Jeremiah 51

Mien Bible (Thai Script) © Thailand Bible Society, 2007

1เฒี้ยว ฮนั้ง น้าย ก๊อง, “เยีย อ๋อย ปุน โหฒว เหมียด เญย หฑยาว ป่วน ต้าย โหฒว ปุน บาบีโลน, เหธา เคนเดีย เมี่ยน.

2เยีย หย่า อ๋อย พ้าย เมี่ยน มี่ง หญม บาบีโลน, นิ่น บัว ฯฒฯ หญม นิ่น อ๊ะ. เถา โค้ว หน่าน เญย ฮนอย นิ่น บัว เยียม ปูงๆ ต้าย โหฒว ปุน นิ่น วั้ว หฒั่น, นิ่น บัว ฯฒฯ ปุน นิ่น เญย เต่ย-ปูง ขูง เหฑ่ง.

3ไม้ ตู๋ง ปุน ป๊วน จวัง-หฒิน เญย เมี่ยน แปง จวัง-หฒิน, หย่า ไม้ ตู๋ง ปุน นิ่น ฒุ เฮลียะ-ลุย โซ้ว เจี๊ยน. ไม้ ตู๋ง เลี่ยว นิ่น เญย เมี่ยน หลุน เมี่ยน เญย แหม่ง. อ๋อย หฒุ เหมียด เหฑ่ง นิ่น เญย เหยียด ฒู้ง จุน-แปง.

4เคนเดีย เมี่ยน เยียม กั้น เญย เต่ย-ปูง หฒุ ไต๋ ไต่, หย่า เยียม วั้ว จาย-ห่อง หฒุ มุน.

5เหว่ย หฒุ อิสะลาเอน เมี่ยน เหธา ยูดา เมี่ยน ไม้ หฒุ เน่น เจี๋ย เญย เฒี้ยว, นิ่น บัว เญย ทิน-ฮู่ง, กวั่ง นิ่น บัว, ไม้ กุ๊น นิ่น บัว เญย เต่ย-ปูง ป์าม ฒุ์ย โหฒว ต่อง อิสะลาเอน เญย ธีง-เหฑ่ง ทิน-ฮู่ง.

6“เยียม บาบีโลน กะญั์ว เปย๋า ม่าะ! เก๊าะ-เมี่ยน เหฌียว เก๊าะ-เมี่ยน เญย แหม่ง. ไม้ ตู๋ง หลาย นิ่น หฒุ ตี่ง ฒุ์ย เหว่ย หฒุ น้าย เซ เฒี้ยว จ๊าว วิน เญย เฒี่ยง โห่ เถา อ๊ะ, หฒิว บาบีโลน โหฒว เญย อ๋อย วิ่น ปุน นิ่น.

7ฒิ่น ด่าง บาบีโลน ฮนั้ง นอม เจียม-ฒ้าน เยียม เฒี้ยว เญย ปั์ว, ปุน ลู่ง เดี๊ย เมี่ยน ฆวิน มี่ง. หม่าน กั๊วะ เมี่ยน ฮบ นิ่น เญย อะหงุ่น ติ๊ว, นิ่น บัว ฯฒฯ ปุ๊ด ดิน หมี่ อ๊ะ.

8บาบีโลน เลี่ยม เฒ่ย บาง เหฌี่ย ฮู้ เหฑ่ง, อ๋อย หฒุ เหว่ย นิ่น เญี้ยม. ต้อ เดีย-ล่าง เฮยี้ยด นิ่น มุน เญย ต๋อง, เหฑีย นิ่น ไฮ่ หฒ่อ หลง ต้าย.

9“‘เยีย บัว อ๋อย หฒ่อ บาบีโลน มป่า หฒ่อ ไม้ หลง. อ๋อย หฒุ กวั่ง นิ่น อ๊ะ, เก๊าะ-เมี่ยน หฑวน เก๊าะ-เมี่ยน เญย กั๊วะ. เหว่ย หฒุ นิ่น หฒุ เซี้ยม ฒุ์ย แบ่ง ลู่ง. ฒู้ง ดุย เจี๊ยน เถา ด๊าม-ลู่ง.’

