?”

20เหว่ย น้าย, อ๋อย หฒุ หมวัง เฒี้ยว ต๊า เญย หฒะเอ๋ย เหว่ย เบ๊าะ เอโดม เหธา นิ่น เบ๊าะ เทมาน ฒี่ง เญย เมี่ยน ตี่ง เญย หฒะเอ๋ย. นิ่น บัว ไฝ เจี๋ย เญย ปะกี ยู่ง ตอน ฒู้ง อ๋อย หฒุ ทอ มี่ง. นิ่น บัว เญย ปะกี ยู่ง ล่าน ด่ง หาย ฒู้ง อ๋อย หฒุ เหมียด.

21เอโดม บาง เหฌี่ย เญย เฉีย บุย ดั่น เดา ต์ง, นิ่น บัว เห่ว เญย เฉีย แอ๊ง มี่ง เถา ค้อย-ซิ.

22หมั่ง ม่าะ! ม่าย เต้า ฮนั้ง ต้ม จ๊าง อ๋อย ยัง ฆอย ด๊าด ได๋ ต้าย เบ๊าะ โบซาลา. วั้ว ฮนอย เอโดม เบ๊าะ จ๋า เฮ้น เญย แปง เญย เฮญี้ยว ฮนั้ง มเซียะ ตอน มุน กู้งว์า นอ.”

23ก๊อง เถา ดามัดกัด. “ฮามัด เหธา อานปัด หฒุ ป่าย เฮมียน เหว่ย หฒุ นิ่น บัว หมวัง ไฮ์ เธี้ยว เญย เฝียน. นิ่น บัว บะฑิว หยุ หมี่ อ๊ะ, นิ่น บัว เฮญี้ยว พานๆ พัวะๆ เญย ฮนั้ง ค้อย ไม้ ไฮ่ เซ้ก นอ.

24ดามัดกัด เมา หมี่ อ๊ะ. นิ่น กวิ้น ซิน เปย๋า, เฮญี้ยว ฮวาง เหฑ่ง. นิ่น หฒุ เฮญี้ยว มุน, เฮญี้ยว เฑ่า, ฮนั้ง มเซียะ ตอน มุน กู้งว์า นอ.

25ม่าย เม่ง เต้า วั้ว นอม ฒี่ง หฒุ กวั่ง หมี่ อ๊ะ, ต้ง ม่าย เฌียน-โย่ว ปวั๊ง เหฑ่ง เญย ฒี่ง.

26เหว่ย น้าย นิ่น เญย เมี่ยน หลุน เมี่ยน ฯฒฯ เยียม ต้ม หฒวัง หฒ่าม หฒุ ไต๋ ไต่. ต้ง วั้ว ฮนอย นิ่น เญย เหยียด ฒู้ง แปง หฒุ เหมียด เหฑ่ง.” เน่น เจี๋ย เญย เฒี้ยว ฮนั้ง น้าย ก๊อง.

27“เยีย อ๋อย เยียม ดามัดกัด เญย ฒี่ง หลาด เตี๊ยม โต์ว, โต์ว ฯฒฯ ปั๊ว ชุย เบนฮาดัด เว่ย ว้วน เญย ต๋อง.”

28น้าย ก๊อง เถา บาบีโลน เญย ฮู่ง, เนบูคัดเน้ดซา, เบ๊าะ เคดา ฝีง เหธา ฮาโซ เญย กั๊วะ. เฒี้ยว ฮนั้ง น้าย ก๊อง, “เจี์ย ต้าย มี่ง เบ๊าะ เคดา, เหมียด เหฑ่ง เยียม ตง ปูง เญย เมี่ยน.

29นิ่น บัว เญย ด๊บ-ลิ่ว เหธา ปะกี ยู่ง กวั้น, ยู่ง กวั้น, อ๋อย หฒุ เฒาะ, เลี่ยม นิ่น บัว เญย แบะ แก้ง เดีย เหธา นิ่น บัว เญย เหยียด ฒู้ง จา-ต๋อง. นิ่น บัว เญย ล่อ ท่อ หฒุ เฒาะ มี่ง, เมี่ยน ฯฒฯ เห่ว เจี๊ยน บั๋ว นิ่น บัว, ‘ปูงๆ ม่าย กั้ม เหฑีย เญย สี่ อ๊ะโล่ะ!’”

