1 Kings 7 — Kamba (MBIVILIA ŨVOO MŨSEO)

1Solomoni nĩweeyakĩie nyũmba ya kĩ-ũsumbĩ; nyũmba ĩsu yakuie myaka ĩkũmi na ĩtatũ ĩithela.

2Nĩwaakie Nyũmba ya Mũtitũ wa Levanoni. Ũasa wa nyũmba ĩsu waĩ mita mĩongo ĩna na inya, ũthanthau wa mita mĩongo ĩlĩ na ilĩ, na ũtũlu wa mita ĩkũmi na itatũ na nyusu. Nyũmba ĩsu yaĩ na mĩthĩa ĩna ya ituĩ sya mũkũũ, itw'ĩĩkĩte mĩamba mĩtendesye ya mũkũũ.

3Kĩla mũthĩa waĩ na ituĩ ĩkũmi na itano, kwoou ituĩ isu syonthe syaĩ mĩongo ĩna na itano.

4Ndĩlĩsya sya nyũmba ĩsu syeekĩĩtwe ĩũlũ mũno, na syeekĩĩtwe syĩ mĩthĩa itatũ syelekanĩle.

5Mĩomo na ndĩlĩsya sya nyũmba ĩsu syeekĩĩtwe mbwaũnĩ sya ndee syĩ na kona inya, nayo ĩla mĩthĩa ĩtatũ ya ndĩlĩsya ũkũtanĩ ũmwe yeelekele ĩla yaĩ ũkũtanĩ ũla ũngĩ.

6Nĩwaseũvisye Nyũmba ya Kũmbanĩa ya Ituĩ, ĩla ũasa wayo waĩ wa mita mĩongo ĩlĩ na ilĩ, na ũthanthau wa mita ĩkũmi na itatũ na nyusu. Ngalĩkonĩ ya mbee ya nyũmba ĩsu vaĩ valanda wĩ na kĩala, ũla watw'ĩĩkĩtwe na ituĩ.

7Nĩwaakie Nyũmba ya Kũmbanĩa ya Kĩvĩla kya Kĩ-ũsumbĩ, ĩla kwa ĩsyĩtwa yĩngĩ yeetawa Nyũmba ya Kũmbanĩa ya Sila, vala Solomoni wasilĩlaa makoani. Nĩwavw'ĩkie nyũmba ĩsu na mbwaũ sya mũkũũ, ivangĩtwe kuma nthĩ kũvika vala kĩala kyambĩĩe.

8Nyũmba yake mwene ya kwĩkala, ĩla yaakĩtwe ngalĩko ya ĩtina ya Nyũmba ya kũmbanĩa ya Sila, yaakĩtwe ĩilyĩ ta nyũmba ila ingĩ. O ta ũu Solomoni nĩwaakie nyũmba ĩngĩ ĩilyĩ ta ĩsu, kwondũ wa mwĩĩtu wa mũsumbĩ wa Misili ũla waĩ anamũtwaa.

9Myako ĩsu yonthe, vamwe na ũkũta wa kĩwanza kĩla kyaĩ nza wa Ĩkalũ, syaakĩtwe na mavia mase nesa kuma mũsinginĩ nginya vala kĩala kyambĩĩe. Mavia asu masĩwe kyasĩonĩ na makatilwa kwĩanana na ithimo ila syaĩlĩte. Nĩmeananĩtw'e kwa kũtilwa na mĩsumeno ngalĩko ya nthĩnĩ na ya nza.

10Mĩsingi ya myako ĩsu yaakĩtwe na mavia manene ma thooa mũnene; amwe me na ũasa wa mita itatũ na nyusu na angĩ mita inya.

11Ĩũlũ wa mavia asu, vaĩ mavia angĩ ma thooa mũnene matilĩtwe kĩthimo kĩla kyaaĩlĩte, na vaĩ mĩamba ya mĩkũũ.

12Kĩwanza kĩla kyaĩ nza wa nyũmba ya mũsumbĩ, kyathyũlũlũkĩtw'e ũkũta waakĩtwe na mĩthĩa ĩtatũ ya mavia mase, na mũthĩa ũmwe wa mĩamba mĩtendesye ya mũkũũ. Ũkũta ũsu wailyĩ o ta ũla waakĩtwe kũthyũlũlũka kĩwanza kya nthĩnĩ kya Ĩkalũ ya Mwĩai Ngai, na wailyĩ ta ũla wa valanda wa nyũmba ya mũsumbĩ.

