bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
1 Kings 9
1 Kings 9
Kamba (MBIVILIA ŨVOO MŨSEO)
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 10 →
1
Solomoni amina kwaka Ĩkalũ ya Mwĩai Ngai na nyũmba ya kĩ-ũsumbĩ, vamwe na syĩndũ syonthe ila wendaa kwaka,
2
Mwĩai Ngai nĩwamumĩlĩĩle ĩvinda ya kelĩ, o tondũ wamumĩlĩĩle e Ngiveoni.
3
Mwĩai Ngai nĩwaneenie nake amwĩa atĩĩ, “Nĩnĩw'ĩte mboya syaku na kwĩsũvana kwaku; nĩnĩvathĩte Ĩkalũ yĩĩ wakĩte yĩthĩwe vandũ vala ngathaithĩawa tene na tene. Ngayendaa na kũyĩsũvĩaa ĩvindanĩ yonthe yĩla yũkĩte.
4
Ethĩwa ũkambĩw'aa o ũndũ Ndeviti ĩthe waku weekaa, na ũyĩkaa maũndũ onthe ala nĩkwĩaĩe, na kwĩanĩsya motw'ĩo na myamũlo yakwa,
5
ngalũlũmĩĩlya kĩvĩla kyaku kya kĩ-ũsumbĩ andũnĩ ma Ĩsilaeli ĩvindanĩ yonthe yĩla yũkĩte, o tondũ nathie ĩthe waku Ndeviti namwĩa atĩĩ, ‘Vai ĩvinda Ĩsilaeli ĩkethĩwa ĩte na mũsumbĩ kuma nzyawanĩ syaku.’
6
Ĩndĩ we na nzyawa syaku mwaeka kũngatĩĩa, kwa kũlea kwĩanĩsya mĩao na motw'ĩo makwa ala nĩmũnengete, na mũithi kũthũkũma na kũthaitha ngai ingĩ,
7
nĩvo ĩndĩ nĩthamya andũ makwa Ĩsilaeli kuma nthĩ ĩno namanengie. O ta ũu Ĩkalũ yĩĩ nĩvathĩte nĩthaithĩawe vo ngayananga. Andũ kĩla vandũ makavũthasya andũ ma Ĩsilaeli na kũmavũĩa ngũĩ.
8
Ĩkalũ yĩĩ yĩkatw'ĩka kĩvumbu kya nyũmba mbomboku, wĩthĩe kĩla mũndũ esĩlĩte vakuvĩ nayo nũkũtelema na kũsaanĩw'a na aikũlya atĩĩ, ‘Mwĩai Ngai ekĩte nthĩ ĩno na Ĩkalũ yĩĩ ũu nĩkĩ?’
9
Nĩvo ĩndĩ andũ mesũngĩaa na kwasya atĩĩ, ‘Ekĩte ũu nũndũ andũ aa nĩmatiĩte Mwĩai Ngai, Ngai woo, ũla waumisye aaũmae moo nthĩ ya Misili. Nĩmakwatanĩte na ngai ingĩ, makaithaitha na kwithũkũma. Kĩu nĩkyo kĩtumĩte Mwĩai Ngai amaetee ũthũku ũnenevete ũu.’ ”
10
Ĩtina wa myaka mĩongo ĩlĩ, ĩla Solomoni wakuie kwaka Ĩkalũ ya Mwĩai Ngai na nyũmba ya kĩ-ũsumbĩ,
11
nĩwanengie Ilamu mũsumbĩ wa Tile ndũa mĩongo ĩlĩ, ila syaĩ kĩsionĩ kya Kalilii. Eekie ũu nũndũ Ilamu nĩwe wamũnengete mĩtĩ ya mĩkũũ na ya mĩtalakwe, vamwe na thaavu w'onthe ũla Solomoni wendaa kwondũ wa myako ĩsu.
12
Ĩndĩ yĩla Ilamu waumie Tile athi akone ndũa ila Solomoni wamũnengete, ndaaendeew'a nĩsyo.
13
Nĩvo ĩndĩ wakũlilye Solomoni atĩĩ, “Mwana-a-asa, ndũa ii ũnengete nĩ sya mũthemba mwaũ?” Kwoou kũvika o na ũmũnthĩ ndũa isu syĩtawa nthĩ ya Kavuli.
14
Ilamu atwaĩĩte Solomoni thaavu wa kĩlo ta ngili inya.
