Leviticus 1

Kamba (Mbivilia) 1956

Jump to: Chapter 2 →

1Na Yeova amwĩta Mose, na aneena nake e ĩeemanĩ ya kũmbanĩa, akĩmwĩa,

2Neena na ana ma Isilaeli, noimea, Mũndũ o na wĩva wenyu aithembea Yeova nthembo, mwĩthemba nthembo yenyu ya indo, ya ndĩthya ya ng’ombe na ya mbũi na malondu.

3Ethĩwa nthembo yake nĩ nthembo ya kũvĩvw’a ya ndĩthya ya ng’ombe, akathembe nũme ĩte kĩema: na akamĩthembee mũomonĩ wa ĩeema ya kũmbanĩa, nĩ kana etĩkĩlwe nĩ Yeova.

4Nake akailĩĩle kw’oko mũtwenĩ wa nthembo ya kũvĩvw’a; na ĩkeetĩkĩlwa kwondũ wake yĩthĩw’e nthembo ya kwĩw’anĩthw’a kwake.

5Akakoaĩe kasalũ ka mũew’a mbee wa Yeova: na ana ma Aluni, ala athembi, makaete ĩla nthakame, na kũminzangĩsya nthakame ĩũlũ wa kĩthembeo kw’onthe kĩla kĩ vakuvĩ na mũomo wa ĩeema ya kũmbanĩa.

6Nake akathĩnze ĩla nthembo ya kũvĩvw’a, na kũmĩtilanga ilungu syayo.

7Na ana ma mũthembi Aluni makekĩe mwaki kĩthembeonĩ, na kwaĩĩa ngũ ĩũlũ wa mwaki;

8na ana ma Aluni, ala athembi, makaie ila ilungu, vamwe na mũtwe, na mathunya, maĩĩe ĩũlũ wa ngũ ila syĩ mwakinĩ ũla wĩ kĩthembeonĩ:

9ĩndĩ mavu mako na maũũ mako akathambye na manzĩ. Na mũthembi akavĩvĩsye konthe kĩthembeonĩ, kethĩwe nthembo ya kũvĩvw’a, nthembo ĩvĩvaw’a na mwaki, yĩ mũuke mũseo kwa Yeova.

10Na ethĩwa nthembo yake nĩ ya ndĩthya, ya malondu, kana ya mbũi, yĩthĩwe nthembo ya kũvĩvw’a; akathembe nũme ĩte kĩema.

11Akamyũaĩe ũtee wa kĩthembeo kwelekela ngalĩ ya ĩũlũ mbee wa Yeova: na ana ma Aluni, ala athembi, makaminzangĩsye nthakame yayo ĩũlũ wa kĩthembeo kw’onthe.

12Na akamĩtilange ilungu syayo, vamwe na mũtwe wayo na mathunya mayo; na mũthembi akasyaĩĩe ngũnĩ ila syĩ mwakinĩ ũla wĩ kĩthembeonĩ:

13ĩndĩ mavu na maũũ akathambye na manzĩ. Na mũthembi akathembe yonthe, na kũmĩvĩvĩsya kĩthembeonĩ: nayo nĩ nthembo ya kũvĩvw’a, nthembo ĩvĩvaw’a na mwaki, yĩ mũuke mũseo kwa Yeova.

14Na ethĩwa nthembo yake ya kũmũthembea Yeova nĩ nthembo ya kũvĩvw’a ya nyũnyi, nĩvo wĩthemba nthembo yake ya ndumbũ, kana ya maswii ma ĩvũĩ.

15Na mũthembi akamĩete kĩthembeonĩ, na kũmila mũtwe wayo ngingo ĩtilĩke, na kũmĩvĩvĩsya kĩthembeonĩ; na nthakame yayo ĩkamenew’e ngalĩ ĩmwe ya kĩthembeo;

16nake akaumye kĩmoeo kyayo vamwe na ũvuku wakyo, na kwĩkya ũtee wa kĩthembeo ngalĩ ya wumĩlonĩ wa syũa, vandũ va kwĩta mũu:

17na akatũanĩlye nthwaunĩ syayo, ĩndĩ ndakatilan’ye ilungu ilĩ. Na mũthembi akamĩvĩvĩsye kĩthembeonĩ, ĩũlũ wa ngũ syĩ mwakinĩ: nayo nĩ nthembo ya kũvĩvw’a, nthembo ĩvĩvaw’a na mwaki, yĩ mũuke mũseo kwa Yeova.

Jump to: Chapter 2 →