Leviticus 10

Kamba (Mbivilia) 1956

← Chapter 9 Jump to: Chapter 11 →

1Na Natavu na Aviu, ana ma Aluni, kĩla ũmwe osa kĩtoeesya kyake, na eekĩa mwaki nthĩnĩ wakyo, na eekĩa ũvani ĩũlũ waw’o, na mamũthembea Yeova na mwaki ũte wa vo, ũla ũtaameaĩa.

2Na mwaki wauma mbee wa Yeova, na wamavĩvya, na makw’ĩa mbee wa Yeova.

3Na ĩndĩ Mose amwĩa Aluni, Ũũ nĩw’o ũla Yeova waneenie, akyasya, Ngoonanw’a kwa ala manthengeeaa atĩ nĩ mũtheu, na ngataĩwa mbee wa andũ onthe. Na Aluni avindya ki.

4Na Mose ameta Misaeli na Elisavani, ana ma Usieli mwendw’a ĩthe wa Aluni, na amea, Thengeeai, mũkue ana‐a‐ĩthe menyu kũmaumya mbee wa vala vandũ vatheu mũmatwae ũtee wa mwako wa maeema.

5Kwondũ wa ũu mathengeea, na mamakua me o na makanzũ moo mamatwaa ũtee wa mwako wa maeema, o tondũ Mose waisye.

6Na Mose amwĩa Aluni, na Eleasali na Ithamali, ana make, Mũikaivue nzw’ĩĩ sya mĩtwe yenyu, o na mũikatembũe ngũa syenyu; nĩ kana mũikakw’e, na kana ndakathatĩe ũmbano w’onthe: indĩ ana‐a‐ĩthe menyu, nyũmba nima ya Isilaeli, maĩe ũndũ wa kũvĩvya kũla Yeova ũvĩvisye.

7Na mũikaumaale mũomonĩ wa ĩeema ya kũmbanĩa, mũikakw’e; nũndũ mauta ma kwĩtĩkĩsya ma Yeova me ĩũlũ wenyu. Na meeka kwĩanana na ndeto sya Mose.

8Na Yeova aneena na Aluni, akĩmwĩa,

9Ndũkanyw’e mbinyu kana kĩla kĩtoonasya, we, kana ana maku vamwe naku, yĩla mwĩlika ĩeemanĩ ya kũmbanĩa, mũtikese kũkw’a: ũu ũkeethĩawa mwamũlo wa tene na tene mosyaanĩonĩ menyu onthe:

10nĩ kana mũvathũkan’ye katĩ wa kĩla kĩtheu na kĩla kĩte kĩtheu, na kĩla kĩvuku na kĩla kĩte kĩvuku;

11na nĩ kana mũmanyĩsye ana ma Isilaeli myamũlo yonthe ĩla Yeova ũneenete nao na kanyw’a wa Mose.

12Na Mose aneena na Aluni, na Eleasali na Ithamali, ana make ala matialile, Osai nthembo ya mũtu ĩla yatiala ya nthembo sya Yeova ila ivĩvaw’a na mwaki, na mũimĩya ĩte na ĩlawa ũtee wa kĩthembeo; nũndũ nĩ ntheu mũno;

13nayo ĩkaĩĩwa vandũ vatheu, nĩkwĩthĩwa nĩ kĩlungu kyaku, na kĩlungu kya ana maku, kya nthembo sya Yeova ila ivĩvaw’a na mwaki: nũndũ ũu nĩw’o nĩaĩĩtwe.

14Na kĩng’eng’eto kya kũvyũlw’a na kũũ kwa kũkĩlw’a mũkaĩĩa vandũ vatheu, we, na ana maku, na eĩtu maku vamwe naku: nũndũ ninenganĩtwe syĩthĩwe kĩlungu kyaku, na kĩlungu kya ana maku, kumw’a nthĩnĩ wa nthembo sya nthembo sya mũuo sya ana ma Isilaeli.

15Kũũ kwa kũkĩlw’a na kĩng’eng’eto kya kũvyũlw’a makaetanĩsye na nthembo sya mathunya ila ivĩvaw’a na mwaki, kũmĩvyũlangya ĩthĩwe nthembo ya kũvyũlw’a mbee wa Yeova: na ĩkeethĩwa yaku, na ya ana maku vamwe naku, kĩlungu kya tene na tene; o tondũ Yeova weaie.

16Na Mose amantha na kĩthing’ĩĩsyo ĩla mbũi ya nthembo ya naĩ, na, sisya, yaĩ ĩnamina kũvĩvw’a: na amathatĩa Eleasali na Ithamali, ana ma Aluni ala matialile, akĩmea,

17Nũndũ wa kĩ mũtinaĩa nthembo ya naĩ vala vandũ vatheu, nũndũ nĩ ntheu mũno, nake nũmũnengete ya kũveta naĩ ya ũmbano, yĩthĩwe nthembo ya wĩw’anĩthyo kwondũ woo mbee wa Yeova?

18Sisya nthakame yayo ndĩnaetwe nthĩnĩ wa vala vandũ vatheu: vate ndĩĩ nĩmwaĩlwe nĩ kũmĩya mwĩ vala vandũ vatheu, o tondũ nĩaie.

19Na Aluni amwĩa Mose, Sisya, ũmũnthĩ nĩmamũthembea Yeova nthembo yoo ya naĩ na nthembo yoo ya kũvĩvw’a; na maũndũ aa nĩo mangwata: kethĩwa nĩĩe nthembo ya naĩ ũmũnthĩ, wĩthĩwa ũndũ wa kwendeesya methonĩ ma Yeova?

20Na Mose eew’a ũu, wamwendeesya.

← Chapter 9 Jump to: Chapter 11 →