Leviticus 14 — Kamba (Mbivilia) 1956

6Na nyũnyi ĩla ĩngĩ yĩ thayũ, akamyose, vamwe na mũtĩ wa mũkũũ, na langi mũtune mũno, na ĩsovo, na akailikye vamwe na nyũnyi yĩ thayũ nthakamenĩ ya nyũnyi ĩla yũaĩwe ĩũlũ wa manzĩ mavĩtĩte:

7na akamũminzangĩsye mũndũ ũla wa kũthew’a mangũ maminzangĩsya mũonza, na akasya nĩ mũtheu, na akalekye nyũnyi yĩ thayũ ĩthi weũnĩ.

8Na ũla wa ũthew’a akathambye ngũa syake, na kwenza nzw’ĩĩ syake syonthe, na kũthamba manzĩnĩ; na akeethĩwa mũtheu: na ĩtina wa ũu akasyoka mwakonĩ wa maeema, ĩndĩ akekala ũtee wa ĩeema yake mĩthenya mũonza.

9Na kũkeethĩwa mũthenya wa mũonza, akenze nzw’ĩĩ syake syonthe mũtwenĩ wake na kĩng’ew’a kyake na syĩnthakuva syake, o nzw’ĩĩ syake syonthe akenze: na akathambye ngũa syake, na akathambe mwĩĩ wake manzĩnĩ, na akeethĩwa mũtheu.

10Na mũthenya wa nyanya akose tũtũlũme twĩlĩ tũte kĩema, na kamwatĩ kamwe ka mwaka ũmwe kate kĩema, na ilungu itatũ sya ĩkũmi sya eva ya mũtu mũvinyu wĩthĩwe nthembo ya mũtu, ũvulanĩtw’e na mauta, na kĩthimi kĩtawa loki ya mauta.

11Na mũthembi ũla wĩmũthesya akamwĩkalya mũndũ ũla wĩthew’a, vamwe na syĩndũ isu, mbee wa Yeova, mũomonĩ wa ĩeema ya kũmbanĩa.

12Na mũthembi akose kamwe ka tũla tũtũlũme, na kũkathemba kethĩwe nthembo ya ĩvĩtyo, vamwe na loki ya mauta, na kwivyũlangya syĩthĩwe nthembo ya kũvyũlw’a mbee wa Yeova:

13na akoaĩe katũlũme vandũ vala moaĩaa nthembo ya naĩ na nthembo ya kũvĩvw’a, vala vandũ vatheu: o tondũ nthembo ya naĩ nĩ ya mũthembi, o ta ũu nthembo ya ĩvĩtyo nĩ yake: nĩ ntheu mũno.

14Na mũthembi akose nthakame ĩmwe ya nthembo ya ĩvĩtyo, na mũthembi akamĩvaka mũthyanĩ wa kũtũ kwa ngalĩ ya kw’oko kwa aũme kwa ũla wa kũthew’a, na kyaanĩ kĩnene kya kw’oko kwake kwa aũme, na kyaanĩ kĩnene kya kũũ kwake kwa aũme.

15Na mũthembi akose kĩthiminĩ kĩtawa loki ya mauta, na kwĩkĩa kĩtaanĩ kya kw’oko kwake kwa aka;

16na mũthembi akatolye kyaa kyake kya kw’oko kwa aũme mautanĩ ala me kw’okonĩ kwa aka, na kũminzangĩsya mauta na kyaa kyake maminzangĩsya mũonza mbee wa Yeova.

17Na ma mauta ala metiala kw’okonĩ kwake mũthembi akamavake mũthyanĩ wa kũtũ kwa ngalĩ ya kw’oko kwa aũme kwa ũla wĩthew’a, na kyaanĩ kĩnene kya kw’oko kwake kwa aũme, na kyaanĩ kĩnene kya kũũ kwake kwa aũme, vala ve nthakame ya nthembo ya ĩvĩtyo;

18na mauta ala metiala kw’okonĩ kwa mũthembi akekĩe mũtwenĩ wa ũla wĩthew’a: na mũthembi akathembe nthembo ya wĩw’anĩthyo kwondũ wake mbee wa Yeova.

