Jeremiah 32

Mien Bible (Thai Script) © Thailand Bible Society, 2007

1เสเดคียา โหฒว ยูดา เญย ฮู่ง ตะเหฒียบ หฮญัง วั้ว หฮญัง, เซ เนบูคัดเน้ดซา โหฒว ฮู่ง เหฒียบ เป๊ด วั้ว หฮญัง, เยเลมี ตุ๊ ฒิบ เฒี้ยว เญย หว่า.

2วั้ว หฒั่น บาบีโลน ฮู่ง เญย จุน-แปง เว่ย เจี๊ยน เยลูซาเลม. โต่ว หว่า เมี่ยน, เยเลมี, หย่า หฒุ หววน เจี๊ยน เยียม เซี้ยว แกง เญย แปง เญย หลาด กะญั์ว, เซ เยียม ยูดา ฮู่ง เญย ติ่น.

3เหว่ย หฒุ ยูดา ฮู่ง, เสเดคียา, เฒาะ นิ่น หววน เจี๊ยน หย่า ก๊อง, “เม่ย เหว่ย หาย ติ่ว โต่ว หว่า ก๊อง, ‘ เฒี้ยว ฮนั้ง น้าย ก๊อง, “เยีย อ๋อย เฒาะ น้าย นอม ฒี่ง จิว ปุน เยียม บาบีโลน ฮู่ง เญย ปั์ว-เดี๊ย. นิ่น ฯฒฯ ธ้าง น้าย นอม ฒี่ง อ๊ะ.

4ยูดา เญย ฮู่ง, เสเดคียา, เปย๋า ไม้ ดุ๊ด เคนเดีย เมี่ยน เญย ปั์ว-เดี๊ย, มป่า ด่ง หาย ฒู้ง หฒุ จิว ปุน เยียม บาบีโลน ฮู่ง เญย ปั์ว-เดี๊ย หย่า ตุ๊ เหธา นิ่น เฮมียน ต๋อย เฮมียน ก๊อง หว่า, มฒีง ต๋อย มฒีง หมั่ง.

5นิ่น อ๋อย ต้อ เสเดคียา มี่ง เถา บาบีโลน. เสเดคียา หย่า อ๋อย หฒุ เยียม หน่าย เถา เยีย มี่ง ล์อ นิ่น. ไม้ กุ๊น เม่ย เบ๊าะ เคนเดีย เมี่ยน, เม่ย หย่า เบ๊าะ ไม้ ฮี่ง.’ น้าย เซ เฒี้ยว ก๊อง เญย หว่า.”

6เยเลมี ก๊อง, “เยีย ตุ๊ ฒิบ เฒี้ยว เญย หว่า ก๊อง,

7“เม่ย เญย โย์ว-เตี๋ย, ซันลูม เญย ตอน, ฮานัมเอน, อ๋อย ต้าย ล์อ เม่ย ก๊อง, ‘โท้ เม่ย ม์าย เยียม อันนาโท้ด เยีย วั้ว ฑง เดา, เหว่ย หฒุ เม่ย ม์าย เป๋น เม่ย เญย เซ หอบ หฒัวะ หฑวน เญย เล์ย.’

8“เยีย เญย โย์ว-เตี๋ย เญย ตอน, ฮานัมเอน, ฯฒฯ ต้าย เถา เซี้ยว แกง เญย แปง เญย หลาด กะญั์ว ล์อ เยีย ก๊อง, ‘โท้ เม่ย ม์าย เยียม เบนยามิน เต่ย, อานาโท้ด, เยีย วั้ว ฑง เดา, เหว่ย หฒุ เม่ย ม่าย เล์ย หฒัวะ หฑวน เป๋น เม่ย เญย ป่วน. ม์าย เป๋น เม่ย กั้น เญย ม่าะ!’ “เยีย ฯฒฯ ฮิ้ว ตุ๊ น้าย เซ เฒี้ยว เญย หว่า.

