Leviticus 13 — Kamba (Mbivilia) 1956

1Na Yeova aneena na Mose na Aluni, akĩmea.

2Yĩla mũndũ wĩĩthĩwa na vandũ vaimbu, kana ngũsĩ, kana vandũ vaw’engu kĩkondenĩ kya mwĩĩ wake, na vakatw’ĩka ũthĩn’yo wa mangũ kĩkondenĩ kya mwĩĩ wake, nĩvo ĩndĩ wĩetwe kwa mũthembi Aluni, kana kwa mwana ũmwe wake mũthembi:

3na mũthembi akasisya ũla ũthĩn’yo kĩkondenĩ kya mwĩĩ wake: na ethĩwa maw’ĩa ala me ũthĩn’yonĩ nĩ maalyũku makethĩwa meũ, na ũthĩn’yo wooneka ũlikĩte nthĩnĩ kũthonoka kĩkonde kya mwĩĩ wake, nĩ ũthĩn’yo wa mangũ; na mũthembi akamũsisya, na kwasya nĩ mũvuku.

4Na ethĩwa vandũ vau vaw’engu nĩ veũ kĩkondenĩ kya mwĩĩ wake, na vandũ vau vationeka ve valiku kũthonoka kĩkonde kya mwĩĩ wake, na maw’ĩa ma vo ti maalyũku makethĩwa meũ, nĩvo ĩndĩ mũthembi wĩmũvatha ũla wĩ na ũthĩn’yo mĩthenya mũonza:

5na mũthembi akamũsisya mũthenya wa mũonza: na, sisya, ethĩwa nũkwona ũthĩn’yo ũũngamĩte, na ũthĩn’yo ndũendeee kĩkondenĩ, nĩvo ĩndĩ mũthembi wĩmũvatha mĩthenya ĩngĩ mũonza:

6na mũthembi akamũsisya ĩngĩ mũthenya wa mũonza; na, sisya, ethĩwa ũthĩn’yo nĩwambĩlĩlye kũvoa, na ũthĩn’yo ndũendeee kĩkondenĩ, nĩvo ĩndĩ mũthembi wĩasya nĩ mũtheu: ve ngũsĩ: nake akathambye ngũa syake, na akeethĩwa mũtheu.

7Ĩndĩ ethĩwa ngũsĩ ĩkaendeea kĩkondenĩ, ĩtina wa kwĩyonan’ya kwake kwa mũthembi kwondũ wa kũthew’a kwake, akeeyonan’ye ĩngĩ kwa mũthembi:

8na mũthembi akasisya: na, sisya, ethĩwa ngũsĩ nĩendeee kĩkondenĩ, nĩvo ĩndĩ mũthembi wĩasya nĩ mũvuku: nĩ mangũ.

9Yĩla mũndũ wĩ na ũthĩn’yo wa mangũ, nĩvo wĩetwe kwa mũthembi;

10na mũthembi akasisya; na, sisya, ethĩwa ve vandũ vaimbũ veũ kĩkondenĩ, na maw’ĩa nĩ maalyũku makethĩwa meũ, na vandũnĩ vau vaimbu vakethĩwa nyama yumĩlĩte,

11nĩ mangũ ma tene kĩkondenĩ kya mwĩĩ wake, na mũthembi akasya nĩ mũvuku: ndakamũvathe; nũndũ nĩ mũvuku.

12Na ethĩwa mangũ makaumĩla na kũendeea kĩkondenĩ, na mangũ asu makeekunĩkĩlya kĩkonde kyonthe kya ũla wĩ na ũthĩn’yo ũsu kuma mũtwe kũvika maũũ make, o ũndũ mũthembi wĩona;

13nĩvo ĩndĩ mũthembi wĩsisya; na, sisya, ethĩwa mangũ nĩmekunĩkĩlĩtye mwĩĩ wake w’onthe, akasya nĩ mũtheu ũla wĩ na ũthĩn’yo ũsu: w’onthe ũalyũkĩte ũkethĩwa mweũ: nake nĩ mũtheu.

14Ĩndĩ o yĩla nyama yumĩlĩte ĩkoneka mũndũnĩ ũsu akeethĩwa mũvuku.

15Na mũthembi akasisya nyama ĩsu yumĩlĩte, na kwasya nĩ mũvuku: nyama ĩsu yumĩlĩte nĩ mbuku: nĩ mangũ.

