bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
1 Kings 8
1 Kings 8
Kamba (MBIVILIA ŨVOO MŨSEO)
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 9 →
1
Nĩvo ĩndĩ Mũsumbĩ Solomoni weetie atongoi onthe ma mbaĩ na mĩsyĩ ya Ĩsilaeli moke Yelũsalemu vala waĩ, nĩ kana makakue Ĩsandũkũ ya Ũtianĩo ya Mwĩai Ngai kuma Ndũanĩ ya Ndeviti, ĩla nĩ Saioni, mayĩete Ĩkalũnĩ.
2
Andũ asu onthe nĩmoombanĩie kwa Mũsumbĩ Solomoni ĩvindanĩ ya Mboka ya Tũsũmba twa Matũ, mweinĩ wa mũonza, ũla nĩw'o wĩtawa Ethanimu.
3
Atongoi asu onthe mamina kũmbana, athembi nĩmakuie Ĩsandũkũ ya Ũtianĩo ya Mwĩai Ngai,
4
na mayĩkua mayĩtwaa Ĩkalũnĩ. O ta ũu athembi na Alivai nĩmakuie yĩla Ĩeema ĩtheu ya kũkomanĩa na Mwĩai Ngai, vamwe na syĩndũ syayo syonthe maitwaa Ĩkalũnĩ.
5
Mũsumbĩ Solomoni vamwe na andũ onthe ma Ĩsilaeli nĩmoombanĩie vau mbee wa Ĩsandũkũ ya Ũtianĩo, na mathemba malondu na ng'ombe mbingĩ itatalĩka.
6
Nĩvo ĩndĩ athembi maetie Ĩsandũkũ ya Ũtianĩo ya Mwĩai Ngai na mayia vala yaaĩlĩte kwiwa, Vandũnĩ vala Vatheu Mũno Ĩkalũnĩ, ungu wa nthwau sya ila syũmbe ilĩ syĩ nthwau syĩtawa akelũvi.
7
Syũmbe isu ilĩ syatambũũkĩtye nthwau ĩũlũ wa vala vandũ va kwia Ĩsandũkũ ya Ũtianĩo, nginya ikayĩvw'ĩka vamwe na mĩtĩ ĩla yayĩkuaa.
8
Mĩtĩ ĩsu ya kũkua Ĩsandũkũ ya Ũtianĩo yaĩ mĩasa mũno, ũkethĩa mĩthya ya yo nĩtonya kwoneka nĩ mũndũ aũngamĩte Vandũnĩ vala Vatheu, nza wa Vandũ vala Vatheu Mũno. Mĩthya ya mĩtĩ ĩsu ndyaĩ ĩtonya kwoneka nĩ mũndũ aũngamĩte nza wa Vandũ vala Vatheu. Mĩtĩ ĩsu yĩ o vo kũvika o na ũmũnthĩ.
9
Vayaĩ kĩndũ nthĩnĩ wa Ĩsandũkũ ya Ũtianĩo, ate o ala masengea elĩ ma mavia Mwose weekĩie vo e Kĩĩmanĩ kya Sinaĩ, vala Mwĩai Ngai waseũvĩisye Ũtianĩo na andũ ma Ĩsilaeli, ĩtina wa mauma nthĩ ya Misili.
10
Yĩla athembi maumie vala Vandũ Vatheu, mũumbĩ nĩwausũie Ĩkalũnĩ ya Mwĩai Ngai.
11
Athembi mayaĩ matonya kũtethya wĩa woo nũndũ wa mũumbĩ ũsu, nĩkwĩthĩwa ũtheu mũtisu wa Mwĩai Ngai nĩwausũĩte Ĩkalũnĩ.
12
Nĩvo ĩndĩ Solomoni wavoyie asya atĩĩ, “We Mwĩai Ngai waĩtye kana akekalaa kĩvindunĩ kĩkamu.
13
Nĩngwakĩĩte Ĩkalũ yĩ ndaĩa, vandũ vaku va kwĩkalaa tene na tene.”
14
Andũ ma Ĩsilaeli onthe maũngamĩte vau, Mũsumbĩ Solomoni nĩweethyũũie amasisya na amaathima.
