1 Kings 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Mũsumbĩ Solomoni asumbĩkĩte nthĩ yonthe ya Ĩsilaeli,

2na aa nĩmo maĩ atongoi make anene: Asalia mwana wa Nzatoki aĩ mũthembi.

3Eliolevu na Aiya ana ma Sisa maĩ aandĩki; Yeosavati mwana wa Ailuti nĩwe waiaa maũndũ ala maandĩke;

4Mbenaia mwana wa Yeoiata aĩ mũnene wa asikalĩ ma kaũ; Nzatoki na Aviathali maĩ athembi;

5Asalia mwana wa Nathani nĩwe waũngamĩe anene ala angĩ; Nzavuti mwana wa Nathani aĩ mũthembi na mũtai wa mũsumbĩ.

6Aisali aĩ mũnene wa ala mathũkũmaa nyũmbanĩ kwa mũsumbĩ; Atonilamu mwana wa Avita aĩ mũnene wa andũ ala mathũkũmĩthaw'a na vinya.

7Solomoni aĩ na atongoi ĩkũmi na elĩ nthĩnĩ wa nthĩ ya Ĩsilaeli, ala manengae mũsumbĩ vamwe na nyũmba yake lĩu. Kĩla ũmwe woo aaĩlĩte kũnengane lĩu vandũ va mwei ũmwe kĩla mwaka.

8Aa nĩmo masyĩtwa moo: Mbeni-uli ũla waũngamĩe nthĩ yĩ iĩma ya Evalaimu;

9Mbeni-ndekeli ũla waũngamĩe ndũa sya Makasi, Saalivimu, Mbethi-semesi, na Eloni-mbethi-aanani;

10Mbeni-eseti ũla waũngamĩe ndũa sya Aluvothi, Soko, na kĩsio kyonthe kya nthĩ ya Eevieli;

11Mbeni-avinatavu ũla waũngamĩe kĩsio kyonthe kya nthĩ ya Ndoli. Atwaĩte Tavathi mwĩĩtu wa Solomoni;

12Mbaana mwana wa Ailuti ũla waũngamĩe ndũa sya Taanaki, Mekito, na kĩsio kyonthe kya nthĩ ya Mbethi-sani ĩla yĩ vakuvĩ na ndũa ya Nzalethani, ĩla yĩ ngalĩko ya ĩtheo ya ndũa ya Yesileeli, kũthi kũvika ndũanĩ ya Aveli-meola na ya Yokimeamu;

13Mbeni-ngeveli ũla waũngamĩe ndũa ya Lamothi ĩla yĩ Ngileati, na motũi ma mũsyĩ wa Yaili nzyawa ya Manase ala maĩ Ngileati, na kĩsio kya Alikovu kĩla kĩ Mbasani, kĩla ndũa syakyo nene syonthe syaĩ mĩongo thanthatũ. Ndũa isu syonthe syaiĩĩwe na ngũta, na mĩamba ya kyũma kĩtawa mbulonzi yeekĩĩtwe mĩvĩanĩ yasyo;

14Ainatavu mwana wa Ito aũngamĩe Maanaimu;

15Aimaasi ũla waũngamĩe kĩsio kya Navutalĩ, atwaĩte Mbasemathi mwĩĩtu ũngĩ wa Solomoni;

16Mbaana mwana wa Usai ũla waũngamĩe kĩsio kya Aseli na ndũa ya Mbealothi;

17Yeosavati mwana wa Valũa ũla waũngamĩe kĩsio kya Isakali;

18Simei mwana wa Ela ũla waũngamĩe kĩsio kya Mbengyameni;

19Ngeveli mwana wa Uli ũla waũngamĩe kĩsio kya Ngileati, kĩla navu mbeenĩ kyasumbĩkĩtwe nĩ Sioni mũsumbĩ wa Aamoli, na Oku mũsumbĩ wa Mbasani. Vamwe na asu ĩkũmi na elĩ, nĩveethĩawa mũtongoi ũmwe ũũngamĩe nthĩ yonthe ya Yuta.

20Andũ ma Yuta na ma Ĩsilaeli maingĩvĩte ta kĩthangathĩ kĩla kĩ ũtee wa ũkanga; nĩmaĩsaa, makanyw'a na nĩmeethĩawa na ũtanu.