9เยีย ฯฒฯ เถง โย์ว-เตี๋ย เญย ตอน, ฮานัมเอน, ม์าย เยียม อานาโท้ด วั้ว ฑง เดา. เยีย เฑียง เหฒียบ เธี้ยด นอม ฒิ่น จิว ปุน นิ่น.

10เยีย ฯฒฯ ฝาว บั๋ว เยียม วั้ว เดา-โซว หย่า แน้ด เจี๊ยน เห่ว เมี่ยน โหฒว ฒอง-เหฒง แอ๋ง หล่ง ตั๊ง เฑียง ญ่าน.

11เยีย เฒาะ แน้ด เจี๊ยน เญย เดา-โซว, ต้ง เฟี้ย เจี๊ยน ม์าย วั้ว ฑง เดา เญย เหยียด เหญ่ย, แอ๋ง เฒาะ ไม้ แน้ด วั้ว คว้าย.

12ฆะฮ้า เยีย ตอง เจี๊ยน เยีย เญย โย์ว-เตี๋ย เญย ตอน, ฮานัมเอน, เหธา ฝาว บั๋ว เยียม ม์าย เดา เญย เดา-โซว วั้ว เต๋ย ฒอง-เหฒง เมี่ยน, แอ๋ง เหธา เฒว์ย เจี๊ยน เซี้ยว แกง เญย แปง เญย หลาด กะญั์ว เญย เหยียด ฒู้ง ยิวไท เมี่ยน, เฒาะ ม์าย เดา เญย โซว จิว ปุน มาเสยา เญย ฟุน, เนลิยา เญย ตอน, บาลุก.

13เยีย ตอง เจี๊ยน นิ่น บัว หัด บาลุก. เยีย ก๊อง,

14‘เน่น เจี๋ย เญย เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง, “เฒาะ น้าย เต๋ย อี คว้าย เดา-โซว, เลี่ยม แน้ด เจี๊ยน วั้ว คว้าย เหธา ไม้ แน้ด วั้ว คว้าย ม์าย เดา เญย โซว, ตั๊บ เจี๊ยน เนีย-อ๋ง เหว่ย ไฮ่ เลี่ยว ตุ๊ เล่า.”

15เหว่ย หฒุ เน่น เจี๋ย เญย เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง, ‘เยียม น้าย นอม เต่ย-ปูง แอ๋ง อ๋อย ม่าย เมี่ยน ม์าย เปย๊า, ลี่ง เต่ย เหธา อะหงุ่น หฮวีง.’

16“เยีย เฒาะ ม์าย เดา เญย โซว ปุน เนลิยา เญย ตอน, บาลุก, ลิ์ว, เยีย เต๋า เก๋า โท้ เฒี้ยว,

17“เฒี้ยว ทิน-ฮู่ง อ้า! เซ ต้ง เม่ย ซูง เม่ย เญย ปั์ว ธ้วด, หล่ง เม่ย เญย ต้ม ชะ เหฒย ลู่ง เหฒย เดา. เหว่ย เม่ย ไม้ ม่าย หาย หญู่ง อะ เจี๋ย ด่าง.

18เม่ย ปุน ธีง เม่ย เหฒียบ ฒัวะ เญย ฮนั้ม ธินๆ หว่านๆ เมี่ยน. มป่า เตีย ป์าม ฒุ์ย เม่ย วิ่น ปุน นิ่น เญย ตอน-เจว๊ย ฟุน-ฟะ. โฮล ไห่, เฮ้น ไห่ เญย ทิน-ฮู่ง, ม่าย บั๋ว เห่ว เน่น เจี๋ย เญย เฒี้ยว อ่า,

19เม่ย เญย หฒะเอ๋ย โฮล ไห่, เม่ย โหฒว เญย สี่ เฮ้น. เม่ย เญย มฒีง หมั่ง เจี๊ยน ป้าม เมี่ยน เญย ติ้วๆ เจ๊า, หย่า หฒิว เก๊าะ-เมี่ยน เญย เจ๊า เหธา โหฒว เญย สี่ เม่ย วิ่น ปุน นิ่น บัว.

