1 Kings 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Solomoni ambĩĩie kwaka Ĩkalũ ya Mwĩai Ngai mwakanĩ wa maana ana na mĩongo nyanya, ĩtina wa andũ ma Ĩsilaeli mauma Misili. Ũsu nĩw'o waĩ mwaka wa kana wa Solomoni kũsumbĩka Ĩsilaeli, na ambĩĩie kũyaka mweinĩ wa Nzivu, ũla nĩ mwei wa kelĩ wa mwaka.

2Ũasa wa Ĩkalũ yĩu waĩ wa mita mĩongo ĩlĩ na mũonza, ũthanthau wa mita kenda, na ũtũlu wa mita ĩkũmi na itatũ na nyusu.

3Valanda ũla waĩ mbee wa vala valikĩlawa Ĩkalũnĩ waĩ na ũasa wa mita kenda ta ũthanthau wa Ĩkalũ, na waĩ na ũthanthau wa mita inya na nyusu.

4Ngũta sya Ĩkalũ syaĩ na ndĩlĩsya ilĩ syaĩ ntheke ngalĩko ĩla ya nza, mbee wa ngalĩko ĩla ya nthĩnĩ.

5Ngũtanĩ sya Ĩkalũ ila sya mavavanĩ na ũla wa ĩtina, nĩvongeleelwe tũsũmba twa ngolova; kĩla ngolova yaĩ na ũtũlu wa mita ilĩ na sendimita mĩongo ĩlĩ.

6Kĩla kasũmba ka ngolova ya nthĩ, kaĩ na ũthanthau wa mita ilĩ na sendimita mĩongo ĩlĩ; ngolovanĩ ya kelĩ, kĩla kasũmba kaĩ na ũthanthau wa mita ilĩ na sendimita mĩongo mũonza; na ngolovanĩ ya ĩũlũ, kĩla kasũmba kaĩ na ũthanthau wa mita itatũ na sendimita ĩkũmi. Ngũta sya Ĩkalũ yĩu kĩla ngolovanĩ syaĩ ntheke mbee wa ũkũta wa ngolova ĩla yaĩ ĩtheango, nĩ kana tũsũmba twĩthĩwe tũtw'ĩĩkĩtwe nĩ ũkũta mĩamba yatw'o ĩtemyakĩĩe ũkũtanĩ.

7Mavia ala Ĩkalũ yĩu yaakiwe namo maseũvĩiw'e kyasĩonĩ, nĩ kana wĩthĩe vai wasya ũkwĩw'ĩka wa syĩiva, mathoka kana mũio ũngĩ o na wĩva wa kyũma Ĩkalũ yĩendee kwakwa.

8Mũvĩa wa kũlika ngolovanĩ ĩla ya nthĩ ya tũsũmba tũla twongeleelwe waĩ ngalĩkonĩ ya ĩtheo ya Ĩkalũ, vamwe na ngasi syambatĩte kũvika ngolovanĩ ya kelĩ na ya katatũ.

9Ũu nĩw'o Mũsumbĩ Solomoni waakie Ĩkalũ ayĩmina. Nĩweekĩie kĩala kĩseũvĩtw'e na mĩamba na mbwaũ sya mũkũũ.

10Wongeleelo ũsu wa ngolova itatũ, kĩla ĩmwe yĩna ũtũlu wa mita ilĩ na sendimita mĩongo ĩlĩ, waakĩĩwe ngũtanĩ sya Ĩkalũ, na wakwatanĩtw'e na ngũta isu na mĩamba ya mĩkũũ.

11Mwĩai Ngai nĩweeie Solomoni atĩĩ,

12“Ũndũ wa Ĩkalũ yĩĩ ũkwaka, ethĩwa ũkaatĩĩaa motw'ĩo makwa, kwĩanĩsya myamũlo yakwa, na kwĩw'a mĩao yakwa na kũmĩatĩĩaa, ngeanĩsya kwĩsĩla vala ũĩ watho ũla nanengie ĩthe waku Ndeviti.