15
Nĩwaneenie asya atĩĩ, “Nĩakathwe Mwĩai Ngai, Ngai wa Ĩsilaeli, ũla ũtonyinĩ wake wĩanĩĩsye maũndũ ala wathie Ndeviti ĩthe wakwa ayasya,
16
‘Kuma ĩvinda yĩla naumisye andũ makwa nthĩ ya Misili, ndyaanyuva ndũa o na yĩva mbaĩnĩ sya Ĩsilaeli nĩ kana nakĩwe Ĩkalũ vala ngathaithĩawa, ĩndĩ nanyuvie Ndeviti asumbĩke andũ makwa Ĩsilaeli.’ ”
17
Solomoni nĩwaendeeie kũneena asya atĩĩ, “Ndeviti ĩthe wakwa nĩwavangĩte kwaka Ĩkalũ nĩ kana Mwĩai Ngai, Ngai wa Ĩsilaeli athaithĩawe vo.
18
Ĩndĩ Mwĩai Ngai nĩwaneenie na Ndeviti ĩthe wakwa amwĩa, ‘Nĩ ũndũ ũseo kwĩthĩwa ũvangĩte ngoonĩ yaku kũmbakĩa Ĩkalũ nĩ kana nĩthaithĩawe vo.
19
Ĩndĩ we ndwĩmbakĩa Ĩkalũ yĩu; mwana waku ũla we wĩsyaa nĩwe ũkambakĩa Ĩkalũ yĩu.’
20
“Yu Mwĩai Ngai nũminĩte kwĩanĩsya ũndũ wathanie; nĩnĩtw'ĩkĩte mũsumbĩ wa Ĩsilaeli ĩtina wa ĩthe wakwa, na nĩnakĩte Ĩkalũ nĩ kana Mwĩai Ngai, Ngai wa Ĩsilaeli athaithĩawe vo.
21
O ta ũu nĩnĩvathĩte vandũ Ĩkalũnĩ va kwia Ĩsandũkũ ya Ũtianĩo, yĩla nthĩnĩ wayo vekĩĩtwe ala masengea ma mavia ma ũtianĩo, ũla Mwĩai Ngai waseũvisye na aaĩthe maitũ, yĩla wamaumisye nthĩ ya Misili.”
22
Nĩvo ĩndĩ Solomoni e mbee wa andũ onthe ma Ĩsilaeli, waendie aũngama mbee wa kĩthembeo kya Mwĩai Ngai, na ookĩlya moko make ĩũlũ,
23
avoya ayasya atĩĩ, “Ame Mwĩai Ngai, Ngai wa Ĩsilaeli, vai Ngai ũngĩ taku ĩũlũ ĩtunĩ kana kũũ nthĩ! Nĩwĩanĩasya ũtianĩo waku na andũ maku, na nũmendaa na wendo waku ũtaolekaa, yĩla mekala meyumĩtye kũkwĩw'a na ngoo syoo syonthe.
24
Nĩwĩanĩĩtye kĩla wathie mũthũkũmi waku Ndeviti ĩthe wakwa; nĩwaneenie wathana, na nĩwĩanĩĩtye na ũtonyi waku o tondũ kũilyĩ ũmũnthĩ.
25
Yu ĩndĩ, ame Mwĩai Ngai, Ngai wa Ĩsilaeli, nĩngũũvoya wĩanĩsye ũla ũndũ ũngĩ wathie mũthũkũmi waku Ndeviti ĩthe wakwa. Nĩwamwĩie kana kĩla ĩvinda vakeethĩawa ũmwe wa nzyawa syake asumbĩkĩte Ĩsilaeli, ethĩwa makakwĩw'aa na kĩthito o tondũ Ndeviti weekaa.
26
Kwoou yu, ame Ngai wa Ĩsilaeli, eka maũndũ onthe ala wathie ĩthe wakwa Ndeviti mũthũkũmi waku meanĩe.
27
“Ĩndĩ nĩkũlya, we Ngai nũtonya kwĩkala ĩũlũ wa nthĩ? Ethĩwa ndũtonya kwĩanĩa matunĩ o na ala me ĩũlũ mũno, ũtonya ata kwĩanĩa Ĩkalũnĩ yĩĩ nĩkwakĩe?
