Jeremiah 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1“สี ก๊อง ม่าย ล่าน เมี่ยน เล่ย กวั่ง นิ่น เญย เอ๊า, นิ่น เญย เอ๊า เล่ย ฆอย แอ๋ง มี่ง โหฒว กั้น ล่าน เมี่ยน เญย เอ๊า, โล์-โหฆ แอ๋ง หฑวน มี่ง ล์อ นิ่น ไฟ? วั้ว นอม เต่ย-ปูง ไม้ เฒ์ย ไล่ ฮลบ ธั้ม เญย ไฟ? มป่า เม่ย โหฒว ฮนั้ง หม่าย ป๊วน-ซิน เญย มเซียะ ตอน, เหฮยียน ฮนั้ม เม่ย วั้ว เต๋ย เมี่ยน ธั้ม, เม่ย หธ่อ หฑวน ต้าย ล์อ เยีย ไฟ?” น้าย เซ เฒี้ยว ก๊อง เญย หว่า.

2“เธา เฮมียน หมั่ง ฮลัง, ฌัง เญย ต๋อง ม่าะ! ม่าย หาย นอม ต๋อง ไม้ ม่าย เมี่ยน เหธา เม่ย เปว๋ย เจี๋ย? เม่ย เฒว์ย เจี๊ยน เจ๊า-เฮลน ฒั้ว เมี่ยน ต้าย ฮนั้ม เม่ย, ฮนั้ง อาหลับ เมี่ยน เยียม เต่ย-ปูง-ฮวาง. เม่ย โหฒว เอ๊าะ ไห่, หม่าย ซิน เญย สี่ ปุน เต่ย-ปูง ม่าย หวุย ปวั๊ง เหฑ่ง.

3เหว่ย น้าย บยู่ง หฒุ ตี้ง หมี่ อ๊ะ, ธุน-เกน บยู่ง หย่า ไม้ ตุ้ย, มป่า เม่ย ม่าย เฮมียน ฮนั้ง หม่าย ป๊วน-ซิน เญย มเซียะ ตอน หย่า แหง่ง เจี๊ยน ไม้ แล์ง ไญ้.

4อะจัง เม่ย เห่ว เยีย ไม้ เฒ์ย? เม่ย ก๊อง, ‘เยีย เญย เตีย อ้า! เยียม เยีย หลุน เญย เฒี่ยง โห่ เม่ย เหธา เยีย โหฒว ต่อย.

5นิ่น อ๋อย เหยียด ลิ์ว เฉีย เจี์ย เยีย ไฟ? อ๋อย โน์ว เยีย เถา เซ้ด เมว์ย?’ หมั่ง ม่าะ! เม่ย ก๊อง ลิ์ว อ๊ะ, มป่า เม่ย ไฮ่ โหฒว ตุ๊ หาย หญู่ง เอ๊าะ สี่, เม่ย หย่า โหฒว หมี่ อ๊ะ.”

6เยียม โยสิยา ฮู่ง กุ๊น เญย เฒี่ยง โห่ เฒี้ยว ก๊อง บั๋ว เยีย, “เม่ย ปวัด นิ่น โหฒว เญย ไฟ? แหง่ง โต์ เญย อิสะลาเอน ฝาว นอมๆ บง-ฮลัง หย่า เยียม ติ้วๆ เดี๋ยง-เญี์ยม กะเดี๊ย เหฮยียน.

7เยีย หย่า ฮนั้ม ต้าย, ‘นิ่น โหฒว ลิ์ว น้าย เต๋ย เหยียด ฒู้ง สี่ นิ่น ฯฒฯ หฑวน ต้าย ล์อ เยีย.’ มป่า นิ่น ไม้ หฑวน. นิ่น ไม้ เหฒียบ ฒัวะ เญย เฑี์ย, ยูดา, ปวัด เญย.

8นิ่น ปวัด หลาย แหง่ง โต์ เญย อิสะลาเอน โหฒว เหยียด ฒู้ง เหฮยียน เญย สี่, เยีย ปุน เล่ย ไธ โซว นิ่น หย่า หฒุ่น นิ่น มี่ง. มป่า นิ่น ไม้ เหฒียบ ฒัวะ เญย เฑี์ย, ยูดา, ไม้ กั้ม เหฑีย. นิ่น หย่า มี่ง โหฒว ฮนั้ง หม่าย ป๊วน-ซิน เญย มเซียะ ตอน.

