1 Kings 16

Kamba (MBIVILIA ŨVOO MŨSEO)

← Chapter 15 Jump to: Chapter 17 →

1Mwĩai Ngai nĩwaneenie na mwathani Yeũ mwana wa Anani amwĩa atavye Mbaasa atĩĩ,

2“We Mbaasa waĩ mũndũ ũtesĩkĩe, nginya yĩla nyie Mwĩai Ngai nakũnyuvie ũtw'ĩke mũsumbĩ wa andũ makwa Ĩsilaeli. Ĩndĩ yu nũvĩtĩtye ta Yelovoamu na ũkatuma andũ makwa meka naĩ, na kũnthatya na naĩ syoo.

3Yu ngilĩlye ũkũmina we na mũsyĩ waku, na kũtuma mũsyĩ waku wĩkala ta ũla wa Yelovoamu mwana wa Nevati.

4Mũndũ o na wĩva wa mũsyĩ waku ũla wĩkw'ĩĩa ndũanĩ akaĩwa nĩ ngitĩ, na ũla wĩkw'ĩĩa kĩsesinĩ akaĩwa nĩ ndei.”

5Maũndũ ala angĩ onthe Mbaasa weekie yĩla wasumbĩkĩte, na meko make onthe ma ũkũmbaũ, maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

6Mbaasa nĩwakwie na athikwa Tilisa, na mwana wake ũla weetawa Ela atw'ĩka mũsumbĩ ĩtina wake.

7Ũtũmani ũsu wa Mwĩai Ngai waetiwe kũla kwĩ Mbaasa na andũ ma mũsyĩ wake nĩ mwathani Yeũ mwana wa Anani, nũndũ wa mothũku onthe ala Mbaasa wavĩtĩsye Mwĩai Ngai namo. Mbaasa nĩwathatisye Mwĩai Ngai nũndũ wa mothũku ala weekie. Mothũku asu mailyĩ ta ala Yelovoamu, ũla wasumbĩkĩte mbee wake weekĩte. O na ti ũu w'oka, ĩndĩ nĩwathatisye Mwĩai Ngai nũndũ wa kũaa andũ ma mũsyĩ wa Yelovoamu onthe.

8Mwakanĩ wa mĩongo ĩlĩ na thanthatũ wa kũsumbĩka kwa Asa mũsumbĩ wa Yuta, Ela mwana wa Mbaasa nĩwatw'ĩkie mũsumbĩ wa Ĩsilaeli. Ela asumbĩkie myaka ĩlĩ e Tilisa.

9Ũmwe wa anini make ũla weetawa Nzimili, na waĩ mũũngamĩi wa nyusu ya makasya ma kaũ ma mũsumbĩ, nĩwaseũvĩisye mũsumbĩ mũvango mũthũku. Ĩvindanĩ yĩu Ela aĩ Tilisa, ainyw'a ũkĩ mũsyĩ kwa Alisa. Alisa nĩwe waũngamĩe nyũmba ya kĩ-ũsumbĩ ĩla yaĩ Tilisa.

10Nzimili nĩwalikile nyũmba, ooaa Ela, na atw'ĩka mũsumbĩ ĩtina wake. Nzimili ooaie Ela mwakanĩ wa mĩongo ĩlĩ na mũonza wa kũsumbĩka kwa Asa mũsumbĩ wa Yuta.

11Nzimili ambĩlĩĩlya kũsumbĩka oou, nĩwooaie andũ onthe ma mũsyĩ wa Mbaasa. Nzimili nĩwooaie aũme onthe ala me ũko na Mbaasa o vamwe na anyanyae ma Mbaasa.

12Kwoou Nzimili nĩwooaie andũ onthe ma mũsyĩ wa Mbaasa, kwĩanana na ndeto sya Mwĩai Ngai, ila waneenete kwĩsĩla vala ve mwathani Yeũ ũndũ wa Mbaasa.

13Maũndũ asu meekĩkie nũndũ wa naĩ ila Mbaasa na mwanae Ela meekie. Mbaasa na Ela nĩmathatisye Mwĩai Ngai, Ngai wa Ĩsilaeli, nũndũ wa naĩ ila meekĩte sya kũthaitha mĩvw'anano na makatuma andũ ma Ĩsilaeli mavĩtya.

14Maũndũ ala angĩ Ela weekie yĩla wasumbĩkĩte maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

15Mwakanĩ wa mĩongo ĩlĩ na mũonza wa kũsumbĩka kwa Asa mũsumbĩ wa Yuta, Nzimili nĩwatw'ĩkie mũsumbĩ wa Ĩsilaeli. Asumbĩkie mĩthenya mũonza e Tilisa. Ĩvindanĩ yĩu asikalĩ ma kaũ ma Ĩsilaeli nĩmeelingĩlĩte ndũa ya Ngivethoni, ĩla yĩ nthĩ ya Avilisiti.

16Yĩla asikalĩ asu meewie kana Nzimili nĩwaseũvĩisye Ela mũvango mũthũku na amũaa, kavindanĩ o kau me Ngivethoni nĩmatw'ĩkĩthisye mũnene woo, ũla weetawa Omili mũsumbĩ wa Ĩsilaeli.

