Isaiah 2

Kituba (BIBILIYA NA KITUBA)

← Chapter 1 Jump to: Chapter 3 →

1Yayi ni lumoni yina talaka mumbikudi Esaya, mwana ya Amose, na yina me tadila yinsi ya kimfumu ya Yuda mpe mbanza Yelusalemi.

2Na bilumbu yina ke kwiza, mongo ya Yinzo ya Yave ke lutila mfunu na myongo nyonso, yawu ke lutila myongo ya fyoti, mpe bantu ya bayinsi nyonso ke kwenda fuluka kuna.

3Bantu ya bayinsi mingi ke kwenda kuna mpe ke tuba bawu na bawu: «Beno kwiza, beto kwendeno na mongo ya Yave kisika kele Yinzo ya Nzambi ya Yakobi! Yandi ke longisa beto banzila ya yandi, mpe beto ke landa yawu.» Samu ti musiku ke katuka na Siyone mpe mambu ya Yave ke katuka na Yelusalemi.

4Yandi ke vwanda zuzi na kati-kati ya bantu ya ba yinsi mingi, yandi ke vwanda nzonzi ya bantu ya bayinsi mingi. Ba ke baka bambele ya bawu ya mvita samu na kuyidika basengo na yawu, ba ke baka madyonga ya bawu samu na kuyidika minkwati na yawu. Ata yinsi mosi ke nwanisa dyaka yinsi ya nkaka ve. Bantu ke longoka dyaka ve na kunwana bamvita.

5Beno kwiza, dikanda ya Yakobi! Beto tambuleno na nsemo ya Yave.

6Yave, nge me losa bantu ya nge, dikanda ya Yakobi, samu ti bwala ya bawu me fuluka na bantu yina ke salaka mambu, bantu yina me katuka na Esete, bantu yina ke sadilaka mikisi to bunganga samu na kuzaba mambu yina ke kwiza, mutindu ba-Filiseti, bantu ya nge ke na kusala mumbungu na banzenza.

7Yinsi me fuluka na mbongo mpe na wolo, bimvwama ya yinsi kele mingi, yinsi me fuluka na bampunda mpe na pusu-pusu ya mvita.

8Yinsi me fuluka na banzambi ya luvunu, bawu ke na kufukama na mantwala ya biteki yina ba yidika na maboko ya bawu, bima yina ba me yidika na misapi ya bawu.

9Muntu me kondama, muntu me kuluka, kulemvokila yandi ve!

10Kwenda bumbama na kati ya bantadi, na yisi ya ntoto, samu na kukima nsisi ya Yave, mpe nsemo ya bunene ya yandi.

11Muntu yina ke na lunangu, yandi ke kuluka, mpe muntu ya lulendo ke kondama: Na kilumbu yina, kaka ni Yave yandi mosi ke kemboswa.

12Ya tsyelika yawu kele kilumbu ya Yave Nzambi ya Binwani samu na kufundisa bayina ke salaka mayama, mpe bayina ke na lunangu, mpe bayina ke ya kuzanguka, Nzambi ke kulula bawu.

13Na kilumbu yina, yandi ke semba bayinti ya nene, ya kuzangama yina ba ke bokilaka sedele ya Libane, mpe na bayinti ya nene ya bizunga ya Basane,

14Na kilumbu yina, yandi ke fundisa myongo ya nene mpe ya fyoti ya kuzanguka.

15Na kilumbu yina, yandi ke fundisa bayinzo nyonso ya bankebi, bayinzo ya bawu ya mitela ya yinda, yandi ke fundisa bibaka nyonso ya lukengolo.

16Na kilumbu yina, yandi ke semba babwatu ya Talesise mpe bamasuwa ya kulutila kitoko.

17Muntu yina ke na lunangu ke kuluka, mpe muntu ya lulendo ke kondama: Na kilumbu yina, kaka ni Yave yandi mosi ke kemboswa.

18Banzambi nyonso ya luvunu ke zimbana.

19Samu na bawu, ba ke kima na bantadi, na mabulu ya ntoto samu na kukima nsisi ya Yave, samu na kukima nsemo ya bunene ya yandi, ntangu yandi ke telama samu na kutalisa ntoto boma.

20Na kilumbu yina, muntu ke baka banzambi ya yandi ya luvunu, yina yandi yidikaka na palata mpe na wolo, banzambi ya yandi yina yandi vwandaka fukimina, yandi ke losa yawu na bampuku mpe na bangembo.

21Bantu ke kwenda bumbama na bantadi, na kati-kati ya matadi, ntama na nsisi ya Yave, samu na kukima nsemo ya bunene ya yandi, ntangu yandi ke telama samu na kutalisa ntoto boma.

22Ni yawu yina, beno tula ve kivuvu na muntu! Luzingu ya muntu ke kaka mupepe! Wapi mfunu yina muntu kele na yawu?

← Chapter 1 Jump to: Chapter 3 →