Leviticus 26

Kamba (Mbivilia) 1956

← Chapter 25 Jump to: Chapter 27 →

1Mũikeseũvĩsye mĩvw’anano o na yĩva, o na mũikeũngamĩsye mũvw’anano mwasũvye, kana kĩtuĩ, o na mũikaie ĩvia o na yĩva yĩvanĩtwe nthĩ yenyu, nĩ kana mũyĩkunamĩe: nũndũ ninyie Yeova Ngai wenyu.

2Lilikanai masavato makwa, na kũtaĩa vandũ vakwa vatheu: ninyie Yeova.

3Ethĩwa mũkaendaa myamũlonĩ yakwa, na kũkwataa mĩao yakwa, na kũmĩkaa;

4nĩvo ngaete mbua yenyu ivinda yayo, na nthĩ ĩkasyaaa ũsyao wayo, na mĩtĩ ya mũũnda ĩkasyaaa ũsyao wayo.

5Na ngetha yenyu ya ũvũa ĩkekaala kũvika ngetha ya mĩũnda ya mĩsavivũ, na ngetha ĩsu ya mĩsavivũ ĩkekalaa kũvika ĩvinda ya kũvanda; na mũkaĩsaa lĩu wenyu na kũvũna, na kwĩkalaa nthĩ yenyu vate mũisyo.

6Nakwa ngamĩnenga nthĩ mũuo, na mũkakomaa, na vaiĩ ũla wĩtuma mũkĩa: ngamina nyamũ mbai nthĩ yenyu, o na ũvyũ ndũkavĩtĩle nthĩ yenyu.

7Mũkalũngya amaitha menyu, na makavalũkw’a mbee wenyu na ũvyũ.

8Andũ atano menyu makalũngya ĩana, na ĩana menyu makalũngya ngili ĩkũmi; na amaitha menyu makavalũkw’a mbee wenyu na ũvyũ.

9Na ngamwĩtĩkĩla, na ngamwongeleela, na kũmwingĩvya, na ngalũlũmĩlya ũtianĩo wakwa nenyu.

10Mũkaĩsaa lĩu ũla mũkũũ wa mbio mĩthenya mingĩ, na mũkaumaalya ũla mũkũũ nũndũ wa ũla mweũ.

11Na ngaaka wĩkalo wakwa katĩ wenyu: na ngoo yakwa ndĩkamũthĩtha.

12Na ngaendaa katĩ wenyu, na ngeethĩwa Ngai wenyu, nenyu mũkeethĩwa andũ makwa.

13Ninyie Yeova Ngai wenyu, ũla wamumisye nthĩ ya Misili, nĩ kana mũtikethĩwe ngombo syoo; na nĩndũlĩte mĩtĩ ya ĩsoki yenyu, na kũmũendethya mũlũngalĩte.

14Ĩndĩ ethĩwa mũikambĩthukĩĩsya, na mũikakwata mĩao ĩno yonthe;

15na ethĩwa mũkalea myamũlo yakwa, na ngoo yenyu ĩkathĩtha motw’ĩo makwa, ũndũ mũteka mĩao yakwa yonthe, ĩndĩ mũkyananga ũtianĩo wakwa;

16nakwa ngamwĩka ũũ: ngeeaĩa w’ĩa ĩũlũ wenyu, ũwau wa ũkooa na ndetema, ũla wanangaa metho, na kũtuma thayũ ũsonzoma; na mũkavanda mbeũ syenyu mana, nũndũ amaitha menyu makaiya.

17Ngamũlutĩla ũthyũ wakwa, na mũkakũnwa mbee wa amaitha menyu: ala mamũmenaa makamũsumbĩka; na mũkasemba yĩla vate mũndũ ũmũatĩĩĩte.

18Na ethĩwa ĩtina wa maũndũ asu mũtikambĩthukĩĩsya, nĩvo ĩndĩ ngamũkũna makũna angĩ mũonza nũndũ wa naĩ syenyu.

19Ngaananga ngathĩĩo ya vinya wenyu: na ngatw’ĩkĩthya ĩtu yenyu yĩthĩwe ta kĩaa, na nthĩ yenyu ta ũthuku;

20na mũkananga vinya wenyu ta ũthuku; na mũkananga vinya wenyu mana; nũndũ nthĩ yenyu ndĩkasyaa ũsyao wayo, o na mĩtĩ ya nthĩ ndĩkasyaa ũsyao wayo.

21Na ethĩwa mũkaendea na kũndea, na mũikambĩthukĩĩsya, ngamũetee mothĩn’yo kũndũ mũonza kwĩanana na naĩ syenyu.

22Na ngaete nyamũ sya kĩtheka kwenyu, ila ikamũvuta syana syenyu, na kwananga indo syenyu, na mũkatiwa mwĩ avũthũ ũtalonĩ wenyu; na nzĩa syenyu ikaekwa.

23Na ethĩwa kwondũ wa maũndũ asu mũtikaalyũlwa ninyie, ĩndĩ mũkaendeea na kũndea;

24nĩvo ĩndĩ ngamũlea; na ngamũkũna, o nyie, makũna mũonza kwondũ wa naĩ syenyu.

