Leviticus 8

Kamba (Mbivilia) 1956

← Chapter 7 Jump to: Chapter 9 →

1Na Yeova aneena na Mose, akĩmwĩa,

2Osa Aluni na ana make vamwe nake, na ila ngũa, na mauta ma kwĩtĩkĩsya, na kala kasalũ ka nthembo ya naĩ, na ndũũme ilĩ, na kĩkavũ kya kĩmũtũ kĩte ĩlawa;

3na ũmban’ya ũmbano w’onthe mũomonĩ wa ĩeema ya kũmbanĩa.

4Na Mose eeka o tondũ Yeova wamwĩaĩe; na ũmbano woombanw’a mũomonĩ wa ĩeema ya kũmbanĩa.

5Na Mose awĩa ũmbano, Ũũ nĩw’o ũla Yeova wĩaĩte wĩkwe.

6Na Mose amaete Aluni na ana make, na amathambya na manzĩ.

7Na amwĩkĩa ũla kanzũ, na amũvotoa mũsivi, na amwĩkĩa ngũa ndasa, na amwĩkĩa ngũa yĩtawa evotĩ, na amũvotoa mũsivi wa evoti ũla watumĩtwe na ũĩ, na kũmwoveea evoti naw’o.

8Na amwĩkĩa kakalo ka kĩthũi: na kakalonĩ ka kĩthũi eekĩa Ulimu na Thumimu.

9Na eekĩa ngutw’a mũtwenĩ wake; na ngutw’anĩ, ngalĩ ya mbee, eekĩa kĩlaũni kya thaavu, ngovĩa ntheu ya ũsumbĩ; o tondũ Yeova wamwĩaĩe Mose.

10Na Mose oosa mauta ma kwĩtĩkĩsya, na awĩtĩkĩsya mauta ũla wĩkalo na syĩndũ syonthe ila syaĩ nthĩnĩ waw’o, kwivathan’ya syĩthĩwe ntheu.

11Na aminzangĩsya amwe kĩthembeonĩ maminzangĩsya mũonza, na akĩtĩkĩsya kĩthembeo mauta na mĩio yakyo yonthe, na kĩndũ kya kũthambĩa na ĩtina yakyo, aivathan’ya syĩthĩwe ntheu.

12Na etĩkĩsya mauta ma kwĩtĩkĩsya mũtwenĩ wa Aluni, na amwĩtĩkĩsya mauta, amũvathan’ye ethĩwe mũtheu.

13Na Mose aete ana ma Aluni, na amavw’ĩka makanzũ, na amavotoa mĩsivi, na amekĩa tũkovila; o tondũ Yeova wamwĩaĩe Mose.

14Na aete kala kasalũ ka nthembo ya naĩ: na Aluni na ana make mailĩĩla moko mũtwenĩ wa kala kasalũ ka nthembo ya naĩ.

15Na akoaa; na Mose oosa nthakame, na amĩvaka mbyanĩ sya kĩthembeo ngalĩ syonthe na kyaa kyake, na athesya kĩthembeo, na atulũĩla nthakame ĩtinanĩ ya kĩthembeo, na akĩvatha kĩthĩwe kĩtheu, kũthemba nthembo ya wĩw’anĩthyo kwondũ wakyo.

16Nake oosa mathunya onthe ala me ĩũlũ wa mavu, na koa mũvũthũ ũla ũvw’ĩkĩte ĩtema, na mbio syelĩ, na mathunya masyo; na Mose aivĩvĩsya kĩthembeonĩ.

17Ĩndĩ kala kasalũ, na kĩthuma kyako, na nyama syako, na mũyoo wako, aivĩvĩsya na mwaki ũtee wa mwako wa maeema; o tondũ Yeova wamwĩaĩe Mose.

18Na aete ndũũme ya nthembo ya kũvĩvw’a: na Aluni na ana make mailĩĩla moko mũtwenĩ wa ĩla ndũũme.

19Na amyũaa; na Mose aminzangĩsya nthakame ĩũlũ wa kĩthembeo kw’onthe.

20Na atilanga ndũũme ilungu syayo; na Mose avĩvya mũtwe, na ilungu, na mathunya.

21Na athambya mavu na maũũ na manzĩ; na Mose avĩvĩsya ndũũme yonthe kĩthembeonĩ: yaĩ nthembo ya kũvĩvw’a yĩ mũuke mũseo: nthembo ĩla ĩvĩvĩaw’a Yeova na mwaki; o tondũ Yeova wamwĩaĩe Mose.

