Leviticus 23

Kamba (Mbivilia) 1956

← Chapter 22 Jump to: Chapter 24 →

1Na Yeova aneena na Mose, akĩmwĩa,

2Neena na ana ma Isilaeli, noimea, Mboka ila itw’ĩtwe sya Yeova, ila mũkatavan’ya atĩ nĩ maũmbano matheu, o ii nĩsyo mboka syakwa itw’ĩtwe.

3Tethyai wĩa mĩthenya thanthatũ: ĩndĩ mũthenya wa mũonza nĩ savato wa ũthũmũo mũuu, ũmbano mũtheu; mũikatethye wĩa o na wĩva: nĩ savato wa Yeova motũonĩ menyu onthe.

4Ii nĩsyo mboka itw’ĩtwe sya Yeova, o maũmbano matheu, ila mũkatavanasya ĩvinda yĩla yĩtw’ĩtwe yasyo.

5Mwei wa mbee, mũthenya wa ĩkũmi na ĩna wa mwei wĩoo, nĩ vasaka wa Yeova.

6Na mũthenya wa ĩkũmi na ĩtano mwei o ũsu nĩ mboka kwondũ wa Yeova ya kĩmũtũ kĩte ĩlawa: yai kĩmũtũ kĩte ĩlawa mĩthenya mũonza.

7Mũthenya wa mbee mũkeethĩwa na ũmbano mũtheu: mũikatethye wĩa o na wĩva.

8Ĩndi mũkamũthembee Yeova nthembo ya kũvĩvw’a na mwaki mĩthenya mũonza: mũthenya wa mũonza nĩ ũmbano mũtheu; mũikatethye wĩa o na wĩva.

9Na Yeova aneena na Mose, akĩmwĩa,

10Neena na ana ma Isilaeli, noimea, Mwalika nthĩ ĩla nĩmũnengae, na mwaketha ngetha yayo, nĩvo ĩndĩ mwĩmũetee mũthembi kyove kya mosyao ma mbee ma ngetha yenyu:

11nake akavyũlangya kyove mbee wa Yeova, kĩtĩkĩlwe kwondũ wenyu: savato ũnĩ usu mũthembi akakĩvyũlangya.

12Na mũthenya ũla mwĩvyũlangya kyove, mũkamũthembea Yeova katũlũme kate kĩema ka mwaka ũmwe kethĩwe nthembo ya kũvĩvw’a.

13Na nthembo ya mũtu ya kũthembanĩsya nayo ĩkeethĩwa ilungu ilĩ sya ĩkũmi sya eva ya mũtu mũvinyu ũvulanĩtw’e na mauta, nthembo ĩvĩvĩaw’a Yeova na mwaki yĩthĩwe mũuke mũseo; na nthembo ya kũnyuwa ya kũthembanĩsya nayo ĩkeethĩwa ya mbinyu, kĩlungu kya kana kya ini.

14Na mũtikaye kĩmũtũ, kana lĩu wa mbaa ngetha ũkaangĩtwe na mwaki, kana iia mbĩu, kũvika mũthenya o ũsu, kũvika yĩla mwĩete nthembo ya Ngai wenyu: nĩ mwamũlo wa tene na tene mosyaanĩonĩ menyu motũonĩ menyu onthe.

15Na mũketalĩle kwambĩlĩlya ũnĩ ũsu savato wathela, kuma mũthenya ũla mwaetie kyove kya nthembo ya kũvyũlw’a; masavato mũonza makeethĩwa meanĩe:

16mũkatale mĩthenya mĩongo ĩtano o kũvika ũnĩ ũsu savato wa mũonza wathela; na mũkathembee Yeova nthembo ya mũtu mweũ.

17Mũkaete kuma motũonĩ menyu imũtũ ilĩ sya kũvyũlw’a sya ilungu ilĩ sya ĩkũmi sya eva: ikeethĩwa sya mũtu mũvinyu, na ikauwa syĩ ĩlawa, syĩthĩwe mosyao ma mbee kwa Yeova.

18Na vamwe na imũtũ mũkaete tũtena mũonza twa malondu tũte kĩema twa mwaka ũmwe, na kasalũ, na ndũũme ilĩ: ikeethĩwa nthembo ya kũvĩvĩw’a Yeova, na nthembo ya mũtu ya kũthembanĩsya nasyo, na nthembo sya kũnyuwa sya kũthembanĩsya nasyo, o nthembo ĩla ĩvĩvaw’a na mwaki, yĩ mũuke mũseo kwa Yeova.

19Na mũkathembe nthenge ĩmwe yĩthĩwe nthembo ya naĩ, na tũtũlũme twĩlĩ twa mwaka ũmwe twĩthĩwe nthembo ya nthembo sya mũuo.

20Na mũthembi akaivyũlangye vamwe na kĩmũtũ kya mosyao ma mbee syĩthĩwe nthembo sya kũvyũlw’a mbee wa Yeova, vamwe na tũla tũtũlũme twĩlĩ: ikeethĩwa ntheu kwa Yeova kwondũ wa mũthembi.

21Na mũkatavan’ye o mũthenya ũsu; kũkeethĩwa ũmbano mũtheu kwenyu; mũikatethye wĩa o na wĩva: nĩ mwamũlo wa tene na tene motũonĩ menyu onthe mosyaanĩonĩ menyu.

