1 Kings 12

Kamba (MBIVILIA ŨVOO MŨSEO)

← Chapter 11 Jump to: Chapter 13 →

1Leovoamu nĩwaendie Sekemu vala andũ ma Ĩsilaeli onthe moombanĩte mamũtw'ĩkĩthye mũsumbĩ.

2Yĩla Yelovoamu mwana wa Nevati weewie ũu, nĩwasyokie kuma Misili, kũla waĩ anathi akĩĩte Mũsumbĩ Solomoni.

3Kwoou andũ ma Ĩsilaeli nĩmatũmanie Yelovoamu aketwe. Yelovoamu e vamwe na andũ ma Ĩsilaeli onthe nĩmaendie vala ve Leovoamu na mamwĩa atĩĩ,

4“Ĩthe waku Solomoni nũnatũthũkũmĩthĩsya wĩa wĩ vinya. Ĩndĩ ethĩwa nũũtũolangĩla wĩa ũsu na kũtũthũmũsya, nĩtũũkũthũkũma.”

5Leovoamu nĩwamasũngĩie amea atĩĩ, “Endai na mũisyoka vala nĩĩ ĩtina wa mĩthenya ĩtatũ na ngamũsũngĩa.” Kwoou andũ asu nĩmaumie vau mathi.

6Nĩvo ĩndĩ Mũsumbĩ Leovoamu wakũlilye ũtao kuma kwa atumĩa, ala mathũkũmaa Solomoni ĩthe wake ĩvindanĩ yonthe yĩla wasumbĩkĩte. Nĩwamakũlilye atĩĩ, “Mwĩnenga ũtao mwaũ nĩ kana nĩsũngĩe andũ aa?”

7Atumĩa asu nĩmamũsũngĩie mamwĩa atĩĩ, “Ethĩwa ũmũnthĩ nũkwĩtĩkĩla kũtw'ĩka mũthũkũmi wa andũ aa, na kũmanenga ũsũngĩo mũseo, nĩmeũtw'ĩka athũkũmi maku ĩvindanĩ yonthe yĩla yũkĩte.”

8Ĩndĩ Leovoamu nĩwaleile kũatĩĩa ũtao ũla wanengiwe nĩ atumĩa asu, na athi kũkũlya ũtao kũla kwĩ anake ala ma ĩika yake, ala mamũthũkũmaa.

9Nĩwakũlilye anake asu atĩĩ, “Inyw'ĩ mwĩnenga ũtao mwaũ, nĩ kana tũsũngĩe andũ aa mangũlĩtye nĩmaolangĩle wĩa wĩ vinya ũla ĩthe wakwa ũnamathũkũmĩthasya?”

10Anake asu nĩmasũngĩie Leovoamu mamwĩa atĩĩ, “Enda ũkasũngĩe andũ asu makwĩĩte kana ĩthe waku anamathũkũmĩthasya wĩa wĩ vinya, na kwoou ũmaolangĩle wĩa ũsu ũmee atĩĩ, ‘Kyaa kyakwa kya mwela nĩ kĩthanthau mbee wa kĩnyunyu kya ĩthe wakwa.

11Ĩthe wakwa nũnamũthũkũmĩthasya wĩa wĩ vinya mũno, nakwa nĩngũtuma wĩa ũsu wĩthĩwa wĩ vinya mũno mbeange. Ĩthe wakwa anamũkũnaa na mĩsalisa, ĩndĩ nyie ngamũkũnaa na mĩsalisa yĩ mĩw'a!’ ”

12Ĩtina wa mĩthenya ĩtatũ, Yelovoamu e vamwe na andũ onthe nĩmasyokie kũla kwĩ Mũsumbĩ Leovoamu, o tondũ wameaĩĩte.

13Mũsumbĩ nĩwaleile kũatĩĩa ũtao ũla wanengiwe nĩ atumĩa, na asũngĩa andũ asu e na ũng'endu mwingĩ.

14Nĩwaatĩĩie ũtao ũla wanengiwe nĩ ala anake ma ĩika yake na amea atĩĩ, “Ĩthe wakwa anamũthũkũmĩthasya wĩa wĩ vinya, ĩndĩ nyie nĩngũtuma wĩa ũsu wĩthĩwa wĩ vinya mũno mbeange. Ĩthe wakwa anamũkũnaa na mĩsalisa, ĩndĩ nakwa ngamũkũnaa na mĩsalisa yĩ mĩw'a!”

15Kwoou mũsumbĩ nĩwaleile kwĩthukĩĩsya andũ, nũndũ kwaĩ kwenda kwa Mwĩai Ngai ũndũ ũsu wĩthĩwe, nĩ kana maũndũ ala Mwĩai Ngai waneenete na Yelovoamu mwana wa Nevati, kwĩsĩla kũla kwĩ mwathani Aiya wa kuma Silo meanĩw'e.

16Yĩla andũ onthe ma Ĩsilaeli moonie kana mũsumbĩ nĩwalea kũmethukĩĩsya, nĩmalonzanilye mayasya atĩĩ, “Tũi na ngwatanĩo o na vanini na Ndeviti na mũsyĩ wake! Tũi na kĩanda o na kĩmwe vala ve mwana wa Yese. Inyw'ĩ andũ ma Ĩsilaeli, ĩnũkai! We nzyawa ya Ndeviti, ĩsũvĩĩe mũsyĩ waku.” Kwoou andũ ma Ĩsilaeli onthe nĩmenũkie.

17Leovoamu nĩwatiiwe asumbĩkĩte andũ ma Ĩsilaeli, ala matwĩe ndũanĩ ila syaĩ kĩsionĩ kya nthĩ ya mbaĩ ya Yuta.