10เฒี้ยว ปุน ธีง เยีย บัว หอบ. ต้าย ม่าะ! บัว อ๋อย หฒุ มี่ง สิโอน ฒุ่น ก๊อง เฒี้ยว, เยีย บัว เญย ทิน-ฮู่ง, โหฒว เญย กง.

11“อ๋อย หฒุ เหฑียว ไหล่ ฟอง-ธัง, นั้น เจี๊ยน ท้อง-ป้าย. เฒี้ยว ต์ง หฒุ มีเดีย เมี่ยน เญย ฮู่ง, เหว่ย หฒุ ก๊อง เถา บาบีโลน, เฒี้ยว เญย เอ๋ย เซ อ๋อย เหมียด เหฑ่ง. เหว่ย หฒุ น้าย เซ เฒี้ยว จ๊าว วิน, เซ เหว่ย นิ่น เญย เปย๊า จ๊าว วิน.

12อ๋อย หฒุ เหลียบ เก้ เบ๊าะ บาบีโลน เญย ฒี่ง หลาด, ปุน ฒั้ว เญย แปง จา เฮ้น, พ้าย เหฒียง เซี้ยว แกง เญย แปง, หย่า หลิ่ว เล์ย เหฒียง ปี๋ง เจี๊ยน ฒั้ว เญย เมี่ยน, เหว่ย หฒุ เฒี้ยว ต๊า หฒะเอ๋ย หย่า โหฒว เหฒียง หฒิว นิ่น เฒี้ยง เจี๊ยน ก๊อง บาบีโลน เมี่ยน เญย หว่า.

13เม่ย เยียม ววม ธั้ม เญย กะเฮลน, ม่าย ฒิ่น ฒ่อย ธั้ม เญย เมี่ยน อ้า! เม่ย เญย เซ้ด เมว์ย เถา อ๊ะ, เม่ย เฒี่ยง วั้ว ติ้ว แหม่ง เถา โป่ว อ๊ะ.

14เน่น เจี๋ย เญย เฒี้ยว เฒี้ยง เจี๊ยน นิ่น กั้น โฮ้ว หว่า ก๊อง, เยีย ด่ง หาย ฒู้ง อ๋อย ปุน เม่ย ม่าย เมี่ยน ปวั๊ง ด่ง จ๊บ-เหญ่ย ธั้ม, นิ่น บัว ฯฒฯ เหน่า เจี๊ยน เหว่ย เบ๊าะ ฮี่ง เม่ย.

15“ทิน-ฮู่ง หล่ง นิ่น เญย ชะ เหฒย เดา, หล่ง นิ่น เญย ธง-เม่ง เหลียบ ป้าม เกน, หล่ง นิ่น เม่ง แปะ เญย เจ๊า ธอง ลู่ง.

16นิ่น เยี้ยด ธ้วด เฉีย, เยียม วั้ว ลู่ง ม่าย ววม เญย เฉีย บุย โฒ์ๆ เญย. นิ่น ปุน โหม่ว เยียม ลู่ง กอน ฝาว. นิ่น ปุน บะหลี่ง กัน บยู่ง, หย่า ปุน หฑยาว เยียม นิ่น เซียว เญย ต๋อง ธ้วด ต้าย.

17“เต้าๆ ป้าม เมี่ยน เซ หฮงง เญย, ไม้ ม่าย ว่วน ฒาง. โม์ว เต้า เจียม-หฒั่ง หลาย นิ่น บัว โหฒว เญย หมิ่ว-ฝัง หฒุ ไญ้, เหว่ย หฒุ นิ่น เญย หมิ่ว-ฝัง เซ จ๊า เญย, ไม้ ม่าย เหยียด เต๋ย เฉีย เท้า.

18หมิ่ว-ฝัง ไม้ ม่าย จ๋า-ฒิ่น, โหฒว ต้าย เป๋น จ๊า เญย กะน้าย ฮนั้ง. เถา นิ่น บัว หฒุ ตี่ง ฒุ์ย เญย เฒี่ยง โห่, นิ่น บัว ฯฒฯ หฒุ เหมียด.