28
O vamwe na ũu, ame Mwĩai Ngai, Ngai wakwa, ĩthũkĩĩsye mboya yakwa nyie mũthũkũmi waku, yĩla ngũkwĩsũva ũmbĩw'ĩe tei. Ĩw'a kĩĩo kyakwa, na mboya ĩla nyie mũthũkũmi waku ngũvoya nĩ mbee waku ũmũnthĩ.
29
Sũvĩa Ĩkalũ yĩĩ ũtukũ na mũthenya. Vaa nĩvo waneenie ĩũlũ wavo wasya, ‘Ngathaithĩawa vaa.’ Mbĩw'ae yĩla nyie mũthũkũmi waku ngũvoya nelekelye ũthyũ wakwa Ĩkalũnĩ yĩĩ.
30
Ĩw'aa mboya syakwa na sya andũ maku ma Ĩsilaeli, yĩla meelekelya mothyũ moo Ĩkalũnĩ yĩĩ na kũvoya. Ĩthukĩĩasye wĩ mũsyĩnĩ kwaku ĩtunĩ, na weew'a ũitũekea.
31
“Mũndũ avĩtĩsya mũtũi wake, na aitw'ĩka no nginya evĩte, na ayũka na kwĩvĩta e mbee wa kĩthembeo kyaku, kĩla kĩ Ĩkalũnĩ yĩĩ,
32
ame Mwĩai Ngai ĩthukĩĩasye wĩ ĩtunĩ na ũisilanasya athũkũmi maku. Ũla wĩ na ĩvĩtyo mũkanasye kwĩanana na ĩvĩtyo yake, na ũla ũte na ĩvĩtyo ũiekana nake, na kũmũnenga mũthĩnzĩo kwĩanana na ũĩkĩĩku wake.
33
“Ethĩwa andũ maku Ĩsilaeli nĩmasindwa nĩ amaitha moo nũndũ nĩmakũvĩtĩsye, makũsyokea na kwĩkaĩla ĩsyĩtwa yaku, na maivoya na kũkwĩsũva me Ĩkalũnĩ yĩĩ,
34
ĩthukĩĩasye wĩ ĩtunĩ; ekea naĩ ya andũ maku ma Ĩsilaeli, na ũimatũnga nthĩ ĩla wanengie aaũmae moo.
35
“Yĩla walea kusya mbua nũndũ andũ maku nĩmakũvĩtĩsye, ethĩwa makavoya melekelye mothyũ moo Ĩkalũnĩ yĩĩ, na maikũsĩĩa ĩsyĩtwa yaku, na kũeka kwĩka naĩ nĩkwĩthĩwa nĩwamakany'a,
36
ĩthukĩĩasye wĩ ĩtunĩ na ũiekea naĩ ya athũkũmi maku, andũ ma Ĩsilaeli. Mamanyĩasye kwĩka maũndũ ala maĩlĩte, na ũyusya mbua ĩũlũ wa nthĩ, ĩla wanengie andũ maku yĩthĩwe ng'ũndũ yoo.
37
“Yĩla kwooka yũa, ũwau mũthũku, kĩseve kĩvĩvasya, mbuka, ngie kana itooli nthĩ ya Ĩsilaeli, kana yĩla amaitha mamelingĩla mamavithũkĩe me nthĩnĩ wa ĩmwe ya ndũa syoo, makwatwa nĩ ũndũ mũthũku kana ũwau o na wĩva,
38
na yĩla mũndũ o na wĩva wa andũ maku Ĩsilaeli wavoya kana eesũvana, na kĩla ũmwe ayĩthĩwa esĩ thĩna ũla wĩ ngoonĩ yake, na aivoya atambũũkĩtye moko make melekele Ĩkalũ yĩĩ,
39
ĩthukĩĩasye wĩ mũsyĩnĩ kwaku ĩtunĩ. Ekea na ũyĩkana na kĩla mũndũ kwĩanana na meko make onthe, nũndũ noue wĩ weka wĩsĩ mosũanĩo ala me ngoonĩ sya andũ.