13Ngekalanasya na andũ makwa Ĩsilaeli na ndikamatia.”

14Kwoou Solomoni nĩwaakie Ĩkalũ ayĩmina.

15Nĩwavw'ĩkie ngũta sya ngalĩko ya nthĩnĩ sya Ĩkalũ na mbwaũ sya mũkũũ, aivangĩte kuma nthĩ kũvika vala kĩala kyambĩĩe. O ta ũu nĩwavw'ĩkie Ĩkalũ yĩu nthĩ na mbwaũ sya mũtalakwe.

16Ngalĩkonĩ ya ĩtina ya Ĩkalũ yĩu nĩkwaakiwe kasũmba ka nthĩnĩ kala ketawa Vandũ Vala Vatheu Mũno. Kasũmba kau kaĩ na ũasa wa mita kenda na katilanĩtw'e na mbwaũ sya mũkũũ, syumĩte nthĩ kũvika vala kĩala kyambĩĩe.

17Nyũmba ĩla ya ngalĩko ya mbee ya Vandũ vala Vatheu Mũno, yaĩ na ũasa wa mita ĩkũmi na nyanya.

18Ngalĩko ya nthĩnĩ ya nyũmba ĩsu yaĩ ya mbwaũ sya mũkũũ syasĩtwe mavisa ma ikuu na ma malaa. Ngalĩko ya nthĩnĩ yonthe ya nyũmba ĩsu yavw'ĩkĩtwe na mbwaũ sya mũkũũ ũkethĩa mavia ma ngũta syayo mayenekee.

19Ngalĩkonĩ ya ĩtina nthĩnĩ wa Ĩkalũ, nĩwaseũvisye Vandũ vala Vatheu Mũno, nĩ kana aie Ĩsandũkũ ya Ũtianĩo ya Mwĩai Ngai vo.

20Ithimo sya Vandũ vau Vatheu Mũno syailyĩ ta ũũ: Ũasa wa mita kenda, ũthanthau wa mita kenda, na ũtũlu wa mita kenda. Nĩwoombĩĩie thaavu mũthei ngalĩko ya nthĩnĩ ya Vandũ vala Vatheu Mũno, na o ta ũu oombĩĩa thaavu kĩthembeonĩ kĩla kyaseũvĩtw'e na mbwaũ sya mũkũũ.

21Solomoni nĩwoombĩĩie thaavu mũthei ngalĩko ya nthĩnĩ ya Ĩkalũ yĩu. Nĩweekĩie nyololo sya thaavu ngalĩkonĩ ya mbee ya Vandũ vala Vatheu Mũno, syumĩte ngalĩko ĩmwe kũvika ngalĩko ĩla ĩngĩ. Vandũ vala Vatheu Mũno o navo voombĩĩwe thaavu mũthei.

22Kwoou nĩwoombĩĩie thaavu mũthei ngalĩko ya nthĩnĩ yonthe ya Ĩkalũ. O ta ũu nĩwoombĩĩie thaavu kĩthembeonĩ kĩla kyaĩ nthĩnĩ wa Vandũ vala Vatheu Mũno.

23Solomoni nĩwaseũvisye mavisa elĩ ma syũmbe syĩ nthwau syĩtawa akelũvi, aitũmĩa mũtĩ wa mũthata, kĩla ĩvisa yĩ na ũtũlu wa mita inya na sendimita mĩongo ĩna, na amaia Vandũnĩ vala Vatheu Mũno.

24Kĩla kĩmwe kya syũmbe isu kyaĩ na nthwau ilĩ. Ũasa wa ũthwau ũmwe waĩ mita ilĩ na sendimita mĩongo ĩlĩ na itano, na o ta ũu ũasa wa ũthwau ũla ũngĩ waĩ mita ilĩ na sendimita mĩongo ĩlĩ na itano. Ũasa wa kuma mũthyanĩ wa ũthwau ũmwe kũvika mũthyanĩ wa ũthwau ũla ũngĩ waĩ mita inya na nyusu.

