Leviticus 16

Kamba (Mbivilia) 1956

← Chapter 15 Jump to: Chapter 17 →

1Na Yeova aneena na Mose, ĩtina wa kĩkw’ũ kya ala ana elĩ ma Aluni, yĩla mamũthengeeie Yeova, na makw’a;

2na Yeova amwĩa Mose, Neena na Aluni mwana‐a‐mwenyu, ndakalikae mavinda onthe vala vandũ vatheu nthĩnĩ wa tũtũ, mbee wa wĩkalo wa tei ũla wĩ ĩũlũ wa yĩla ĩsandũkũ; nĩ kana Ndakakw’e: nũndũ ngeeyonan’ya nĩ mũumbĩnĩ ĩũlũ wa wĩkalo wa tei.

3Aluni akalikaa vala vandũ vatheu e na syĩndũ ii: kasalũ kethĩwe nthembo ya naĩ, na ndũũme yĩthĩwe nthembo ya kũvĩvw’a.

4Akekĩaa ũla kanzũ mũtheu wa katane, na akekĩaa ũla sulualĩ wa katane mwĩĩnĩ wake, na akeevotoaa mũsivi wa katane, na akeekĩaa ngutw’a ya katane: isu nĩsyo ngũa ntheu; na akathambe mwĩĩ wake na manzĩ, na kũsyĩkĩa.

5Na akose ũmbanonĩ wa ana ma Isilaeli nthenge ilĩ syĩthĩwe nthembo ya naĩ, na ndũũme ĩmwe yĩthĩwe nthembo ya kũvĩvw’a.

6Na Aluni akaete kala kasalũ ka nthembo ya naĩ, nako nĩ kwondũ wake mwene, na kũkathemba kethĩwe wĩw’anĩthyo kwondũ wake mwene, na kwondũ wa nyũmba yake.

7Na akose nthenge isu syelĩ, na kũsia mbee wa Yeova, mũomonĩ wa ĩeema ya kũmbanĩa.

8Na Aluni akaliman’ye nthenge isu syelĩ; kũliman’ya kũmwe kwĩthĩwe kwondũ wa Yeova, na kũliman’ya kũla kũngĩ kwĩthĩwe kwondũ wa Asaseli.

9Na Aluni akaete nthenge ĩla yavalũkĩlwe nĩ mũlimano yĩthĩwe ya Yeova, na kũmĩthemba yĩthĩwe nthembo ya naĩ.

10Ĩndĩ nthenge, ĩla yavalũkĩlwe nĩ mũlimano yĩthĩwe ya Asaseli, ĩkaekwe yĩ thayũ mbee wa Yeova, yĩthĩwe nthembo ya wĩw’anĩthyo, ĩlekw’e ĩthi weũnĩ yĩthĩwe ya Asaseli.

11Na Aluni akaete kala kasalũ ka nthembo ya naĩ, nayo nĩ kwondũ wake mwene, na kũkathemba kethĩwe wĩw’anĩthyo kwondũ wake mwene, na kwondũ wa nyũmba yake, na akooaa kasalũ kau ka nthembo ya naĩ, ĩla yĩ kwondũ wake mwene.

12Na akose kĩtoeesya kyusũĩtw’e makaa me mwaki kuma kĩthembeonĩ mbee wa Yeova, na mbĩ syusĩe ũvani wĩ mũuke mũseo mũkimange, na kũtwaa nthĩnĩ wa tũtũ:

13na akekĩe ũvani mwakinĩ mbee wa Yeova, nĩ kana syũki ya ũvani yĩvw’ĩke wĩkalo wa tei ũla wĩ ĩũlũ wa yĩla ĩsandũkũ ya ũkũsĩ, nĩ kana ndakakw’e:

14na akose nthakame ĩmwe ya kala kasalũ, na kũmĩminzangĩsya na kyaa kyake wĩkalonĩ wa tei ngalĩ ya wumĩlonĩ wa syũa; na akaminzangĩsye nthakame na kyaa kyake maminzangĩsya mũonza mbee wa wĩkalo wa tei.

15Nĩvo ĩndĩ wĩũaa ĩla nthenge ya nthembo ya naĩ, ĩla yĩ kwondũ wa andũ, na kũete nthakame yayo nthĩnĩ wa tũtũ, na kwĩka na nthakame yayo o tondũ wekie na nthakame ya kala kasalũ, na kũmĩminzangĩsya wĩkalonĩ wa tei, na mbee wa wĩkalo wa tei:

16na akathembe nthembo ya wĩw’anĩthyo kwondũ wa vala vandũ vatheu, nũndũ wa movuku ma ana ma Isilaeli, na nũndũ wa mavĩtyo moo, o naĩ syoo syonthe: na now’o ũkeka kwondũ wa ĩeema ya kũmbanĩa, yĩla yĩkalaa namo movukunĩ moo.

17Na vatikethĩwe mũndũ o na wĩva ĩeemanĩ ya kũmbanĩa yĩla mũthembi wĩlika kũthemba nthembo ya wĩw’anĩthyo vala vandũ vatheu, kũvika yĩla wĩumaala, amina kũthemba nthembo ya wĩw’anĩthyo kwondũ wake mwene, na kwondũ wa andũ ma nyũmba yake, na kwondũ wa ũmbano w’onthe wa Isilaeli.

