1 Kings 15

Kamba (MBIVILIA ŨVOO MŨSEO)

← Chapter 14 Jump to: Chapter 16 →

1Mwakanĩ wa ĩkũmi na nyanya wa kũsumbĩka kwa Yelovoamu mwana wa Nevati, Aviyamu nĩwambĩlĩĩlye kũsumbĩka Yuta.

2Asumbĩkie myaka ĩtatũ e Yelũsalemu. Inyia wa Aviyamu eetawa Maaka mwĩĩtu wa Avisalomu.

3Aviyamu eekie naĩ syonthe ila syeekĩtwe nĩ ĩthe wake vau mbeenĩ, ndaĩ mũĩkĩĩku kũla kwĩ Mwĩai Ngai, Ngai wake, ũndũ ũmae Ndeviti waĩ mũĩkĩĩku.

4Ĩndĩ kwondũ wa Ndeviti, Mwĩai Ngai nĩwanengie Aviyamu mwana wa kũsumbĩka ĩtina wake e Yelũsalemu, na kwĩkalya Yelũsalemu yĩ ũsũvĩonĩ.

5Mwĩai Ngai eekie ũu nũndũ Ndeviti nĩweekaa maũndũ ala mamwendeeasya, na ndaalea kwĩanĩsya o na ũmwe wa mĩao yake ĩvindanĩ yonthe ya thayũ wake, ate o ũla ũndũ wakonetye Ulia ũla Mũititi.

6Ĩvindanĩ yonthe yĩla Aviyamu waĩ thayũ, kaũ ũla wambĩĩwe nĩ Leovoamu na Yelovoamu nĩwaendee.

7Maũndũ ala angĩ onthe Aviyamu weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta. Aviyamu na Yelovoamu mekalaa mayũkita.

8Aviyamu nĩwakwie na athikwa ndũanĩ ya Ndeviti. Mwana wake ũla weetawa Asa nĩwatw'ĩkie mũsumbĩ ĩtina wake.

9Mwakanĩ wa mĩongo ĩlĩ wa kũsumbĩka kwa Yelovoamu mũsumbĩ wa Ĩsilaeli, Asa nĩwatw'ĩkie mũsumbĩ wa Yuta.

10Asa nĩwasumbĩkie myaka mĩongo ĩna na ũmwe e Yelũsalemu. Ũsũe eetawa Maaka mwĩĩtu wa Avisalomu.

11Asa eekaa maũndũ onthe ala mamwendeeasya Mwĩai Ngai, o ũndũ ũmae Ndeviti weekaa.

12Nĩwalũngilye malwaya ma aũme ala maĩ kũndũnĩ kwa kũthaithĩa, na avetanga ngai syonthe sya mĩvw'anano, ila syaseũvĩtw'e nĩ asumbĩ ala maĩ mbee wake.

13Mũsumbĩ Asa nĩwavetie Maaka ũsũe wake kuma ũnenenĩ wa kĩ-ũsumbĩ aeka kũtw'ĩka ta we inyia wa mũsumbĩ, nũndũ Maaka nĩwaseũvĩtye kĩtuĩ kya mũvw'anano wa kũthatya, wa ngai nga ĩla yĩtawa Asela. Asa nĩwatemangie mũvw'anano ũsu na aũvĩvĩsya kalũsĩnĩ ka Kĩtilonĩ.

14O na vala Asa ndaa ananga kũndũ kw'onthe kũla andũ mathaithĩaa iĩmanĩ ĩũlũ, nĩwekalile e mũĩkĩĩku kũla kwĩ Mwĩai Ngai, ĩvindanĩ yonthe yĩla waĩ thayũ.

15Nĩwaetie Ĩkalũnĩ mĩio yonthe ya thaavu na ya silĩva, ĩla ĩthe wake wavathĩte kwondũ wa Mwĩai Ngai, o vamwe na ĩla we mwene wavathĩte.

16Asa mũsumbĩ wa Yuta na Mbaasa mũsumbĩ wa Ĩsilaeli, mekalaa mayũkita ĩvindanĩ yonthe ya kũsumbĩka kwoo.

17Mbaasa mũsumbĩ wa Ĩsilaeli nĩwavithũkĩie Yuta na alũlũmĩĩlya ndũa ya Lama, nĩ kana asiĩĩe wĩthĩe vai mũndũ ũtonya kumaala kana kũlika kĩsionĩ kya nthĩ kya Asa mũsumbĩ wa Yuta.

18Kwoou Mũsumbĩ Asa nĩwoosie silĩva na thaavu w'onthe, ũla watialĩte Ĩkalũnĩ na nyũmbanĩ ya kĩ-ũsumbĩ. Nĩwanengie anini make syĩndũ isu maitwae Ndamasikũ, kũla kwĩ Mũsumbĩ Mbeni-aatati wa Silia. Mbeni-aatati aĩ mwana wa Tavilimimoni na aĩ mwĩsũkũũe wa Esioni. Asa eeĩte anini asu make nĩmathi makee Mbeni-aatati atĩĩ,

19“Eka nyie naku twĩthĩwe twĩ na ngwatanĩo, o tondũ ĩthe wakwa na ĩthe waku maĩ na ngwatanĩo. Silĩva na thaavu ũũ nĩ mũthĩnzĩo waku. Ananga ngwatanĩo yaku na Mbaasa mũsumbĩ wa Ĩsilaeli, nĩ kana aeke kũkita nakwa.”