16Kana ethĩwa nyama ĩsu yumĩlĩte ĩkaalyũka ĩngĩ, ĩkethĩwa nzaũ, nĩvo ĩndĩ wĩenda kwa mũthembi;

17na mũthembi akamũsisya; na, sisya, ethĩwa ũthĩn’yo ũsu nĩ mũalyũku ũkethĩwa mweũ, nĩvo ĩndĩ mũthembi wĩasya nĩ mũtheu ũla wĩ na ũthĩn’yo: nake nĩ mũtheu.

18Na yĩla mwĩĩ wĩĩthĩwa na mũimũ kĩkondenĩ kyaw’o, naw’o ũivoa,

19na vandũ vala vaĩ mũimũ ũsu ve vandũ vaimbu veũ, kana vandũ vaw’engu vatune vanini, akamwon’ye mũthembi vandũ vau;

20na mũthembi akasisya; na, sisya, ethĩwa kwoneka kwa vo nĩ valiku kũthonoka kĩkonde, na maw’ĩa ma vo nĩ maalyũku makethĩwa meũ, nĩvo ĩndĩ mũthembi wĩasya nĩ mũvuku: nĩ ũthĩn’yo wa mangũ, nĩwumĩlĩte mũimũnĩ.

21Ĩndĩ ethĩwa mũthembi akavasisya, na, sisya, vati maw’ĩa meũ nthĩnĩ wa vo, na ethĩwa tĩ valiku kũthonoka kĩkonde, ĩndĩ nĩvambĩlĩlye kũvoa; nĩvo ĩndĩ mũthembi wĩmũvatha mĩthenya mũonza:

22na ethĩwa vakaendeea kĩkondenĩ, nĩvo ĩndĩ mũthembi wĩasya nĩ mũvuku: nĩ ũthĩn’yo.

23Ĩndĩ ethĩwa vandũ vau vaw’engu vakekalaa o vamwe, na vaikaendeea, nĩ ĩlanga ya mũimũ; na mũthembi akasya nĩ mũtheu.

24Kana yĩla mwĩĩ wĩ na vandũ veũlalaka kĩkondenĩ kyaw’o, na nyama ĩla yumĩlĩte vala veũlalaka ĩkatw’ĩka vandũ vaw’engu, vatune vanini, kana veũ;

25nĩvo ĩndĩ mũthembi wĩvasisya; na, sisya, ethĩwa maw’ĩa ala me nthĩnĩ wa vandũ vau vaw’engu nĩ maalyũku makethĩwa meũ, na kwoneka kwa vo nĩ valiku kũthonoka kĩkonde; nĩ mangũ, nĩmaumĩlĩte nthĩnĩ wa vandũ veũlalaka: na mũthembi akasya nĩ mũvuku: nĩ ũthĩn’yo wa mangũ.

26Ĩndĩ ethĩwa mũthembi akavasisya, na, sisya, vati maw’ĩa meũ nthĩnĩ wa vandũ vau vaw’engu, na ti valiku kũthonoka kĩkonde, ĩndĩ nĩvambĩlĩlye kũvoa; nĩvo ĩndĩ mũthembi wĩmũvatha mĩthenya mũonza:

27na mũthembi akamũsisya mũthenya wa mũonza: na ethĩwa nĩveũendeea kĩkondenĩ, nĩvo ĩndĩ mũthembi wĩasya nĩ mũvuku: nĩ ũthĩn’yo wa mangũ.

28Na ethĩwa vandũ vau vaw’engu vekalaa vamwe, na vatĩendeee kĩkondenĩ, ĩndĩ nĩvambĩlĩlye kũvoa; nĩ wimbu wa vala veũlalaka, na mũthembi akasya nĩ mũtheu: nũndũ nĩ ĩlanga ya vala veũlalaka.

29Na yĩla mũndũ mũũme kana mũndũ mũka wĩ na ũthĩn’yo mũtwenĩ kana kĩng’ew’anĩ,

30nĩvo ĩndĩ mũthembi wĩsisya ũthĩn’yo; na, sisya, ethĩwa kwoneka kwaw’o nĩ mũliku kũthonoka kĩkonde, na nthĩnĩ waw’o ve nzw’ĩĩ mbalaanĩku iilyĩ ĩuuku, nĩvo ĩndĩ mũthembi wĩasya nĩ mũvuku: ve kĩea, nĩ mangũ ma mũtwe kana ma kĩng’ew’a.