19ยาโค้บ เญย ป่วน ไม้ ฮนั้ง น้าย เต๋ย, เหว่ย หฒุ นิ่น เซ เหฒย หม่าน หมวด วั้ว เต้า, อิสะลาเอน เซ นิ่น หฑิบ ต้าย เญย ฝีง, นิ่น เญย บั๋ว เห่ว เน่น เจี๋ย เญย เฒี้ยว.

20“เม่ย เซ เยีย หล่ง เบ๊าะ จ๋า เญย เฮลียะ-เฒว่ย เหธา หวัวะ กิ่น. เยีย หล่ง เม่ย เบ๊าะ หม่วน เหฒีย ฝีง. เยีย หล่ง เม่ย เหมียด ธั้ม-นอม กั๊วะ.

21เยีย หล่ง เม่ย เบ๊าะ หม่วน ม์า เหธา เก้ ม์า เมี่ยน. เยีย หล่ง เม่ย เบ๊าะ หม่วน เบ๊าะ จ๋า ม์า-เธีย เหธา ฒ้าง เธีย เญย เมี่ยน.

22เยีย หล่ง เม่ย เบ๊าะ หม่วน มจั่ง มเซียะ. เยีย หล่ง เม่ย เบ๊าะ หม่วน เมี่ยน โก๋ เมี่ยน เหธา เมี่ยน หลุน เมี่ยน. เยีย หล่ง เม่ย เบ๊าะ หม่วน โฮ่ว แซง เหธา เซียะ-ตอน.

23เยีย หล่ง เม่ย เบ๊าะ หม่วน โก๋ว ปะกี ยู่ง เญย เมี่ยน เหธา นิ่น เญย ปะกี ยู่ง กวั้น. เยีย หล่ง เม่ย เบ๊าะ หม่วน โหฒว เด่ย เญย เมี่ยน เหธา นิ่น เญย เหยียด ต๋อย ง่ง. เยีย หล่ง เม่ย เบ๊าะ หม่วน แซ้ง-เฒี้ยว เหธา โหฒว โฮล เญย เจียน.”

24เฒี้ยว ก๊อง, “เยีย อ๋อย ตอง เจี๊ยน เม่ย บัว เญย มฒีง จ๊าว วิน ปุน บาบีโลน เหธา เยียม เคนเดีย เต่ย-ปูง เญย เหยียด ฒู้ง แปะ ฝีง เหว่ย นิ่น บัว เยียม สิโอน โหฒว เญย เหยียด ฒู้ง เอ๊าะ สี่.”

25เฒี้ยว ก๊อง, “โหฒว เหมียด เญย บง อ้า! เซ เหมียด ลู่ง เดี๊ย วั้ว นอม บง, เยีย เหธา เม่ย ต๋อย-เตก อ๊ะ. เยีย อ๋อย ซูง เยีย เญย ปั์ว ธ้วด โหฒว ปุน เม่ย, ปุน เม่ย เยียม แบ๋ง-นี้ง หฌัง เหฌี่ย มี่ง, ปุน เม่ย เป๋น ปั๊ว ชุย เญย บง.”

26“เมี่ยน ไม้ เยียม เม่ย น้าย เฒาะ หละเปย๊ย ไฟ โหฒว เปย๊า-เก๊าะ เญย หละเปย๊ย, หย่า ไม้ หล่ง หาย นอม โหฒว กอน-โด๊ะ เญย หละเปย๊ย. เม่ย ฒู้ง อ๋อย หฒุ เป๋น เหยียด ลิ์ว ป่าย ฮวาง เญย ต๋อง.” เฒี้ยว ฮนั้ง น้าย ก๊อง.

27“เยียม เดา-เป้ย เหลียบ เก้, เยียม หม่าน ฝีง บุด๋ง ปย๊ม จอง, เห่ว หม่าน กั๊วะ เมี่ยน หลิ่ว เล์ย ต้าย เบ๊าะ บาบีโลน, เห่ว น้าย เต๋ย กั๊วะ ต้าย เบ๊าะ นิ่น. เซ อาลาลัด, มินนี เหธา อัดเคนัด. พ้าย จุน-แปง-เปย๊ย ต้าย เบ๊าะ นิ่น, พ้าย ม์า ฝาว ต้าย ฮนั้ง จ๊บ-เหญ่ย กวั้น.