22Na mwaketha ngetha ya nthĩ yenyu, ndũkakethe vyũ ndee sya mũũnda waku, o na ndũkethĩan’ye ngetha yaku: ũkatiĩa ngya, na mwĩkali wa ũeninĩ: ninyie Yeova Ngai waku.

23Na Yeova aneena na Mose, akĩmwĩa,

24Neena na ana ma Isilaeli, ũkĩmea, Mwei wa mũonza, mũthenya wa mbee wa mwei, ũkeethĩwa ũthũmũo mũuu kwenyu, ũlilikan’yo wa kũvuva masoo, ũmbano mũtheu.

25Mũikatethye wĩa o na wĩva; na mũkamũthembea Yeova nthembo ya kũvĩvw’a na mwaki.

26Na Yeova aneena na Mose, akĩmwĩa,

27Na ĩngĩ mũthenya wa ĩkũmi wa mwei ũsu wa mũonza nĩ mũthenya wa wĩw’anĩthyo: ũkeethĩwa ũmbano mũtheu kwenyu, na mwĩthĩn’ye ngoo syenyu; na mũkamũthembee Yeova nthembo ya kũvĩvw’a na mwaki.

28Na mũikatethye wĩa o na wĩva mũthenya ũsu; nũndũ nĩ mũthenya wa wĩw’anĩthyo, wa kũthemba nthembo ya wĩw’anĩthyo kwondũ wenyu mbee wa Yeova Ngai wenyu.

29Nũndũ mũndũ o na wĩva ũla ũteĩthĩn’ya mũthenya o ũsu, akavetwe andũnĩ make.

30Na mũndũ o na wĩva ũla wĩtethya mũthemba o na wĩva wa wĩa mũthenya ũsu, mũndũ ũsu ngamwananga aume andũnĩ make.

31Mũikatethye wĩa o na wĩva: nĩ mwĩao wa tene na tene mosyaanĩonĩ menyu motũonĩ menyu onthe.

32Mũthenya ũsu ũkeethĩwa kwenyu savato wa ũthũmũo mũuu, na mwĩthĩn’ye ngoo syenyu: mũthenya wa kenda wa mwei wĩoo, kuma wĩoo kũvika wĩoo, mũkalilikane savato wenyu.

33Na Yeova aneena na Mose, akĩmwĩa,

34Neena na ana ma Isilaeli, ũkĩmea, Mũthenya wa ĩkũmi na ĩtano wa mwei wa mũonza nĩ mboka ya malwanda kwondũ wa Yeova vandũ va mĩthenya mũonza.

35Mũthenya wa mbee kũkeethĩwa ũmbano mũtheu: mũikatethye wĩa o na wĩva.

36Mĩthenya mũonza mũkamũthembee Yeova nthembo ĩvĩvaw’a na mwaki: mũthenya wa nyanya kũkeethĩwa ũmbano mũtheu kwenyu; na mũkamũthembee Yeova nthembo ĩvĩvaw’a na mwaki: nĩ ũmbano ũkilĩtye; mũikatethye wĩa o na wĩva.

37Ii nĩsyo mboka itw’ĩtwe sya Yeova, ila mũkatavanasya syĩthĩwe maũmbano matheu, kũmũthembea Yeova nthembo ĩvĩvaw’a na mwaki, nthembo ya kũvĩvw’a, na nthembo ya mũtu, na nthembo ya ũtonywa, na nthembo sya kũnyuwa, kĩla ĩmwe mũthenya wayo;

38vamwe na isu masavato ma Yeova, na mĩthĩnzĩo yenyu, na mawĩvĩto menyu onthe, na nthembo syenyu syonthe sya kumya na ngoo ya kwenda, ila mũmũnengae Yeova.

39Na ĩndĩ mũthenya wa ĩkũmi na ĩtano wa mwei wa mũonza, mwamina kũmban’ya mosyao ma nthĩ, mũkalilikane mboka ya Yeova mĩthenya mũonza: mũthenya wa mbee kũkeethĩwa ũthũmũo mũuu, na mũthenya wa nyanya kũkeethĩwa ũthũmũo mũuu.

40Na mũthenya wa mbee mũkeeyosea ũsyao wa mĩtĩ mĩseo, mathangũ ma mĩtende, na mbonge sya mĩtĩ mĩthungu, na mĩtĩ ĩla ĩmeaa kalũsĩnĩ; na mũkatana mbee wa Yeova Ngai wenyu mĩthenya mũonza.

41Na mũkethĩawa na mboka kwondũ wa Yeova mĩthenya mũonza kĩla mwaka: nĩ mwamũlo wa tene na tene mosyaanĩonĩ menyu; mũkamĩlilikanaa mwei wa mũonza.

42Mũkekale malwandanĩ mĩthenya mũonza; onthe ala masyaawa kwa Isilaeli makekale malwandanĩ;

43nĩ kana nzyawa syenyu imanye kana nyie namekalilye ana ma Isilaeli malwandanĩ, yĩla namaumisye nthĩ ya Misili: ninyie Yeova Ngai wenyu.

44Na Mose amatavya ana ma Isilaeli mboka isu ila syatwiwe sya Yeova.

← Chapter 22 Jump to: Chapter 24 →