19Na mũthembi akathembe nthembo ya naĩ, na kũmwĩw’anĩthya ũla wĩthew’a nũndũ wa ũvuku wake: na ĩtina akooaa nthembo ya kũvĩvw’a;

20na mũthembi akathembe nthembo ya kũvĩvw’a na nthembo ya mũtu kĩthembeonĩ; na mũthembi akathembe nthembo ya wĩw’anĩthyo kwondũ wake, na akeethĩwa mũtheu.

21Na ethĩwa nĩ ngya, na ndatonya kũsyona, nĩvo ĩndĩ wĩtwaa katũlũme kamwe kethĩwe nthembo ya ĩvĩtyo ka kũvyũlangw’a, ka wĩw’anĩthyo kwondũ wake, na kĩlungu kya ĩkũmi kya eva ya mũtu mũvinyu ũvulanĩtw’e na mauta wĩthĩwe nthembo ya mũtu, na loki ya mauta;

22na ndumbũ ilĩ, kana maswii elĩ ma ĩvũĩ, o ũndũ ũtonya kwona; na ĩmwe ĩkeethĩwa nthembo ya naĩ, na ĩla ĩngĩ nthembo ya kũvĩvw’a.

23Na mũthenya wa nyanya akaiete kwa mũthembi kwondũ wa kũthew’a kwake, mũomonĩ wa ĩeema ya kũmbanĩa, mbee wa Yeova:

24na mũthembi akose katũlũme ka nthembo ya ĩvĩtyo, na loki ya mauta, na mũthembi akaivyũlangya syĩthĩwe nthembo ya kũvyũlw’a mbee wa Yeova.

25Na akoae katũlũme ka nthembo ya ĩvĩtyo; na mũthembi akose nthakame ĩmwe ya nthembo ya ĩvĩtyo, na kũmĩvaka mũthyanĩ wa kũtũ kwa ngalĩ ya kw’oko kwa aũme kwa ũla wĩthew’a, na kyaanĩ kĩla kĩnene kya kw’oko kwake kwa aũme, na kyaanĩ kĩla kĩnene kya kũũ kwake kwa aũme.

26Na mũthembi akekĩe mauta amwe kĩtaanĩ kyake kya kw’oko kwa aka;

27na mũthembi akaminzangĩsye na kyaa kyake kya kw’oko kwa aũme mauta amwe me kw’okonĩ kwake kwa aka maminzangĩsya mũonza mbee wa Yeova:

28na mũthembi akavake mauta amwe ala me kw’okonĩ kwake mũthyanĩ wa kũtũ kwa ngalĩ ya kw’oko kwa aũme kwa ũla wĩthew’a, na kyaanĩ kĩla kĩnene kya kw’oko kwake kwa aũme, na kyaanĩ kĩnene kya kũũ kwake kwa aũme, vala ve nthakame ya nthembo ya ĩvĩtyo:

29na mauta ala metiala kw’okonĩ kwa mũthembi akekĩe mũtwenĩ wa ũla wĩthew’a, methĩwe ma wĩw’anĩthyo kwondũ wake mbee wa Yeova.

30Na akathembe ĩmwe ya ila ndumbũ, kana yĩmwe ya maswii ma ĩvũĩ, o ũndũ ũtonya kwona,

31o ũndũ ũtonya kwona, ĩmwe yĩthĩwe nthembo ya naĩ, na ĩla ĩngĩ yĩthĩwe nthembo ya kũvĩvw’a, vamwe na nthembo ya mũtu: na mũthembi akathembe nthembo ya wĩw’anĩthyo kwondũ wa ũla wĩthew’a mbee wa Yeova.

32Ũsu nĩw’o mwĩao wa ũla wĩ na ũthĩn’yo wa mangũ, ũla ũtatonya kwona kĩla kya kũthew’a kwake.

33Na Yeova aneena na Mose na Aluni, akĩmea,

34Mwalika nthĩ ya Kanaani, ĩla nĩmũnengae yĩthĩwe ng’ũndũ yenyu, na neekĩa ũthĩn’yo wa mangũ nyũmbanĩ yĩ nthĩ ya ng’ũndũ yenyu;

35nĩvo ĩndĩ mwene nyũmba wĩthi kũtavya mũthembi, akĩmwĩa, Nĩngwona nyie kana ve ũthĩn’yo nyũmbanĩ.

