Jeremiah 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1น้าย เซ เยเลมี ตุ๊ ฒิบ เฒี้ยว เญย หว่า ก๊อง,

2“เม่ย อ๋อย หฒุ โซ้ว เจี๊ยน หฒั่ง เฒี้ยว เญย เปย๊า เญย แก้ง ด่าง ฒุ่น ก๊อง น้าย เต๋ย หว่า, ‘ตะฟ่าน เม่ย บัว เปียะ น้าย เต๋ย แก้ง หฒั่ง เฒี้ยว เญย ยูดา เมี่ยน อ้า! อ๋อย หฒุ หมวัง เฒี้ยว เญย หว่า.’

3เน่น เจี๋ย เญย เฒี้ยว, เซ อิสะลาเอน เญย ทิน-ฮู่ง, ฮนั้ง น้าย ก๊อง, ‘อ๋อย หฒุ หฒ่อ เม่ย บัว เญย เจ๊า-โหล่ว เหธา โหฒว เญย สี่, เยีย ฯฒฯ ปุน เม่ย บัว เยียม เจี๊ยน น้าย นอม ต๋อง.

4ไม้ ตู๋ง เขา น้าย เต๋ย ดั๊ว เญย หว่า, “น้าย เซ หฒั่ง เฒี้ยว เญย เปย๊า, หฒั่ง เฒี้ยว เญย เปย๊า, หฒั่ง เฒี้ยว เญย เปย๊า.”

5สี ก๊อง เม่ย บัว หฒะเก้ง หฒ่อ เม่ย บัว เญย เจ๊า-โหล่ว เหธา โหฒว เญย สี่, สี ก๊อง เม่ย บัว ล่าน เหธา ล่าน หฒะเก้ง โหฒว แป้ง ฟิม เญย,

6สี ก๊อง เม่ย บัว ไม้ เหฒย กั้น ฝีง เมี่ยน ไฟ กู้ ฮั่น ฝุเจว๊ย ไฟ เอ๊า-กว๊า, เยียม น้าย นอม ต๋อง ไม้ ไต๋ ไม้ โหฒว ต่อง เญย เมี่ยน หย่า ไม้ กัน เหญี่ย เญย เฒี่ยน ห่อย หฒุ กั้น,

7เยีย ฯฒฯ ปุน เม่ย บัว ตุ๊ เยียม น้าย นอม ต๋อง, เซ เยียม โล์-ฮนอย เยีย เหธย ปุน เม่ย บัว เญย อง-ถาย เหยียด ลิ์ว เยียม เญย ต๋อง.

8หมั่ง ม่าะ! เม่ย บัว เขา ดั๊ว เมี่ยน เญย หว่า หย่า ไม้ ลั่ม หล่ง.

9“‘เม่ย บัว โหฒว หฒะ, ไต๋ เมี่ยน, เหฮยียน เอ๊า เหฮยียน โหฆ, แล์ง หว่า จ๊า เญย, ปั๊ว ฮูง ปุน บาอัน เฒี่ยน หย่า กัน เจี๊ยน เม่ย บัว ไม้ ฮิ้ว เญย เฒี่ยน,

10ฆะฮ้า ต้าย ต้ง กัน เยีย เญย บั๋ว เห่ว น้าย นอม เปย๊า, โซ้ว เจี๊ยน เยีย เญย หฑะเฮมียน ก๊อง, “เยีย บัว ตุ๊ เหฌียว ธ้วด หมี่ อ๊ะ.” มป่า เม่ย บัว หธ่อ โหฒว เจี๊ยน น้าย เต๋ย เหยียด ฒู้ง กั้ม เฑี้ย เญย สี่.

11ต้ง กัน เยีย เญย บั๋ว เห่ว น้าย นอม เปย๊า, หฒิว เม่ย บัว เญย มฒีง หมั่ง, ไม้ เฒ์ย เป๋น จั๋น-หฒะ ปี๋ง เญย ค้วด ไฟ? เฒี้ยว ก๊อง, “เยีย กั้น ฒู้ง ปวัด หมี่ อ๊ะ.”

12“‘เม่ย บัว มี่ง เยีย เญย ต๋อง, เซ ซีโล วั้ว, ต้ง ต้าว ตั้ง เยีย เหว่ย เยีย เญย เม่ง เหลียบ เญย ต๋อง. หมั่ง ก๋า หลาย เยีย เญย แปะ ฝีง, อิสะลาเอน เมี่ยน, โหฒว เญย เอ๊าะ สี่ เยีย ฮนั้ง หาย นอ โหฒว ปุน วั้ว นอม ต๋อง.’

13เฒี้ยว ก๊อง, ‘อี้ หฒั่น หลาย เม่ย บัว โหฒว น้าย เต๋ย เหยียด ฒู้ง สี่, เยีย หฒั่นๆ เหธา เม่ย บัว ก๊อง, เม่ย บัว หย่า ไม้ หมวัง. เยีย เห่ว เม่ย บัว, เม่ย บัว หย่า ไม้ เตา.