9เหว่ย อิสะลาเอน น้าย เต๋ย หม่าย ป๊วน-ซิน เญย เจ๊า เซ เฮง เญย สี่, นิ่น ฯฒฯ ปุน เต่ย-ปูง ม่าย หวุย, แอ๋ง ป๋าย หละเปย๊ย เหธา เดี๋ยง.

10ไม้ กุ๊น น้าย เต๋ย เหยียด ฒู้ง สี่, นิ่น ไม้ เหฒียบ ฒัวะ เญย เฑี์ย, ยูดา, ไม้ หล่ง เหฑ่ง เฮญี้ยว หฑวน ต้าย ล์อ เยีย. ขูง โหฒว จ๊า เญย เอ๋ย เล์ย ฮนั้ง.” น้าย เซ เฒี้ยว ก๊อง เญย หว่า.

11เฒี้ยว แอ๋ง ก๊อง บั๋ว เยีย, “แหง่ง โต์ เญย อิสะลาเอน ปิ๋ว เม่ง นิ่น ไม้ ด่ง ไม้ เหฒียบ ฒัวะ เญย ยูดา ต่อง ฒุ์ย.

12มี่ง ม่าะ! หูง เจี๊ยน ป๊ะ ปูง แหมง ฒุ่น น้าย เต๋ย หว่า. อ๋อย หฒุ ก๊อง, “ เฒี้ยว ก๊อง, ‘แหง่ง โต์ เญย อิสะลาเอน อ้า! หฑวน ต้าย ม่าะ! เยีย ไม้ โน์ว เจี๊ยน หมั่ง เม่ย, เหว่ย หฒุ เยีย ค้อ-เลี่ยน เมี่ยน.’ เฒี้ยว ฮนั้ง น้าย ก๊อง. “‘เยีย ไม้ เหยียด ลิ์ว เฉีย เจี์ย.

13ขูง อ๋อย หฒุ เหญี่ยม เม่ย โหฒว ต่อง เญย ฒุ์ย, เซ เม่ย แหง่ง เฒี้ยว, เม่ย เญย ทิน-ฮู่ง. เม่ย เยียม ติ้วๆ เดี๋ยง-เญี์ยม เซว่ย เอ๋ย เฒาะ กั้น ปุน กั้น ฝีง เญย เฒี่ยน. เม่ย หย่า ไม้ หมวัง เยีย เญย เฉีย.’” เฒี้ยว ฮนั้ง น้าย ก๊อง.

14เฒี้ยว ก๊อง, “แหง่ง โต์ เญย น่าม โญ์ว อ้า! หฑวน ต้าย ม่าะ! เหว่ย หฒุ เยีย โหฒว เม่ย บัว เญย เฒี้ยว. เยีย อ๋อย เยียม เหยียด นอม ฒี่ง กิ๊น เหยียด ล่าน, แอ๋ง เยียม เหยียด ฝีง กิ๊น อี ล่าน, หย่า ต้อ เม่ย บัว เถา สิโอน.

15เยีย หย่า อ๋อย ปุน หอบ เยีย เญย เฮญี้ยว เญย โก๋ว ยู่ง เมี่ยน, ต้ง ไฮ่ หล่ง ว่วน ฒาง เหธา เปียะ เฮญี้ยว เญย เจ๊า โก๋ว เม่ย บัว.”

16เฒี้ยว ก๊อง, “เม่ย บัว เยียม เต่ย-ปูง หฮยาง ธั้ม เจี๊ยน ฝาว วั้ว เต๋ย ฮนอย-เหญียะ, เมี่ยน ไม้ แอ๋ง ก๊อง, ‘ เฒี้ยว เญย แล์ง แหง่ง หว่า ฟาง.’ น้าย หญู่ง เจ๊า ไม้ เยียม เฮญี้ยว, ไม้ จั๋ง, ไม้ ฮนั้ม เถา หย่า ไม้ แอ๋ง เซียง-โหฒว นอม อ๊ะ.

17วั้ว เต๋ย เฒี่ยง โห่ เมี่ยน อ๋อย เห่ว เยลูซาเลม เป๋น เฒี้ยว เญย เหว่ย. หม่าน กั๊วะ เมี่ยน อ๋อย กั๊บ ฒุ้น ต้าย เยียม เยลูซาเลม, เฒี้ยว เญย หฑะเฮมียน. นิ่น บัว ฯฒฯ ไม้ แอ๋ง แหง่ง เจี๊ยน เอย นิ่น บัว กั้น เอ๊าะ เญย เฮญี้ยว โหฒว.

