1 Kings 10

Kamba (MBIVILIA ŨVOO MŨSEO)

← Chapter 9 Jump to: Chapter 11 →

1Mũsumbĩ mũndũ mũka wa Sieva nĩweewie nguma ya Solomoni, na ũndũ wekalanasya na Mwĩai Ngai. Kwoou nĩwookie kũmũtata Solomoni na makũlyo me vinya.

2Mũsumbĩ ũsu nĩwavikie Yelũsalemu e na andũ aingĩ, me na ngamĩle mbingĩ ikuĩte syĩndũ syĩ mũuke mũseo, thaavu mwingĩ, na mavia ma thooa mũnene. Nĩwookie vala ve Solomoni na amũkũlya makũlyo onthe ala waĩ namo.

3Solomoni nĩwasũngĩie makũlyo ma mũsumbĩ ũsu onthe; Solomoni ndaaemwa nĩ kũmũelesya ũndũ o na wĩva.

4Yĩla mũsumbĩ ũsu mũndũ mũka wa Sieva weewie ũndũ Solomoni ũĩvĩte, na oona nyũmba ya kĩ-ũsumbĩ ĩla waakĩte,

5na yĩla woonie lĩu ũla weethĩawa mesanĩ yake, ũndũ atongoi ala maĩ ũsumbĩnĩ wake mekalaa, ũndũ athũkũmi ala ma vau kwa mũsumbĩ matethasya wĩa, na ũndũ meekĩĩte ngũa iilyĩ, na oona andũ ala matethasya wĩa wa kũnengane ndivai kwa mũsumbĩ, na nthembo sya kũvĩvw'a ila Solomoni wathembeie Ĩkalũnĩ ya Mwĩai Ngai, nĩwasaanĩiw'e mũno.

6Mũsumbĩ ũsu mũndũ mũka nĩwaneenie na Solomoni amwĩa atĩĩ, “Ũvoo ũla neewie nĩ nthĩ yakwa ĩũlũ wa maũndũ ala wĩkĩte, na ũndũ wĩ na ũĩ wingĩvĩte, nĩ wa w'o.

7Ĩndĩ ndyaaĩkĩĩa maũndũ asu nataviw'e nginya yĩla nĩnookie na neeyonea nyie mwene. Kwa w'o o na ndyaatavw'a nyusu ya maũndũ asu; ũĩ na ũthwii waku nivĩtũkĩte mũno maũndũ asu nataviw'e.

8Andũ maku me vaati mũno! Athũkũmi maku ala mekalaa naku kĩla ĩvinda, na me na mwanya wa kwĩw'a ndeto syaku sya ũĩ me vaati mũno!

9Ataĩwe Mwĩai Ngai, Ngai waku ũla wendeew'e nue na akũtw'ĩkĩthya mũsumbĩ, nũndũ wa wendo wake wa tene na tene kwa andũ ma Ĩsilaeli. Akũtw'ĩkĩthĩtye mũsumbĩ nĩ kana wĩanĩasye sila wa katĩ na ũlũngalu.”

10Mũsumbĩ ũsu mũndũ mũka nĩwanengie Solomoni thaavu wa kĩlo mbee wa ngili inya, syĩndũ mbingĩ mũno syĩ mũuke mũseo, na mavia ma thooa mũnene. Vai ĩvinda yĩngĩ o na yĩva, Solomoni waaetewe syĩndũ syĩ mũuke mũseo singĩvĩte ta isu wanengiwe nĩ mũsumbĩ ũsu mũndũ mũka wa Sieva.

11(Meli sya Ilamu ila syaĩ inaete thaavu kuma Ovili, nĩsyaetie kuma kw'o mĩtĩ mingĩ ya mĩsandali, na mavia maingĩ ma thooa mũnene.

12Solomoni atũmĩie mĩtĩ ĩsu kũseũvya ituĩ sya Ĩkalũ na sya nyũmba yake ya kĩ-ũsumbĩ, na o ta ũu kũseũvya ngitaa nene na ngitaa nini itũmĩawe nĩ aini. Ĩsu nĩyo yaĩ mĩtĩ ĩla mĩseo vyũ kũetwe Ĩsilaeli kuma nthĩ ĩngĩ; mĩtĩ ĩilyĩ ũu ndyaaoneka ĩngĩ kuma ĩvinda yĩu nginya ũmũnthĩ.)

13Mũsumbĩ Solomoni nĩwanengie mũsumbĩ ũsu mũndũ mũka wa Sieva syĩndũ syonthe ila wendeeiw'e nĩsyo na amwĩtya, vamwe na mĩthĩnzĩo ĩla ĩngĩ yonthe Solomoni wamũnengie kumana na ũlau wa kĩ-ũsumbĩ. Ĩtina wa ũu mũsumbĩ mũndũ mũka, vamwe na anini make nĩmasyokie nthĩ yoo.

14Kĩla mwaka Mũsumbĩ Solomoni nĩwaeteawe kĩlo ta ngili mĩongo ĩlĩ na itatũ sya thaavu.

