Jeremiah 39

Mien Bible (Thai Script) © Thailand Bible Society, 2007

← Chapter 38 Jump to: Chapter 40 →

1เสเดคียา โหฒว ยูดา เญย ฮู่ง ตะจั๊ว หฮญัง เหฒียบ หฮลา วั้ว หฒั่น, บาบีโลน เญย ฮู่ง, เนบูคัดเน้ดซา, เหธา นิ่น เญย หฒวัง จุน-แปง ต้าย เบ๊าะ หย่า เว่ย เจี๊ยน เยลูซาเลม.

2เยียม เสเดคียา โหฒว ฮู่ง เหฒียบ เยี้ยด วั้ว หฮญัง, เฝย หฮลา แซง-จั๊ว, ฒี่ง หลาด หฒุ เบ๊าะ ทง หมี่ อ๊ะ.

3เยลูซาเลม หฒุ เบ๊าะ ป่าย เญย เฒี่ยง โห่, บาบีโลน ฮู่ง เญย หฒวัง เจียน เปียะ มี่ง เฒว์ย เจี๊ยน บุด๋ง เญย แก้ง. ม่าย เนกันซาเลเซ, สัมกาเนโบ, โหฒว เจียน เญย เปย๊ย วั้ว เต้า สานเสคิม, โหฒว โฮล เญย เจียน วั้ว เต้า เนกันซาเลเซ, เหธา บาบีโลน เญย ฮู่ง เหฒ่ง เหฌี่ย เญย เหยียด ฒู้ง เจียน.

4ยูดา ฮู่ง, เสเดคียา, เหธา เหยียด ฒู้ง แปง ปวัด นิ่น บัว ฯฒฯ ลู่ง ม์วน หฒั่น กัน ฮู่ง เตี๋ย เญย หฮวีง เหธา อี นอม หลาด บุด๋ง เญย แก้ง เปย๋า, หูง เจี๊ยน อาลาบา มี่ง.

5มป่า เคนเดีย เญย จุน-แปง หฒุ่น เจี๊ยน นิ่น บัว มี่ง. หฒุ่น เถา เยลีโค เญย เดา-แป้ง ฯฒฯ หฒุ่น หฒ่าย เสเดคียา อ๊ะ. นิ่น บัว เฒาะ ตุ๊ นิ่น ฯฒฯ ต้อ มี่ง เถา ฮามัด เต่ย, ลิบลา ฒี่ง, บาบีโลน ฮู่ง, เนบูคัดเน้ดซา วั้ว. เนบูคัดเน้ดซา ฯฒฯ ตี่ง นิ่น เญย ฒุ์ย.

6เยียม ลิบลา, บาบีโลน ฮู่ง, ตอง เจี๊ยน เสเดคียา เญย มฒีง ไต๋ นิ่น เญย ตอน บัว. บาบีโลน ฮู่ง หย่า ไต๋ เหฑ่ง ยูดา เญย เหยียด ฒู้ง โหฒว โฮล เญย เมี่ยน.

7นิ่น แอ๋ง โหฒว ปุน เสเดคียา เญย มฒีง แม่ง หย่า เขา เจี๊ยน หลิ่ม เหว่ย ต้อ นิ่น มี่ง บาบีโลน.

8เคนเดีย เมี่ยน หล่ง โต์ว ปั๊ว ฮู่ง ติ่น หย่า ปั๊ว แปะ ฝีง เญย เปย๊า, แอ๋ง แธะ เยลูซาเลม เญย ฒี่ง หลาด.

9โก๋ว ฮู่ง เญย ต้ม แปง-เปย๊ย, เนบูซาละดาน, ต้อ เยียม ฒี่ง เหฒ่ง เหฌี่ย เญย เมี่ยน เหธา เปย๋า ต้าย เปียะ นิ่น วั้ว เต๋ย, เหธา หธ่อ เยียม เจี๊ยน วั้ว เหฒ่ง เหฌี่ย เญย เมี่ยน.