40
Ĩkana na andũ maku ũu, nĩ kana andũ maku maũkĩae mavinda onthe, yĩla meĩkalaa nthĩ ĩla wanengie aaũmae maitũ.
41
“O ta ũu ethĩwa mũndũ wa nthĩ ĩngĩ, ũla ũte ũmwe wa andũ maku ma Ĩsilaeli, nĩwooka kuma nthĩ ya kũasa nĩ kana akũthaithe,
42
(nĩkwĩthĩwa andũ ma nthĩ ingĩ makeew'a nguma yaku, vinya waku na ũtonyi waku), ooka na aivoya elekelye ũthyũ wake Ĩkalũnĩ yĩĩ,
43
ĩthũkĩĩasye mboya yake wĩ mũsyĩnĩ waku ĩtunĩ. Ĩanĩsya maũndũ onthe ala mũndũ ũsu wa nthĩ ĩngĩ wakũvoya, nĩ kana andũ onthe ĩũlũ wa nthĩ makũmanye na kũkwĩw'a, o tondũ andũ maku Ĩsilaeli mekaa. Nĩvo ĩndĩ memanya kana Ĩkalũ yĩĩ yĩla nakĩte, nĩvo waĩlĩte kũthaithĩwa.
44
“Yĩla weeaĩa andũ maku mathi kaũnĩ makokite na amaitha moo, na me vala maĩ maikũvoya melekelye mothyũ moo ndũanĩ ĩla we ũnyuvĩte, na Ĩkalũnĩ yĩla nakĩte ũthaithĩawe vo,
45
ĩthukĩĩasye mboya na kwĩsũvana kwoo wĩ mũsyĩnĩ kwaku ĩtunĩ, na ũimatonyethya kũsinda amaitha moo.
46
“Yĩla andũ maku makũvĩtĩsya (nũndũ vai mũndũ ũtavĩtasya), naku ũimathatĩa na kũeka masindwe nĩ amaitha moo, na kũtuma amaitha moo mamakwata na kũmatwaa me ove nthĩ yĩ vaasa kana yĩ vakuvĩ;
47
me nthĩ ĩsu matwaĩtwe me ove, maalyũla ngoo syoo na kwĩlila na kũkwĩsũva mayasya, ‘Nĩtũvĩtĩtye, nĩtwĩkĩte naĩ, nĩtwĩkĩte maũndũ mathũku;’
48
ethĩwa makeelila na ngoo na thayũ woo w'onthe me nthĩ ya amaitha moo, ala mamatwaie kũu me ove, na maikũvoya melekelye mothyũ moo nthĩ yoo ĩla wanengie aaũmae moo, ndũanĩ ĩla we wanyuvie, na Ĩkalũnĩ yĩla ngwakĩĩte ũthaithĩawe vo,
49
ĩthukĩĩasye mboya na kwĩsũvana kwoo wĩ mũsyĩnĩ kwaku ĩtunĩ, na ũimew'ĩa tei.
50
Ekea andũ maku ala maũvĩtĩsye; maekee mavĩtyo moo onthe ala mekĩte, na ũituma amaitha moo ala mamasindĩte mamew'ĩa tei.
51
Asu nĩ andũ maku na ũtiĩwa waku, ala waumisye nthĩ ya Misili, kuma ĩikonĩ ĩnene ya kũtwekethya syũma.
52
“Ame Mwĩai Ngai mũsumbĩ, ĩthukĩĩsye wĩsũvano wakwa na wa andũ maku Ĩsilaeli; methukĩĩasye kĩla ĩvinda makwĩkaĩla.
53
Nĩwamanyuvie kuma mbaĩnĩ syonthe sya nthĩ methĩwe ũtiĩwa waku, o tondũ waneenie kwĩsĩla vala ve Mwose, yĩla waumisye aaũmae maitũ nthĩ ya Misili.”
54
Solomoni amina kũvoya mboya ĩsu yonthe na kwĩsũva Mwĩai Ngai, nĩwookĩlile kuma mbee wa kĩthembeo kya Mwĩai Ngai, vala watulĩtye ndu, na akokĩlya moko make melekele ĩtunĩ.