21Solomoni asumbĩkĩte mosumbĩ onthe kuma Ũsĩnĩ wa Euvalati kũthi kũvika nthĩ ya Avilisiti, o na kũthi kũvika mũvakanĩ wa Misili. Nthĩ ii syonthe syaĩ ungu wake, na syamumĩasya koti ĩvindanĩ yonthe yĩla waĩ thayũ.

22Lĩu ũla wendekaa kwondũ wa Solomoni kĩla mũthenya waĩ: Maleve maana atatũ na mĩongo thanthatũ ma mũtu mũvinyu, na maleve angĩ maana mũonza na mĩongo ĩlĩ ma mũtu ũte mũvinyu;

23ng'ombe ĩkũmi iĩthĩw'e itũũnĩ, ng'ombe mĩongo ĩlĩ iĩthĩw'e isesinĩ, malondu ĩana yĩmwe, vamwe na ndaatai, ilong'a, nthwaia, na ngũkũ nou.

24Solomoni asumbĩkĩte mosumbĩ onthe ala maĩ ngalĩko ya ũthũĩlonĩ wa syũa ya Ũsĩ wa Euvalati, kuma Tivisa kũvika Ngasa, na aĩ na mũuo na nthĩ syonthe ila syamũthyũlũlũkĩte.

25Ĩvindanĩ yonthe ya thayũ wa Solomoni, andũ ma Yuta na ma Ĩsilaeli kuma Ndani ngalĩko ya ĩũlũ, kũthi kũvika Mbeeli-sieva ngalĩko ya ĩtheo, mekalaa me ũsũvĩonĩ, kĩla mũsyĩ wĩ na mĩũnda yaw'o ya mĩsavivũ na mĩkũyũ.

26Solomoni aĩ na itũũ ngili mĩongo ĩna sya kũvingĩa mbalasi sya kũkusya makasya ma kaũ, na asikalĩ ma kũlĩsa mbalasinĩ ngili ĩkũmi na elĩ.

27Ala atongoi ĩkũmi na elĩ, nĩmaetae lĩu ũla Mũsumbĩ Solomoni wendaa, kĩla ũmwe mweinĩ ũla waaĩwe. Lĩu ũsu waetawe kwondũ wake, na kwondũ wa andũ onthe ala maĩsaa nyũmbanĩ ya kĩ-ũsumbĩ; atongoi asu nĩmaetae syĩndũ syonthe ila syeethĩawa iyendeka.

28O ta ũu kĩla ũmwe wa atongoi asu nĩwaetae kĩlungu kyake kĩla watw'ĩĩwe kumya kya nganũ ĩla yĩtawa mbaale, na ũĩthyo kwondũ wa mbalasi sya makasya ma kaũ na mbalasi ila ingĩ. Maetae syĩndũ isu vandũnĩ vala syendekaa.

29Ngai nĩwanengie Solomoni ũĩ wa mwanya na kĩlĩko. Nĩwamũnengie ũmanyi mwingĩ ũte kĩthimo ta kĩthangathĩ kĩla kĩ ũtee wa ũkanga.

30Ũĩ wa Solomoni waĩ mwingĩ mbee wa ũĩ wa andũ ma ngalĩko ya wumĩlonĩ wa syũa, kana wa andũ oĩ ma nthĩ ya Misili.

31Aĩ mũĩ mbee wa mũndũ ũngĩ o na wĩva; o na mbee wa Ethani kuma mũsyĩnĩ wa Esala, Emani, Kalikoli, na Ndalita ana ma Maoli. Nguma yake yanyaĩĩkĩte kĩla vandũ nthĩ ila syamũthyũlũlũkĩte.

32Nĩwaseũvisye nthimo ngili itatũ, na aĩ na mbathi ngili ĩmwe na itano.

33Nĩwaeleisye ĩũlũ wa mĩtĩ, kuma mĩkũũ ĩla yĩ Levanoni, kũvika mũtĩ wĩtawa ĩsovo ũla ũmeaa maũvainĩ. O ta ũu nĩwaeleisye ĩũlũ wa nyamũ, nyũnyi, nyamũ ila ilekasya matumbĩ na makũyũ.

34Asumbĩ kuma nthĩ yonthe nĩmeewie ĩũlũ wa ũĩ wa Solomoni, na matũma andũ mathi makamwĩthukĩĩsye.

← Chapter 3 Jump to: Chapter 5 →