Isaiah 51

Kituba (BIBILIYA NA KITUBA)

← Chapter 50 Jump to: Chapter 52 →

1Beno kuwa munu, beno bayina ke na kwendaka sosa ludedomo, beno bayina ke na kusosaka Yave! Beno tala ditadi yina mu pasulaka samu na kuyidika beno, mpe dibulu ya matadi kisika yina mu basisaka beno!

2Beno tala tata ya beno Abalayami, Saala yina butaka beno, samu ti ntangu mu bokilaka Abalayami, yandi vwandaka ve na mwana, mu sakumunaka yandi mpe mu pesaka yandi dikanda ya nene.

3Ya tsyelika, Yave ke bomba Siyone, Yandi ke bomba nyonso yina ba mwangisaka, yandi ke sala ti yinsi ya kuyuma kukuma mutindu bilanga ya Edeni ntoto yina ata kima ke menaka ve, ke kuma mutindu bilanga ya Yave. Nsayi mpe mayangi ke yala kuna, ba ke yimbila mikunga ya nzitusu mpe mikunga ya kuvutula matondo.

4Beno bantu ya munu, beno kuwa munu mbote-mbote! Beno dikanda ya bantu ya munu, beno fungula makutu, samu ti mu ke samuna Musiku ya munu, mu ke pesa banzengolo ya munu, samu ti yawu kuvwanda nsemo ya bantu ya bayinsi.

5Ludedomo ya munu ke pene-pene. Mpulusu ya munu ke na kwiza. Mu ke fundisa bantu ya bayinsi nyonso na lulendo nyonso, bantu yina ke zinga na bisanga ke tula kivuvu ya bawu na munu, bawu ke vingila lusalusu ya diboko ya munu.

6Beno balula meso na zulu mpe beno tala na yisi, awa na ntoto. Ya tsyelika zulu ke zimbana mutindu mulinga. Ntoto ke pasuka, yawu ke kuma mutindu bitende ya kinkuti, bayina ke zingaka na ntoto, ke kufwa mutindu banzinzi. Kasi ludedomo ya munu, ke zingila bantangu nyonso, mpulusu ya munu ke suka ve.

7Beno kuwa munu, beno bayina zaba yinki kele ludedomo, beno bayina kele na Musiku ya munu na ntima! Beno kukima ve bisombolo ya bantu, beno kuvwanda ve na boma ya bifingu ya bawu.

8Samu ti banselele ke kudya bawu mutindu kinkuti, mpe mutindu bidongolo ke kudyaka lele ya mika ya mameme. Kasi mpulusu ya munu ke zingila bantangu nyonso, nkudulu ya munu ke zingila bambandu nyonso.

9Vumbuka, vumbuka! Vwata lulendo ya nge, nge diboko ya Yave! Vumbuka, mutindu na ntangu ya ntama, na ntangu ya bambandu yina lutaka! Ni nge ve pasulaka Layabe? Ni nge ve tobolaka kibulu ya nene ya nsisi ya mubu?

10Ni nge ve yumisaka mubu? Ni nge ve yumisaka maza ya dibulu ya nene yina kele ve na nsuka? Nge fungulaka nzila na kati-kati ya mubu, nzila samu na kulutisa bayina nge kuulaka.

11Bayina Yave me kuula ke vutuka. Bawu ke kuma na Siyone na kati ya milolo ya nsayi. Kyese ya bamvula na bamvula ke talana na bayintu ya bawu mutindu yimpu ya kintinu, kyese na mayangi ke kwiza bwabana bawu, manyongo na biyawula ke kima.

12Yave ke na kutuba: Ni munu, ni munu ke bomba beno. Nge kele nani, samu ti nge vwanda na boma ya muntu yina ke kufwaka? Samu ti nge vwanda na boma ya muntu, yina luzingu ya yandi kele kaka mutindu matiti.

13Nge me zimbana Yave, ni yandi yidikaka nge, Yave yina tandaka mazulu mpe tulaka lufulu ya ntoto! Bilumbu nyonso, nge ke na kutekita, samu na nkele ya muntu ya ntima ya yimbi, mutindu muntu yina me kubama samu na kubebisa nge. Ntangu yayi, wapi nkele yango, ya muntu yina ke kwamisaka?

14Ntama mingi ve, nkole ke kuzwa kimpwanza, yandi ke kufwa dyaka ve na kati ya boloko, yandi ke kufwa dyaka nsatu ve!

15Munu, mu kele Yave Nzambi ya nge. Ni munu ke ningisaka mubu, mpe ke wakisaka makelele ya bimpo, Nkumbu ya munu kele: Yave, Mfumu ya Binwani.

16Mu me tula mambu ya munu na yinwa ya nge, mu me bumba nge na mpewo ya diboko ya munu, samu na kuyalumuna mazulu, na kutula lufulu ya ntoto, mpe kutuba na Siyone: Nge kele dikanda ya munu!

17Vumbuka, vumbuka! Nge Yelusalemi, telama, nge me kunwa mbungu ya kufuluka ya nkele ya Yave, mbungu yina yandi me lakisa nge, Ya tsyelika, nge me manisa mbungu ya kizungu-zungu, tii na dibete ya mansukina.

18Na bana nyonso yina nge me buta, ata mosi ve lenda twadisa nge, mpe na bana nyonso yina nge me kulisa, ata mosi ve lenda simba nge na diboko ya nge!

19Mambu zole ya mpasi me bwidila nge, kasi nani ke tala nge kyadi? Mpasi mpe mwangusulu, nsatu na mbele ya mvita! Nani ke bomba nge?

20Bana ya nge me lemba, bawu ke ya kulala na magambu ya banzila, mutindu bankabi me kangama na mutambu, nkele ya Yave me bwidila bawu, bawu me kuzwa nsembolo ya Nzambi ya nge.

21Na yina, kuwa mambu yayi, nge kento ya kyadi, nge yina me kola kasi na vinu ve.

22Yave Nzambi ya nge ke na kutuba: yandi yina ke nwaninaka dikanda ya nge, mu ke katula na diboko ya nge, mbungu ya kizungu-zungu, nge ke kunwa dyaka ve, mbungu ya kufuluka na nkele ya munu,

23samu ti mu ke tula yawu na maboko ya bantu yina vwandaka nyokola nge, ya bayina vwandaka tuba na nge: Kondama, samu ti beto luta! Mpe nge me pesa mukongo ya nge samu ti, bawu kudyata yawu, mutindu nzila samu na bayina ke lutaka.

← Chapter 50 Jump to: Chapter 52 →