20Mũsumbĩ Mbeni-aatati nĩweetĩkĩlile ũndũ Mũsumbĩ Asa wamũkũlĩtye eke, na atũma anene ma asikalĩ ma kaũ vamwe na asikalĩ mokite ndũa sya Ĩsilaeli. Asikalĩ asu nĩmokitie masinda ndũa sya Iyoni, Ndani, Aveli-mbethi-maaka, kĩsio kya Kĩnelothi kyonthe, na kĩsio kya nthĩ ya Navutalĩ kyonthe.

21Yĩla Mũsumbĩ Mbaasa weewie ũndũ kweekĩkĩte, nĩwaekie kwaka ndũa ya Lama, na auma vo athi kũtũa Tilisa.

22Nĩvo ĩndĩ Asa waumisye mwĩao, ũtavw'e andũ onthe ma Yuta vate ũmwe ũkũtiwa, makue kuma Lama mavia na mĩtĩ, ĩla Mũsumbĩ Mbaasa watũmĩaa kwaka ndũa ĩsu ya Lama. Asa nĩwatũmĩie mavia na mĩtĩ ĩsu kũlũlũmĩĩlya ndũa ya Misiva na ya Ngeva, ila syĩ kĩsionĩ kya nthĩ ya Mbengyameni.

23Maũndũ ala angĩ onthe Asa weekie yĩla wasumbĩkĩte, meko ma ũkũmbaũ, na ndũa ila walũlũmĩĩilye, onthe maandĩkĩtwe Ĩvukunĩ ya Maũndũ ma Mavinda ma Asumbĩ ma Yuta. Mũsumbĩ Asa e mũkũũ, nĩwawaie maũũ.

24Asa nĩwakwie na athikwa Ndũanĩ ya Ndeviti vala aaũmae mathikĩtwe. Mwana wake ũla weetawa Yeosavati nĩwatw'ĩkie mũsumbĩ ĩtina wake.

25Mwakanĩ wa kelĩ wa kũsumbĩka kwa Asa mũsumbĩ wa Yuta, Natavu mwana wa Yelovoamu nĩwatw'ĩkie mũsumbĩ wa Ĩsilaeli. Natavu asumbĩkie Ĩsilaeli myaka ĩlĩ.

26Natavu nĩwavĩtĩisye Mwĩai Ngai; eekaa o ũndũ ĩthe wake weekie, na kũtongoesya andũ ma Ĩsilaeli kũlika naĩnĩ.

27Mbaasa mwana wa Aiya kuma mbaĩnĩ ya Isakali, nĩwaseũvisye mũvango mũthũku ĩũlũ wa Natavu. Yĩla Natavu na asikalĩ make mathyũlũlũkĩte ndũa ya Ngivethoni ĩla yaĩ ya Avilisiti, Mbaasa nĩwamũvithũkĩie na amũaa.

28Mbaasa ooaie Natavu mwakanĩ wa katatũ wa kũsumbĩka kwa Asa mũsumbĩ wa Yuta. Mbaasa nĩwatw'ĩkie mũsumbĩ wa Ĩsilaeli ĩtina wa Natavu.

29Ambĩĩa kũsumbĩka oou, Mbaasa nĩwooaie andũ ma mũsyĩ wa Yelovoamu onthe. Andũ ma mũsyĩ wa Yelovoamu onthe nĩmooaiwe, o tondũ Mwĩai Ngai weeaĩte kwĩsĩla kwa mũthũkũmi wake mwathani Aiya ũla waumĩte Silo; vai mũndũ o na ũmwe waatiala.

30Ũndũ ũsu weekĩkie nũndũ wa naĩ ila Yelovoamu weekĩte, na akatuma andũ ma Ĩsilaeli masyĩka, na nũndũ wa kũthatya Mwĩai Ngai, Ngai wa Ĩsilaeli.

31Maũndũ ala angĩ onthe Natavu weekie yĩla wasumbĩkĩte, maandĩkĩtwe Ĩvukunĩ ya Maũndũ ma Mavinda ma Asumbĩ ma Ĩsilaeli.

32Kweethĩawa kaũ katĩ wa Asa mũsumbĩ wa Yuta na Mbaasa mũsumbĩ wa Ĩsilaeli ĩvindanĩ yonthe yĩla masumbĩkĩte.

33Mwakanĩ wa katatũ wa kũsumbĩka kwa Asa mũsumbĩ wa Yuta, Mbaasa mwana wa Aiya nĩwatw'ĩkie mũsumbĩ wa Ĩsilaeli. Asumbĩkie e Tilisa vandũ va myaka mĩongo ĩlĩ na ĩna.

34Mũsumbĩ Mbaasa nĩwavĩtĩisye Mwĩai Ngai, na atuma andũ ma Ĩsilaeli malika naĩnĩ, o tondũ Yelovoamu ũla waĩ mbee wake weekĩte.

← Chapter 14 Jump to: Chapter 16 →