Leviticus 15

Kamba (Mbivilia) 1956

← Chapter 14 Jump to: Chapter 16 →

1Na Yeova aneena na Mose na Aluni, akyasya,

2Neenai na ana ma Isilaeli, noimea, Mũndũ o na wĩva e na mũluo kuma mwĩĩnĩ wake, nĩ mũvuku kwondũ wa mũluo wake.

3Na ũvuku wake nĩ ũũ nthĩnĩ wa mũluo wake: ethĩwa mwĩĩ wake wĩumya mavia ma mũluo wake, kana ethĩwa mũluo wake nũsiĩĩwa mwĩĩnĩ wake, nĩ ũvuku wake.

4Ũkomo o na wĩva ũla ũsu wĩ na mũluo ũkomee ũkeethĩwa wĩ mũvuku; na kĩla kĩndũ wĩĩkalĩla kĩkeethĩwa kĩ kĩvuku.

5Na o ũla wĩkiita ũkomo wake mũvaka athambye ngũa syake, na akathamba na manzĩ, na akeethĩwa mũvuku kũvika wĩoo.

6Na ũla wĩĩkalĩla kĩndũ kĩla kĩkalĩlwe nĩ ũla wĩ na mũluo mũvaka athambye ngũa syake, na akathamba na manzĩ, na akeethĩwa mũvuku kũvika wĩoo.

7Na ũla wĩkiita mwĩĩ wa ũsu wĩ na mũluo mũvaka athambye ngũa syake, na akathamba na manzĩ, na akeethĩwa mũvuku kũvika wĩoo.

8Na ethĩwa mũndũ ũsu wĩ na mũluo akamũtwĩla mata ũla mũtheu, nĩvo ĩndĩ wĩthambya ngũa syake, na akathamba na manzĩ, na akeethĩwa e mũvuku kũvika wĩoo.

9Na ĩtandĩko o na yĩva ũla wĩ na mũluo wĩtũla yĩkeethĩwa yĩ ĩvuku.

10Na o ũla wĩkiita kĩndũ kĩla ũsu eĩtũlĩte akeethĩwa e mũvuku kũvika wĩoo: na ũla wĩkua syĩndũ isu akathambye ngũa syake, na kũthamba na manzĩ, na akeethĩwa mũvuku kũvika wĩoo.

11Na o ũla wĩkiitwa nĩ ũsu wĩ na mũluo, atathambĩte moko na manzĩ, mũvaka athambye ngũa syake, na akathamba na manzĩ, na akeethĩwa mũvuku kũvika wĩoo.

12Na kĩndũ kya yũmba, kĩla ũla wĩ na mũluo wĩkiita, mũvaka kyũawe; na kĩla kĩndũ kya mũtĩ kĩkathambw’e na manzĩ.

13Na ũsu wĩ na mũluo athew’a mũluo wake, nĩvo wĩĩtalĩla mwene matukũ mũonza ma kũthew’a kwake, na akathambye ngũa syake; na kũthamba mwĩĩ wake na manzĩ mavĩtĩte, na akeethĩwa e mũtheu.

14Na mũthenya wa nyanya akeeyosea ndumbũ ilĩ, kana maswii elĩ ma mavũĩ, nake akathi mbee wa Yeova mũomonĩ wa ĩeema ya kũmbanĩa, na akamũnenga mũthembi:

15nake mũthembi akaithembe, ĩmwe ĩthĩwe nthembo ya naĩ, na ĩla ĩngĩ ĩthĩwe nthembo ya kũvĩvw’a; na mũthembi akamwĩw’anĩthya ũsu na Yeova kwondũ wa mũluo wake.

16Ethĩwa mũndũ akaumwa nĩ ũsamba wake, nĩvo ĩndĩ athambe mwĩĩ wake w’onthe na manzĩ, na akeethĩwa mũvuka kũvika wĩoo.

17Na kĩla ngũa, na kĩla kĩthuma, kĩ na ũsamba, ikathambw’e na manzĩ, na ikeethĩwa syĩ mbuku kũvika wĩoo.

18Na mũndũ mũka nake ũla wĩkoma na mũndũ mũũme e na ũsamba, no mũvaka mathambe me elĩ na manzĩ, na kwĩthĩwa avuku kũvika wĩoo.

