Leviticus 9

Kamba (Mbivilia) 1956

← Chapter 8 Jump to: Chapter 10 →

1Na kweethĩwa mũthenya wa nyanya, Mose ameta Aluni na ana make, na atumĩa ma Isilaeli;

2na amwĩa Aluni, Osa kasaũ ka ndĩthya kethĩwe nthembo ya naĩ, na ndũũme yĩthĩwe nthembo ya kũvĩvw’a, ĩte kĩema, noithemba mbee wa Yeova.

3Na neena na ana ma Isilaeli, ũkĩmea, Osai nthenge yĩthĩwe nthembo ya naĩ; na kasaũ na katena ka ĩlondu, twa mwaka ũmwe, tũte kĩema twĩthĩwe nthembo ya kũvĩvw’a;

4na ng’ombe na ndũũme syĩthĩwe nthembo sya mũuo, sya kũthembwa mbee wa Yeova; na nthembo ya mũtu ũvulanĩtw’e na mauta: nũndũ ũmũnthĩ Yeova nũnũkũmumĩlĩla.

5Na maete ila Mose weaie mbee wa ĩeema ya kũmbanĩa: na ũmbano w’onthe wathengeea na waũngama mbee wa Yeova.

6Na Mose asya, Ũũ nĩw’o ũla Yeova weaie mwĩke: na ũtheu mũtisu wa Yeova ũkamumĩlĩla inyw’ĩ.

7Na Mose amwĩa Aluni, Thengeea kĩthembeo, ũthembe nthembo yaku ya naĩ, na nthembo yaku ya kũvĩvw’a, ũthembe nthembo ya wĩw’anĩthyo kwondũ waku mwene, na kwondũ wa andũ; na themba nthembo ya andũ, na kumya nthembo ya wĩw’anĩthyo kwondũ woo; o tondũ Yeova weaie.

8Kwondũ wa ũu Aluni athengeea kĩthembeo, na ooaa kasaũ ka nthembo ya naĩ, ĩla yaĩ kwondũ wake mwene.

9Na ana ma Aluni mamũetee nthakame; nake atolya kyaa kyake nthakamenĩ, na amĩvaka mbyanĩ sya kĩthembeo, na atulũĩla nthakame ĩtinanĩ ya kĩthembeo:

10ĩndĩ mathunya, na mbio, na koa mũvũthũ ũla waumiw’e ĩtemanĩ ya nthembo ya naĩ, avĩvĩsya kĩthembeonĩ; o tondũ Yeova wamwĩaĩe Mose.

11Na nyama na kĩthuma avĩvĩsya na mwaki ũtee wa mwako wa maeema.

12Nake ooaa nthembo ya kũvĩvw’a; na ana ma Aluni mamũetee nthakame, na amĩminzangĩsya ĩũlũ wa kĩthembeo kw’onthe.

13Na mamũetee nthembo ya kũvĩvw’a, kĩlungu, kĩlungu, na mũtwe: nake aivĩvĩsya kĩthembeonĩ.

14Na athambya mavu na maũũ, na amavĩvĩsya ĩũlũ wa nthembo ya kũvĩvw’a kĩthembeonĩ.

15Na aete nthembo ya andũ, na oosa mbũi ya nthembo ya naĩ ĩla yaĩ kwondũ wa andũ, na amyũaa, na amĩthemba kwondũ wa naĩ, o ta ĩla ya mbee.

16Na aete nthembo ya kũvĩvw’a, na amĩthemba kwĩanana na ũtw’ĩo.

17Na aete nthembo ya mũtu, na auta ũvĩ ũmwe, na oovĩvĩsya kĩthembeonĩ, vamwe na nthembo ya kũvĩvw’a ya kĩoko.

18O na ooaa ng’ombe na ndũũme, nthembo ya nthembo sya mũuo, ĩla yaĩ kwondũ wa andũ: na ana ma Aluni mamũetee nthakame, na amĩminzangĩsya ĩũlũ wa kĩthembeo kw’onthe,

19na mathunya ma ĩla ng’ombe na ma ĩla ndũũme, na mwĩthe, na mathunya ala mavw’ĩkĩte mavu, na mbio, na koa mũvũthũ ũla ũvw’ĩkĩte ĩtema:

20na mailĩĩla mathunya ĩũlũ wa ing’eng’eto, na avĩvĩsya mathunya kĩthembeonĩ:

21na ing’eng’eto na kũũ kwa ngalĩ ya kw’oko kwa aũme Aluni avyũlangya syĩthĩwe nthembo ya kũvyũlw’a mbee wa Yeova; o tondũ Mose weaie.

22Na Aluni ookĩlya moko make kwelekelya andũ, na amaathima; na atheea amina kũthemba nthembo ya naĩ, na nthembo ya kũvĩvw’a, na nthembo sya mũuo.

23Na Mose na Aluni malika ĩeemanĩ ya kũmbanĩa, na maumaala, na maathima andũ: na ũtheu mũtisu wa Yeova wamaumĩlĩla andũ onthe.

24Na kwauma mwaki mbee wa Yeova, na wavĩvĩsya nthembo ya kũvĩvw’a na mathunya kĩthembeonĩ: na yĩla andũ onthe mawonie, mookĩlya mawasya, na mavalũka na mothyũ moo.

← Chapter 8 Jump to: Chapter 10 →