31Na ethĩwa mũthembi akasisya ũthĩn’yo ũsu wa kĩea, na, sisya, kwoneka kwakyo ti kĩliku kũthonoka kĩkonde, na vati nzw’ĩĩ nziũ nthĩnĩ wakyo, nĩvo ĩndĩ mũthembi wĩmũvatha ũla wĩ na ũthĩn’yo wa kĩea kyu mĩthenya mũonza:

32na mũthenya wa mũonza mũthembi akasisya ũthĩn’yo ũsu; na, sisya, ethĩwa kĩea kĩtiendeee, na nthĩnĩ wakyo vati nzw’ĩĩ iilyĩ ĩuuku, na kwoneka kwa kĩea ti kĩliku kũthonoka kĩkonde,

33nĩvo ĩndĩ wĩenzwa, ĩndĩ ndakenzwe vala ve kĩea; na mũthembi akamũvathe ũla wĩ na kĩea mĩthenya mũonza ĩngĩ:

34na mũthenya wa mũonza mũthembi akasisya kĩea; na, sisya, ethĩwa kĩea kĩtinaendeea kĩkondenĩ, na kwoneka kwakyo ti kĩliku kũthonoka kĩkonde; nĩvo ĩndĩ mũthembi wĩasya nĩ mũtheu: na akathambye ngũa syake, nake akeethĩwa mũtheu.

35Ĩndĩ ethĩwa kĩea nĩkĩendeee kĩkondenĩ ĩtina wa kũthew’a kwake,

36nĩvo mũthembi wĩmũsisya; na, sisya, ethĩwa kĩea nĩkĩendeee kĩkondenĩ, mũthembi ndakamanthe nzw’ĩĩ iilyĩ ĩuuku; nĩ mũvuku.

37Ĩndĩ ethĩwa nũnũkwona kĩea kĩũngamĩte, na nzw’ĩĩ nziũ nikũmea nthĩnĩ wa kĩea; kĩea nĩkĩvoete, nake nĩ mũtheu: na mũthembi akasya nĩ mũtheu.

38Na yĩla mũndũ mũũme kana mũndũ mũka wĩ na kũndũ kũw’engu kĩkondenĩ kya mwĩĩ, o kũw’engu kweũ;

39nĩvo mũthembi wĩsisya; na, sisya, ethĩwa kũndũ kũu kũw’engu kĩkondenĩ kya mwĩĩ kũkethĩwa kweu vanini, nĩ mũvĩvya, nĩwumĩlĩte kĩkondenĩ; nake nĩ mũtheu.

40Na ethĩwa nzw’ĩĩ sya mũndũ nĩ ngunyũku mũtwe, e ũvaa; ĩndĩ nĩ mũtheu.

41Na ethĩwa nzw’ĩĩ nĩ ngunyũku mũtwe kuma ũthyũnĩ, we e ũvaa wa kĩtulya; ĩndĩ nĩ mũtheu.

42Ĩndĩ ethĩwa ve ũthĩn’yo mũtune vanini mũtwenĩ ũla wĩ ũvaa katĩ, kana kĩtulyanĩ kya ũthyũ kĩ ũvaa; nĩ mangũ maumĩlĩte mũtwenĩ wake wĩ ũvaa katĩ, kana kĩtulyanĩ kya ũthyũ kĩ ũvaa.

43Nĩvo mũthembi wĩmũsisya; na, sisya, ethĩwa wimbu wa ũthĩn’yo nĩ mũtune vanini mũtwenĩ wake wĩ ũvaa, kana kĩtulyanĩ kyake kya ũthyũ kĩ ũvaa, ũkyoneka ta mangũ kĩkondenĩ kya mwĩĩ;

44we nĩ mũndũ wĩ na mangũ, nĩ mũvuku; mũthembi ndatĩa kwasya nĩ mũvuku; ũthĩn’yo wake wĩ mũtwenĩ wake.

45Na ũla wĩ na ũthĩn’yo ũsu, ngũa syake ikatembũangwe, na nzw’ĩĩ sya mũtwe wake ikavuwe, na akavw’ĩke kĩlomo kyake kya ĩũlũ, na kũneena na wasya mũnene, Mũvuku, mũvuku.

46Mĩthenya yonthe ĩla wĩĩthĩwa na ũthĩn’yo akeethĩwa mũvuku; nake nĩ mũvuku: akekale e weka; ũtũo wake ũkeethĩwa ũtee wa mwako wa maeema.