25Kĩthimo kya kyũmbe kĩla kya kelĩ kyaĩ kya ũasa wa mita inya na sendimita mĩongo ĩna, kuma mũthyanĩ wa ũthwau ũmwe kũvika mũthyanĩ wa ũthwau ũla ũngĩ. Akelũvi asu elĩ nĩmeanene kwa kĩthimo, na mailyĩ ũndũ ũmwe.

26Ũtũlu wa kĩla ũmwe wa akelũvi asu waĩ wa mita inya na sendimita mĩongo ĩna.

27Solomoni nĩwaiie syũmbe isu ilĩ nthĩnĩ wa Vandũ vala Vatheu Mũno ithimanĩte, na ikatambũũkya nthwau ũkethĩa ũthwau wa kĩmwe wũkĩte kũtinanĩa na ũthwau wa kĩla kĩngĩ katĩ wa kasũmba kau. Nthwau ila ingĩ syatambũũkĩte ikatina ngũtanĩ sya kasũmba kau.

28Nĩwoombĩĩie syũmbe isu ilĩ syĩ nthwau thaavu.

29Ngũta syonthe sya Ĩkalũ na sya Vandũ vala Vatheu Mũno, syaanakavĩtw'e na mavisa ma kũtemeleelwa ma akelũvi, ma mĩkĩndũ na ma malaa malaũku.

30O ta ũu nĩwoombĩĩie thaavu Ĩkalũnĩ nthĩ o vamwe na Vandũ vala Vatheu Mũno.

31Solomoni nĩwaseũvisye mĩango ĩlĩ ĩkwatene aitũmĩa mbwaũ sya mũthata, na amĩkĩa mũomonĩ wa Vandũ vala Vatheu Mũno. Ĩũlũ wa mũomo ũsu vaseũvĩtw'e vena kona itano.

32Mĩango ĩsu yaanakavĩtw'e kwa kũtemeleelwa mavisa ma akelũvi, mĩkĩndũ na malaa malaũku. Mĩango ĩsu, mavisa ma akelũvi na ma mĩkĩndũ syoombĩĩwe thaavu.

33O ta ũu nĩwaseũvisye mbwaũ sya mũthata sya kwĩnzĩla ndeenĩ sya mũomo wa kũlika Ĩkalũnĩ, syĩ na kona inya syĩanene.

34Nĩwaseũvisye mĩango ĩlĩ ya mbwaũ sya mũtalakwe; kĩla mũango waseũvĩtw'e ũkethĩa nũtonya kũkũnzwa.

35Nĩwatemeleeile mĩangonĩ ĩsu mavisa ma akelũvi, mĩkĩndũ na malaa malaũku; nĩwoombĩĩie thaavu wĩanene mĩangonĩ, vamwe na mavisanĩ ala matemeleelwe.

36Nĩwaakie ũkũta ũthyũlũlũkĩte kĩwanza kya nthĩnĩ kya Ĩkalũ. Ũkũta ũsu waakĩtwe mĩthĩa ĩtatũ ya mavia masũvye, na mũthĩa ũmwe wa mĩamba ya mĩkũũ mĩtendesye.

37Mũsingi wa Ĩkalũ yĩu waakiwe mweinĩ wa Nzivu, ũla nĩ mwei wa kelĩ, mwakanĩ wa kana wa kũsumbĩka kwa Solomoni.

38Ĩkalũ nĩyathelile kwakwa vyũ mweinĩ wa Mbuli, ũla nĩ mwei wa nyanya, mwakanĩ wa ĩkũmi na ũmwe wa kũsumbĩka kwa Solomoni. Ĩkalũ yĩu yaakiwe kwĩanana na ũndũ yavangĩĩwe kwakwa. Solomoni akuie myaka mũonza kwaka Ĩkalũ yĩu.

← Chapter 5 Jump to: Chapter 7 →