20เม่ย เยียม อียิบ เต่ย-ปูง โหฒว จั๋ง-โห่ เหธา บัวะ ฮ่อง เญย สี่ เถา อี้ จ๋า ฮนอย หย่า เยียม อิสะลาเอน เมี่ยน เหธา หฒวัง ป้าม เมี่ยน บุด๋ง โหฒว, ปุน เม่ย กั้น ตุ๊ เม่ง เต้า ฮนั้ง อี้ ฮนอย นอ.

21เม่ย หล่ง จั๋ง-โห่ เหธา บัวะ ฮ่อง เญย สี่ หย่า ซูง ธ้วด เม่ย เฮ้น ไห่ เญย ปั์ว แอ๋ง หล่ง กั้ม เหฑีย เญย ต้ม สี่ ต้อ เม่ย เญย แปะ ฝีง, อิสะลาเอน เมี่ยน, ธ้วด อียิบ เต่ย-ปูง.

22เม่ย เฒาะ น้าย นอม เต่ย-ปูง จิว ปุน นิ่น บัว, ต้ง เม่ย โฮ้ว เจี๊ยน แล์ง ปุน นิ่น บัว เญย อง-ถาย. เป๋น นอม เดา-โท้ว หลง เญย เต่ย-ปูง.

23นิ่น บัว ตุ๊ เปียะ น้าย นอม เต่ย-ปูง หฑิบ เป๋น นิ่น บัว เญย ป่วน. มป่า นิ่น บัว ไม้ หมวัง เม่ย เญย หว่า หย่า ไม้ ยั่ง เม่ย เญย เล์ย-หลัด. เม่ย หัด นิ่น บัว โหฒว เญย เหยียด ฒู้ง นิ่น บัว เหยียด หญู่ง หย่า ไม้ โหฒว. เหว่ย น้าย เม่ย ปุน นิ่น บัว หฒุ น้าย เต๋ย เหยียด ฒู้ง เธี้ยว เญย เหฒะ หน่าน.

24หมั่ง ม่าะ! เนีย ดุย เจี๊ยน ต้าย เว่ย ก๋อม อ๋อย เบ๊าะ น้าย นอม ฒี่ง. หย่า หลาย หฑุ ด๊าว เหธา หง่อ หฮนาง เญย เจ๊า เหธา ววน-แป่ง, น้าย นอม ฒี่ง หฒุ จิว ปุน ต้าย เบ๊าะ ฒี่ง เญย เคนเดีย เมี่ยน. หฒิว เม่ย ก๊อง เญย หว่า หฒะเก้ง ธ้วด ต้าย. เม่ย หย่า ปวัด ลิ์ว อ๊ะ.

25มป่า เฒี้ยว ทิน-ฮู่ง อ่า, เม่ย หธ่อ บั๋ว เยีย, อ๋อย หฒุ หล่ง ญ่าน ม์าย วั้ว ฑง เดา หย่า ล์อ เมี่ยน โหฒว ฒอง-เหฒง, ไม้ กุ๊น น้าย นอม ฒี่ง หฒุ จิว ปุน เยียม เคนเดีย เมี่ยน เญย ปั์ว-เดี๊ย.’”

26เยเลมี ตุ๊ ฒิบ เฒี้ยว เญย หว่า ก๊อง,

27“เยีย เซ เฒี้ยว, เหยียด ฒู้ง ป้าม เมี่ยน เญย ทิน-ฮู่ง. ม่าย หาย หญู่ง เหว่ย เยีย อะ เจี๋ย ด่าง ไฟ?

28เหว่ย น้าย เฒี้ยว ฮนั้ง น้าย ก๊อง, ‘เยีย เฒาะ น้าย นอม ฒี่ง จิว ปุน เยียม เคนเดีย เมี่ยน เญย ปั์ว-เดี๊ย หย่า จิว ปุน เยียม บาบีโลน เญย ฮู่ง, เนบูคัดเน้ดซา, เญย ปั์ว-เดี๊ย. นิ่น หย่า ธ้าง ตุ๊ อ๊ะ.

