Jeremiah 27

Mien Bible (Thai Script) © Thailand Bible Society, 2007

← Chapter 26 Jump to: Chapter 28 →

1ยูดา ฮู่ง, โยสิยา, เญย ตอน, เสเดคียา, เจี์ย กอน โหฒว ฮู่ง กุ๊น วั้ว หฒั่น, เยเลมี ตุ๊ ฒิบ น้าย โจ๋ว เฒี้ยว เญย หว่า.

2เฒี้ยว ฮนั้ง น้าย ก๊อง บั๋ว เยีย, “อ๋อย หฒุ หล่ง ฮลาง เหธา เดี๋ยง โหฒว นอม เดี๋ยง-ก์า หย่า ก์า เจี๊ยน เม่ย กั้น เญย จาง.

3อ๋อย หฒุ ปุน หว่า มี่ง บั๋ว เอโดม เญย ฮู่ง, โมอับ เญย ฮู่ง, อัมโมน เมี่ยน เญย ฮู่ง, ไทละ เญย ฮู่ง เหธา ไซดอน เญย ฮู่ง. หย่า อ๋อย หฒุ ปั่ง ต้าย เยลูซาเลม ล์อ ยูดา ฮู่ง, เสเดคียา, วั้ว เต๋ย กง-โฒ่ ฝูง มี่ง.

4อ๋อย หฒุ พ้าย นิ่น บัว เฒาะ น้าย เต๋ย หว่า บั๋ว นิ่น บัว เญย เฒี้ยว. อ๋อย หฒุ ก๊อง, ‘เน่น เจี๋ย เญย เฒี้ยว, อิสะลาเอน เญย ทิน-ฮู่ง, ฮนั้ง น้าย นอ ก๊อง, “อ๋อย หฒุ เฒาะ น้าย เต๋ย หว่า ก๊อง ปุน เม่ย บัว เญย เฒี้ยว หมวัง.

5‘เซ เยีย หล่ง เยีย เฮ้น ไห่ เญย ชะ หย่า ซูง เจี๊ยน เยีย เญย ปั์ว เหฒย ธ้วด ลู่ง เดี๊ย เหธา เยียม ลู่ง เดี๊ย เญย เมี่ยน เหธา แซง-คู้ เฮยี่ย ฒ่อย. หฒิว เยีย หมั่ง, หอบ หฒุ ปุน หาย เต้า, เยีย จิว ปุน วั้ว เต้า อ๊ะ.

6อี้ หฒั่น เยีย เฒาะ น้าย เต๋ย เหยียด ฒู้ง เต่ย-ปูง จิว ปุน เยียม เยีย เญย โปว, บาบีโลน เญย ฮู่ง, เนบูคัดเน้ดซา, เญย ปั์ว-เดี๊ย. เยีย หย่า เฒาะ หล่ม-ฮวาง เญย เฮยี่ย ฒ่อย จิว ปุน นิ่น เหว่ย ฟู-สู นิ่น.

7หม่าน กั๊วะ เมี่ยน อ๋อย หฒุ ฟู-สู นิ่น เหธา นิ่น เญย ตอน, นิ่น เญย ฟุน เถา นิ่น เญย ป๊วน-กั๊วะ ตี่ง ต้าย เญย ฮนอย-เหญียะ ปวั๊ง. เถา วั้ว หฒั่น เหฒีย กั๊วะ เมี่ยน เหธา ต้ม ฮู่ง เตี๋ย ฯฒฯ ปุน นิ่น หฒุ โหฒว นิ่น บัว เญย โน่ว.

