Leviticus 4

Kamba (Mbivilia) 1956

← Chapter 3 Jump to: Chapter 5 →

1Na Yeova aneena na Mose, akĩmwĩa,

2Neena na ana ma Isilaeli, ũkĩmea, Ethĩwa mũndũ o na wĩva akeeka naĩ atesĩ, ũndũnĩ o na wĩva ũla Yeova weaie ndũkekwe, na akeeka ũndũ o na wĩva wa asu:

3o na ethĩwa mũthembi ũla wetĩkĩw’e mauta akeeka naĩ na kwondũ wa ũu aiete ũthũkũ ĩũlũ wa andũ, nĩvo ĩndĩ namũthembee Yeova kwondũ wa naĩ yake ĩla wavĩtisye, kasalũ kate kĩema kethĩwe nthembo ya naĩ.

4Na akaete kasalũ kau mũomonĩ wa ĩeema ya kũmbanĩa mbee wa Yeova; na akailĩĩle kw’oko mũtwenĩ wa kasalũ kau, na kũaĩa kasalu mbee wa Yeova.

5Na mũthembi ũla wetĩkĩw’e mauta akose nthakame ya kasalũ, na kũmĩete ĩeemanĩ ya kũmbanĩa:

6na mũthembi akatolye kyaa kyake nthakamenĩ, na kũminzangĩsya nthakame maminzangĩsya mũonza mbee wa Yeova, mbee wa tũtũ wa vala vandũ vatheu.

7Na mũthembi akavake nthakame mbyanĩ sya kĩthembeo kya kũtoeesya ũvani wĩ mũuke mũseo mbee wa Yeova, kĩla kĩ ĩeemanĩ ya kũmbanĩa; na nthakame yonthe ya kala kasalũ akatulũĩle ĩtinanĩ ya kĩthembeo kya nthembo ya kũvĩvw’a, kĩla kĩ mũomonĩ wa ĩeema ya kũmbanĩa.

8Na akaumye mathunya onthe ma kala kasalũ ka nthembo ya naĩ; koa ũla ũvw’ĩkĩte mavu, na mathunya onthe ala me ĩũlũ wa mavu,

9na mbio syelĩ, na mathunya ala makwatene nasyo, ala me vakuvĩ na kĩnyunyu, na koa mũvũthũ ũla ũvw’ĩkĩte ĩtema, vamwe na mbio, akaumye,

10o tondũ maumaw’a ng’ombenĩ ya nthembo ya nthembo sya mũuo: na mũthembi akamavĩvĩsye kĩthembeonĩ kya nthembo ya kũvĩvw’a.

11Na kĩthuma kya kasalũ kau, na nyama syako syonthe, vamwe na mũtwe wako, na maũũ mako, na mavu mako, na mũyoo wako,

12o kasalũ kau konthe akatwae ũtee wa mwako wa maeema vandũ vatheu, vala mũu wĩtawa, na kũkavĩvĩsya ĩũlũ wa ngũ na mwaki: vala mũu wĩtawa nĩvo kevĩvĩw’a.

13Na ethĩwa ũmbano w’onthe wa Isilaeli ũkavĩtya, na ũndũ ũsu ũivithwa methonĩ ma ũmbano, na ethĩwa mekĩte ũndũ o na wĩva wa maũndũ ala Yeova weaie matikekwe, na nĩmatw’ĩka avĩtan’ya;

14yĩla naĩ ĩla mavĩtisye yĩmanyĩka, nĩvo ĩndĩ ũmbano ũkathembe kasalũ kethĩwe nthembo ya naĩ, na kũkaete mbee wa ĩeema ya kũmbanĩa.

15Na atumĩa ma ũmbano makailĩĩle moko mũtwenĩ wa kasalũ kau mbee wa Yeova; na kasalũ kakoaĩwe mbee wa Yeova.

16Na mũthembi ũla wetĩkĩw’e mauta akaete nthakame ya kala kasalũ ĩeemanĩ ya kũmbanĩa:

17na mũthembi akatolye kyaa kyake nthakamenĩ, na kũmĩminzangĩsya maminzangĩsya mũonza mbee wa Yeova, mbee wa ũla tũtũ.

18Na akavake nthakame mbyanĩ sya kĩthembeo kĩla kĩ mbee wa Yeova, kĩla kĩ ĩeemanĩ ya kũmbanĩa; na nthakame yonthe akatulũĩle ĩtinanĩ ya kithembeo kya nthembo ya kũvĩvw’a, kĩla kĩ mũomonĩ wa ĩeema ya kũmbanĩa.