19Na ethĩwa mũndũ mũka eumwa nĩ kĩndũ, na kĩndũ kyake kĩla wĩ nakyo mwĩĩnĩ wake nĩ nthakame, kũvathwa kwake nĩ ĩvinda ya matukũ mũonza: na o ũla wĩmũkiita akeethĩwa mũvuku kũvika wĩoo.

20Na kĩndũ o na kĩva kyonthe kĩla wĩkomea yĩla ũvathĩtwe kĩkeethĩwa kivuku: na kĩndũ o na kĩva nakyo kĩla wĩĩkalĩla kĩkeethĩwa kĩvuku.

21Na mũndũ mũũme o ũla wĩkiita ũkomo wake akathambye ngũa syake, na kũthamba na manzĩ, na akeethĩwa mũvuku kũvika wĩoo.

22Na o ũla wĩkiita kĩndũ o na kĩva ũkĩkalĩle no mũvaka athambye ngũa syake, na akathamba na manzĩ, na akeethĩwa mũvuku kũvika wĩoo.

23Ethĩwa nĩ ĩũlũ wa ũkomo, kana ĩũlũ wa kĩndũ o na kĩva kĩla wĩĩkalĩla, mũndũ mũũme akĩkiita akeethĩwa mũvuku kũvika wĩoo.

24Na ethĩwa mũndũ mũũme akakoma nake, na ũvuku wake ũkĩthĩwa ĩũlũ wake, ũ mũndũ mũũme akeethĩwa mũvuku matukũ mũonza; na kĩla ũkomo wĩkomeaa ũkeethĩwa mũvuku.

25Na ethĩwa mũndũ mũka eumwa nĩ nthakame yake mĩthenya mingĩ, na ti ĩvinda ya kwĩalũla kwake, kana ethĩwa eumwa ni nthakame kũvĩtũka ivinda ya kwĩalũla kwake; mĩthenya yonthe ya kumwa nthakame ya ũvuku wake akeethĩwa o ta mĩthenyanĩ ya kwĩalũla kwake: nĩ mũvuku.

26Kĩla ũkomo wĩkomeaa mĩthenya yonthe ya kumwa kwake kwa nthakame ũkeethĩwa kwake ta ũkomo wa kwĩalũla kwake: na kĩla kĩndũ wĩĩkalĩla kĩkeethĩwa kĩvuku, o ta ũvuku wa kwĩalũla kwake.

27Na mũndũ mũũme o ũla wĩkiita syĩndũ isu akeethĩwa mũvuku, na akathambye ngũa syake, na kũthamba na manzĩ, na akeethĩwa mũvuku kũvika wĩoo.

28Ĩndĩ ethĩwa akathew’a kwa kumwa kwake kwa nthakame, nĩvo ĩndĩ wĩĩtalĩla mwene mĩthenya mũonza, na ĩtina wa ũu akeethĩwa mũtheu.

29Na mũthenya wa nyanya akeeyosea ndumbũ ilĩ, kana maswii elĩ ma ĩvũĩ, na kũmũtwaĩa mũthembi, mũomonĩ wa ĩeema ya kũmbanĩa.

30Na mũthembi akathembe yĩmwe yĩthĩwe nthembo ya naĩ, na yĩla yĩngĩ yĩthĩwe nthembo ya kũvĩvw’a; na mũthembi akamwĩw’anĩthya ũsu mbee wa Yeova kwondũ wa kumwa kwa nthakame yake kwa ũvuku wake.

31Ũu nĩw’o mwĩvathanasya ana ma Isilaeli na ũvuku woo, matikakw’e ũvukunĩ woo, o yĩla mevukya ũla wĩkalo wakwa ũla wĩ katĩ woo.

32Ũsu nĩw’o mwĩao kwa ũla wĩ na mũluo, na kwa ũla wĩumwa nĩ ũsamba wake, ũndũ watumie avuka;

33na kwa ũla wĩalũlĩte, na kwa ũla wĩumwa nĩ nthakame, kwa mũndũ mũũme, na kwa mũndũ mũka, na kwa ũla wĩkoma na mũndũ mũka mũvuku.

← Chapter 14 Jump to: Chapter 16 →