Leviticus 2

Kamba (Mbivilia) 1956

← Chapter 1 Jump to: Chapter 3 →

1Na yĩla mũndũ o na wĩva wĩthemba Yeova nthembo ya mũtu, nthembo yake yĩthĩwe ya mũtu mũvinyu: na akatulũĩle mauta ĩũlũ waw’o, na kwĩkĩa ũvumba ĩũlũ:

2na akamĩetee ana ma Aluni athembi; na akaute ũvĩ wake wa ũla mũtu mũvinyu wayo, na amwe ma mauta mayo, vamwe na ũvumba w’onthe wayo. Na mũthembi akamĩvĩvĩsye kĩthembeonĩ yĩthĩwe ũlilikan’yo wayo, nthembo ĩvĩvaw’a na mwaki, yĩ mũuke mũseo kwa Yeova:

3na kĩla kĩtiala kya nthembo ya mũtu kĩkeethĩwa kya Aluni na ana make: nĩ kĩndũ kĩtheu mũno kya nthembo sya Yeova ila ivĩvaw’a na mwaki.

4Yĩla wĩthemba nthembo ya mũtu ũla ũkaangĩwe nthĩnĩ wa iko, yĩthĩwe tũmũtũ tũte ĩlawa twa mũtu mũvinyu ũvulanĩtw’e na mauta, kana tũmĩkate tũvũthũ tũte ĩlawa tũvakĩtwe mauta.

5Na ethĩwa nthembo yaku nĩ nthembo ya mũtu ya kũkaangwa na ĩtandaa ya kĩaa, yĩthĩwe ya mũtu mũvinyu ũte ĩlawa, ũvulanĩtw’e na mauta.

6Ũkatũtilange tũlungu, na kũtulũĩla mauta ĩũlũ watw’o: nĩ nthembo ya mũtu.

7Na ethĩwa nthembo yaku nĩ nthembo ya mũtu ya kũkaangwa kĩkaanginĩ, ĩseũvw’e na mũtu mũvinyu na mauta.

8Na ũkamũetee Yeova nthembo ya mũtu ĩla ĩseũvĩtw’e na syĩndũ isu: na ĩkanengwe mũthembi, nake akamĩete kĩthembeonĩ.

9Na mũthembi akaumye nthembonĩ ya mũtu ũlilikan’yo wayo, na kũvĩvĩsya kĩthembeonĩ, nthembo ĩvĩvaw’a na mwaki, yĩ mũuke mũseo kwa Yeova.

10Na kĩla kĩtiala kya nthembo ya mũtu kĩkeethĩwa kya Aluni na ana make: nĩ kĩndũ kĩtheu mũno kya nthembo sya Yeova ila ivĩvaw’a na mwaki.

11Nthembo ya mũtu o na wĩva, ĩla mwĩmũthembeaa Yeova, ndĩkekĩwe ĩlawa; nũndũ nĩkũvatane kũvĩvya ĩlawa, kana ũkĩ wa nzũkĩ, syĩthĩwe nthembo ĩvĩvĩaw’a Yeova na mwaki.

12Mũkaithembee Yeova syĩthĩwe nthembo ya mosyao ma mbee: ĩndĩ itikethĩwe kĩthembeonĩ syĩthĩwe mũuke mũseo.

13Na kĩla kĩthembawa kya nthembo yaku ya mũtu kĩkĩae mũnyũ; o na ndũketĩkĩle nthembo yaku ya mũtu yĩthĩwe ĩte na mũnyũ wa ũtianĩo wa Ngai waku: thembaa mũnyũ vamwe na nthembo syaku syonthe.

14Na ethĩwa wĩmũthembea Yeova nthembo ya mũtu ya mosyao ma mbee, thembaa nganũ yĩ iianĩ syayo ĩkaangĩtwe na mwaki, nganũ nthokoe ya iia mbĩũ, yĩthĩwe nthembo ya mũtu ya mosyao maku ma mbee.

15Na ĩkĩa mauta ĩũlũ wayo, noyia ũvumba ĩũlũ: nĩ nthembo ya mũtu.

16Na mũthembi akavĩvye ũlilikan’yo wayo, kĩlungu kya nganũ nthokoe yayo, na kĩlungu kya mauta mayo, vamwe na ũvumba w’onthe wayo: nĩ nthembo ĩvĩvĩaw’a Yeova na mwaki.

← Chapter 1 Jump to: Chapter 3 →