18เถา วั้ว เต๋ย ฮนอย-เหญียะ ยูดา เญย เฒ้ย-ฟุน เหธา อิสะลาเอน เญย เฒ้ย-ฟุน อ๋อย กั๊บ เจี๊ยน, ฯฒฯ เยียม ป๊ะ ปูง แหมง เญย เต่ย-ปูง ต้าย เถา เยีย เหธย ปุน เป๋น เม่ย บัว เญย อง-ถาย หฑิบ เญย ป่วน เต่ย-ปูง.

19“เยีย ฮนั้ม ต้าย, “‘เยีย อ๋อย เหลียบ เม่ย เยียม เยีย เญย น่าม โญ์ว บุด๋ง, หย่า ปุน นอม คู่ เยียม เญย เต่ย-ปูง เม่ย. เซ เยียม หฒวัง กั๊วะ บุด๋ง ปุน เม่ย หฑิบ เก้า เหฑว่ย เจี๋ย เญย ป่วน.’ เยีย หย่า ฮนั้ม ต้าย เม่ย อ๋อย เห่ว เยีย, ‘อา เตีย,’” หย่า ไม้ เล่ย ฆอย, กวั่ง เยีย.

20อิสะลาเอน เญย เฒ้ย-ฟุน อ้า! เฒียน สี่, ไม้ เหฒียบ ฒัวะ เญย เอ๊า ฮนั้ง หาย นอ กวั่ง นิ่น เญย โหฆ, เม่ย บัว หย่า ฮนั้ง วั้ว นอ ไม้ เหฒียบ ฒัวะ เญย โหฒว ปุน เยีย.” น้าย เซ เฒี้ยว ก๊อง เญย หว่า.

21เยียม ฮลัง, ฌัง เญย ต๋อง ไฮ์ เมี่ยน เญย เฉีย, เป๋น อิสะลาเอน เญย น่าม โญ์ว เญี้ยม แอ๋ง เห่ว เจี๊ยน โท้ เญย เฉีย, เหว่ย หฒุ นิ่น บัว ยั่ง เพียน เล่ย เฒียน เจ๊า, หละคุ เฒี้ยว, นิ่น บัว เญย ทิน-ฮู่ง.

22“เม่ย บัว แหง่ง โต์ เญย น่าม โญ์ว อ้า! หฑวน ต้าย ม่าะ! เยีย อ๋อย หฒ่อ เม่ย บัว แหง่ง โต์ เญย เจ๊า หลง ต้าย.” “หมั่ง ม่าะ! เยีย บัว ต้าย ล์อ เม่ย เหว่ย หฒุ เม่ย เซ เฒี้ยว, เยีย บัว เญย ทิน-ฮู่ง.

23เฒียน เญย, เยียม ฟิ้ว-บง ต้ม บง สาน เญย เจ๊า ขูง ดั๊ว เมี่ยน ฮนั้ง. เฒียน เญย, เฒี้ยว, เยีย บัว เญย ทิน-ฮู่ง, เซ อิสะลาเอน เญย เหฌียว เอน.

24มป่า เยียม เยีย บัว หลุน เญย เฒี่ยง โห่ เถา อี้ หฒั่น น้าย เต๋ย ไญ้ ไห่ เญย กะน้าย นะ เหฑ่ง เยีย บัว เญย อง-ถาย ล่าว หลุ่ย ตุ๊ ต้าย เญย, เซ นิ่น บัว เญย ปะกี ยู่ง กวั้น, ยู่ง กวั้น, นิ่น บัว เญย ง่ง กวั้น, เหธา นิ่น บัว เญย ตอน เซียะ.

25เยีย บัว อ๋อย หฒุ หล่ง หฒุ ไญ้ เญย เจ๊า ต๋อง โหธว เปว๋ย, หย่า หล่ง เยีย บัว ป่าย เฮมียน เญย เจ๊า ห่ม. เหว่ย หฒุ เยียม เยีย บัว หลุน เญย เฒี่ยง โห่ เถา อี้ หฒั่น เยีย บัว เหธา เยีย บัว เญย อง-ถาย ป์าม ฒุ์ย ต่อง เฒี้ยว, เยีย บัว เญย ทิน-ฮู่ง. เยีย บัว หย่า ไม้ หมวัง เฒี้ยว, เยีย บัว เญย ทิน-ฮู่ง เญย หว่า.”

← Chapter 2 Jump to: Chapter 4 →