bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
1 Kings 14
1 Kings 14
Kamba (MBIVILIA ŨVOO MŨSEO)
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 15 →
1
Ĩvindanĩ yĩu Aviya mwana wa Yelovoamu nĩwawaie.
2
Yelovoamu nĩwaneenie na mũka amwĩa atĩĩ, “Ĩtw'ĩkĩthye ta mũndũ ũngĩ, wĩthĩe vai mũndũ ũtonya kũmanya kana nue mũka wakwa, na ũithi Silo, vala mwathani Aiya ũla wambĩie kana ngatw'ĩka mũsumbĩ wa Ĩsilaeli wĩkalaa.
3
Enda vala ũĩ ũmũkuĩe mĩkate ĩkũmi, itumbua, na sũva wa ũkĩ wa nzũkĩ. Mwathani ũsu nũkũũtavya ũndũ ũla wĩĩkĩka mwananĩ ũũ waitũ.”
4
Kwoou mũka wa Yelovoamu nĩweekie ũndũ mũũme wamwĩie, na athi Silo mũsyĩ kwa Aiya. Aiya aĩ mũkũũ mũno ũkethĩa ndatonya kwona nthĩ nesa.
5
Mwĩai Ngai aĩ ananeena na Aiya akamwĩa kana mũka wa Yelovoamu nĩwũkĩte, nĩ kana ũmũtavye ũndũ ũla wĩĩkĩka kwa mwana wake ũla waĩ mũwau. Mwĩai Ngai aĩ anatavya Aiya ũndũ ũkũka kũmũsũngĩa. O ta ũu nĩwamũtavĩtye kana mũka wa Yelovoamu eũka etw'ĩkĩthĩtye ta mũndũ ũngĩ.
6
Kwoou yĩla Aiya weewie matuu ma mũka wa Yelovoamu aitonyeleela mũomonĩ, nĩwamwĩie atĩĩ, “Lika, mũka wa Yelovoamu, lika. Wĩtw'ĩkĩthĩtye ta mũndũ ũngĩ nĩkĩ? Nĩnĩnengetwe ũtũmani mũthũku ngũtavye.
7
Enda ũkatavye Yelovoamu kana Mwĩai Ngai, Ngai wa Ĩsilaeli easya atĩĩ, ‘Nĩnakũnyuvie kuma andũnĩ ma Ĩsilaeli, na nakũtw'ĩkĩthya mũtongoi woo.
8
Nĩnavenie mũsyĩ wa Ndeviti ũsumbĩ na nakũnenga w'o, ĩndĩ we ndwĩthĩĩtwe ũilyĩ ta Ndeviti mũthũkũmi wakwa, ũla wakwataa mĩao yakwa, na wangatĩĩaa na ngoo yake yonthe, na weekaa maũndũ ala mambendeeasya.
9
We Yelovoamu nĩwĩkĩte naĩ mũno, mbee wa andũ ala angĩ onthe maĩ mbee waku. Nũndekete na ũkanthatya, nũndũ nĩwĩseũvĩsye ngai ingĩ sya mĩvw'anano iseũvĩtw'e na kyũma.
10
Nũndũ nĩwĩkĩte ũu, ngaete mathĩna mũsyĩnĩ waku wa kĩ-ũsumbĩ, na ngooaa nzyawa syaku syonthe sya aũme, ala athasye o na ala ngombo. Ngamina mũsyĩ waku w'onthe ũndũ mũndũ ũvĩvasya kyaa kĩkathela vyũ.
11
Mũndũ o na wĩva wa mũsyĩ waku ũla wĩkw'ĩĩa ndũanĩ akaĩwa nĩ ngitĩ, na mũndũ o na wĩva ũla wĩkw'ĩĩa isesinĩ akaĩwa nĩ ndei. Nyie Mwĩai Ngai, nĩnaneena.’ ”
12
Mwathani Aiya nĩwaendeeie kũneena na mũka wa Yelovoamu amwĩa atĩĩ, “We yu ũkĩla wĩnũke, na wĩkilya ũilika ndũanĩ oou mwana waku akw'e.
13
Andũ ma Ĩsilaeli onthe nĩmekwĩthĩwa na ĩvinda ya kyeva nũndũ wake na maimũthika. Mũsyĩnĩ wa Yelovoamu w'onthe, mwana ũsu nowe e weka wĩthikwa mbũanĩ, nũndũ nowe e weka wĩthĩĩtwe e na ũndũ ũmwendeesya Mwĩai Ngai, Ngai wa Ĩsilaeli.
14
Mwĩai Ngai akeenyuvĩa mũsumbĩ ũla wĩsumbĩka Ĩsilaeli, na aimina mũsyĩ wa kĩ-ũsumbĩ wa Yelovoamu.