15Thaavu ũsu ndweethĩawa ũtalanĩlw'e na koti wa thaavu ũla waumaw'a nĩ atandĩthya na athoosya ma syĩndũ, na kuma kwa asumbĩ onthe ma nthĩ sya Ũalavu, na kuma kwa makavana ma nthĩ ya Ĩsilaeli.

16Solomoni nĩwaseũvisye ngao nene maana elĩ sya thaavu mũtumbatumbe. Kĩla ĩmwe yaseũvĩtw'e na thaavu wa kĩlo ta mũonza.

17O ta ũu nĩwaseũvisye ngao ingĩ nini maana atatũ sya thaavu mũtumbatumbe; kĩla ĩmwe yaseũvĩtw'e na thaavu wa kĩlo ta ilĩ. Nĩwaiie ngao isu syonthe Nyũmbanĩ ya Mũtitũ wa Levanoni.

18O ta ũu Mũsumbĩ Solomoni nĩwaseũvisye kĩvĩla kĩnene kya kĩ-ũsumbĩ aitũmĩa maeo ma nzou, na akyũmbĩĩa thaavu ũla mũseo vyũ.

19Kĩvĩla kĩu kyaĩ na ngasi ya kwambata vala kĩĩ ĩla yaĩ na matambya thanthatũ, na ngalĩko ya ĩũlũ ya kwaĩĩsya mũongo ya kĩvĩla kĩu vaĩ ĩvisa ya mũtwe wa nzaũ. Kĩvĩla kĩu kyaĩ na kũndũ kwa kwilĩĩla moko ngalĩko syelĩ syakyo, na ũtee wakyo kwaĩ na mavisa elĩ ma mĩnyambũ ĩũngamĩte; ũmwe ngalĩko ĩmwe na ũngĩ ngalĩko ĩla ĩngĩ.

20Ngasinĩ ĩsu vaĩ mavisa ĩkũmi na elĩ ma mĩnyambũ ĩũngamĩte. Mũnyambũ ũmwe ũũngamĩte mũthyanĩ wa ĩtambya yĩmwe ya ngasi ĩsu, na ũngĩ mũthyanĩ ũla ũngĩ. Vai kĩvĩla kĩngĩ kĩilyĩ ta kĩu kyaĩ kyaaseũvw'a ũsumbĩnĩ ũngĩ o na wĩva.

21Mĩio yonthe ya Solomoni ya kũnyw'ĩĩa syĩndũ yaseũvĩtw'e na thaavu, na mĩio yonthe ya Nyũmba ya Mũtitũ wa Levanoni yaseũvĩtw'e na thaavu mũthei. Vai mũio waseũvĩtw'e na silĩva, nũndũ ĩvindanĩ ya Solomoni silĩva woonekaa ta kĩndũ kĩte vata mũno.

22Solomoni aĩ na meli mbingĩ sya kũthi Talisisi ila syakuaa syĩndũ sya kũthoosya na syaendelaa ũkanganĩ syĩ vamwe na meli sya Ilamu. Meli isu syasyokaa kuma Talisisi ĩvinda yĩmwe ĩtina wa myaka ĩtatũ ikuĩte thaavu, silĩva, maeo ma nzou, ngũlĩ, na nyũnyi syĩtawa taũsi.

23Mũsumbĩ Solomoni aĩ na ũthwii na ũĩ mwingĩ mbee wa asumbĩ onthe ĩũlũ wa nthĩ.

24Andũ onthe ĩũlũ wa nthĩ nĩmamanthaa ũndũ matonya kũvika vala ve Solomoni, nĩ kana methukĩĩsye ũĩ ũla Ngai wamũnengete.

25Kĩla ũmwe woo nĩwaeteae Solomoni mĩthĩnzĩo ya syĩndũ iseũvĩtw'e na silĩva na thaavu, ngũa, mĩio ya kaũ, syĩndũ syĩ mũuke mũseo, mbalasi na nyũmbũ. Solomoni nĩwaeteawe mĩthĩnzĩo ĩsu kĩla mwaka.

26Solomoni nĩwoombanisye makasya ma kaũ ngili ĩmwe na maana ana, na asikalĩ ngili ĩkũmi na ilĩ ma kũlĩsa mbalasinĩ. Amwe nĩwamaiie ndũanĩ ila syaiawa makasya ma kaũ, na angĩ amaia Yelũsalemu vala wekalaa.

27Ĩvindanĩ ya kũsumbĩka kwake, Solomoni nĩwatumie silĩva wĩthĩwa wĩ mwingĩ Yelũsalemu ta mavia, na o ta ũu atuma mĩtĩ ya mĩkũũ yĩthĩwa yĩ mingĩ ta mĩkũyũ ĩla yĩ nguumo wa iĩma sya Yuta.

28Solomoni aumasya mbalasi syake nthĩ ya Misili na ya Silisia; atandĩthya make maithooaa kũu.

29Ĩkasya yĩmwe ya kaũ yathooawa kuma Misili kwa thooa wa kĩlo mũonza sya silĩva, nayo mbalasi ĩithoowa na kĩlo kĩmwe na ngulamu maana mũonza sya silĩva. Atandĩthya asu o ta ũu nĩmathooeasya asumbĩ onthe ma Aititi na ma Silia syĩndũ isu.

← Chapter 9 Jump to: Chapter 11 →