28หลิ่ว เล์ย หม่าน กั๊วะ เมี่ยน ต้าย เบ๊าะ บาบีโลน, เห่ว มีเดีย เมี่ยน เญย ฮู่ง เหธา นิ่น บัว เญย แซ้ง-เฒี้ยว เหธา แซ้ง-เฒี้ยว เญย ปอง-ปั์ว เมี่ยน, เหธา มีเดีย กุ๊น เญย นอมๆ เต่ย-ปูง.

29เดา ต์ง, หลาย มุน หย่า เนี้ยวๆ เญย, เหว่ย หฒุ เฒี้ยว ตี่ง โหฒว ปุน บาบีโลน เญย หฒะเอ๋ย หธ่อ เยียม เญย, เซ อ๋อย ปุน บาบีโลน เป๋น เดา-ฮวาง, ไม้ ม่าย เมี่ยน เยียม.

30บาบีโลน เบ๊าะ จ๋า เฮ้น เญย แปง ตี้ง เหฌี่ย ไม้ เบ๊าะ, นิ่น บัว เยียม เจี๊ยน นิ่น บัว ว้วน เญย ต๋อง. นิ่น บัว เญย ชะ ถุย หมี่ อ๊ะ, นิ่น บัว ฯฒฯ ฮนั้ง มเซียะ ตอน นอ. บาบีโลน เยียม เญย ต๋อง ม่าย โต์ว เหฒียะ เจี๊ยน, นิ่น เญย แก้ง ซอน หย่า เน้า หมี่ อ๊ะ.

31โต่ว เฝียน เมี่ยน เหยียด เต้า ถิว มี่ง หฑิบ เหยียด เต้า, ฝูง เฝียน เญย เมี่ยน หฑิบ เจี๊ยน ฝูง เหฌี่ย เหยียด เต้า, มี่ง บั๋ว บาบีโลน ฮู่ง, นิ่น เญย เปยย ปูง ฒี่ง หฒุ ธ้าง หมี่ อ๊ะ.

32เจี๋ย เญย เจ๊า-โป่ว หฒุ ธ้าง หมี่ อ๊ะ. เว่ย ว้วน เญย ต๋อง หฒุ โต์ว ปั๊ว. จุน-แปง หย่า หลุ่น เหฑ่ง.

33เหว่ย หฒุ เน่น เจี๋ย เญย เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง, “บาบีโลน เมี่ยน เซ ฮนั้ง เบ๊าะ เบย้า เธี้ยง ต๋อย หฒุ ธ้าย เญย เฒี่ยง โห่. อ๊า ตั้ง ฮนั้ง, เซียว นิ่น เญย เบย้า เญย เฒี่ยง โห่ เถา อ๊ะ.”

34“บาบีโลน เญย ฮู่ง, เนบูคัดเน้ดซา, นะ เยีย, หย่า งัด เจี๊ยน เยีย. นิ่น ปุน เยีย โหฒว ขูง เญย จา-ต๋อง, นิ่น นะ เยีย ฮนั้ง ต้ม เบย์า. เยีย ม่าย หาย หญู่ง คู้ เญย นิ่น หญั่น ปวั๊ง กะเซีย, หย่า ทุ้ย เยีย ธ้วด มี่ง.”

35ปุน สิโอน เญย แปะ ฝีง ก๊อง, “นิ่น โหฒว โตะ เยีย แอ๋ง ห่อย เยีย เญย เธียน-เธะ, โท้ ปุน ด๊อด หฒุ บาบีโลน.” ปุน เยลูซาเลม ก๊อง, “โท้ ปุน เหลี่ยว เยีย เญย ฑย้าม ธ้วด เญย ฒุ์ย ด๊อด หฒุ เคนเดีย เมี่ยน.”

36เหว่ย น้าย เฒี้ยว ฮนั้ง น้าย ก๊อง, “เยีย อ๋อย เถง เม่ย บัว แหธง สี่, แอ๋ง เถง เม่ย บัว จ๊าว วิน. เยีย อ๋อย ปุน บาบีโลน เญย ค้อย ฆาย, หย่า ปุน นิ่น เญย ววม-ฒี้ง ฆาย.

