Leviticus 5

Kamba (Mbivilia) 1956

← Chapter 4 Jump to: Chapter 6 →

1Na ethĩwa mũndũ o na wĩva akeeka naĩ, akĩw’a wasya wa wĩvĩto, nake nĩ ngũsĩ, ethĩwa nĩwonete kana kũmanya, ethĩwa ndeũtavan’ya ũndũ ũsu, nĩvo ĩndĩ wĩkua naĩ yake mwene.

2Kana ethĩwa mũndũ o na wĩva akakiita kĩndũ kĩvuku, ethĩwa nĩ nyamũ ngw’ũ mbuku, kana indo ngw’ũ mbuku, kana tũsamũ tũkw’ũ tũvuku tũla tũtambũkaa, na ũndũ ũsu ndawĩsĩ, nake aivukw’a, nĩvo ĩndĩ nĩwatw’ĩka mũvĩtan’ya.

3Kana ethĩwa akakiita ũvuku wa mũndũ, o ũndũ ũvuku wake ũilyĩ ũla ũvukĩtw’e nĩw’o, na ũndũ ũsu ndawĩsĩ; yĩla wĩũmanya, nĩvo ĩndĩ nĩwatw’ĩka mũvĩtan’ya.

4Kana ethĩwa mũndũ o na wĩva akeevĩta ateũsũanĩa aineena na ilomo syake kwĩka naĩ, kana kwĩka nesa, ũndũ o na wĩva ũla mũndũ ũkevĩta ateũsũanĩa, na ũndũ ũsu ndawĩsĩ; yĩla wĩũmanya, nĩvo ĩndĩ wĩĩthĩwa e na ĩvĩtyo ya ũmwe wa maũndũ asu.

5Na kũkeethĩwa, yĩla wĩĩthĩwa e na ĩvĩtyo ũndũnĩ ũmwe wa asu, akaumbũle ũndũ ũsu ũla wavĩtisye:

6na akamũetee Yeova nthembo yake ya ĩvĩtyo kwondũ wa naĩ yake ĩla wavĩtisye, kamwatĩ kana mbaika, kuma ndĩthyanĩ yĩthĩwe nthembo ya naĩ; na mũthembi akathembe nthembo ya kũmwĩw’anĩthya ũsu ũndũ wa naĩ yake.

7Na ethĩwa ndatonya kwona katena ka ĩlondu, nĩvo ĩndĩ wĩmũetee Yeova nthembo yake ya ĩvĩtyo kwondũ wa ũndũ ũla wavĩtisye, ndumbũ ilĩ, kana maswii elĩ ma ĩvũĩ; ĩmwe yĩthĩwe nthembo ya naĩ, na ĩla ĩngĩ yĩthĩwe nthembo ya kũvĩvw’a.

8Na akaietee mũthembi, nake akambe kũthemba ĩla ya nthembo ya naĩ, na kũmila mũtwe wayo ngingo ĩtilĩke, ĩndĩ ndakamyatũan’ye:

9na akaminzangĩsye nthakame ĩmwe ya nthembo ya naĩ ngalĩ ya kĩthembeo; na nthakame ĩla yĩtiala ĩkamenew’e ĩtinanĩ ya kĩthembeo: nĩ nthembo ya naĩ.

10Na akathembe ĩla ya kelĩ yĩthĩwe nthembo ya kũvĩvw’a, kwĩanana na ũtw’ĩo; na mũthembi akathembe nthembo ya kũmwĩw’anĩthya ũsu ũndũ wa naĩ yake ĩla wavĩtisye, nake akaekewa.

11Ĩndĩ ethĩwa ndatonya kwona ndumbũ ilĩ, kana maswii elĩ ma ĩvũĩ, nĩvo ĩndĩ wĩete nthembo yake kwondũ wa naĩ ĩla wavĩtisye, kĩlungu kya ĩkũmi kya eva ya mũtu mũvinyu wĩthĩwe nthembo ya naĩ: ndakawĩkĩe mauta, o na ndakawĩkĩe ũvumba ĩũlũ waw’o; nũndũ nĩ nthembo ya naĩ.

12Na akamũetee mũthembi, na mũthembi akauta ũvĩ wake waw’o wĩthĩwe ũlilikan’yo wayo, na kũvĩvĩsya kĩthembeonĩ, ĩũlũ wa nthembo sya Yeova ila ivĩvaw’a na mwaki: nayo nĩ nthembo ya naĩ.

13Na mũthembi akathembe nthembo ya kũmwĩw’anĩthya ũsu nũndũ wa naĩ yake ĩla wavĩtisye ũndũnĩ o na wĩva wa maũndũ aa, nake akaekewa: na kĩla kĩtiala kĩkeethĩwa kya mũthembi, o ta nthembo ya mũtu.

14Na Yeova aneena na Mose, akĩmwĩa,

15Ethĩwa mũndũ o na wĩva akavĩtya, na kwĩka naĩ afesĩ, maũndũnĩ matheu ma Yeova; nĩvo ĩndĩ wĩmũetee Yeova nthembo yake ya ĩvĩtyo, ndũũme ya ndĩthya ĩte kĩema, kwĩanana na ũndũ wĩona thooa wayo wĩana vethanĩ wa sekeli, kwĩanana na sekeli ya vala vandũ vatheu, yĩthĩwe nthembo ya ĩvĩtyo:

16nake akaĩve kwondũ wa ĩvĩtyo yake yĩla wavĩtisye ũndũnĩ mũtheu, na akwongeleele kĩlungu kya katano, na kũmũnenga mũthembi; na mũthembi akamwĩw’anĩthya kwondũ wa ĩla ndũũme ya nthembo ya ĩvĩtyo, nake akaekewa.

17Na ethĩwa mũndũ o na wĩva akeeka naĩ, na kwĩka ũndũ o na wĩva ũla Yeova weaie ndũkekwe; o na ethĩwa ndesĩ nake nĩwatw’ĩka mũvĩtan’ya, na akakua ũthũku wake.

18Na akamũetee mũthembi ndũũme ĩte kĩema kuma ndĩthyanĩ, kwĩanana na ũndũ wĩona thooa wayo wĩana, yĩthĩwe nthembo ya ĩvĩtyo; na mũthembi akathembe nthembo ya kũmwĩw’anĩthya ũsu ũndũ wa ĩvĩtyo wavĩtisye atesĩ na ndaamanya nĩ ĩvĩtyo, nake akaekewa.

19Nayo nĩ nthembo ya ĩvĩtyo: vate ndĩi nĩ mũvĩtan’ya mbee wa Yeova.

← Chapter 4 Jump to: Chapter 6 →