1 Kings 17

Kamba (MBIVILIA ŨVOO MŨSEO)

← Chapter 16 Jump to: Chapter 18 →

1Mwathani Eliya kuma ndũanĩ ya Tisivi ĩla yĩ Ngileati, nĩwaneenie na Mũsumbĩ Aavu amwĩa atĩĩ, “Ĩsyĩtwanĩ ya Mwĩai Ngai, Ngai wa Ĩsilaeli, ũla wĩ thayũ na ũla nĩthũkũmaa, nĩkũtavya kana kũiĩthĩwa ĩmwe kana mbua vandũ va myaka yĩana ũndũ mũna yũkĩte, nginya yĩla nĩasya kue.”

2Nĩvo ĩndĩ Mwĩai Ngai waneenie na Eliya amwĩa atĩĩ,

3“Uma vaa ũthi welekele ngalĩko ya wumĩlonĩ wa syũa, ũkevithe vakuvĩ na kalũsĩ ketawa Kelithi, kala ke wumĩlonĩ wa syũa wa Ũsĩ wa Yolotani.

4Ũkanyusaa kĩw'ũ kuma kalũsĩnĩ kau, na nĩnĩaĩĩte ngũngũũ ikũeteae lĩu vo.”

5Eliya nĩweekie ũndũ Mwĩai Ngai wamwĩaĩĩte, na athi ekala vakuvĩ na kalũsĩ ka Kelithi, kala ke wumĩlonĩ wa syũa wa Ũsĩ wa Yolotani.

6Ngũngũũ nĩsyamũeteae mũkate na nyama kwakya na wĩoo, na nĩwanyusaa kĩw'ũ kuma kala kalũsĩnĩ.

7Ĩtina wa ĩvinda yĩana ũndũ mũna, kalũsĩ kau nĩkang'alile, nũndũ nĩkwekalĩte kũte mbua nthĩ ĩsu.

8Nĩvo ĩndĩ Mwĩai Ngai waneenie na Eliya amwĩa atĩĩ,

9“Enda yu ũkekale ndũanĩ ya Nzalevathi, ĩla yĩ vakuvĩ na Sitoni. Nĩnĩaĩĩte mũndũ mũka ũmwe ndiwa wa ndũa ĩsu akũnengae lĩu.”

10Kwoou Eliya nĩwaendie Nzalevathi. Yĩla wavikie mũvĩanĩ wa ndũa ĩsu, nĩwoonie mũndũ mũka ndiwa ayuna ngũ. Eliya nĩweetie mũndũ mũka ũsu na amwĩa atĩĩ, “Nũtonya kũndetee kĩw'ũ kĩnini na nzele nĩnyw'e?”

11Mũndũ mũka ũsu aendete kũmũetee kĩw'ũ, Eliya nĩwamwĩtie amwĩa atĩĩ, “Ndetee kalungu ka mũkate o na ko.”

12Mũndũ mũka ũsu nĩwamũsũngĩie amwĩa atĩĩ, “Nĩngwĩvĩta ĩsyĩtwanĩ ya Mwĩai Ngai, Ngai waku ũla wĩ thayũ, kana ndi na mũkate o na ũmwe; nĩ o na kamũtu kanini mũno ke mbakũlinĩ, na mauta manini me sũvanĩ. Yu nĩkolanasya tũlũkũ tũnini nĩnũkye, ngaue lĩu wakwa na wa mwana wakwa tũye, na ĩtina wa ũu tũyũawa nĩ nzaa.”

13Eliya nĩweeie mũndũ mũka ũsu atĩĩ, “Ndũkakĩe. Ĩnũka ũkeke ũndũ wasya, ĩndĩ amba kũnduĩa kamũkate kamwe ũitũmĩa kĩla wĩ nakyo na ũindetee, na ĩndĩ ũkĩua mũkate waku na wa mwana waku.

14Mwĩai Ngai, Ngai wa Ĩsilaeli easya atĩĩ, ‘Mũtu ndũkathela mbakũlinĩ ĩla yĩkĩawa mũtu, na mauta maikathela sũvanĩ ũla wĩkĩawa mauta, nginya mũthenya ũla nyie Mwĩai Ngai ngausya mbua ĩũlũ wa nthĩ.’ ”

15Mũndũ mũka ũsu nĩwaendie na eeka ũndũ Eliya wamwĩie. Kwoou mũndũ mũka ũsu, mũsyĩ wake na Eliya nĩmeethĩawa na lĩu kĩla mũthenya.

16O tondũ Mwĩai Ngai weeĩte Eliya, mũtu ndwaathela mbakũlinĩ na mauta mayaathela sũvanĩ.

17Ĩtina wa maũndũ asu, mwana wa ũla mũndũ mũka ndiwa, mwene mũsyĩ, nĩwawaie. Ũwau wa mwana ũsu nĩwaendeeie kwongeleka nginya esa kũkw'a.

18Mũndũ mũka ũsu nĩwakũlilye Eliya atĩĩ, “Ngwĩkĩte ata we mũndũ wa Ngai? Ũnookie vaa kũlilikany'a Ngai naĩ syakwa, na ũituma mwana wakwa akw'a?”

19Eliya nĩweeie mũndũ mũka ũsu atĩĩ, “Nenge mwana waku.” Eliya nĩwoosie mwana ũsu kuma mokonĩ ma inyia, na amũkua amũtwaa kasũmbanĩ ka ĩũlũ vala wekalaa. Nĩwakomisye mwana ũsu kĩtandanĩ kyake mwene.

20Nĩvo ĩndĩ Eliya wavoyie na wasya mũnene asya atĩĩ, “Ame Mwĩai Ngai, Ngai wakwa, nĩkĩ ũetete ũndũ ũthũkĩte ta ũũ kwa mũndũ mũka ũũ ndiwa nĩkalaa kwake, kwa kũtuma mwana wake akw'a?”

21Nĩvo ĩndĩ Eliya wakomie atambũũkĩte ĩũlũ wa mwana ũsu mavinda atatũ na avoya ayasya atĩĩ, “Ame Mwĩai Ngai, Ngai wakwa thayũũkya mwana ũũ!”

22Mwĩai Ngai nĩweewie mboya ya Eliya, na mwana ũsu athayũũka, ambĩlĩĩlya kũveva.

23Eliya nĩwoosie mwana ũsu amũkua kuma kasũmbanĩ ka ĩũlũ amũtheesya nyũmba. Nĩwanenganie mwana ũsu kũla kwĩ nyinyia na amwĩa atĩĩ, “Sisya, mwana waku e thayũ!”

24Nĩvo ĩndĩ mũndũ mũka ũsu weeie Eliya atĩĩ, “Yu nĩnamanya kana wĩ mũndũ wa Ngai, na kana ndeto ya Mwĩai Ngai ĩla ũneenaa nĩ ya w'o.”

← Chapter 16 Jump to: Chapter 18 →