37บาบีโลน ฯฒฯ เป๋น บาง หว่าย เญย กะน้าย-ดุย, เป๋น เฮยี่ย จู๊ เยียม เญย ต๋อง, ปุน เมี่ยน กั้ม เหฑีย, ปุน เมี่ยน ฮว้วด, หย่า ไม้ ม่าย เมี่ยน เยียม.

38นิ่น บัว อ๋อย ล่ม ฑ่อย ฌุ่น ฮนั้ง เซี่ยน นอ, นิ่น บัว หย่า อ๋อย ฮนั้ง เซี่ยน ตอน นอ เห่ว.

39นิ่น บัว จอม เจี๊ยน โหฒว เญย เฒี่ยง โห่, เยีย อ๋อย เหว่ย นิ่น บัว เบ่น หฮนาง โฮล เญย, ปุน นิ่น บัว ติ๊ว ฆวิน เถา นิ่น บัว เม่ย มวั้ง, หย่า เหยียด ลิ์ว มฌ่อม, ไม้ เญีย.” เฒี้ยว ฮนั้ง น้าย ก๊อง.

40“เยีย อ๋อย ต้อ นิ่น บัว เหฌี่ย ต้าย ฮนั้ง ต้อ มี่ง ไต๋ เญย ปะกี ยู่ง ตอน, ฮนั้ง ปะกี ยู่ง โก๊ว เหธา ยู่ง โก๊ว.

41“บาบีโลน หฒุ ธ้าง หมี่ อ๊ะ. ลู่ง เดี๊ย เมี่ยน เธง เญย ต๋อง หฒุ ธ้าง หมี่ อ๊ะ. บาบีโลน เยียม หม่าน กั๊วะ บุด๋ง เป๋น เมี่ยน กั้ม เหฑีย เญย ต๋อง.

42ค้อย เญย ววม ฝาว เหยียม บาบีโลน, นิ่น หฒุ ค้อย เป๊ะ เญย ววม-หล่าง ฆ์ม เจี๊ยน นิ่น.

43นิ่น เญย ฒี่ง เป๋น กั้ม เหฑีย เญย ต๋อง, เป๋น เต่ย-ปูง-ฮ์าน, เต่ย-ปูง-ฮวาง, ไม้ ม่าย เมี่ยน เยียม เญย เต่ย-ปูง, หย่า ไม้ ม่าย ป้าม เมี่ยน เจี๋ย มี่ง.

44เยีย อ๋อย ตี่ง เยียม บาบีโลน เญย เบน เฒี่ยน เญย ฒุ์ย, นิ่น นะ เหฌี่ย เญย กะน้าย เยีย อ๋อย ปุน นิ่น โล้ ธ้วด. หม่าน กั๊วะ เมี่ยน ไม้ ตุ๊ แอ๋ง มี่ง ล์อ นิ่น, บาบีโลน เญย ฒี่ง หลาด บาง หมี่ อ๊ะ.

45“เยีย เญย แปะ ฝีง อ้า! เม่ย บัว อ๋อย หฒุ เยียม นิ่น เปย๋า ธ้วด. เก๊าะ-เมี่ยน อ๋อย หฒุ เหฌียว เก๊าะ-เมี่ยน เญย แหม่ง, เปย๋า ดุ๊ด เฒี้ยว เธี้ยว ไห่ เญย กะเฉีย.

46ไม้ ตู๋ง ปุน เม่ย เญย เฮญี้ยว เมา, ไม้ ตู๋ง กั้ม เหฑีย, เหว่ย เม่ย ไฮ์ เต่ย-ปูง กะญั์ว เญย เฝียน. ต้ง น้าย หฮญัง ม่าย เฝียน ต้าย, ตะเหญ่ย หฮญัง แอ๋ง ม่าย เฝียน ต้าย. เต่ย-ปูง กะญั์ว หย่า ม่าย โตะ เญย สี่, โหฒว โฮล กุ๊น เญย เมี่ยน ล่าน เหธา ล่าน ต๋อย-เตก.