13Mũsumbĩ Solomoni nĩwatũmanie Tile aketĩwe mũndũ weetawa Ilamu.

14Inyia wa Ilamu aĩ kĩveti ndiwa kuma mbaĩnĩ ya Navutalĩ, na ĩthe wake aĩ mũndũ wa ndũa ya Tile, na aĩ mũtwii wa syĩndũ sya kyũma kĩtawa mbulonzi. Ilamu aĩ na ũĩ, kĩlĩko na ũmanyi mwingĩ wa kũseũvya syĩndũ aitũmĩa kyũma kya mbulonzi. Nĩwaendie kwa Mũsumbĩ Solomoni na atethya wĩa w'onthe ũla wanengiwe.

15Ilamu nĩwaseũvisye ituĩ ilĩ sya mbulonzi. Ituĩ isu syaĩ kĩthyũlũlũ na syaĩ na ĩima nthĩnĩ, na kĩemo kyasyo kyaĩ sendimita mũonza na nyusu. Kĩla kĩmwe kyaĩ na ũtũlu wa mita nyanya, na ũthanthau wakyo kũkĩthyũlũlũka waĩ mita itano na sendimita mĩongo ĩtatũ.

16O ta ũu nĩwaseũvisye ngovia ilĩ sya mbulonzi, na asilĩĩla mĩthyanĩ ya ituĩ isu. Kĩla ngovia yaĩ na ũtũlu wa mita ilĩ na sendimita mĩongo ĩlĩ.

17Mĩthya ya ituĩ isu syelĩ yaanakavĩtw'e na nyololo ivĩlanganĩtw'e; kĩla kĩtuĩ kyaĩ na mĩthĩa mũonza ya wanake ũsu.

18Nĩwaseũvisye matunda ma makũngũmanga ma mbulonzi, na aanakavya kĩla ngovia na mĩthĩa ĩlĩ ya matunda asu.

19Ngovia ila syaĩ ĩũlũ wa ituĩ isu syaseũvĩtw'e syĩ na mũvw'ano wa malaa ma lili, na syaĩ na ũtũlu wa mita ĩmwe na sendimita mĩongo nyanya.

20Ngovia isu syaĩ ĩũlũ wa ituĩ isu ilĩ, na o ta ũu syaĩ ĩũlũ wa kĩlungu kya kĩthyũlũlũ kĩla kyaumĩlĩte vakuvĩ na ũla wanake wa nyololo. Ngovia isu syaĩ na wanake wa mũvw'ano wa matunda ma makũngũmanga maana elĩ, ala mavangĩtwe mĩthĩa ĩlĩ kũthyũlũlũka kĩla ngovia.

21Ilamu nĩwenzĩlile ituĩ isu ilĩ valandanĩ wa Ĩkalũ. Kĩtuĩ kĩla kyaĩ ngalĩko ya ĩtheo nĩwakĩtie Yakini, na eeta kĩla kyaĩ ngalĩko ya ĩũlũ Mboasi.

22Ngovia ila syaĩ ĩũlũ wa ituĩ isu syaseũvĩtw'e syĩ na mũvw'ano wa malaa ma lili. Kwoou wĩa wa kũseũvya ituĩ nĩwathelile.

23Ilamu nĩwaseũvisye ĩtangi ya kĩthyũlũlũ ya mbulonzi. Ĩtangi yĩu yaĩ na ũthanthau wa mita inya na sendimita mĩongo ĩna, kuma ngalĩko ĩmwe kwĩsĩla katĩ nginya ngalĩko ĩla ĩngĩ, ũliku wa mita ilĩ na sendimita mĩongo ĩlĩ, na ũasa wayo kũyĩthyũlũlũka waĩ mita ĩkũmi na itatũ na sendimita mĩongo ĩlĩ.

24Kũthyũlũlũka ũtiivo w'onthe wa ĩtangi yĩu, vaĩ mĩthĩa ĩlĩ ya ikuu sya mbulonzi ila syaseũvĩtw'e ikwatanĩte nayo.

25Ĩtangi yĩu yailĩĩlĩtwe mĩongonĩ ya nzaũ ĩkũmi na ilĩ sya mbulonzi. Nzaũ itatũ isyaĩtye ngalĩko ya ĩũlũ, itatũ ĩsyaĩtye ngalĩko ya ũthũĩlonĩ wa syũa, itatũ isyaĩtye ngalĩko ya ĩtheo, na itatũ isyaĩtye ngalĩko ya wumĩlonĩ wa syũa. Itimba sya nzaũ isu syonthe syeelekele ngalĩko ya nthĩnĩ.

