Jeremiah 12

Mien Bible (Thai Script) © Thailand Bible Society, 2007

← Chapter 11 Jump to: Chapter 13 →

1เฒี้ยว อ่า, เยีย งบ ปุน เม่ย หมวัง เญย เฒี่ยง โห่, เม่ย ปุน ธีง เม่ย หอบ. ไม้ กุ๊น ฮนั้ง หน่าย, ม่าย เหยียด ติ้ว เจ๊า เยีย อ๋อย เหธา เม่ย แฑง. เอ๊าะ เมี่ยน เญย เจ๊า เหว่ย หาย ติ่ว หลง เจี๊ยน ฝาว? ไม้ เหฒียบ ฒัวะ เญย เมี่ยน เหว่ย หาย ติ่ว ตุ๊ คู่ เยียม?

2เม่ย หฒวัง นิ่น บัว, นิ่น บัว เหฌี่ย ฑู่ง. นิ่น บัว โฮล เจี๊ยน ฝาว หย่า เฒี่ยง เปี๊ยว. นิ่น บัว เญย ฑุ่ย เยียม นิด ฟัด เม่ย มป่า เฮญี้ยว เล่ย เม่ย โก.

3มป่า เฒี้ยว อ่า, เม่ย ฮิ้ว ตุ๊ เยีย. เม่ย ปวัด เยีย, หย่า เสย เยีย เญย เฮญี้ยว ฮนั้ง หาย นอ ฮนั้ม เถา เม่ย. โท้ ทอ นิ่น บัว ธ้วด ต้าย ฮนั้ง อ๋อย หฒุ ไต๋ ไต่ เญย ปะกี ยู่ง. เฒาะ ต้าย ปุน ฆอย ฒั้ว เจี๊ยน หฒุ ไต๋ เญย ฮนอย.

4น้าย นอม เต่ย-ปูง อ๋อย บ๋อง ฆาย ด่ง หาย เล่า? เหยียด ฒู้ง ลี่ง เต่ย เญย เมี้ย อ๋อย เหญา เถา หาย หฒั่น? หลาย เยียม น้าย เต๋ย ต๋อง เญย เมี่ยน โหฒว เญย เอ๊าะ สี่ เฮยี่ย ฒ่อย เหธา เหนาะ ไต่ เหฑ่ง. เหว่ย หฒุ เมี่ยน ก๊อง, “ เฒี้ยว ไม้ ปวัด เยีย บัว เซ้ด เมว์ย เญย เฒี่ยง โห่.”

5เฒี้ยว ก๊อง, “สี ก๊อง เม่ย เหธา เมี่ยน สาย ถิว นิ่น บัว หย่า ปุน เม่ย ไฮ์ โค้ว, เม่ย ฝู่ง ไฮ่ เหธา ม์า สาย ถิว? สี ก๊อง เม่ย เยียม แป้ง ออน เญย เต่ย-ปูง ฒู้ง ไฮ่ ดอบ, เม่ย เยียม จอแดน ด้าย เฮลน เญย หล่ม ฮนั้ง หาย นอ?

6ไม้ กุ๊น เม่ย เญย มั์ว-ต่อย เหธา เม่ย เญย เตีย เญย เปย๊า ฒง เมี่ยน ไม้ เหฒียบ ฒัวะ เญย โหฒว ปุน เม่ย, นิ่น บัว หย่า หฒุ่น เจี๊ยน เห่ว เจี๊ยน เม่ย มี่ง. ไม้ กุ๊น นิ่น บัว เหธา เม่ย ก๊อง หว่า หลง, เม่ย ไม้ ตู๋ง เสียน นิ่น บัว.

7“เยีย กวั่ง เยีย เญย เปย๊า, เล่ย ฆอย เยีย หฑิบ เญย ป่วน. เยีย เฒาะ เยีย เญย เฮญี้ยว ฮนั้ม วั้ว เต้า จิว ปุน เยียม นิ่น เญย วิน-วั้ง เญย ปั์ว-เดี๊ย.

8เยีย หฑิบ เญย ป่วน เหว่ย เยีย ฮนั้ง หล่ม เญย เซี่ยน นิ่น เห่ว เจี๊ยน อ๋อย ห่อย เยีย, เยีย ฯฒฯ ฑอง นิ่น.

9เยีย หฑิบ เญย ป่วน เหว่ย เยีย ฮนั้ง นอม เฒาะ อ๊อ หญั่น เญย เหนาะ เปน ไฟ? เฒาะ อ๊อ หญั่น เญย เหนาะ ไม้ เฒ์ย เยียม ฮวีง ก๋อม นิ่น ไฟ? กุ๊น มี่ง อ๊ะ. ปุน หล่ม-ฮวาง เญย เหยียด ฒู้ง เฮยี่ย ฒ่อย กั๊บ ฒุ้น. ต้อ นิ่น บัว ต้าย นะ ม่าะ!