47Na ngũa ĩla yĩ na ũthĩn’yo wa mangũ nthĩnĩ wayo, ethĩwa nĩ ngũa ĩtumĩtwe ya maw’ĩa ma malondu, kana ngũa ya katane;

48ethĩwa wĩ mbeinĩ, kana mbĩnonĩ; ngũanĩ ya katane, kana ya maw’ĩa ma malondu; ethĩwa wĩ kĩthumanĩ, kana kĩndũnĩ o na kĩva kĩseũvĩtw’e kya kĩthuma;

49ethĩwa ũthĩn’yo ũilyĩ waiũ kana mũtune wĩ ngũanĩ, kana kĩthumanĩ, kana mbeinĩ, kana mbĩnonĩ, kana kĩndũnĩ o na kĩva kĩseũvĩtw’e kya kĩthuma; nĩ ũthĩn’yo wa mangũ, na mũvaka ũkonanw’e kwa mũthembi.

50Na mũthembi akasisya ũthĩn’yo, na akavathe kĩla kĩ na ũthĩn’yo mĩthenya mũonza:

51na akasisya ũthĩn’yo mũthenya wa mũonza: ethĩwa ũthĩn’yo nũendeee ngũanĩ, ethĩwa wĩ mbeinĩ, kana mbĩnonĩ, kana kĩthumanĩ, kĩthuma kya wĩa o na wĩva; ũthĩn’yo nĩ mangũ mai; nĩ mbuku.

52Na akavĩvye ngũa, ethĩwa nĩ mbei kana mbĩno, ngũanĩ ya maw’ĩa ma ĩlondu kana ya katane, kana kĩndũnĩ o na kĩva kĩseũvĩtw’e kya kĩthuma, kĩla kĩ na ũthĩn’yo nthĩnĩ wakyo: nũndũ nĩ mangũ mai; kĩvĩvw’e na mwaki.

53Na ethĩwa mũthembi akasisya, na, sisya, ũthĩn’yo ndũnaendeea ngũanĩ, mbeinĩ, kana mbĩnonĩ, kana kĩndũnĩ o na kĩva kĩseũvĩtw’e kya kĩthuma;

54nĩvo mũthembi wĩtw’a mathambye kĩndũ kĩla kĩ na ũthĩn’yo nthĩnĩ wakyo, na akakĩvathe mĩthenya mũonza ĩngĩ:

55na mũthembi akasisya, ĩtina wa kũthambw’a kwa ũthĩn’yo; na, sisya, ethĩwa ũthĩn’yo ndũnaalyũka langi waw’o, na ũthĩn’yo ndũnaendeea, nĩ mbuku; mĩvĩvye na mwaki: nĩ wai, ethĩwa ũvaa wĩ nthĩnĩ kana ũtee.

56Na ethĩwa mũthembi akasisya, na, sisya, ũthĩn’yo nĩwambĩlĩlye kũvoa ĩtina wa kũthambw’a kwaw’o, nĩvo ĩndĩ wĩvatembũa aumye vala ve ũthĩn’yo ngũanĩ, kana kĩthumanĩ, kana mbeinĩ, kana mbĩnonĩ:

57na ethĩwa ĩtina wa kwĩka ũu ũkooneka ngũanĩ, ethĩwa nĩ mbeinĩ kana mbĩnonĩ, kana kĩndũnĩ o na kĩva kĩseũvĩtw’e kya kĩthuma, nũkumĩla: vĩvya na mwaki kĩndũ kĩla kĩ na ũthĩn’yo.

58Na ngũa, mbei kana mbĩno, kana kĩndũ o na kĩva kĩseũvĩtw’e kya kĩthuma, kĩla wĩthambya, ethĩwa ũthĩn’yo nĩwumĩte nthĩnĩ wasyo, kĩkathambwe ĩvinda ya kelĩ, na kĩkeethĩwa kĩtheu.

59Ũsu nĩw’o mwĩao wa ũthĩn’yo wa mangũ ngũanĩ ĩtumĩtwe na maw’ĩa ma ĩlondu kana ya katane, mbeinĩ kana mbĩnonĩ, kana kĩndũnĩ o na kĩva kĩseũvĩtw’e kya kĩthuma, wa kwasya nĩ kĩtheu, kana kwasya nĩ kĩvuku.