26Kĩemo kya ĩtangi yĩu kyaĩ sendimita mũonza na nyusu. Ũtiivo wayo wailyĩ ta ũtiivo wa kĩkombe, wĩkumbĩte na nza ta ĩlaa ya lili. Ĩtangi yĩu yaĩ yĩtonya kusũw'a nĩ kĩw'ũ kya lita ngili mĩongo ĩna.

27O ta ũu Ilamu nĩwaseũvisye makasya ĩkũmi ma mbulonzi; kĩla yĩmwe yaĩ na ũasa wa mita ĩmwe na sendimita mĩongo nyanya, ũthanthau wa mita ĩmwe na sendimita mĩongo nyanya, na ũtũlu wa mita ĩmwe na sendimita mĩongo ĩtatũ.

28Makasya asu maseũvĩtw'e ta ũũ: Maĩ na mavava makwatanĩtw'e na syũma, ila syeekĩĩtwe syambatĩte.

29Mavavanĩ asu, katĩ katĩ wa syũma isu syambatĩte, vaanakavĩtw'e na mavisa ma mĩnyambũ, nzaũ na ma syũmbe syĩ nthwau syĩtawa akelũvi. O nasyo syũma isu syambatĩte, syaanakavĩtw'e na mavisa o ta asu. Ngalĩkonĩ ya ĩũlũ na ya ĩtheo ya mavisa asu ma mĩnyambũ na nzaũ, vaĩ malaa manake mavĩlangany'e na makombĩĩwa.

30Kĩla ĩkasya yaĩ na ndĩa inya sya mbulonzi na syaĩ na kyũma kĩtawa mbulonzi kya kwikwatany'a. Kĩla ĩkasya yaĩ na kalaĩ kaĩ na syũndũ inya sya kũtw'ĩĩka. Syĩndũ isu sya kũtw'ĩĩka syaanakavĩtw'e kĩla ngalĩko na malaa mavĩlangany'e na makombĩĩwa.

31Ngalĩkonĩ ya ĩũlũ ya syĩndũ isu sya kũtw'ĩĩka, vaseũvĩtw'e kĩndũ kya kĩthyũlũlũ kya kwilĩĩla kalaĩ kau. Kuma ĩkasyanĩ ĩũlũ, kĩndũ kĩu kyaumĩlĩte sendimita mĩongo ĩna na itano kũthi na ĩũlũ, na sendimita ĩkũmi na nyanya kũlika ĩkasyanĩ yĩu. Kyathyũlũlũkĩtwe nĩ mavisa ma kũtemeleelwa. Mavava ma syĩndũ isu sya kũtw'ĩĩka mayaĩ ma kĩthyũlũlũ, ĩndĩ maĩ na ngalĩko inya syĩanene.

32Ndĩa sya makasya asu syaĩ na ũtũlu wa sendimita mĩongo thanthatũ na thanthatũ; syaĩ ungu wa mavava, na syũma sya kũkwatany'a ndĩa syakwatene na makasya asu.

33Ndĩa sya makasya asu syaseũvĩtw'e ta ndĩa sya makasya ma kaũ. Syũma sya kũkwatany'a ndĩa, ndĩa, mĩkunzu na tũtilinge twa kũkwatany'a mĩkunzu na ndĩa, syonthe syaseũvĩtw'e na kyũma kya mbulonzi.

34Kĩla ĩkasya yaĩ na syĩndũ inya sya kũyĩtw'ĩĩka. Syĩndũ isu sya kũtw'ĩĩka syeekĩĩtwe konanĩ inya ikwatene na ĩkasya.

35Ngalĩko ya ĩũlũ ya kĩla ĩkasya, yathyũlũlũkĩtw'e mũsivi wĩ na ũtũlu wa sendimita mĩongo ĩlĩ na ilĩ. Syĩndũ sya kũtw'ĩĩka, mũsivi ũsu na mavava syakwatene na ĩkasya.

36Syĩndũ isu sya kũtw'ĩĩka na mavava, syaanakavĩtw'e na mavisa ma syũmbe syĩ nthwau syĩtawa akelũvi, ma mĩnyambũ na ma mĩkĩndũ. Mavisa asu matemeleelwe kĩla vandũ vaĩ mwanya, na makathyũlũlũkw'a malaa mavĩlangany'e na makombĩĩwa.

37Ũu ĩndĩ nĩw'o makasya asu maseũviw'e. Maseũvĩtw'e mavw'anene, me ma kĩthimo kĩmwe na wũmbo ũmwe.