29เบ๊าะ น้าย นอม ฒี่ง เญย เคนเดีย เมี่ยน อ๋อย ต้าย ปู๋ง โต์ว ปั๊ว น้าย นอม ฒี่ง, เลี่ยม เปย๊า หย่า ปั๊ว ชุย เหฑ่ง. เมี่ยน เยียม น้าย เต๋ย เปย๊า-ง่อ ปั๊ว ฮูง ปุน บาอัน เฒี่ยน หย่า เธี้ย เหฒี่ย ปุน เหญี่ย เญย เฒี่ยน, ธัวะ เยีย เฉีย เจี์ย.

30“อิสะลาเอน เมี่ยน เหธา ยูดา เมี่ยน เยียม หลุน เญย เฒี่ยง โห่ มต้าย เยียม เยีย เญย หฑะเฮมียน ขูง โหฒว เอ๊าะ สี่ ฮนั้ง. อิสะลาเอน เมี่ยน ขูง หล่ง นิ่น บัว เญย ปั์ว โหฒว เญย กง ธัวะ เยีย เฉีย เจี์ย ฮนั้ง.” น้าย เซ เฒี้ยว ก๊อง เญย หว่า.

31“น้าย นอม ฒี่ง เยียม เหธย เจี์ย ต้าย วั้ว ฮนอย เถา อี้ ฮนอย ธัวะ เยีย เฉีย เจี์ย, โน์ว ไห่. เยีย ฯฒฯ เฒาะ ฆอย น้าย นอม ฒี่ง, ไม้ ปุน เยียม เยีย เญย หฑะเฮมียน,

32หลาย อิสะลาเอน เมี่ยน เหธา ยูดา เมี่ยน โหฒว เญย เหยียด ฒู้ง เอ๊าะ สี่ ธัวะ เยีย เฉีย เจี์ย, เซ นิ่น บัว เญย ฮู่ง, นิ่น บัว เญย เจียน, นิ่น บัว เญย ไซ เมี่ยน เหธา โต่ว หว่า เมี่ยน, ยูดา เมี่ยน เหธา เยียม เยลูซาเลม เญย แปะ ฝีง.

33นิ่น บัว ฮวิน ติ ต์าน ปุน เยีย, ไม้ เฒ์ย ฮวิน เฮมียน. ไม้ กุ๊น เยีย ไม้ ตี้ง เลี่ยว เญย หฌาว นิ่น บัว, นิ่น บัว ไม้ หมวัง เหว่ย ฒิบ เยีย หฌาว เญย หว่า.

34นิ่น บัว เฒาะ กั้ม เฑี้ย เญย กะน้าย เหลียบ เยียม ต้ง กัน เยีย เญย บั๋ว เห่ว วั้ว นอม เปย๊า, ปุน ม่าย หวุย.

35นิ่น บัว เยียม เบนฮินโนม ฮ์อง เหว่ย บาอัน เฒี่ยน เหธย ฮลัง เญย ต๋อง, เฒาะ นิ่น บัว เญย น่าม โญ์ว ฝ่ง ห่อ ปุน โมเล้ก เฒี่ยน, ไม้ กุ๊น เยีย ไม้ พ้าย นิ่น บัว โหฒว. เยีย ฒู้ง ไม้ ฮนั้ม เถา นิ่น บัว อ๋อย โหฒว น้าย เต๋ย กั้ม เฑี้ย ไห่ เญย สี่ ปุน ยูดา ป์าม ฒุ์ย.

36“เม่ย บัว ฮนั้ง น้าย ก๊อง เถา น้าย นอม ฒี่ง, ‘หลาย หฒุ หฑุ ด๊าว, หฒุ หง่อ หฮนาง, หฒุ ววน-แป่ง, น้าย นอม ฒี่ง อ๋อย หฒุ จิว ปุน เยียม บาบีโลน ฮู่ง เญย ปั์ว-เดี๊ย. มป่า เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง,

37‘เยีย อ๋อย เยียม ต้ง เยีย เฉีย เจี์ย, โน์ว ไห่, กะเฉีย แป๊ด ธ้วด ต้าย หฒุ่น นิ่น บัว ธ้วด มี่ง เยียม เญย นอมๆ กั๊วะ, เซียว นิ่น บัว ฒุ้น. เยีย อ๋อย ต้อ นิ่น บัว หฑวน เถา น้าย นอม ต๋อง หย่า อ๋อย ปุน นิ่น บัว แป้ง ออน เญย เยียม.