10โก๋ว ฮู่ง เญย ต้ม แปง-เปย๊ย, เนบูซาละดาน, ปุน เต๋ย ไม้ ม่าย หาย หญู่ง เญย เมี่ยน จ่ม เมี่ยน เลี่ยว เหฌี่ย เยียม ยูดา เต่ย. ต๋อย วั้ว เต๋ย เฒี่ยง โห่ นิ่น หย่า เฒาะ อะหงุ่น หฮวีง เหธา ลี่ง เต่ย จิว ปุน นิ่น บัว.

11บาบีโลน ฮู่ง, เนบูคัดเน้ดซา, พ้าย หว่า ก๊อง เถา เยเลมี บั๋ว โก๋ว ฮู่ง เญย ต้ม แปง-เปย๊ย, เนบูซาละดาน, ก๊อง,

12“เม่ย อ๋อย หฒุ ต้อ นิ่น มี่ง, โก๋ว หลง นิ่น, ไม้ ตู๋ง โหฒว หาย หญู่ง ห่อย. นิ่น ก๊อง หาย หญู่ง, กุ๊น เถง นิ่น โหฒว วั้ว หญู่ง.”

13ฮนั้ง หน่าย โก๋ว ฮู่ง เญย ต้ม แปง-เปย๊ย, เนบูซาละดาน, โหฒว เจียน เญย เปย๊ย วั้ว เต้า เนบูซัดบาน, เหธา โหฒว โฮล เญย เจียน, เนกันซาเลเซ, เหธา บาบีโลน เญย ฮู่ง เหยียด ฒู้ง เหฒ่ง เหฌี่ย เญย เจียน,

14พ้าย เมี่ยน มี่ง เซี้ยว แกง เญย แปง เญย หลาด กะญั์ว ต้อ เยเลมี ต้าย ฯฒฯ จิว ปุน ซาฟาน เญย ฟุน, อาหิคัม เญย ตอน, เกดาลิยา, ต้อ มี่ง นิ่น เญย เปย๊า. ฮนั้ง หน่าย เยเลมี ตุ๊ เยียม แปะ ฝีง บุด๋ง.

15เยเลมี หธ่อ หฒุ หววน เจี๊ยน เซี้ยว แกง เญย แปง เญย หลาด กะญั์ว เญย เฒี่ยง โห่, นิ่น ตุ๊ ฒิบ เฒี้ยว เญย หว่า ก๊อง,

16“เม่ย มี่ง ก๊อง บั๋ว เอทีโอเปีย เมี่ยน, เอเบดเมเล้ก, ‘เน่น เจี๋ย เญย เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง, “เยีย อ๋อย เยียม น้าย นอม ฒี่ง หฒิว เยีย แล์ง เญย หว่า โหฒว เหฒียง เธี้ยว เญย สี่, ไม้ เฒ์ย โหฒว หลง. เถา วั้ว ฮนอย เยียม เม่ย เญย หฑะเฮมียน โหฒว เหฒียง.”

17มป่า เฒี้ยว ก๊อง, “วั้ว ฮนอย เยีย อ๋อย เหฌียว เม่ย, เม่ย ฯฒฯ ไม้ หฒุ จิว ปุน เยียม เม่ย กั้ม เหฑีย วั้ว เต๋ย เมี่ยน เญย ปั์ว-เดี๊ย.

18เหว่ย หฒุ เยีย ด่ง หาย ฒู้ง อ๋อย เหฌียว เม่ย. เม่ย หย่า ไม้ หฒุ หฑุ ด๊าว ไต๋, มป่า เม่ย อ๋อย ตุ๊ แหม่ง เฒี่ยง เป๋น เบ๊าะ จ๋า ตุ๊ ต้าย เญย ฒี่ง เหญ่ย เหว่ย หฒุ เม่ย เสียน เขา เยีย.” เฒี้ยว ฮนั้ง น้าย ก๊อง.’”

← Chapter 38 Jump to: Chapter 40 →