55
Nĩwaũngamie na aathima wũmbano w'onthe wa andũ onthe ma Ĩsilaeli na wasya mũnene ayasya atĩĩ,
56
“Mwĩai Ngai nĩataĩwe ũla ũnengete andũ make ma Ĩsilaeli mũuo, o tondũ wathanie kana akeeka. Katĩ wa maũndũ onthe maseo, ala waneenie kwĩsĩla vala ve mũthũkũmi wake Mwose, vai ũndũ o na ũmwe ũtaaĩanĩa.
57
O tondũ Mwĩai Ngai, Ngai waitũ waĩ vamwe na aaũmae maitũ, nĩethĩwe vamwe naitũ; ndakaatũeke kana kũtũtia o na ĩndĩĩ.
58
Nĩatume twĩthĩwa tũimwĩw'a, nĩ kana twĩkalae kĩla ĩvinda ũndũ ũkwenda twĩkalae, na kwĩanĩasya mĩao, motw'ĩo na myamũlo ĩla weeaĩie aaũmae maitũ.
59
Kĩla ĩvinda Mwĩai Ngai, Ngai waitũ nĩalilikanae mboya na mawĩsũvano makwa kwake. Kĩla ĩvinda nĩew'ĩae andũ make Ĩsilaeli tei, na o ta ũu ayĩw'ĩa mũthũkũmi wake, na kwĩanĩasya mavata moo ma kĩla mũthenya.
60
Kwa kwĩka ũu, andũ onthe ĩũlũ wa nthĩ makamanya kana Mwĩai Ngai nĩwe Ngai; vai ũngĩ take.
61
Kwoou yu ĩndĩ ĩnenganei vyũ kũla kwĩ Mwĩai Ngai, Ngai waitũ, mũaatĩĩae motw'ĩo na kũkwataa mĩao yake, o ũndũ mũendee na kwĩka ũmũnthĩ.”
62
Nĩvo ĩndĩ mũsumbĩ vamwe na andũ onthe ma Ĩsilaeli mathembeie Mwĩai Ngai nthembo.
63
Solomoni nĩwathembeie Mwĩai Ngai ng'ombe ngili mĩongo ĩlĩ na ilĩ, na malondu ngili ĩana na mĩongo ĩlĩ, syĩthĩwe nthembo sya ngwatanĩo. Ũu nĩw'o mũsumbĩ na andũ onthe ma Ĩsilaeli mavathie Ĩkalũ.
64
Mũthenya o ũsu, mũsumbĩ nĩwavathie kĩsio kya katĩ kya kĩwanza kĩla kyaĩ mbee wa Ĩkalũ ya Mwĩai Ngai, na athembea vo nthembo sya kũvĩvw'a, nthembo sya ngetha ya mbaa mbeke, na mathunya ma nthembo sya ngwatanĩo. Eekie ũu nũndũ kĩthembeo kya mbulonzi, kĩla kyaĩ nza mbee wa Ĩkalũ, kyaĩ kĩnini ũkethĩa kĩitonya kwĩanĩa nthembo sya kũvĩvw'a, nthembo sya ngetha ya mbaa mbeke, na mathunya ma nthembo sya ngwatanĩo.
65
Kwoou Solomoni na andũ onthe ma Ĩsilaeli, nĩmatanĩie Mboka ya Tũsũmba twa Matũ, vau mbee wa Ĩkalũ vandũ va mĩthenya mũonza. Vaĩ nguthu nene mũno ya andũ maumĩte kũndũ kũasa, ta Ũlikĩlonĩ wa Amathi ũla wĩ ngalĩko ya ĩũlũ, na mũvakanĩ wa Misili ũla wĩ ngalĩko ya ĩtheo.
66
Mũthenyanĩ wa nyanya Solomoni nĩwaekie andũ menũka. Andũ nĩmaathimie mũsumbĩ na menũka me na mũyo na ũtanu ngoonĩ, nũndũ wa moseo onthe ala Mwĩai Ngai weekĩte mũthũkũmi wake Ndeviti na andũ make ma Ĩsilaeli.
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 9 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22