38นิ่น บัว อ๋อย โหฒว เยีย เญย แปะ ฝีง, เยีย หย่า อ๋อย โหฒว นิ่น บัว เญย ทิน-ฮู่ง.

39เยีย อ๋อย ปุน นิ่น บัว ม่าย ดุ ติ้ว เฮญี้ยว, ม่าย ดุ ติ้ว เจ๊า เหว่ย ปุน นิ่น บัว เหยียด ลิ์ว ท่าย เยีย, หย่า เหว่ย ปุน นิ่น บัว กั้น เหธา นิ่น บัว ฆะฮ้า ฮี้ง เญย เฒ้ย-ฟุน ตุ๊ หลง.

40เยีย อ๋อย เหธา นิ่น บัว เหลียบ เหยียด ลิ์ว เญย แหง่ง หว่า, เซ เยีย เหยียด ลิ์ว โหฒว หลง ปุน นิ่น บัว, ไม้ ฮวิน มี่ง กั้น ปูง. เยีย อ๋อย ปุน นิ่น บัว เญย เฮญี้ยว ท่าย เยีย, เหว่ย ปุน นิ่น บัว ไม้ เล่ย ฆอย เยีย.

41เยีย อ๋อย อะเฮน้ย เญย โหฒว หลง ปุน นิ่น บัว หย่า หล่ง เหฑ่ง เฮญี้ยว, หล่ง เหฑ่ง หฒะเอ๋ย, เหฒียบ ฒัวะ เญย เหลียบ นิ่น บัว เจี์ย เยียม น้าย นอม เต่ย-ปูง.

42“เหว่ย หฒุ เฒี้ยว ฮนั้ง น้าย ก๊อง, ‘เยีย ฮนั้ง หาย นอ ปุน น้าย เต๋ย แปะ ฝีง หฒุ น้าย เต๋ย เหยียด ฒู้ง เธี้ยว เญย ต้ม เหฒะ หน่าน, เยีย อ๋อย ฮนั้ง วั้ว นอ หฒิว เยีย แล์ง เญย หว่า เฒาะ เหยียด ฒู้ง หลง เญย เจ๊า ปุน นิ่น บัว.

43เม่ย บัว ก๊อง, “น้าย นอม เต่ย-ปูง เป๋น ป่าย ฮวาง เญย ต๋อง. ไม้ ม่าย เมี่ยน หย่า ไม้ ม่าย แซง-คู้, เซ หฒุ จิว ปุน เยียม เคนเดีย เมี่ยน เญย ปั์ว-เดี๊ย.” มป่า แอ๋ง ม่าย เมี่ยน ตุ๊ เยียม น้าย ม์าย เดา.

44เมี่ยน อ๋อย หล่ง ญ่าน ม์าย เดา, หย่า ฝาว บั๋ว เดา-โซว, แน้ด เจี๊ยน, หย่า ม่าย เมี่ยน โหฒว ฒอง-เหฒง, เยียม เบนยามิน เต่ย, เยียม เยลูซาเลม เว่ย ก๋อม เญย ต๋อง, เยียม ยูดา เญย ฒี่ง, เยียม บง-ไอ๊ ต๋อง เญย ฒี่ง, เยียม บง-จั๊วะ เญย ฒี่ง เหธา เนเกบ เญย ฒี่ง, เหว่ย หฒุ เยีย อ๋อย ปุน นิ่น บัว แอ๋ง ตุ๊ หลง ฮนั้ง โล์ วั้ว นอ.” น้าย เซ เฒี้ยว ก๊อง เญย หว่า.

← Chapter 31 Jump to: Chapter 33 →