25Na ngaete ũvyũ wũke ĩũlũ wenyu, ũla ũkaĩvanĩsya ũĩvanĩsyo kwondũ wa ũtianĩo; na mũkoombanĩw’a ndũanĩ syenyu: na ngaete mũimũ katĩ wenyu; na mũkanenganwe kw’okonĩ kwa mũmaitha.

26Yĩla nĩtũla ndata yenyu ya kĩmũtũ, aka ĩkũmi makauĩa kĩmũtũ kyenyu ikonĩ yĩmwe, na makamũnenga ĩngĩ kĩmũtũ kyenyu kwondũ wa kũthima: na mũkaya, na mũikavũna.

27Na ethĩwa ĩtina wa ũu w’onthe mũkalea kũmbĩthukĩĩsya, ĩndĩ mũkaendeea na kũndea;

28nĩvo ĩndĩ nakwa ngamũlea nĩ mũthilĩku; o na ngamũkũna makũna mũonza kwondũ wa naĩ syenyu.

29Na mũkaya nyama sya ana maku, na nyama sya eĩtu maku mũkaya.

30Na ngaananga kũndũ kwenyu kũtũlu, na kũtema mĩvw’anano yenyu ya syũa, na kwĩkya simba syenyu ĩũlũ wa mĩĩ ya mĩvw’anano yenyu; na ngoo yakwa ĩkamũthĩtha inyw’ĩ.

31Na ngatw’ĩkĩthya ndũa syenyu maanzo, na ngaananga kũndũ kwenyu kũtheu, na ndikanyungĩa mĩuke yenyu mĩseo.

32Na ngatw’ĩkĩthya nthĩ nthei; na amaitha menyu ala memĩtũa makaseng’a nũndũ wayo.

33Nenyu ngamũnyaĩĩkya i mbaĩnĩ, na ngamũatĩĩa nĩkũĩte ũvyũ: na nthĩ yenyu ĩkeethĩwa nthei, na ndũa syenyu ikeethĩwa maanzo.

34Nĩvo ĩndĩ nthĩ ĩkatanĩa masavato mayo, o ĩvinda yĩla yĩ nthei, na inyw’i mwĩ nthĩ ya amaitha menyu; o ĩvinda yĩu nthĩ ĩkathũmũa, na kũtanĩa masavato mayo.

35O yĩla yĩ nthei ĩkeethĩwa na ũthũmũo, o ũthũmũo ũla ĩtaĩ naw’o masavatonĩ menyu, yĩla mwamĩtwĩe.

36Na ũndũ wa ala menyu metiala, ngeekĩa ũleelu ngoonĩ syoo me nthĩ sya amaitha moo: na wasya wa ĩtũ yĩkĩthingithangw’a ũkatuma masemba; na makakĩa, ta mũndũ ũkĩĩte ũvyũ; na makavalũka yĩla vate mũndũ ũmaatĩĩĩte.

37Na makavalũkangan’ya ene kwa ene, o ta makĩĩte mbee wa ũvyũ, yĩla vate mũndũ ũmaatĩĩĩte: na mũtikethĩwa na vinya wa kũũngama mbee wa amaitha menyu.

38Na mũkaanangĩka mbaĩnĩ sya nthĩ, na nthĩ ya amaitha menyu ĩkamũmina.

39Na ala menyu metiala makasonzomea naĩnĩ yoo me nthĩ sya amaitha menyu: o na mothũkũnĩ ma aaĩthe moo makasonzomea vamwe nao.

40Na makaumbũla ũthũku woo, na ũthũku wa aaĩthe moo, ũndũ wa ĩvĩtyo yoo yĩla mambĩtanĩsye, na ĩngĩ, nũndũ maendeeie makĩndea,

41nakwa naendeea ngĩmalea, na namatwaa nthĩ ya amaitha moo: ethĩwa ĩndĩ ngoo yoo ĩte mbaĩke ĩkeenyivya, na kwĩtĩkĩla ũsilĩlo wa ũthũku woo;

42nĩvo ĩndĩ ngalilikana ũtianĩo wakwa na Yakovo; o na ũtianĩo wakwa na Isaka, o na ũtianĩo wakwa na Avalaamu ngalilikana; na ngalilikana ĩ nthĩ.

43Nthĩ nayo ĩkatiwa nĩo, na ĩkatanĩa masavato mayo, yĩla yĩĩthĩwa nthei nao mate vo: na makeetĩkĩla ũsilĩlo wa ũthũku woo, nĩkwĩthĩwa, ĩĩ nĩkwĩthĩwa nĩmaleile motw’ĩo makwa, na ngoo syoo nĩsyathĩthie myamũlo yakwa.

44Ĩndĩ o na ũu w’onthe, yĩla me nthĩ ya amaitha moo, nyie ndikamalea, o na ndikamathĩtha, nĩmanange vyũ, na kwananga ũtianĩo wakwa nao; nũndũ nyie nĩ Yeova Ngai woo;

45ĩndĩ kwondũ woo ngalilikana ũtianĩo wa aaĩthe moo, ala naumisye nthĩ ya Misili mbaĩ sya nthĩ syene, nĩ kana nĩthĩwe Ngai woo: ninyie Yeova.

46Myamũlo na motw’ĩo na mĩao, nĩyo ĩsu, ĩla Yeova watwie katĩ wake na ana ma Isilaeli kĩĩmanĩ kya Sinai na kanyw’a wa Mose.

← Chapter 25 Jump to: Chapter 27 →