38O ta ũu Ilamu nĩwaseũvisye tũlaĩ ĩkũmi twa mbulonzi; kalaĩ kamwe kwa kĩla ĩkasya. Kĩla kalaĩ kaĩ na ũthanthau wa mita ũmwe na sendimita mĩongo nyanya kuma ũtee ũmwe kwĩsĩla katĩ nginya ũtee ũla ũngĩ, na kaĩ katonya kwĩkĩwa kĩw'ũ kya lita ta maana nyanya.

39Nĩwaiie makasya atano ngalĩko ya ĩtheo ya Ĩkalũ, na ala angĩ atano ngalĩko ya ĩũlũ. Nĩwaiie yĩla ĩtangi konanĩ ya Ĩkalũ ĩla yĩ ngalĩko ya wumĩlonĩ wa syũa, kwelekela ngalĩko ya ĩtheo.

40O ta ũu Ilamu nĩwaseũvisye mbisũ, mĩko na mbakũli. Kwoou Ilamu nĩwaminie wĩa ũla weeaĩwe nĩ Mũsumbĩ Solomoni atethye kwondũ wa Ĩkalũ ya Mwĩai Ngai. Ii nĩsyo syĩndũ ila Ilamu waseũvisye:

41Ituĩ ilĩ, ngovia ilĩ iilyĩ ta mbakũli ila syeekĩĩtwe mĩthyanĩ ya ituĩ isu, nyololo ivĩlanganĩtw'e sya kwanakavya kĩla ngovia,

42makũngũmanga maana ana ma mbulonzi, mavangĩtwe mĩthĩa ĩlĩ ya makũngũmanga ĩana yĩmwe kĩla mũthĩa, kĩla ngovianĩ,

43makasya ĩkũmi vamwe na tũlaĩ twamo ĩkũmi,

44ĩtangi na nzaũ ĩkũmi na ilĩ sya kũyĩtw'ĩĩka,

45mbisũ, mĩko na mbakũli. Syĩndũ isu syonthe ila Ilamu waseũvĩisye Mũsumbĩ Solomoni kwondũ wa Ĩkalũ ya Mwĩai Ngai, syaseũvĩtw'e na kyũma kya mbulonzi kĩkute.

46Mũsumbĩ nĩweeaĩte syĩndũ isu ikaseũvĩw'e vandũ vaĩ yũmba ya kũseũvya syĩndũ, katĩkatĩ wa Sukothi na Nzalethani, Ũiĩnĩ wa Yolotani.

47Solomoni ndaathima ũito wa syĩndũ isu syonthe nũndũ syaĩ mbingĩ mũno; vai mũndũ waamanya ũito wa mbulonzi yonthe ĩla yatũmĩiwe kũiseũvya.

48O ta ũu Solomoni nĩwaseũvisye syĩndũ sya thaavu sya kwĩkĩa Ĩkalũnĩ. Syĩndũ isu syaĩ: Kĩthembeo, mesa ya mĩkate ĩthembewe Ngai,

49syĩndũ ĩkũmi sya kwilĩĩla taa syaseũvĩtw'e na thaavu mũthei, ila syaiĩtwe mbee wa Vandũ vala Vatheu Mũno; itano syĩ ngalĩko ya ĩtheo, na itano syĩ ngalĩko ya ĩũlũ; malaa, taa na mĩkasi ya kũtila ndambi, syonthe iseũvĩtw'e na thaavu;

50ikombe, syĩndũ sya kũvosya taa, mbakũli, masaani ma kwĩkĩa ũvani na itoeesya, syonthe iseũvĩtw'e na thaavu mũthei; syĩndũ sya kũkwatĩlĩĩlya mũomo mbwaũnĩ ila syĩ ũtee wa mĩomo ya Vandũ vala Vatheu Mũno, na sya mĩomo ya nza ya Ĩkalũ o na syo syaseũvĩtw'e na thaavu.

51Mũsumbĩ Solomoni amina wĩa w'onthe wa kwaka Ĩkalũ na kũseũvya syĩndũ syayo, nĩwalikilye Ĩkalũnĩ yĩu syĩndũ syonthe ila ĩthe wake Ndeviti wavathĩĩte Mwĩai Ngai, nasyo nĩ silĩva, thaavu na syĩndũ ila ingĩ. Nĩwaiie syĩndũ isu nyũmbanĩ sya Ĩkalũ sya kwia syĩndũ.