Leviticus 12

Kamba (Mbivilia) 1956

← Chapter 11 Jump to: Chapter 13 →

1Na Yeova aneena na Mose, akĩmwĩa,

2Neena na ana ma Isilaeli, ũkĩmea, Ethĩwa mũndũ mũka akaitava, na kũsyaa kavĩsĩ, nĩvo ĩndĩ wĩĩthĩwa mũvuku mĩthenya mũonza; o ta mĩthenyanĩ ya kũvathwa kwake kwondũ wa kwĩalũla kwake akeethĩwa mũvuku.

3Na mũthenya wa nyanya kakaĩkwe ĩkonde ya mbinũ yako.

4Na mũndũ mũka akekale nthakamenĩ ya kwĩthesya kwake mĩthenya mĩongo ĩtatũ na ĩtatũ; ndakakiite kĩndũ kĩvathe, kana kũlika vala vandũ vatheu, kũvika mĩthenya ya kwĩthesya kwake yĩanĩe.

5Ĩndĩ ethĩwa akasyaa kelĩtu, nĩvo ĩndĩ wĩĩthĩwa mũvuku syumwa ilĩ, ta ĩvinda ya kũvathwa kwake, na akekala nthakamenĩ ya kwĩthesya kwake mĩthenya mĩongo thanthatũ na thanthatũ.

6Na mĩthenya yake ya kwĩthesya kwake yeanĩa, ũndũ wa kavĩsĩ, kana ũndũ wa kelĩtu, akamũetee mũthembi, mũomonĩ wa ĩeema ya kũmbanĩa, katena ka ĩlondu ka mwaka ũmwe kethĩwe nthembo ya kũvĩvw’a, na ĩswii ya ĩvũĩ, kana ndumbũ, yĩthĩwe nthembo ya naĩ:

7na akamĩthembe mbee wa Yeova, yĩthĩwe nthembo ya wĩw’anĩthyo kwondũ wake; nake akathew’a kwondũ wa nthongo ya nthakame yake. Ũu nĩw’o mwĩao wa ũla ũsyaaa, ethĩwa nĩ kũsyaa kavĩsĩ kana kelĩtu.

8Na ethĩwa ndatonya kwona katena ka ĩlondu, nĩvo ĩndĩ wĩosa ndumbũ ilĩ, kana maswii elĩ ma ĩvũĩ; yĩmwe yĩthĩwe nthembo ya kũvĩvw’a, na yĩla yĩngĩ yĩthĩwe nthembo ya naĩ: na mũthembi akathembe ĩ nthembo ya wĩw’anĩthyo kwondũ wake, na akeethĩwa mũtheu.

← Chapter 11 Jump to: Chapter 13 →