8“‘“มป่า สี ก๊อง หาย ฝีง, หาย กั๊วะ เมี่ยน ไม้ ฟู-สู น้าย เต้า บาบีโลน ฮู่ง, เนบูคัดเน้ดซา, หย่า ไม้ คั้ง ก์า บาบีโลน ฮู่ง เญย เดี๋ยง-ก์า, เยีย ฯฒฯ หล่ง หฑุ ด๊าว, หง่อ หฮนาง เญย เจ๊า, เหธา ววน-แป่ง ตี่ง นิ่น บัว เญย ฒุ์ย, ฒั้ว เถา เยีย หล่ง บาบีโลน ฮู่ง เญย ปั์ว เหมียด เหฑ่ง นิ่น บัว.” น้าย เซ เฒี้ยว ก๊อง เญย หว่า.

9เหว่ย น้าย ไม้ ตู๋ง หมวัง เม่ย บัว เญย โต่ว หว่า เมี่ยน, โบ๊ว กว๋า เมี่ยน, เบ๋ยๆ เมี่ยน, หมั่ง แหม่ง เมี่ยน ไฟ โหฒว ฟ้าด เมี่ยน. นิ่น บัว บั๋ว เม่ย บัว, ‘เม่ย บัว ไม้ เฒ์ย อ๋อย หฒุ ฟู-สู บาบีโลน ฮู่ง.’

10นิ่น บัว โต่ว ต้าย บั๋ว เม่ย บัว เญย หว่า เซ จ๊า เญย. สี ก๊อง เม่ย บัว หมวัง นอ, เม่ย บัว ฯฒฯ หฒุ ซุ้ย มี่ง เล่ย กั้น เญย เต่ย-ปูง โก. เยีย หย่า อ๋อย หฒุ่น เม่ย บัว ธ้วด มี่ง, เม่ย บัว ฯฒฯ หฒุ เหมียด.

11มป่า หาย กั๊วะ เมี่ยน บัวะ บาบีโลน ฮู่ง กุ๊น หย่า ฟู-สู นิ่น, เยีย ฯฒฯ ปุน เยียม กั้น เญย เต่ย-ปูง โหฒว ลี่ง เต่ย หย่า เยียม เจี๊ยน หน่าย. เฒี้ยว ฮนั้ง น้าย ก๊อง.”’”

12เยีย ฟี่ ฮนั้ง เญย ก๊อง บั๋ว ยูดา ฮู่ง, เสเดคียา, “เม่ย บัว อ๋อย หฒุ บัวะ บาบีโลน ฮู่ง กุ๊น, หย่า ฟู-สู นิ่น เหธา นิ่น เญย แปะ ฝีง, เม่ย บัว ฯฒฯ ตุ๊ เฒี่ยง เจี๊ยน.

13เม่ย เหธา เม่ย เญย แปะ ฝีง เหว่ย หาย ติ่ว อ๋อย หฒุ หฑุ ด๊าว, หฒุ หง่อ หฮนาง, หฒุ ววน-แป่ง ไต่? เฒี้ยว ก๊อง หาย กั๊วะ เมี่ยน ไม้ ฟู-สู บาบีโลน ฮู่ง อ๋อย หฒุ ปวั้ง น้าย เต๋ย สี่.

14ไม้ ตู๋ง หมวัง วั้ว เต๋ย โต่ว หว่า เมี่ยน ก๊อง บั๋ว เม่ย บัว เญย หว่า. นิ่น บัว ก๊อง, “เม่ย บัว ไม้ หฒุ ฟู-สู บาบีโลน ฮู่ง.” เหว่ย หฒุ นิ่น บัว โต่ว ต้าย บั๋ว เม่ย บัว เญย หว่า เซ ก๊อง-แปะ เญย หว่า ฮนั้ง.

15เฒี้ยว ก๊อง, ‘เยีย ไม้ พ้าย นิ่น บัว, มป่า นิ่น บัว เต๊ง เยีย เญย บั๋ว โต่ว จ๊า เญย หว่า. สี ก๊อง เม่ย บัว เสียน นิ่น บัว, เยีย ฯฒฯ หฒุ่น เม่ย บัว เหธา โต่ว หว่า บั๋ว เม่ย บัว วั้ว เต๋ย โต่ว หว่า เมี่ยน ธ้วด มี่ง. เม่ย บัว ฯฒฯ หฒุ เหมียด เหฑ่ง.’”