47เหว่ย น้าย หมั่ง ม่าะ! ฮนอย-เหญียะ อ๋อย เถา, เยีย อ๋อย ตี่ง บาบีโลน หมิ่ว-ฝัง เญย ฒุ์ย. นิ่น เญย เฒี่ยง นอม เต่ย-ปูง ฯฒฯ ไญ้, นิ่น เญย เหยียด ฒู้ง หฒุ ไต๋ ไต่ เญย เมี่ยน ฯฒฯ เยียม นิ่น กะญั์ว คีง เหฌี่ย.

48วั้ว หฒั่น ลู่ง เหธา เดา เหธา เยียม ลู่ง เดา กะญั์ว เญย เหยียด ฒู้ง กะน้าย ฯฒฯ เหว่ย บาบีโลน เฌียน-โย่ว เญย เห่ว เหว่ย หฒุ โหฒว เหมียด เญย เมี่ยน อ๋อย เยียม ป๊ะ ปูง ต้าย เบ๊าะ นิ่น บัว. เฒี้ยว ฮนั้ง น้าย ก๊อง.

49บาบีโลน อ๋อย หฒุ บาง หลาย ปุน อิสะลาเอน เมี่ยน ไต่, ฮนั้ง ลู่ง เดี๊ย เมี่ยน หฒุ บาบีโลน ไต๋ ไต่.

50เม่ย บัว เปย๋า ดุ๊ด หฑุ ด๊าว เญย เมี่ยน อ้า! อ๋อย หฒุ ก๊าน มี่ง, ไม้ ตู๋ง ไง่. เยียม โก เญย ต๋อง จั๋ง เฒี้ยว, หย่า ปุน เม่ย บัว เญย เฮญี้ยว จั๋ง เยลูซาเลม.

51“เยีย บัว หมวัง ไฮ์ ฮว้วด เญย หว่า เยีย บัว ฯฒฯ หฒุ ไญ้, หย่า ปุน เยีย บัว หฒะเก้ง หฒุ ป่าย เฮมียน, เหว่ย หฒุ กั้น ฝีง เมี่ยน ต้าย เปียะ หฒั่ง เฒี้ยว เญย เปย๊า, ธีง-เหฑ่ง เญย ต๋อง.”

52เฒี้ยว ก๊อง, “เหว่ย น้าย หมั่ง ม่าะ! ฮนอย-เหญียะ อ๋อย เถา, เยีย อ๋อย ตี่ง บาบีโลน เญย หมิ่ว-ฝัง เญย ฒุ์ย. เยียม ก๋อม นิ่น เญย เต่ย-ปูง หฒุ มุน เญย เมี่ยน อ๋อย ฌุ่น เจี๊ยน เยียม.

53ไม้ กุ๊น บาบีโลน ฝาว เถา ลู่ง, หย่า ไม้ กุ๊น นิ่น เหธย นิ่น ฮลัง เจี๋ย เญย ต๋อง ว้วน, เยีย อ๋อย ปุน โหฒว เหมียด เญย เมี่ยน ต้าย เหมียด นิ่น.” เฒี้ยว ฮนั้ง น้าย ก๊อง.

54“หมวัง ม่าะ! ม่าย เฉีย เยียม บาบีโลน เห่ว. เยียม เคนเดีย เมี่ยน เญย เต่ย-ปูง ม่าย หฒุ เหมียด เญย ต้ม เฉีย บุย.

55เหว่ย หฒุ เฒี้ยว โหฒว ปุน บาบีโลน เป๋น เดา-ฮวาง, ปุน นิ่น บุย เญย ต้ม เฉีย เซ้ก. นิ่น บัว เญย วิน-วั้ง ฮนั้ง ววม ธั้ม เญย ววม-หล่าง บุย, นิ่น บัว เญย เฉีย เบี้ยวๆ เญย ธ้วด.

56โหฒว เหมียด วั้ว เต้า ต้าย เบ๊าะ, เซ ต้าย เบ๊าะ บาบีโลน. นิ่น เบ๊าะ จ๋า เฮ้น เญย แปง หฒุ ธ้าง มี่ง, นิ่น บัว เญย จวัง-หฒิน เน้า หม่วน. เหว่ย หฒุ เฒี้ยว เซ จ๊าว วิน เญย ทิน-ฮู่ง, นิ่น ด่ง หาย ฒู้ง อ๋อย จ๊าว วิน.

