Isaiah 55

Kituba (BIBILIYA NA KITUBA)

← Chapter 54 Jump to: Chapter 56 →

1Beno nyonso yina kele na mpwila, beno kwiza na kisika yina kele na maza, ya vwanda muntu yina kele ve na mbongo. Beno kwiza, beno sumba mpe beno kudya! Beno kwiza sumba malafu mpe miliki! Kondwa kupesa mbongo, kondwa kusumba!

2Samu na yinki beno ke na kubasisa mbongo ya beno na yina kele ve madya? Samu na yinki beno ke salaka samu na madya yina ke yukutisaka ve? Beno kuwa munu mbote, mpe beno ke kudya madya ya mbote, beno ke vwanda na kilengi ya kudya madya ya kitoko.

3Beno kuwa munu mpe beno kwiza na sika ya munu, beno kuwa munu mpe beno ke zinga. Mu ke sala na beno, ngwisani ya bantangu nyonso, samu na kulungisa bansilulu yina mu tubaka na Davidi.

4Tala, mu tulaka yandi mutindu mbangi ya makanda ya bantu, mpe mutindu mfumu samu na kuyala makanda ya bantu.

5Ya tsyelika, nge ke bokila bantu ya bayinsi yina nge vwandaka zaba ve, mpe bantu ya bayinsi yina zabaka nge ve ke kwiza mbangu na sika ya nge, samu na munu, Yave Nzambi ya nge, Nzambi ya longo ya Isayeli, yina me pesa nge nkembo.

6Beno sosa Yave na ntangu beno lenda kutala yandi, beno bokila yandi, ntangu yandi kele pene-pene!

7Bika ti muntu ya yimbi kubika mavanga ya yandi, muntu yina ke salaka yimbi kubika mabanza ya yandi ya yimbi! Yandi kuvutuka na Yave yina ke fwila yandi kyadi, yandi kuvutuka na Nzambi ya beto, yina ke lembaka ve na kulemvokila.

8Samu ti mabanza ya beno kele ve mabanza ya munu, banzila ya beno kele ve mutindu banzila ya munu, ni Yave me tuba yawu,

9Mutindu mazulu me lutila ntoto na kuzangama, ni mutindu mosi mpe nzila ya munu kele ya kuzangama na zulu ya banzila ya beno, mpe mabanza ya munu kele ya kuzangama na zulu ya mabanza ya beno.

10Mutindu mvula na neze ke kulumukaka katuka kuna na mazulu, mpe ke vutukaka ve, kondwa kubolisa ntoto, kusala ti ntoto kuma mbote kubasisa mitwikila, kondwa kupesa bambuma ya kukunda na kisadi-bilanga, mpe kupesa mampa na muntu yina ke na nsatu,

11ya kele mutindu mosi mpe na mambu yina me basika na yinwa ya munu: ya ke vutuka ve na munu kondwa kusala dyambu, kondwa kusala luzolo ya munu, mpe kondwa kulungisa mabanza ya munu nyonso.

12Ya tsyelika, beno ke basika na kilengi nyonso, ba ke twadisa beno na kizunu. Myongo na myongo ya fyoti ke yangalala na kusala milolo ya nsayi na mantwala ya beno, bayinti nyonso ya bilanga ke bula maboko.

13Na kisika yina ke menaka yinti ya fyoti, yinti ya sipelese ke mena kuna, na kisika yina ke menaka yinti ya basende, yinti ya miite ke mena kuna, mpe yawu ke vwanda nkembo samu na Yave. Yawu ke vwanda kidimbu ya bantangu nyonso, mpe ba ke mwangisa yawu ve.

← Chapter 54 Jump to: Chapter 56 →