Isaiah 11

Kituba (BIBILIYA NA KITUBA)

← Chapter 10 Jump to: Chapter 12 →

1Na manima, kintala ke mena na yinti ya Yisayi yina ba zengaka, mpe mutwikila ke mena na myanzi ya yawu.

2Mpeve ya Yave ke vwanda na zulu ya yandi, mpeve ya ndwenga mpe ya mayela, mpeve ya malongi mpe ya ngolo. Mpeve ya luzabu mpe ya kuzitisa Yave.

3Yandi ke zitisa Yave, yandi ke fundisa ve na yina meso ke talaka, yandi ke zenga ve mambu kaka na kuzonza ya bantu.

4Yandi ke fundisa bamputu na ludedomo, yandi ke zenga mambu na kusungama nyonso, samu na kunwanina bantu yina ba ke nyokolaka na yinsi, yandi ke semba bantu ya ntoto na lulendo ya yinwa ya yandi, mpe kaka na mupepe ya yinwa ya yandi, yandi ke kufwa bantu ya yimbi.

5Ni ludedomo ke vwanda mukaba na luketo ya yandi, mpe kukwikama ni yawu ke vwanda singa ya yandi ya luketo.

6Kibulu yina ba ke bokilaka mubaku ke zinga kintwadi na dimeme, yingo ya nkento ke lala kisika mosi na mwana ya dimeme ya mbakala, Mwana ya mpakasa ya mbakala, nkosi ya ntwenya mpe bibulu ya mafuta, bawu nyonso ke vwanda kisika mosi mpe ni mwa mwana ya bakala ke twadisa bawu.

7Ngombe ya nkento na uluse ke kudya kisika mosi, bana ya bawu ke lala kisika mosi, nkosi ke kudya matiti mutindu ngombe.

8Mwana ya fyoti ke sakana ya yandi na dizanza ya mpidi, mpe mwana yina ba me zenga mabene kaka malu-malu yayi, ke tula diboko ya yandi na dibulu ya nyoka.

9Mpasi ke vwanda ve, mwangusulu ke salama ve, kuna na mongo nyonso ya longo, samu ti luzabu ya Yave ke fuluka na ntoto nyonso, mutindu maza ke fukaka na mubu.

10Na kilumbu yina, mwanzi ya Yisayi ke telama kuna mutindu kidimbu ya yinsi samu na makanda ya bantu, bantu ya bayinsi ke sosa yandi, kisika yina yandi ke pemaka ke vwanda ya kufuluka na nkembo.

11Na kilumbu yina, Yave ke lambula dyaka diboko ya yandi, samu na kukuula bantu ya yandi yina ke bikana, bayina ke bikana kuna na Asili mpe na Ngipiti, na Patelose mpe na Kuse, na Elame, na Sineyale, na Amate mpe na mwa bantoto yina kele na kati ya mubu.

12Yandi ke telemisa kidimbu samu na bantu ya bayinsi, yandi ke kutikisa bantu ya Isayeli yina ba siingaka, mpe yandi ke bokila bantu ya Yuda yina mwanganaka, na balweka nyonso yiya ya ntoto.

13Kimbanda ya bantu ya Efalayime ke zimbana, mpe bambeni ya Yuda ke vwanda dyaka ve, bantu ya Efalayime ke vwanda dyaka ve na kimbanda ya bantu ya Yuda, mpe bantu ya Yuda ke vwanda dyaka ve na myangu na mantwala ya bantu ya Efalayime.

14Bawu ke vukana kuna na wesete, na zulu ya myongo ya ba-Filiseti, mpe bawu ke kwenda botola bana ya bifumba yina kele na yinsi ya kuyuma, bantu yina ke zingaka na esete, bantu ya Edome mpe ya Mowabe ke tala mpasi, mpe ba-Amoni ke tumama.

15Yave ke yumisa, maza ya mubu ya Ngipiti, yandi ke ningisa na ngolo diboko ya yandi, na kati ya nzadi ya Efalate, yandi ke kabula nzadi na miila nsambwadi, mpe ba ke banda na kulutaka kuna kaka na makulu.

16Ya ke vwanda na mwa nzila, samu na bantu ya Yave yina ke bikana, bayina ke bikana kuna na Asili, mutindu bikanaka bantu ya Isayeli, kilumbu yina bawu basikaka na Ngipiti.

← Chapter 10 Jump to: Chapter 12 →