17Omili e vamwe na asikalĩ make ma kaũ, nĩmaumie Ngivethoni mathi meelingĩla ndũa ya Tilisa.

18Yĩla Nzimili wamanyie kana ndũa ĩsu nĩyasindwa, nĩwalikile naku nthĩnĩ mwakonĩ mũlũmu wa nyũmba ya kĩ-ũsumbĩ. Nĩwakwatisye nyũmba ĩsu ya kĩ-ũsumbĩ mwaki na avĩĩa vo akw'a.

19Nzimili akwie nũndũ wa naĩ ila weekĩte akavĩtĩsya Mwĩai Ngai. O ta Yelovoamu ũla waĩ mũsumbĩ mbee wake, Nzimili nĩwavĩtĩisye Mwĩai Ngai, na atuma andũ ma Ĩsilaeli meka naĩ.

20Maũndũ ala angĩ onthe Nzimili weekie yĩla wasumbĩkĩte, vamwe na mũvango mũthũku ũla waseũvisye, nĩmaandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

21Andũ ma Ĩsilaeli nĩmaanĩkie kũndũ kwĩlĩ; amwe mendaa Tivili mwana wa Nginathi atw'ĩke mũsumbĩ, na ala angĩ mendaa Omili atw'ĩke mũsumbĩ.

22Andũ ala mendaa Omili atw'ĩke mũsumbĩ nĩmasindie ala mendaa Tivili atw'ĩke mũsumbĩ. Kwoou Tivili nĩwakwie na Omili asumbĩka.

23Mwakanĩ wa mĩongo ĩtatũ na ũmwe wa kũsumbĩka kwa Asa mũsumbĩ wa Yuta, Omili nĩwatw'ĩkie mũsumbĩ wa Ĩsilaeli. Asumbĩkie myaka ĩkũmi na ĩlĩ; myaka thanthatũ ya mbee ya kũsumbĩka kwake asumbĩkie e Tilisa.

24Ĩtina wa ũu Omili nĩwathooie kĩĩma kya Samalia kuma kwa Semeli, kwa thooa wa mbesa sya silĩva ngili thanthatũ. Omili nĩwaakie wiio mũlũmu kũthyũlũlũka kĩĩma kĩu na aaka ndũa vo. Nĩweetie ndũa ĩsu Samalia; ĩsyĩtwa yĩu yaumanĩte na Semeli ũla vau mbeenĩ waĩ mwene wa kĩĩma kĩu.

25Omili nĩwavĩtĩisye Mwĩai Ngai mũno mbee wa asumbĩ ala maĩ mbee wake.

26Omili nĩwaatĩĩie mwĩkalĩle mũthũku wa Yelovoamu mwana wa Nevati, na atuma Mwĩai Ngai, Ngai wa Ĩsilaeli athata, nũndũ wa kũtuma andũ ma Ĩsilaeli meka naĩ ya kũthaitha ngai sya mĩvw'anano.

27Maũndũ ala angĩ onthe Omili weekie yĩla wasumbĩkĩte, na ũkũmbaũ ũla waĩ naw'o, maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

28Omili nĩwakwie na athikwa ndũanĩ ya Samalia. Mwana wake ũla weetawa Aavu nĩwatw'ĩkie mũsumbĩ ĩtina wake.

29Mwakanĩ wa mĩongo ĩtatũ na nyanya wa kũsumbĩka kwa Asa mũsumbĩ wa Yuta, Aavu mwana wa Omili nĩwatw'ĩkie mũsumbĩ wa Ĩsilaeli. Aavu asumbĩkie e Samalia myaka mĩongo ĩlĩ na ĩlĩ.

30Nĩwavĩtĩisye Mwĩai Ngai mũno mbee wa asumbĩ onthe ala maĩ mbee wake.

31O vamwe na kũatĩĩa mwĩkalĩle mũthũku ya Yelovoamu mwana wa Nevati, Aavu nĩweekie naĩ ĩngĩ ya kũtwaa Yeseveli, mwĩĩtu wa Ethimbaali mũsumbĩ wa Asitoni, na ambĩlĩĩlya kũthũkũma na kũthaitha ngai ĩla yĩtawa Mbaali.

32Nĩwaakĩie ngai ĩsu ya Mbaali ĩkalũ ndũanĩ ya Samalia, na amyakĩa kĩthembeo na akĩia vo.

33O ta ũu Aavu nĩwaũngamisye kĩtuĩ kya mũvw'anano wa ngai nga ĩla yĩtawa Asela. Nĩwathatisye Mwĩai Ngai, Ngai wa Ĩsilaeli, mbee wa asumbĩ onthe ma Ĩsilaeli ala maĩ mbee wake.

34Ĩvindanĩ yĩla Aavu wasumbĩkĩte, mũndũ weetawa Ieli kuma Mbethi-eli nĩwaakie ndũa ya Yeliko ĩngĩ. Kwĩanana na ũndũ Mwĩai Ngai waneenete na Yosua mwana wa Nuni, Ieli ayaka wambĩlĩĩlyo wa ndũa ya Yeliko Avilamu ĩkithathi yake nĩyakwie, na ayĩkĩa mĩvĩa ya ndũa ĩsu, Sekuvu ĩlumaita yake yakw'a.

← Chapter 15 Jump to: Chapter 17 →