19Na akaumye mathunya onthe mako, na kũmavĩvĩsya kĩthembeonĩ.

20Ũu nĩw’o ũkeka na kala kasalũ; otondũ wekie na kala kasalũ ka nthembo ya naĩ, o ta ũu akeke na kau; na mũthembi akathembe nthembo ya wĩw’anĩthyo kwondũ woo, na makaekewa.

21Na akatwae kala kasalũ ũtee wa mwako wa maeema, na kukavĩvya o tondũ wavĩvisye kasalũ ka mbee: nĩ nthembo ya naĩ kwondũ wa umbano.

22Yĩla mũsumbĩki ũkeka naĩ, na kwĩka atesĩ ũndũ o na wĩva wa maũndũ onthe ala Yeova Ngai wake weaie matikekwe, na nĩwatw’ĩka mũvĩtan’ya;

23ethĩwa akamanyĩthw’a naĩ yake ĩla wavĩtisye, akaete mbũi, nthenge ĩte kĩema, yĩthĩwe nthembo yake.

24Na akailĩĩle kw’oko mũtwenĩ wa nthenge, na kũmyũaĩa vala moaĩaa nthembo ya kũvĩvw’a mbee wa Yeova: nĩ nthembo ya naĩ.

25Na mũthembi akose na kyaa kyake nthakame ya nthembo ya naĩ, na kũmĩvaka mbyanĩ sya kĩthembeo kya nthembo ya kũvĩvw’a; na nthakame yayo akatulũĩle ĩtinanĩ ya kĩthembeo kya nthembo ya kũvĩvw’a.

26Na mathunya onthe mayo akavĩvĩsye kĩthembeonĩ, o ta mathunya ma nthembo ya nthembo sya mũuo; na mũthembi akathembe nthembo ya kũmwĩw’anĩthya ũsu nũndũ wa naĩ yake, nake akaekewa.

27Na ethĩwa mũndũ, o mũndũ, akeeka naĩ atesĩ, akĩka ũndũ o na wĩva wa maũndũ asu ala Yeova weaie matikekwe, na nĩwatw’ĩka mũvĩtan’ya;

28ethĩwa akamanyĩthw’a naĩ yake ĩla wavĩtisye, nĩvo ĩndĩ aete mbũi yĩthĩwe nthembo yake, mbaika ĩte kĩema, kwondũ wa naĩ yake ĩla wavĩtisye.

29Na akailĩĩle kw’oko mũtwenĩ wa nthembo ya naĩ, na kũaĩa nthembo ya naĩ vandũ vau va nthembo ya kũvĩvw’a.

30Na mũthembi akose na kyaa kyake nthakame yayo, na kũmĩvaka mbyanĩ sya kĩthembeo kya nthembo ya kũvĩvw’a; na nthakame yonthe akamĩtulũĩle ĩtinanĩ ya kĩthembeo.

31Na mathunya onthe mayo akaumye, o tondũ mathunya maumaw’a nthembonĩ ya nthembo sya mũuo; na mũthembi akamavĩvĩsye kĩthembeonĩ methĩwe mũuke mũseo kwa Yeova; na mũthembi akathembe nthembo ya kũmwĩw’anĩthya ũsu, nake akaekewa.

32Na ethĩwa akaete katena ka ĩlondu kethĩwe nthembo yake ya naĩ, naete kamwatĩ kate kĩema.

33Na akailĩĩle kw’oko mũtwenĩ wa nthembo ya naĩ, na kũkoaĩa vala moaĩaa nthembo ya kũvĩvw’a kethĩwe nthembo ya naĩ.

34Na mũthembi akose na kyaa kyake nthakame ya nthembo ya naĩ, na kũmĩvaka mbyanĩ sya kĩthembeo kya nthembo ya kũvĩvw’a; na nthakame yonthe yako akamĩtulũĩle ĩtinanĩ ya kĩthembeo.

35Na mathunya onthe mako akaumye, o tondũ mathunya ma katena ka ĩlondu maumaw’a nthembonĩ ya nthembo sya mũuo; na mũthembi akamavĩvĩsye kĩthembeonĩ, ĩũlũ wa nthembo sya Yeova ila ivĩvaw’a na mwaki; na mũthembi akathembe nthembo ya kũmwĩw’anĩthya ũsu nũndũ wa naĩ yake ĩla wavĩtisye, nake akaekewa.

← Chapter 3 Jump to: Chapter 5 →