14เหว่ย น้าย เยีย อ๋อย โหฒว ปุน ต้ง กัน เยีย เญย บั๋ว เห่ว วั้ว นอม เปย๊า, เซ เม่ย บัว เขา เญย ต๋อง, ต้ง เยีย ปุน เม่ย บัว เหธา เม่ย บัว เญย อง-ถาย ฮนั้ง เยียม ซีโล โหฒว นอ.

15เยีย อ๋อย เฒาะ เม่ย บัว เยียม เยีย เญย หฑะเฮมียน หฒุ่น ธ้วด, ฮนั้ง เยีย หฒุ่น ธ้วด เม่ย บัว เญย หฒวัง ก๋อ-โย์ว, เซ เอฟาอิม เญย เหยียด ฒู้ง เฒ้ย-ฟุน.’

16“เม่ย แอ๊ะ, ไม้ ตู๋ง เหว่ย น้าย เต๋ย แปะ ฝีง เต๋า เก๋า. ไม้ ตู๋ง เหว่ย นิ่น บัว เห่ว เจี๊ยน เต๋า เก๋า หย่า ไม้ ตู๋ง เหว่ย นิ่น บัว โท้ เยีย, เหว่ย หฒุ เยีย ไม้ หมวัง เม่ย.

17เม่ย ไม้ ปวัด นิ่น บัว เยียม ยูดา เญย ฒี่ง เหธา เยลูซาเลม เญย จาย-ห่อง โหฒว เญย สี่ ไฟ?

18ฝุเจว๊ย เฑ์า ฒ่าง, เตีย ปั๊ว โต์ว, มเซียะ ตอน ไหธ บ๊วน โหฒว ฌั้ว ฝ่ง ห่อ ปุน ลู่ง เญย ฮู่ง หม่า. นิ่น บัว หย่า โต๋ ธ้วด เธี้ย เหฒี่ย เญย กะน้าย ฝ่ง ห่อ ปุน เหญี่ย เญย เฒี่ยน เหว่ย ธัวะ เยีย เฉีย เจี์ย.

19เฒี้ยว ก๊อง, ‘นิ่น บัว ธัวะ เฉีย เจี์ย เซ เยีย ไฟ? เซ ธัวะ นิ่น บัว กั้น ปุน นิ่น บัว กั้น หลุ่น ไม้ เฒ์ย?’

20“เหว่ย น้าย เฒี้ยว ทิน-ฮู่ง ฮนั้ง น้าย ก๊อง, ‘หมั่ง ม่าะ! เยีย ฯฒฯ โน์ว ไห่, กะเฉีย แป๊ด ธ้วด เหฌี่ย น้าย นอม ต๋อง เญย เมี่ยน, เลี่ยม เมี่ยน เลี่ยม แซง-คู้ เหธา หล่ม-ฮวาง เญย เดี๋ยง เหธา เดา ธ้วด เญย แกง-หฒวัง. โต์ว อ๋อย ปั๊ว ชุย หย่า เบ๊าะ ไม้ ไต่.’

21“เน่น เจี๋ย เญย เฒี้ยว, อิสะลาเอน เญย ทิน-ฮู่ง ฮนั้ง น้าย ก๊อง, ‘เฒาะ เม่ย บัว ฝ่ง ห่อ ปั๊ว เหฒี่ย เญย กะน้าย จา เจี๊ยน เม่ย บัว เหว่ย กั้น หญู่ง เจ๊า ฝ่ง ห่อ เหฒี่ย เญย กะน้าย หย่า หญั่น วั้ว เต๋ย อ๊อ.

22เหว่ย หฒุ เยีย ต้อ เม่ย บัว เญย อง-ถาย ธ้วด อียิบ เต่ย-ปูง วั้ว ฮนอย, เยีย ไม้ ตุ๊ เหธา นิ่น บัว ก๊อง ไฟ หัด นิ่น บัว เถา ปั๊ว เหฒี่ย ไฟ เหว่ย กั้น หญู่ง เหฒี่ย เญย กะน้าย.

23มป่า เยีย ฮนั้ง น้าย หัด นิ่น บัว, ‘อ๋อย หฒุ หมวัง เยีย เญย หว่า, เยีย ฯฒฯ โหฒว เม่ย บัว เญย ทิน-ฮู่ง, เม่ย บัว ตุ๊ โหฒว เยีย เญย แปะ ฝีง หย่า กัน เยีย หัด เม่ย บัว เญย เหยียด ฒู้ง เจ๊า เหว่ย ปุน เม่ย บัว ตุ๊ หลง.’