30เฒี้ยว ก๊อง, “ฮาโซ เมี่ยน อ้า! เปย๋า อ๊ะ. โย่ว เจี๊ยน มี่ง โก, เยียม โด เญย ต๋อง, เหว่ย หฒุ บาบีโลน เญย ฮู่ง, เนบูคัดเน้ดซา, ต๊า หฒะเอ๋ย เบ๊าะ เม่ย บัว, หย่า เจี์ย เฮญี้ยว ห่อย เม่ย บัว.”

31เฒี้ยว ก๊อง, “เจี์ย ต้าย, ธ้วด มี่ง เบ๊าะ เหยียด ฝีง คู่ เยียม เญย เมี่ยน, เซ เยียม ตุ๊ ว้วน เญย เมี่ยน. นิ่น บัว ฒู้ง ไม้ ม่าย ฒี่ง แก้ง, ไม้ ม่าย แก้ง ซอน, นิ่น บัว กั้น เยียม ฮนั้ง.

32นิ่น บัว เญย ล่อ ท่อ อ๋อย หฒุ เป๋น ลู้ ต้าย เญย กะน้าย, นิ่น บัว เญย ง่ง กวั้น หฒุ ธ้าง ต้าย. จั๊บ บะเปยย แป้ง เญย ฮวีง ก๋อม มฆ้อง เญย เมี่ยน, เยีย อ๋อย ปุน หฑาน มี่ง เปยย ปูง หฑยาว-ค้วด, หย่า อ๋อย ปุน นิ่น บัว หฒุ เยียม ปูงๆ ต้าย เญย เหฒะ หน่าน.” น้าย เซ เฒี้ยว ก๊อง เญย หว่า.

33“ฮาโซ อ๋อย หฒุ เป๋น เฮยี่ย จู๊ เยียม เญย ต๋อง, เหยียด ลิ์ว หฒุ ป่าย ฮวาง, ไม้ ม่าย เมี่ยน เยียม, หย่า ไม้ ม่าย หาย เต้า ฮิด หน่าย.”

34เสเดคียา เจี์ย กอน โหฒว ยูดา เญย ฮู่ง วั้ว หฒั่น, เยเลมี ตุ๊ ฒิบ เฒี้ยว ก๊อง เถา เอลาม น้าย เต๋ย หว่า.

35เน่น เจี๋ย เญย เฒี้ยว ฮนั้ง น้าย ก๊อง, “หมั่ง ม่าะ! เยีย อ๋อย ว้วด เน้า เอลาม เญย จวัง-หฒิน, ต้ง นิ่น บัว ปั่ง ธั้ม เจี๋ย เถง นิ่น บัว ตุ๊ ชะ.

36เยีย อ๋อย ปุน เปยย ปูง หฑยาว เยียม เปยย ปูง ลู่ง ป่วน ต้าย เถา เอลาม. เยีย อ๋อย ปุน นิ่น บัว กัน วั้ว เต๋ย เหยียด ฒู้ง หฑยาว หฑาน มี่ง. วั้ว เต๋ย หฒุ หฒุ่น ธ้วด เอลาม เญย เมี่ยน ไม้ ม่าย เหยียด นอม กั๊วะ นิ่น บัว ไม้ เถา.”

37เฒี้ยว ก๊อง, “เยีย อ๋อย ปุน เอลาม เมี่ยน เยียม นิ่น บัว เญย วิน-วั้ง เหธา ล์อ นิ่น บัว เญย แหม่ง วั้ว เต๋ย เญย หฑะเฮมียน กั้ม เหฑีย ไห่. เยีย อ๋อย ปุน นิ่น บัว หฒุ เธี้ยว เญย เหฒะ หน่าน, เซ เยีย กะเฉีย แป๊ด ธ้วด ปุน นิ่น บัว. เยีย อ๋อย ปุน หฑุ ด๊าว หฒุ่น นิ่น บัว, เถา เยีย เหมียด เหฑ่ง นิ่น บัว.

38เยีย อ๋อย เยียม เอลาม เหลียบ เยีย เญย เหว่ย, เหมียด เหฑ่ง นิ่น บัว เญย ฮู่ง เตี๋ย เหธา เจียน.” เฒี้ยว ฮนั้ง น้าย ก๊อง.

39“มป่า เถา เซ้ด เมว์ย เญย เฒี่ยง โห่ เยีย อ๋อย ปุน เอลาม ตุ๊ หลง ฮนั้ง โล์ วั้ว นอ.”

← Chapter 48 Jump to: Chapter 50 →