22Na aete ndũũme ĩla ĩngĩ, ĩla ndũũme ya ũvathan’yo: na Aluni na ana make mailĩĩla moko mũtwenĩ wa ndũũme.

23Na amyũaa; na Mose oosa nthakame yayo, na amĩvaka mũthyanĩ wa kũtũ kwa Aluni kwa ngalĩ ya kw’oko kwa aũme, na kyaanĩ kĩnene kya kw’oko kwa aũme, na kyaanĩ kĩnene kya kũũ kwa ngalĩ ya kw’oko kwa aũme.

24Na aete ana ma Aluni; na Mose avaka nthakame mũthyanĩ wa matũ moo ma ngalĩ ya kw’oko kwa aũme, na kyaanĩ kĩnene kya moko moo ma aũme, na kyaanĩ kĩnene kya maũũ moo ma ngalĩ ya kw’oko kwa aũme: na Mose aminzangĩsya nthakame ĩũlũ wa kĩthembeo kw’onthe.

25Na oosa mathunya na mwĩthe, na mathunya onthe ala me ĩũlũ wa mavu, na koa mũvũthũ ũla ũvw’ĩkĩte ĩtema, na mbio syelĩ, na mathunya masyo, na kũũ kwa ngalĩ ya kw’oko kwa aũme:

26na aumya nthĩnĩ wa kĩla kĩkavũ kya kĩmũtũ kĩte ĩlawa, kĩla kiĩtwe mbee wa Yeova, kamũtũ kamwe kate ĩlawa, na kamũtũ kamwe kavakĩtwe mauta, na kamũkate kamwe kavũthũ, na atwilĩĩla ĩũlũ wa mathunya, na ĩũlũ wa kũla kũũ kwa ngalĩ ya kw’oko kwa aũme:

27na ailĩĩla syonthe ĩũlũ wa moko ma Aluni, na ĩũlũ wa moko ma ana make, na aivyũlangya mbee wa Yeova syĩthĩwe nthembo ya kũvyũlw’a.

28Na Mose asyumya mokonĩ moo, na aivĩvĩsya kĩthembeonĩ ĩũlũ wa nthembo ya kũvĩvw’a: nĩ syĩndũ syavathiwe syĩthĩwe mũuke mũseo: nĩ nthembo ĩvĩvĩaw’a Yeova na mwaki.

29Na Mose oosa kĩng’eng’eto, na akĩvyũlangya kĩthĩwe nthembo ya kũvyũlw’a mbee wa Yeova: kyaĩ kĩlungu kya Mose kya ĩla ndũũme ya ũvathan’yo; o tondũ Yeova wamwĩaĩe Mose.

30Na Mose oosa mauta amwe ma kwĩtĩkĩsya, na nthakame ĩmwe ĩla yaĩ kĩthembeonĩ, na amũminzangĩsya Aluni, na ngũa syake, na ana make, na ngũa syoo vamwe nake, na amũvathan’ya Aluni ethĩwe mũtheu, vamwe na ngũa syake, na ana make, na ngũa syoo vamwe nake.

31Na Mose amwĩa Aluni na ana make, Uĩai nyama ĩsu mũomonĩ wa ĩeema ya kũmbanĩa: na mũkamĩye vo vamwe na kĩmũtũ kĩla kĩ kĩkavũnĩ kĩla kya ũvathan’yo, o tondũ nĩaie, ngyasya, Aluni na ana make mamĩye.

32Na ĩla yĩtiala ya nyama ĩsu na ya kĩmũtũ vĩvyai na mwaki.

33Na mũtikaaumaale mũomonĩ wa ĩeema ya kũmbanĩa mĩthenya mũonza, kũvika mĩthenya ya kũvathwa kwenyu yĩanĩe: nũndũ akamũvathan’ya vandũ va mĩthenya mũonza mwĩthĩwe atheu.

34O ũndũ kweekwa ũmũnthĩ, now’o Yeova wĩaĩte kwĩkwe, kũthemba nthembo ya wĩw’anĩthyo kwondũ wenyu.

35Mũomonĩ wa ĩeema ya kũmbanĩa mũkekala ũtukũ na mũthenya vandũ va mĩthenya mũonza, na kũsũvĩaa wĩaĩo wa Yeova, nĩ kana mũikakw’e: nũndũ nĩw’o nĩaĩĩtwe.

36Na Aluni na ana make meeka maũndũ onthe ala Yeova weaie na kanyw’a wa Mose.

← Chapter 7 Jump to: Chapter 9 →