16เยีย แอ๋ง ก๊อง บั๋ว ไซ เมี่ยน เหธา น้าย เต๋ย หฒวัง แปะ ฝีง, “ เฒี้ยว ฮนั้ง น้าย ก๊อง, ‘ไม้ ตู๋ง หมวัง เม่ย บัว เญย โต่ว หว่า เมี่ยน โต่ว ต้าย บั๋ว เม่ย บัว เญย หว่า.’ นิ่น บัว โต่ว หว่า ก๊อง, ‘ เฒี้ยว เญย เปย๊า เญย จา-สี่ ไม้ เล่า อ๋อย เยียม บาบีโลน ต้อ หฑวน ต้าย.’ เหว่ย หฒุ นิ่น บัว โต่ว ต้าย บั๋ว เม่ย บัว เญย หว่า เซ ก๊อง-แปะ เญย หว่า.

17ไม้ ตู๋ง หมวัง นิ่น บัว. อ๋อย หฒุ ฟู-สู บาบีโลน ฮู่ง ฯฒฯ ตุ๊ เฒี่ยง เจี๊ยน. น้าย นอม ฒี่ง เหว่ย หาย ติ่ว อ๋อย หฒุ เป๋น ฒี่ง ฮวาง?

18สี ก๊อง นิ่น บัว เซ โต่ว หว่า เมี่ยน, นิ่น บัว หย่า หฒะเก้ง ม่าย เฒี้ยว เญย หว่า, กุ๊น ปุน นิ่น บัว โท้ เน่น เจี๋ย เญย เฒี้ยว ปุน เยียม หฒั่ง เฒี้ยว เญย เปย๊า เญย จา-สี่, เหธา ยูดา ฮู่ง เญย ติ่น เญย จา-สี่, เหธา เยียม เยลูซาเลม เหฒ่ง เหฌี่ย เญย จา-สี่, ไม้ หฒุ ต้อ มี่ง บาบีโลน.

19เหว่ย หฒุ เน่น เจี๋ย เญย เฒี้ยว ฮนั้ง น้าย ก๊อง เถา วั้ว เต๋ย ต้ม เดี้ยว, เหธา ต้ม ปุ้น, เหธา ตน ปุ้น เญย กะน้าย, เหธา เยียม น้าย นอม ฒี่ง เหฒ่ง เหฌี่ย เญย จา-สี่,

20ต้ง บาบีโลน ฮู่ง, เนบูคัดเน้ดซา, ไม้ ธ้าง มี่ง ต๋อย นิ่น เยียม เยลูซาเลม เฒาะ ยูดา เญย ฮู่ง, เยโฮยาคิม เญย ตอน, เยโคนียา, เหธา เยียม ยูดา, เหธา เยลูซาเลม เหยียด ฒู้ง โหฒว โฮล เญย เมี่ยน, กว๊าด มี่ง บาบีโลน.

21เน่น เจี๋ย เญย เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง เถา เยียม หฒั่ง เฒี้ยว เญย เปย๊า, เยียม ยูดา ฮู่ง เญย ติ่น เหธา เยลูซาเลม เหฒ่ง เหฌี่ย เญย จา-สี่.”

22เฒี้ยว ก๊อง, “น้าย เต๋ย จา-สี่ อ๋อย หฒุ เฒาะ มี่ง อัน เจี๊ยน บาบีโลน ฒั้ว เยีย จั๋ง เญย เฒี่ยง โห่ เถา, เยีย ฯฒฯ เฒาะ น้าย เต๋ย จา-สี่ ต้อ หฑวน ต้าย อัน เจี๊ยน น้าย นอม ต๋อง ฮนั้ง โล์ วั้ว นอ.

← Chapter 26 Jump to: Chapter 28 →