57เยีย อ๋อย ปุน นิ่น เญย เจียน เหธา นิ่น เญย ธง-เม่ง เมี่ยน, นิ่น เญย แซ้ง-เฒี้ยว เหธา แซ้ง-เฒี้ยว เญย ปอง-ปั์ว เมี่ยน, เหธา นิ่น เฮ้น ไห่ เญย แปง ติ๊ว ฆวิน. นิ่น บัว ฯฒฯ มฌ่อม มี่ง, เหยียด ลิ์ว มฌ่อม ไม้ เญีย.” ฮู่ง เตี๋ย, ต้ง ม่าย บั๋ว เห่ว เน่น เจี๋ย เญย เฒี้ยว, ฮนั้ง น้าย ก๊อง.

58เน่น เจี๋ย เญย เฒี้ยว ฮนั้ง น้าย ก๊อง, “บาบีโลน จั๊ง เญย ฒี่ง หลาด ฒู้ง อ๋อย หฒุ บาง เหฌี่ย เดา. นิ่น ฮลัง เญย ฒี่ง แก้ง หย่า อ๋อย หฒุ โต์ว ปั๊ว. หฒวัง แปะ ฝีง โหฒว กง หย่า ไม้ ลั่ม หล่ง. หม่าน กั๊วะ เมี่ยน ล่าว หลุ่ย โหฒว เญย ขูง หฒุ โต์ว ปั๊ว.”

59เสเดคียา โหฒว ยูดา เญย ฮู่ง ตะเฝย หฮญัง วั้ว หฮญัง, มี่ง บาบีโลน เญย เฒี่ยง โห่, มาเสยา เญย ฟุน, เนลิยา เญย ตอน, เสไลอา, เหธา นิ่น มี่ง. เสไลอา โหฒว เปย๊ย เฒ้ย เบ่น นิ่น บัว ฮิด เญย ต๋อง. น้าย เซ โต่ว หว่า เมี่ยน, เยเลมี, พ้าย เสไลอา ต้อ มี่ง เญย หว่า.

60เยเลมี เฒาะ บาบีโลน อ๋อย หฒุ ปวั้ง เญย เหยียด ฒู้ง เธี้ยว เญย เหฒะ หน่าน เฟี้ย เหฌี่ย โซว. น้าย เต๋ย เหยียด ฒู้ง หว่า ก๊อง เถา บาบีโลน.

61เยเลมี ก๊อง บั๋ว เสไลอา, “เม่ย มี่ง เถา บาบีโลน เม่ย ฒู้ง อ๋อย หฒุ โตะ น้าย เต๋ย เหยียด ฒู้ง หว่า,

62หย่า ก๊อง, ‘ เฒี้ยว อ่า, เม่ย ก๊อง เถา น้าย นอม ต๋อง, เซ เม่ย อ๋อย ไพ กวั่ง ฯฒฯ เลี่ยม เมี่ยน, เลี่ยม แซง-คู้, ไม้ ม่าย หาย หญู่ง เยียม, อ๋อย หฒุ เหยียด ลิ์ว เป๋น เดา-ฮวาง.

63เม่ย โตะ ลิ์ว น้าย หฌุ่น โซว อ๋อย หฒุ เฒาะ โซว ปั่ง นอม หละเปย๊ย โด้ เจี๊ยน ฒอย ยูเฟติด ด้าย กะญั์ว.

64อ๋อย หฒุ ก๊อง, “บาบีโลน อ๋อย หฒุ ฮนั้ง น้าย นอ เฒ่ม เหฌี่ย, เหยียด ลิ์ว ไม้ ไฮ่ เบี้ยว ฝาว, หลาย เยีย ปุน นิ่น หฒุ เธี้ยว เญย เหฒะ หน่าน.’” เยเลมี ก๊อง เญย หว่า เหฒ่ง เหฌี่ย บัวะ น้าย.

← Chapter 50 Jump to: Chapter 52 →