18Na akaumaale aende vala ve kĩthembeo kĩla kĩ mbee wa Yeova, na kũthemba nthembo ya wĩw’anĩthyo kwondũ wakyo, na akose nthakame ĩmwe ya kala kasalũ, na nthakame ĩmwe ya ĩla nthenge, na kũmĩvaka mbyanĩ sya kĩthembeo ngalĩ syonthe.

19Na akakĩminzangĩsye nthakame na kyaa kyake maminzangĩsya mũonza, na kũkĩthesya, na kũkĩvatha kĩthĩwe kĩtheu kwondũ wa movuku ma ana ma Isilaeli.

20Na amina kũthemba nthembo ya wĩw’anĩthyo kwondũ wa vala vandũ vatheu, na ĩeema ya kũmbanĩa, na kĩthembeo, akaete ĩla nthenge yĩ thayũ:

21na Aluni akailĩĩle moko make elĩ mũtwenĩ wa nthenge yĩ thayũ, na kumbũlĩla ĩũlũ wayo mothũku onthe ma ana ma Isilaeli, na mavĩtyo moo onthe, o naĩ syoo syonthe; nasyo akailĩĩle mũtwenĩ wa ĩla nthenge, na akamĩtwaĩthye weũnĩ na kw’oko kwa mũndũ ũla mũnyuve:

22na nthenge ĩsu ĩkakua ĩũlũ wayo naĩ syoo syonthe ĩende nthĩ ĩte andũ: na mũndũ ũsu akalekya ĩla nthenge weũnĩ.

23Na Aluni akalike ĩeemanĩ ya kũmbanĩa, na kumya ngũa sya katane ila wĩkĩe ailika vala vandũ vatheu, na kwitia vo:

24na akathambĩa mwĩĩ wake na manzĩ vandũ vatheu, na kwĩkĩa ngũa syake, na kumaala, na kũthemba nthembo yake ya kũvĩvw’a na nthembo ya kũvĩvw’a ya andũ, syĩthĩwe wĩw’anĩthyo kwondũ wake mwene na kwondũ wa andũ.

25Na mathunya ma nthembo ya naĩ akavĩvĩsye kĩthembeonĩ.

26Na ũla wĩlekya nthenge ĩla yĩ kwondu wa Asaseli akathambye ngũa syake, na kũthamba mwĩĩ wake na manzĩ, na ĩtina akalika mwakonĩ wa maeema.

27Na kala kasalũ ka nthembo ya naĩ, na ĩla nthenge ya nthembo ya naĩ, ila nthakame yasyo yaetiwe nthĩnĩ yĩthĩwe nthembo ya wĩw’anĩthyo nthĩnĩ wa vala vandũ vatheu, ikatwawe ũtee wa mwako wa maeema; na makavĩvye na mwaki ithuma syasyo, na nyama syasyo, na mũyoo wasyo.

28Na ũla wĩivĩvya akathambye ngũa syake, na kũthamba mwĩĩ wake na manzĩ, na ĩtina wa ũu akasyoka mwakonĩ wa maeema.

29Na ũũ ũkeethĩwa mwamũlo wa tene na tene kwenyu; mwei wa mũonza, mũthenya wa ĩkũmi wa mwei, mũkathĩn’ya ngoo syenyu, na mũtikatethye wĩa o na wĩva, ũla ũsyaawa kwenyu, kana mũeni ũla wĩkalaa ũeni kwenyu:

30nũndũ mũthenya ũsu mũkathembewa nthembo ya wĩw’anĩthyo, ya kũmũthesya; mũkathew’a naĩ syenyu syonthe mbee wa Yeova.

31Nĩ savato wa ũthũmũo mũuu kwenyu, na mũkathĩn’ye ngoo syenyu; nĩ mwamũlo wa tene na tene.

32Na mũthembi, ũla wĩĩtĩkĩw’a mauta na kũvathanw’a ethĩwe mũthembi vandũ va ĩthe wake, akathembe nthembo ĩsu ya wĩw’anĩthyo, na kwĩkĩa ila ngũa sya katane, o ngũa isu ntheu:

33na kũthemba nthembo ya wĩw’anĩthyo kwondũ wa vala vandũ vatheu; na akathembe nthembo ya wĩw’anĩthyo kwondũ wa ĩeema ya kũmbanĩa na kwondũ wa kĩthembeo; na akathembe nthembo ya wĩw’anĩthyo kwondũ wa athembi na kwondũ wa andũ onthe ma ũmbano.

34Na ũsu ũkeethĩwa mwamũlo wa tene na tene kwenyu, kũthemba nthembo ya wĩw’anĩthyo kwondũ wa ana ma Isilaeli nũndũ wa naĩ syoo syonthe ĩvinda yĩmwe kĩla mwaka. Nake eeka o tondũ Yeova wamwĩaĩe Mose.

← Chapter 15 Jump to: Chapter 17 →