10ม่าย โก๋ว ปะกี ยู่ง เญย เมี่ยน ธั้ม เญย ป่าย หว่าย เยีย เญย อะหงุ่น หฮวีง. นิ่น บัว ธ้าย เยีย เญย ป่วน เหฌี่ย, นิ่น บัว ปุน เยีย หลง เญย ป่วน เป๋น ป่าย หว่าย เญย เต่ย-ปูง-ฮวาง.

11นิ่น บัว ปุน น้าย เต๋ย เดา เป๋น เดา-ฮวาง, ป่าย ฮวาง, บ๋อง ฆาย เญย ต๋อง. เฒี่ยง นอม เต่ย-ปูง หฒุ กวั่ง ฮวาง, มป่า ไม้ ม่าย หาย เต้า เฮยี้ยด เฮญี้ยว.

12โหฒว เหมียด เญย เมี่ยน ต้าย เถา เต่ย-ปูง-ฮวาง เหยียด ฒู้ง เยียม ฮลัง, ฌัง เญย ต๋อง, เหว่ย หฒุ เยียม เต่ย-ปูง น้าย ปูง มี่ง เถา จ่ม วั้ว ปูง, เฒี้ยว เญย หฑุ ด๊าว ปุน นิ่น บัว หฒุ เหมียด, ไม้ ม่าย หาย ล่าน เมี่ยน ตุ๊ แป้ง ออน เญย เยียม.

13นิ่น บัว หฒวัง เญย เซ เบย้า วิด มป่า เซียว ตุ๊ ฌิ้ม. นิ่น บัว โหฒว โค้ว มป่า ไม้ ตุ๊ หาย หญู่ง. หลาย เฒี้ยว เฉีย เจี์ย! ไห่, นิ่น บัว อ๋อย หฒุ ไญ้ นิ่น บัว เซียว ต้าย เญย กะน้าย.”

14เฒี้ยว ฮนั้ง น้าย ก๊อง, “ก๊อง เถา เยียม นิด ฟัด วั้ว เต๋ย เหยียด ฒู้ง โหฒว เอ๊าะ เญย เมี่ยน, ต้ง แฑง เยีย เญย แปะ ฝีง, อิสะลาเอน เมี่ยน, หฑิบ เญย ป่วน วั้ว เต๋ย, เยีย อ๋อย เฒาะ นิ่น บัว แปง ธ้วด นิ่น บัว กั้น เญย เต่ย-ปูง, แอ๋ง เฒาะ เยียม นิ่น บัว บุด๋ง เญย ยูดา เมี่ยน แปง ธ้วด ต้าย.

15เยีย แปง นิ่น บัว ธ้วด ต้าย, ฆะฮ้า เยีย แอ๋ง อ๋อย ค้อ-เลี่ยน นิ่น บัว. เยีย แอ๋ง อ๋อย ต้อ นิ่น บัว หฑวน, ปุน เก๊าะ-เมี่ยน หฑวน เก๊าะ-เมี่ยน หฑิบ เญย ป่วน, เก๊าะ-เมี่ยน หย่า หฑวน เก๊าะ-เมี่ยน เญย เต่ย-ปูง.

16สี ก๊อง นิ่น บัว เจี้ยน โหะ หลิ่น เยีย เญย แปะ ฝีง เสียน เญย เจ๊า, เซ เฒี้ยง เจี๊ยน เยีย เญย บั๋ว โฮ้ว หว่า ก๊อง, ‘เยีย เฒี้ยง เจี๊ยน เฒี่ยง เจี๊ยน เญย เฒี้ยว โฮ้ว หว่า,’ ฮนั้ง นิ่น บัว ฒิ่น ด่าง หฌาว เยีย เญย แปะ ฝีง เฒี้ยง เจี๊ยน บาอัน เฒี่ยน โฮ้ว หว่า นอ, นิ่น บัว ฯฒฯ เยียม เยีย เญย แปะ ฝีง บุด๋ง ตุ๊ เหธย เจี์ย ต้าย.

17สี ก๊อง หาย นอม กั๊วะ เญย เมี่ยน ไม้ หมวัง, เยีย ฯฒฯ แปง ธ้วด หย่า เหมียด เถา เหฑ่ง.” น้าย เซ เฒี้ยว ก๊อง เญย หว่า.

← Chapter 11 Jump to: Chapter 13 →