Leviticus 7

Kamba (Mbivilia) 1956

← Chapter 6 Jump to: Chapter 8 →

1Na ũu nĩw’o mwĩao wa nthembo ya ĩvĩtyo: nĩ ntheu mũno.

2Vandũ vala moaĩaa nthembo ya kũvĩvw’a nĩvo meũaĩaa nthembo ya ĩvĩtyo; na nthakame yayo akaminzangĩsye ĩũlũ wa kĩthembeo kw’onthe.

3Na akathembe mathunya mayo onthe: mwĩthe, na mathunya ala mavw’ĩkaa mavu,

4na mbio syelĩ, na mathunya ala makwatene nasyo, ala me vakuvĩ na kĩnyunyu, na koa mũvũthũ ũla ũvw’ĩkĩte ĩtema, vamwe na mbio, akaumye;

5na mũthembi akaivĩvĩsye kĩthembeonĩ syĩthĩwe nthembo ya kũmũvĩvĩsya Yeova na mwaki: nĩ nthembo ya ĩvĩtyo.

6Kĩla mũndũ mũũme wa athembi akaye: nĩĩwe vandũ vatheu: nĩ ntheu mũno.

7O ũndũ ĩilyĩ nthembo ya naĩ, nĩw’o ĩilyĩ nthembo ya ĩvĩtyo; mwĩao wasyo nĩ ũmwe: mũthembi ũla wĩthemba nthembo ya wĩw’anĩthyo nayo, ĩkeethĩwa yake.

8Na mũthembi ũla wĩthemba nthembo ya kũvĩvw’a ya mũndũ o na wĩva, o mũthembi ũsu eyosee kĩthuma kya nthembo ya kũvĩvw’a ĩla wathembie.

9Na kĩla nthembo ya mũtu ĩla ĩkaangĩwe ikonĩ nthĩnĩ, na yonthe ĩla ĩkaangĩwe kĩkaanginĩ, na ĩla ĩkaangĩwe ĩtandaanĩ ya kĩaa, ĩkeethĩwa ya mũthembi ũla wamĩthembie.

10Na kĩla nthembo ya mũtu, ũvulanĩtw’e na mauta, kana mũmũ, ĩkeethĩwa ya ana onthe ma Aluni, meanen’ye.

11Na ũu nĩw’o mwĩao wa nthembo ya nthembo sya mũuo, ĩla mũndũ wĩmũthembea Yeova.

12Ethĩwa emĩthemba ũndũ wa mũvea, nĩvo ĩndĩ wĩthemba vamwe na nthembo ya mũvea tũmũtũ tũte ĩlawa tũvulanĩtw’e na mauta, na tũmĩkate tũvũthũ tũte ĩlawa tũvakĩtwe mauta, na tũmũtũ twa mũtu mũvinyu ũvulanĩtw’e na mauta, na tũkakaangwa.

13Vamwe na tũmũtũ tũla twĩ na ĩlawa akathembe nthembo yake o vamwe na nthembo ya nthembo syake sya mũuo kwondũ wa mũvea.

14Na kuma nthĩnĩ wayo akathembe kamwe ka kĩla nthembo kethĩwe nthembo ya kũkĩlĩw’a Yeova; ĩkeethĩwa ya mũthembi ũla ũminzangĩasya nthakame ya nthembo sya mũuo.

15Na nyama sya nthembo ya nthembo syake sya mũuo kwondũ wa mũvea ikaĩwe mũthenya ũla wĩthemba nthembo yake; ndakatialye kũvika kĩoko.

16Ĩndĩ ethĩwa nthembo ya kĩndũ kyake kĩla wĩthemba nĩ ya wĩvĩto, kana nthembo ya kumya na ngoo ya kwenda, ĩkaĩwe mũthenya ũla wĩthemba nthembo yake; na ũnĩ ũsu kĩla kĩtiala kyayo kĩĩwa:

17ĩndĩ kĩla kĩtiala kya nyama sya nthembo ĩsu mũthenya wa katatũ kĩvĩvw’e na mwaki.

18Na ethĩwa nyama o na syĩva sya nthembo ya nthembo syake sya mũuo ikaĩwa mũthenya wa katatũ, ndĩketĩkĩlwa, o na ndĩkatalĩlwa ũsu ũla wĩmĩthemba: ĩkeethĩwa ũthatyo, na mũndũ ũla wĩmĩya akakua ũthũku wake.

