Isaiah 62

Kituba (BIBILIYA NA KITUBA)

← Chapter 61 Jump to: Chapter 63 →

1Samu na Siyone mu ke dingama ve, samu na Yelusalemi, mu ke kuzwa ve kizunu, tii ntangu ludedomo ya yandi ke talana mutindu nsemo ya suka, mpe mpulusu ya yandi ke talana mutindu mwinda ke na kulema.

2Na yina, bayinsi nyonso ke tala ludedomo ya nge, bantinu nyonso ke tala nkembo ya nge, mpe ba ke bokila nge na nkumbu ya malu-malu, yina yinwa ya Yave ke pesa nge.

3Nge ke vwanda na diboko ya Yave, yimpu ya kintinu ke lezima, mpe yimpu ya lele ya kintinu na diboko ya Nzambi ya nge.

4Ba ke bokila dyaka nge ve «Kento yina ba bikaka», mpe ba ke bokila dyaka ve yinsi ya nge «Ntoto ya kumwangana», kasi ba ke bokila nge «Yina ke yangidikaka munu», ba ke bokila yinsi ya nge «Ntoto yina ba me kwela», samu ti Yave ke tala kilengi ya yandi na nge, samu ti yinsi ya nge ke vwanda mutindu kento ya yandi.

5Ya tsyelika, mutindu ditoko ke kwelaka ntwenya ya kento, na yina, bana ya nge ke kwela nge, mutindu kento ba me kwela ke yangidikaka bakala ya yandi, na yina, nge mpe, nge ke yangidika Nzambi ya nge.

6Na bibaka ya nge, nge Yelusalemi, mu me tula bankebi, mpimpa na ntangu, bawu ke dingama ve, beno bayina ke bambulaka Yave moyo, beno ke pema ve!

7Beno kupesa yandi kizunu ve, tii ntangu yandi ke tunga dyaka Yelusalemi, tii ntangu yandi ke vutula nzitusu ya Yelusalemi na ntoto.

8Yave me kudya ndefi na ngolo ya yandi, mpe na lulendo ya yandi: Mu ke sala dyaka ve ti bambeni ya nge kudya bambuma ya nge ya faline, banzenza ke kunwa dyaka ve vinu ya nge ve ya malu-malu, yina nge me kuzwa na kisalu ya ngolo.

9Kasi bayina ke yonzika bambuma ya faline, ni bawu ke kudya yawu, mpe bawu ke kembila Yave, bayina ke yonzika bambuma ya vinu, ni bawu ke kunwa vinu ya malu-malu, na ngaanda ya lupangu ya Yinzo ya munu ya longo.

10Beno luta, beno lutila na myelo! Beno kubika nzila samu na bantu ya munu! Beno fungula, beno fungula nzila, beno katula matadi! Beno telemisa kidimbu ya yinsi na zulu ya bantu!

11Yave ke wakisa ndinga ya yandi tii na bandilu ya ntoto: Beno tuba na ndumba ya Siyone: «Mpulusu ya nge ke na kwiza, yandi kele na difuta ya yandi, mpe musendo kele na mantwala ya yandi.»

12Ba ke bokila bawu «Dikanda ya longo, bantu yina Yave me kuula». Nge Yelusalemi, ba ke bokila nge «Mbanza yina ba me zola», «Mbanza yina ba me manga ve».

← Chapter 61 Jump to: Chapter 63 →