15
Ũũ nĩw'o ũvoo ĩũlũ wa ũndũ Solomoni wathũkũmĩthisye andũ na vinya kwaka Ĩkalũ, nyũmba yake ya kĩ-ũsumbĩ, kũmba mũthanga wa kũtw'ĩĩka ndũa, kwaka ũkũta wa Yelũsalemu, na o ta ũu kwaka ĩngĩ ndũa sya Mekito na Ngeseli.
16
(Ngeseli nĩ ndũa ĩla Valao mũsumbĩ wa Misili waĩ anambata na akamĩvithũkĩa na akamĩkwata. Nĩwamĩvĩvisye na ooaa Akanaani ala matũaa nthĩnĩ wayo. Ĩtina wa ũu mũsumbĩ wa Misili nĩwanengie mwĩĩtu wake ndũa ĩsu ya Ngeseli, yĩthĩwe mũthĩnzĩo wake wa mũtwaano yĩla mwĩĩtu ũsu watwaiwe nĩ Solomoni.
17
Nĩvo ĩndĩ Solomoni waakie ndũa ĩsu ya Ngeseli ĩngĩ.) O ta ũu nĩwaakie ndũa sya Mbethi-oloni ya ĩtheo,
18
Mbaalathi, na Tamalĩ ĩla yĩ weũnĩ nthĩnĩ wa nthĩ yake.
19
O ta ũu nĩwaakie ndũa syake syonthe sya kwia syĩndũ, na ndũa kwondũ wa makasya make ma kaũ, na kwondũ wa asikalĩ make ma kũlĩsa mbalasinĩ. Nĩwaakie syĩndũ syonthe ila waĩ na vata nasyo nthĩnĩ wa Yelũsalemu, Levanoni, na kũndũ kw'onthe kũla ũsumbĩ wake wavikĩte.
20
Andũ ala angĩ onthe matialĩte nthĩ ya Ĩsilaeli ma mbaĩ sya Aamoli, Aititi, Avelisi, Aivi na Ayevusi (andũ asu mayaĩ ma Ĩsilaeli);
21
nzyawa syoo ila andũ ma Ĩsilaeli mataaĩthĩwa matonya kũimina vyũ, nĩmo mathũkũmĩthiw'e na vinya nĩ Solomoni. Ũu now'o kũilyĩ kũvika o na ũmũnthĩ.
22
Solomoni ndaatw'ĩkĩthya mũndũ o na wĩva wa Ĩsilaeli ngombo; nĩmo watw'ĩkĩthisye asikalĩ make, atongoi nthĩnĩ wa ũsumbĩ wake, anene ma asikalĩ, anene ma asikalĩ ma makasya ma kaũ, na asikalĩ ma kũlĩsa mbalasinĩ.
23
Asu nomo maũngamĩĩte andũ ala matethasya mawĩa ma Solomoni. Ũtalo woo waĩ atongoi maana atano na mĩongo ĩtano.
24
Mwĩĩtu wa mũsumbĩ wa Misili amina kwambata kuma Ndũanĩ ya Ndeviti, na kũthi nyũmbanĩ yake ya kĩ-ũsumbĩ ĩla Solomoni wamwakĩĩte, Solomoni nĩwoombie mũthanga wa kũtw'ĩĩka ndũa.
25
Mavinda atatũ kĩla mwaka, Solomoni nĩwathembeaa nthembo sya kũvĩvw'a na nthembo sya ngwatanĩo kĩthembeonĩ kĩla waakĩie Mwĩai Ngai. O ta ũu nĩwathembeaa Mwĩai Ngai nthembo ya ũvani. Kwa kwĩka ũu nĩweanĩĩisye maũndũ ala maaĩlĩte kwĩkwa Ĩkalũnĩ.
26
Solomoni nĩwaseũvĩisye meli mbingĩ ndũanĩ ya Esioni-ngeveli, ĩla yĩ vakuvĩ na ndũa ya Elathi nthĩ ya Etomu, ũtee wa Ũkanga Mũtune.
27
Mũsumbĩ Ilamu nĩwatũmie andũ maĩ na ũmanyi wa kũthũkũmana na meli, nĩ kana makathũkũmae melinĩ isu me vamwe na andũ ma Solomoni.
28
Nĩmaendie kyalo mesĩlĩte ũkanganĩ mavika nthĩ ya Ovili, na masyoka makuĩte kĩlo mbee wa ngili ĩkũmi na inya sya thaavu maetee Solomoni.
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 10 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22