19Nyama ila syĩkiita kĩndũ kĩvuku itikaĩwe; ivĩvw’e na mwaki. Na ũndũ wa nyama, kĩla mũndũ mũtheu nũtonya kwiya:

20ĩndĩ mũndũ ũla wĩya nyama sya nthembo ya nthembo sya mũuo, ila sya Yeova, e mũvuku, mũndũ ũsu akavetwe andũnĩ make.

21Na yĩla mũndũ o na wĩva wĩkiita kĩndũ o na kĩva kĩvuku, ũvuku wa mũndũ, kana nyamũ mbuku, kana kĩndũ o na kĩva kĩvuku kya kũthatya, na kũya nyama sya nthembo ya nthembo sya mũuo, ila sya Yeova, mũndũ ũsu akavetwe andũnĩ make.

22Na Yeova aneena na Mose, akĩmwĩa,

23Neena na ana ma Isilaeli, ũkĩmea, Mũtikaye mathunya o na meva, ma ng’ombe, kana ĩlondu, kana mbũi.

24Na mathunya ma nyamũ ya kũkw’a, na mathunya ma ĩla yalĩkile nĩ nyamũ, nĩmatonya kũtethya wĩa ũngĩ o na wĩva; ĩndĩ mũikamaye nongi.

25Nũndũ o ũla wĩya mathunya ma nyamũ, ala andũ mamũthembeaa Yeova methĩwe nthembo ya kũvĩvw’a na mwaki, o mũndũ ũla wĩmaya akavetwe andũnĩ make.

26Motũonĩ menyu onthe mũikaaye nthakame o na yĩva yonthe, ethĩwa nĩ ya nyũnyĩ kana ya nyamũ.

27O ũla wĩya nthakame o na yĩva, mũndũ ũsu akavetwe andũnĩ make.

28Na Yeova aneena na Mose, akĩmwĩa,

29Neena na ana ma Isĩlaelĩ, ũkĩmea, Ũla wĩmumĩsya Yeova nthembo ya nthembo syake sya mũuo akamũetee Yeova nthembo yake kuma nthĩnĩ wa nthembo ya nthembo sya mũuo:

30moko make mwene makaete nthembo sya Yeova ila ivĩvaw’a na mwaki; akaete mathunya vamwe na kĩng’eng’eto, nĩ kana kĩng’eng’eto kĩvyũlangw’e kĩthĩwe nthembo ya kũvyũlw’a mbee wa Yeova.

31Na mũthembi akavĩvĩsye mathunya kĩthembeonĩ; ĩndĩ kĩng’eng’eto kĩkeethĩwa kya Aluni na ana make.

32Na kũũ kwa ngalĩ ya kw’oko kwa aũme mũkanenge mũthembi kwĩthĩwe nthembo ya kũkĩlw’a kumw’a nthĩnĩ wa nthembo sya nthembo syenyu sya mũuo.

33Ũla wa ana ma Aluni ũla ũthembaa nthakame ya nthembo sya mũuo, na mathunya, kũũ kwa ngalĩ ya kw’oko kwa aũme kũkeethĩwa kĩlungu kyake.

34Nũndũ kĩng’eng’eto kya kũvyũlw’a na kũũ kwa kũkĩlw’a nĩnaumisye nthĩnĩ wa nthembo sya nthembo sya mũuo sya ana ma Isilaeli, na nĩmũnengete mũthembi Aluni na ana make syĩthĩwe ilungu syoo tene na tene kuma kwa ana ma Isilaeli.

35Kĩĩ nĩkyo kĩlungu kya Aluni, na kĩlungu kya ana make, kwondũ wa kwĩtĩkĩw’a mauta kwoo, kumw’a nthĩnĩ wa nthembo sya Yeova ila ivĩvaw’a na mwaki, mũthenya ũla wamanenganie mamũthũkũme Yeova wĩanĩ wa ũthembi;

36kĩla Yeova weaie manengwe kya ana ma Isilaeli, mũthenya ũla wametĩkĩsye mauta. Nĩ kĩlungu kyoo tene na tene mosyaanĩonĩ moo onthe.

37Ũũ nĩw’o mwĩao wa nthembo ya kũvĩvw’a, na wa nthembo ya mũtu, na wa nthembo ya naĩ, na wa nthembo ya ĩvĩtyo, na wa kũvathan’ya, na wa nthembo ya nthembo sya mũuo;

38ũla Yeova wamwĩaĩe Mose kĩĩmanĩ kya Sinai, mũthenya ũla wameaĩe ana ma Isilaeli mamũthembee Yeova nthembo syoo, weũnĩ wa Sinai.

← Chapter 6 Jump to: Chapter 8 →