Leviticus 6

Kamba (Mbivilia) 1956

← Chapter 5 Jump to: Chapter 7 →

1Na Yeova aneena na Mose, akĩmwĩa,

2Ethĩwa mũndũ o na wĩva akeeka naĩ, na kũmũvĩtanĩsya Yeova, na kũkenga mũtũi wake kwondũ wa kĩndũ wiĩte kwake, kana kwondũ wa wĩw’ano, kana kũvutana, kana kũmũthĩn’ya mũtũi wake,

3kana kwona kĩndũ kyau, na kũkengana ũndũ wakyo, na kwĩvĩta ũvũngũ; ũndũnĩ ũmwe wa maũndũ aa onthe ũla mũndũ wĩkaa, akĩvĩtya ũndũnĩ ũsu;

4nĩvo kũkethĩwa, ethĩwa nĩwekie naĩ, na atw’ĩka mũvĩtan’ya, akatũnge kĩla wosie kwondũ wa kũvutana, kana kĩndũ kĩla wosie kwondũ wa kũthĩn’ya ũngĩ, kana kĩndũ kiĩtwe kwake, kana kĩndũ kĩla wonie kyaĩte,

5kana kĩndũ o na kĩva wevĩtie ũvũngũ ũndũ wakyo; akatũnge o kyo, na kũkyongeleela kĩlungu kya katano: akamũnenge ũsu mwene wakyo, mũthenya ũla wĩmanyĩka nĩ mũvĩtan’ya.

6Na akamũetee Yeova nthembo yake ya ĩvĩtyo, ndũũme ya ndĩthya ĩte kĩema, kwĩanana na ũndũ wĩona thooa wayo wĩana, yĩthĩwe nthembo ya ĩvĩtyo, ĩetwe kwa mũthembi:

7nake mũthembi akamwĩw’anĩthya ũsu mbee wa Yeova; na akaekewa ũndũ o na wĩva ũla watumie ethĩwa mũvĩtan’ya.

8Na Yeova aneena na Mose, akĩmwĩa,

9Ĩaĩe Aluni na ana make, ũkĩmea, Ũũ nĩw’o mwĩao wa nthembo ya kũvĩvw’a: nthembo ya kũvĩvw’a yĩthĩwe ĩũlũ wa ngũ syĩ ĩũlũ wa kĩthembeo ũtukũ w’onthe kũvika kĩoko; na mwaki wakanae kĩthembeonĩ.

10Na mũthembi akekĩe ĩla ngũa yake ya katane, na sulualĩ wake wa katane akekĩe mwĩĩnĩ wake; na akoke mũu wa mwaki ũla wavĩvĩsye nthembo ya kũvĩvw’a kĩthembeonĩ, na kũwia ũtee wa kĩthembeo.

11Na akaumye ngũa syake, na kwĩkĩa ngũa ingĩ, na kũtwaa mũu ũtee wa mwako wa maeema vandũ vatheu.

12Na mwaki wakanae kĩthembeonĩ, ndũkaavoe; na mũthembi akavĩvasye ngũ ĩũlũ wakyo kĩla kĩoko: na kwaĩĩa nthembo ya kũvĩvw’a ĩũlũ wasyo, na akavĩvĩsye mathunya ma nthembo sya mũuo vo ĩũlũ.

13Mwaki wakanae kĩthembeonĩ ũtatw’ĩkanaa; ndũkaavoe.

14Na ũũ nĩw’o mwĩao wa nthembo ya mũtu: ana ma Aluni makamĩthembe mbee wa Yeova, mbee wa kĩthembeo.

15Na akaute ũvĩ wake wa mũtu mũvinyu wa nthembo ya mũtu, na wa mauta mayo, na ũvumba w’onthe ũla wĩ ĩũlũ wa nthembo ya mũtu, na kũvĩvĩsya kĩthembeonĩ yĩthĩwe mũuke mũseo kwa Yeova, ũlilikan’yo wayo.

16Na kĩla kĩtiala kyaw’o Aluni na ana make makaye: ũkaĩwe vate ĩlawa vandũ vatheu; nza ya ĩeema ya kũmbanĩa nĩvo meĩĩa.

17Ndũkaauwe wĩ na ĩlawa. Nĩnĩmanengete wĩthĩwe kĩlungu kyoo kya nthembo syakwa ila ivĩvaw’a na mwaki; ni ntheu mũno, o ta nthembo ya naĩ, na ta nthembo ya ĩvĩtyo.

18Kĩla mũndũ mũũme wa ana ma Aluni akaye, kuma nthembonĩ sya Yeova ila ivĩvaw’a na mwaki, nĩ kĩlungu kyake tene na tene mosyaanĩonĩ menyu: o ũla ũkaikiita akeethĩwa e mũtheu.

19Na Yeova aneena na Mose, akĩmwĩa,

20Ĩno nĩyo nthembo ya Aluni na ya ana make, ĩla makamũthembea Yeova mũthenya ũla ũmwe wĩĩtĩkĩw’a mauta: kĩlungu kya ĩkũmi kya eva ya mũtu mũvinyu wĩthĩwe nthembo ya mũtu mavinda onthe, nyunzu yaw’o kĩoko, na nyunzu yaw’o wĩoo.

21Ũkakaangwe na mauta ĩtandaanĩ ya kĩaa; na wakaangwa, ũkaete nthĩnĩ: ũkamũthembee Yeova nthembo ya mũtu ya ilungu isu ikaangĩtwe yĩthĩwe mũuke mũseo.

22Na mũthembi ũla wetĩkĩw’e mauta, ũla ũkethĩwa vandũ vake wa ana make nĩwe ũkamĩthemba: ĩkavĩvĩw’e Yeova vyũ kwondũ wa mwamũlo wa tene na tene.

23Na kĩla nthembo ya mũthembi ĩvĩvw’e vyũ: ndĩkaĩwe.

24Na Yeova aneena na Mose, akĩmwĩa,

25Neena na Aluni na ana make, ũkĩmea, Ũũ nĩw’o mwĩao wa nthembo ya naĩ: vandũ vala nthembo ya kũvĩvw’a yũaĩawa nĩvo nthembo ya naĩ ĩkoaĩawa mbee wa Yeova: nĩ ntheu mũno.

26Mũthembi ũla wĩmĩthemba ũndũ wa naĩ akamĩye: ĩkaĩsĩawe vandũ vatheu, nza ya ĩeema ya kũmbanĩa.

27Kĩla kĩkakiita nyama syayo kĩkeethĩwa kĩtheu; na yĩla nthakame yayo ĩtalĩkĩla ngũanĩ o na yĩva, ngũa ĩla yatalĩkĩlwe ũkathambĩsye vandũ vatheu.

28Ĩndĩ mbisũ ya yũmba ĩla yĩmĩua nĩyũawe; na ethĩwa ĩkauĩwa ĩsilianĩ ya ũthuku, yĩkutwe, na kũthambũkwa na manzĩ.

29Kĩla mũndũ mũũme wa athembi akaye: nĩ ntheu mũno.

30Na nthembo ya naĩ o na yĩva, ĩla nthakame yayo ĩetawe ĩeemanĩ ya kũmbanĩa yĩthĩwe ya wĩw’anĩthyo nthĩnĩ wa vala vandũ vatheu, ndĩkaĩwe: ĩvĩvw’e na mwaki.

← Chapter 5 Jump to: Chapter 7 →