15
Mwĩai Ngai akakany'a andũ ma Ĩsilaeli, namo makathingithangw'a ũndũ ĩkangaa yĩthingithangaw'a nĩ kĩw'ũ ũsĩnĩ. Akamakũanĩsya na mĩi maume nthĩ ĩno nzeo wanengie aaũmae moo, na aimanyaĩĩkĩsya kũasa mũingo wa Ũsĩ wa Euvalati. Akeeka ũu nũndũ nĩmamũthatĩtye kwa kwĩseũvĩsya ituĩ sya ngai nga ĩla yĩtawa Asela.
16
Mwĩai Ngai akakola andũ ma Ĩsilaeli nũndũ wa naĩ ila Yelovoamu wĩkĩte, na akatuma andũ ma Ĩsilaeli masyĩka.”
17
Nĩvo ĩndĩ mũka wa Yelovoamu wookĩlile asyoka Tilisa. Akililye ailika nyũmba oou, ũla mwana akw'a.
18
Andũ ma Ĩsilaeli nĩmeethĩiwe na ĩvinda ya kyeva nũndũ wa kĩkw'ũ kya mwana ũsu, na mamũthika kwĩanana na ũndũ Mwĩai Ngai waneenete, kwĩsĩla vala ve mũthũkũmi wake mwathani Aiya.
19
Maũndũ ala angĩ onthe Yelovoamu weekie yĩla wasumbĩkĩte, makaũ ala wokitie, na ũndũ wasumbĩkie maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.
20
Yelovoamu asumbĩkie ĩvinda ya myaka mĩongo ĩlĩ na ĩlĩ. Nĩwakwie na athikwa, na mwana wake ũla weetawa Natavu atw'ĩka mũsumbĩ ĩtina wake.
21
Leovoamu mwana wa Solomoni nĩwasumbĩkie Yuta. Aĩ na ũkũũ wa myaka mĩongo ĩna na ũmwe ayambĩlĩĩlya kũsumbĩka. Asumbĩkie e Yelũsalemu vandũ va myaka ĩkũmi na mũonza; Yelũsalemu nĩyo ndũa ĩla Mwĩai Ngai wanyuvĩte kuma mbaĩnĩ syonthe sya Ĩsilaeli nĩ kana athaithĩawe vo. Inyia wa Leovoamu eetawa Naama na aĩ Mũamimoni.
22
Andũ ma Yuta nĩmavĩtĩisye Mwĩai Ngai; mathatisye Mwĩai Ngai nũndũ wa naĩ ila meekaa; mamũthatisye mũno mbee wa ũndũ aaũmae moo meekie.
23
Nĩmaakie kũndũ kwa kũthaithĩa ngai sya mĩvw'anano, nĩmaũngamisye ituĩ sya ũthaithi, na sya ngai nga ĩla yĩtawa Asela, ĩũlũ wa kĩla kalĩma katũlu na ungu wa kĩla mũtĩ wĩ matũ maingĩ.
24
O na kwaĩ aũme ala meethĩawa me malwaya kũndũnĩ kũu kwa kũthaithĩa ngai sya mĩvw'anano. Andũ ma Yuta nĩmeekaa maũndũ onthe ma kũthatya, ala meekawa nĩ andũ ala Mwĩai Ngai waĩ analũngya makauma nthĩ ya Kanaani, yĩla andũ ma Ĩsilaeli maendee kũlika nthĩ ĩsu.
25
Mwakanĩ wa katano wa kũsumbĩka kwa Leovoamu, mũsumbĩ wa Misili ũla weetawa Sisaki nĩwavithũkĩie Yelũsalemu.
26
Nĩwakuie ũthwii w'onthe ũla waĩ Ĩkalũnĩ na ũla waĩ nyũmbanĩ ya kĩ-ũsumbĩ. Akuie kĩla kĩndũ, vamwe na ngao sya thaavu ila Solomoni waseũvĩtye.
27
Kwoou Mũsumbĩ Leovoamu nĩwaseũvisye ngao sya mbulonzi vandũ va isu sya thaavu, na aia ngao isu ũsũvĩonĩ wa anene ma asikalĩ, ala masũngaa mĩvĩa ya kũlika nyũmbanĩ ya kĩ-ũsumbĩ.
28
Kĩla ĩvinda mũsumbĩ aithi Ĩkalũnĩ, asikalĩ asu nĩmeethĩawa makuĩte ngao isu, na ĩtina wa ũu nĩmaitũngaa kasũmbanĩ ka asikalĩ ma kũsunga.
29
Maũndũ ala angĩ onthe Leovoamu weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta.
30
Kweethĩawa kaũ ũtathelaa katĩ wa Leovoamu na Yelovoamu.
31
Leovoamu nĩwakwie na athikwa Ndũanĩ ya Ndeviti, vala aaũmae mathikĩtwe. Inyia wa Leovoamu eetawa Naama na aĩ Mũamimoni. Mwana wa Leovoamu ũla weetawa Aviyamu nĩwatw'ĩkie mũsumbĩ ĩtina wake.
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 15 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22