18Nĩvo ĩndĩ Mũsumbĩ Leovoamu watũmie Atonilamu, ũla waũngamĩe andũ ala mathũkũmĩthaw'a na vinya, nĩ kana athi kũla kwĩ andũ ma Ĩsilaeli, ĩndĩ nĩmamũkimangie na mavia akw'a. Leovoamu oona ũu, nĩwalĩsile mĩtũkĩ ĩkasyanĩ yake ya kaũ, na akĩa athi Yelũsalemu.

19Kuma ĩvindanĩ yĩu kũvika ũmũnthĩ, andũ ma Ĩsilaeli ala matwĩe ngalĩko ya ĩũlũ ya nthĩ ya Ĩsilaeli, methĩĩtwe maing'endea mũsyĩ wa kĩ-ũsumbĩ wa Ndeviti.

20Yĩla andũ ma Ĩsilaeli meewie kana Yelovoamu nĩwaĩ anasyoka kuma Misili, nĩmamũthokisye wũmbanonĩ woo na mamũtw'ĩkĩthya mũsumbĩ wa Ĩsilaeli. No mbaĩ ya Yuta yĩ yoka yatialile yĩna ngwatanĩo na nzyawa sya Ndeviti.

21Yĩla Leovoamu wavikie Yelũsalemu, nĩwoombanisye asikalĩ ala aseo vyũ ngilĩ ĩana na mĩongo nyanya kuma mbaĩnĩ ya Yuta na ya Mbengyameni. Amombanisye nĩ kana mathi makokite na mbaĩ sya Ĩsilaeli ila syatwĩe ngalĩko ya ĩũlũ ya nthĩ ya Ĩsilaeli, nĩ kana Leovoamu mwana wa Solomoni aendee kũisumbĩka.

22Ĩndĩ Ngai nĩwaneenie na mwathani Semaia amwĩa atĩĩ,

23“Neena na Leovoamu mwana wa Solomoni mũsumbĩ wa Yuta, na andũ onthe ma mbaĩ ya Yuta na ya Mbengyameni, na andũ ala angĩ onthe ũmee kana

24Mwĩai Ngai easya atĩĩ, ‘Mũikambate mũthi mũkokite na ana-a-ĩthe menyu andũ ma Ĩsilaeli. Kĩla mũndũ nĩenũke kwake, nĩkwĩthĩwa ũndũ ũla wĩkĩkĩte nĩ kwenda kwakwa.’ ” Kwoou nĩmaatĩĩie ũndũ meeaĩiwe nĩ Mwĩai Ngai na kĩla mũndũ enũka.

25Yelovoamu nĩwalũlũmĩĩilye ndũa ya Sekemu, ĩla yĩ nthĩ yĩ iĩma ya Evalaimu na atũa vo. Kuma vau nĩwaendie alũlũmĩĩlya ndũa ya Venueli.

26Yelovoamu nĩwasũanĩie ngoonĩ yake asya, “Ũsumbĩ nũtonya kũsyokea nzyawa sya Ndeviti.

27Ethĩwa andũ aa nĩmekwambata makathembee nthembo Ĩkalũnĩ yĩla yĩ Yelũsalemu, nĩmeũsyoka ĩngĩ mambĩĩe kũatĩĩa mũnene woo Leovoamu mũsumbĩ wa Yuta. Nĩmeũmbũaa na maisyoka kũla kwĩ Mũsumbĩ Leovoamu.”

28Ĩtina wa kũkũlya ũtao ĩũlũ wa ũndũ ũsu, nĩwaseũvisye tũsalũ twĩlĩ twa thaavu na eea andũ make atĩĩ, “Inyw'ĩ andũ ma Ĩsilaeli, ii nĩsyo ngai syenyu ila syamumisye nthĩ ya Misili. Vai vata mũtindae mũyambata Yelũsalemu kũthembea kw'o.”

29Yelovoamu nĩwaiie kasalũ kamwe Mbethi-eli, na aia kasalũ kala kangĩ Ndani.

30Ũndũ ũsu nĩwatumie andũ ma Ĩsilaeli malika naĩnĩ, nũndũ andũ nĩmambĩĩie kũthi kũthaitha kasalũ kala kaĩ Mbethi-eli, na kũthi kũasa nginya Ndani kũthaitha kasalũ kala kaĩ kw'o.

31O ta ũu Yelovoamu nĩwaakie kũndũ kwa kũthaithĩa iĩmanĩ ĩũlũ, na anyuva athembi kuma mĩsyĩnĩ ya andũ mate ma mbaĩ ya Livai.

32Yelovoamu nĩwambĩlĩĩlye mboka ya kĩ-ũthaithi yĩthĩawe matukũ ĩkũmi na atano mweinĩ wa nyanya, ta mboka ĩla yeethĩawa Yuta, na athembea nthembo kĩthembeonĩ. Eekie ũu kĩthembeonĩ kĩla kyaĩ Mbethi-eli aithembea tũla tũsalũ waseũvĩtye. Vau Mbethi-eli nĩwaiie athembi ala wanyuvĩte mathũkũmae kũndũnĩ kwa kũthaithĩa, kũla waseũvĩtye iĩmanĩ ĩũlũ.

33Matukũ ĩkũmi na atano mweinĩ wa nyanya, ũla Yelovoamu wanyuvie kwĩanana na woni wake mwene, nĩwambatie Mbethi-eli na athembea nthembo kĩthembeonĩ kĩla waseũvĩtye vo. Nĩwambĩlĩĩlye mboka ya kĩ-ũthaithi nĩ kana ĩtanĩawe nĩ andũ ma Ĩsilaeli.

← Chapter 11 Jump to: Chapter 13 →