24มป่า นิ่น บัว ไม้ เอย เจี๊ยน โหฒว หย่า ไม้ แปง มน่อม หมวัง. นิ่น บัว เอย เจี๊ยน นิ่น บัว กั้น เญย หฒะเอ๋ย เหธา นิ่น บัว เฮญี้ยว แหง่ง เฮญี้ยว เอ๊าะ เญย โหฒว หย่า ฮล้วด ฆาง, ไม้ มี่ง วั้ว ด่าง.

25เยียม เม่ย บัว เญย อง-ถาย ธ้วด อียิบ วั้ว ฮนอย เถา อี้ ฮนอย, เยีย ไม้ ตี้ง เลี่ยว เญย พ้าย เยีย เญย โปว, หฒวัง โต่ว หว่า เมี่ยน, มี่ง นิ่น บัว วั้ว เหยียด ฮนอย เจี๋ย เหยียด ฮนอย.

26มป่า นิ่น บัว ไม้ หมวัง เยีย, ไม้ แปง มน่อม หมวัง. นิ่น บัว แหง่ง เจี๊ยน เฮญี้ยว. นิ่น บัว ฒู้ง โหฒว เก้า หว่าย นิ่น บัว เญย อง-ถาย.’

27“เม่ย อ๋อย หฒุ ก๊อง น้าย เต๋ย เหยียด ฒู้ง หว่า บั๋ว นิ่น บัว, มป่า นิ่น บัว ไม้ หมวัง. เม่ย ชะ เห่ว นิ่น บัว มป่า นิ่น บัว ไม้ เตา เม่ย.

28เม่ย ฯฒฯ อ๋อย หฒุ ก๊อง บั๋ว นิ่น บัว, ‘น้าย กั๊วะ เมี่ยน ไม้ หมวัง เฒี้ยว, นิ่น บัว เญย ทิน-ฮู่ง เญย หว่า, หย่า ไม้ เอย เจี๊ยน หฌาว เญย เจ๊า. เฒียน เล์ย หฒุ เหมียด หมี่ อ๊ะ. เยียม เม่ย บัว เญย ฑุ่ย เฒียน เล์ย หฒุด หมี่ อ๊ะ.

29อ๋อย หฒุ จั๊บ เม่ย บัว เญย บะเปยย ฒอย กวั่ง มี่ง. เยียม ฮลัง, ฌัง เญย ต๋อง อ๋อย หฒุ เฑ่า เญี้ยม, เหว่ย หฒุ เฒี้ยว เฆ่ม หย่า กวั่ง นิ่น โน์ว เญย น้าย ต่อย เมี่ยน.’

30“ เฒี้ยว ก๊อง, ‘หฒิว เยีย เญย มฒีง หมั่ง, ยูดา เมี่ยน โหฒว เอ๊าะ สี่. นิ่น บัว เฒาะ นิ่น บัว โหฒว กั้ม เฑี้ย เญย กะน้าย อัน ต้ง กัน เยีย เญย บั๋ว เห่ว วั้ว นอม เปย๊า, ปุน เปย๊า ม่าย หวุย.

31นิ่น บัว เหธย โทเฟ้ด ฮลัง เญย ต๋อง เยียม เบนฮินโนม ฮ์อง, เหว่ย หล่ง โต์ว ปั๊ว นิ่น บัว เญย น่าม โญ์ว. เยีย หย่า ไม้ หัด นิ่น บัว โหฒว. เยีย เญย เฮญี้ยว ฒู้ง ไม้ ฮนั้ม เถา ฮนั้ง หน่าย โหฒว.’

32เฒี้ยว ก๊อง, ‘เหว่ย น้าย หมั่ง ม่าะ! ฮนอย-เหญียะ อ๋อย เถา, น้าย นอม ต๋อง ไม้ เห่ว โทเฟ้ด ไฟ เบนฮินโนม ฮ์อง, มป่า เป๋น ไต๋ ไต่ เญย ฮ์อง, เหว่ย หฒุ นิ่น บัว อ๋อย เยียม โทเฟ้ด ปย๊บ เซย หลาย กั้น นอม ต๋อง ไม้ ม่าย ต๋อง ขูง.

33น้าย เต๋ย แปะ ฝีง เญย เซย ฯฒฯ เป๋น ด๊าม-ลู่ง เญย เหนาะ เหธา หล่ม-ฮวาง เญย เฮยี่ย ฒ่อย เญย หญั่น ฮบ. หย่า ไม้ ม่าย เมี่ยน แฮะ เปย๋า.

34เถา วั้ว หฒั่น เยีย อ๋อย ปุน ยูดา เญย ฒี่ง เหธา เยลูซาเลม เญย จาย-ห่อง เฌียน-โย่ว เหน่า หญิด เญย เฉีย เหธา เซียง-ล่าง เซียง-บวั์ง เญย เฉีย เซ้ก, เหว่ย หฒุ เต่ย-ปูง อ๋อย หฒุ เป๋น ป่าย ฮวาง เญย ต๋อง.

← Chapter 6 Jump to: Chapter 8 →