36Na mũthembi akatw’a maumaalye mĩio yonthe nyũmba ĩtiwe yĩ nthei, mũthembi atanalika kũsisya ũthĩn’yo, mĩio yonthe yĩ nyũmbanĩ ndĩkavukw’e: na ĩtina mũthembi akalika asisye nyũmba:

37nake akasisya ũthĩn’yo; na, sisya, ethĩwa ũthĩn’yo wĩ mawakonĩ ma nyũmba wĩ myalĩkanĩ, yĩ langi wĩ waiũ kana mũtune, na kwoneka kwaw’o nĩ mũliku nthĩnĩ wakonĩ;

38nĩvo mũthembi wĩuma nyũmbanĩ kũvika mũomonĩ wa nyũmba, na kũvinga nyũmba mĩthenya mũonza.

39Na mũthembi akasyoka mũthenya wa mũonza, na akasisya; na, sisya, ethĩwa ũthĩn’yo nũendeee mawakonĩ ma nyũmba;

40nĩvo ĩndĩ mũthembi wĩtw’a maumye mavia ala me na ũthĩn’yo nthĩnĩ, na kũmekya vandũ vavuku ũtee wa ndũa:

41na akatuma nyũmba ĩsu ĩvalavalwa nthĩnĩ ngalĩ syonthe, na makete mũthanga ũla mavalavalile, ũtee wa ndũa vandũ vavuku:

42na makose mavia angĩ, na kũmekĩa vandũ va mavia asu; na akose ndaka ĩngĩ, na kũvaka nyũmba.

43Na ethĩwa ũthĩn’yo nũũsyoka, na kumĩla nyũmbanĩ, amina kumya mavia, na amina kũvalavala nyũmba, na yathela kũvakwa ndaka;

44nĩvo mũthembi wĩlika na kũsisya; na, sisya, ethĩwa ũthĩn’yo nũendeee nyũmbanĩ, nĩ mangũ mai nyũmbanĩ: nĩ mbuku.

45Na akamĩomboe nyũmba, mavia mayo, na mĩtĩ yayo, na ndaka yonthe ya nyũmba; na akaitwaa ũtee wa ndũa vandũ vavuku.

46Na ĩngĩ ũla wĩlika nyũmbanĩ ĩvinda yonthe yĩ mbinge akeethĩwa mũvuku kũvika wĩoo.

47Na ũla wĩkoma ĩ nyũmba akathambye ngũa syake; na ũla wĩĩa ĩ nyũmba akathambye ngũa syake.

48Na ethĩwa mũthembi akalika, na kũsisya, na, sisya, ũthĩn’yo ndũnaendeea nyũmbanĩ, nyũmba yathela kũvakwa ndaka; nĩvo ĩndĩ mũthembi wĩasya nyũmba nĩ ntheu, nĩkwĩthĩwa ũthĩn’yo nĩ mũthelu.

49Na akose nyũnyi ilĩ sya kũthesya nyũmba, na mũtĩ wa mũkũũ, na langi mũtune mũno, na ĩsovo:

50na akoaĩe nyũnyi ĩmwe kĩndũnĩ kya yũmba ĩũlũ wa manzĩ mavĩtĩte:

51na akose ũla mũtĩ wa mũkũũ, na ĩsovo, na langi mũtune mũno, na nyũnyi yĩ thayũ, na kũlikya nthakamenĩ ya nyũnyi ĩla mbũae, na manzĩnĩ mavĩtĩte, na kũminzangĩsya nyũmba maminzangĩsya mũonza:

52na akathesye nyũmba na nthakame ya nyũnyi ĩsu, na manzĩ ala mavĩtĩte, na nyũnyi yĩ thayũ, na mũtĩ ũsu wa mũkũũ, na ĩsovo, na langi mũtune mũno:

53ĩndĩ akamĩlekye nyũnyi yĩ thayũ ĩende ũtee wa ndũa weũnĩ: o ta ũu akathembe nthembo ya wĩw’anĩthyo kwondũ wa nyũmba; na ĩkeethĩwa ntheu.

54Ũsu nĩw’o mwĩao kwondũ wa mĩthemba yonthe ya ũthĩn’yo wa mangũ na wa kĩea,

55na wa mangũ me ngũanĩ, na wa nyũmba,

56na wa vandũ vaimbu, na wa ngũsĩ, na wa vandũ vaw’engu;

57kũmanyĩsya yĩla wĩĩthĩwa mũvuku, na yĩla wĩĩthĩwa mũtheu: ũu nĩw’o mwĩao wa mangũ.