Isaiah 25

Kituba (BIBILIYA NA KITUBA)

← Chapter 24 Jump to: Chapter 26 →

1Yave nge kele Nzambi ya munu, mu ke kembila mpe mu ke siika nkumbu ya nge, samu ti nge me lungisa mambu ya mbote, nge kele ya kukwikama na lukanu yina nge bakaka katuka ntama.

2Ya tsyelika, nge me sala ti mbanza kukuma bikunku ya matadi, mbanza ya kutungama na bibaka ya lukengolo me mwangana, yinzo ya kitoko ya banzenza me zimbana, yawu ke tungama dyaka ata fyoti ve.

3Ni yawu yina, bantu ya lulendo ke na kukembila nge, bambanza ya bayinsi yina ke talaka ve bantu kyadi ke zitisa nge.

4Samu ti nge vwandaka kiswamunu ya muntu yina kondwaka ngolo, kiswamunu ya mputu na ntangu ya kyadi, kibumbamanu na ntangu ya kitembo ya ngolo, mpewo na ntangu ya tiya, ya tsyelika, mupepe ya bantu ya lulendo kele mutindu kitembo ya ngolo yina ke mwangisaka bibaka.

5Mutindu tiya na ntoto yina ata kima ke menaka, ni mutindu yina nge sukisaka makelele ya banzenza. Mutindu dituti ke salaka na tiya, ni mutindu yina nge ke kangaka makelele ya bantu yina ke talaka ve bantu kyadi,

6Yave Mfumu ya Binwani, ke sala samu na bantu nyonso na zulu ya mongo yayi, mukembo ya bangombe ya mafuta mukembo ya vinu ya ntama, mukembo ya mbisi ya kitoko mpe ya vinu ya mbote.

7Kuna na mongo, yandi ke pasula lele yina ke kangaka bizizi ya bantu nyonso, divunga yina ke fukaka bayinsi nyonso.

8Yandi ke zimbisa lufwa samu na bantangu nyonso, Yave Mfumu ke kusuna mansangasa ya bizizi ya bantu nyonso, yandi ke zimbisa nsoni ya bantu ya yandi na ntoto nyonso. Ni Yave me tuba yawu.

9Na kilumbu yina ba ke tuba: «Ni yandi Nzambi ya beto! Beto me tula kivuvu ya beto na yandi, yandi me vuukisa beto. Samu ti beto me tula kivuvu ya beto na Yave, beto kele na kyese mingi, beto ke na kuyangalala na mpulusu ya yandi!

10Ya tsyelika diboko ya Yave ke pemaka na zulu ya mongo!» Mpe Mowabe ba me mwangisa yawu, mutindu matiti yina ba ke na kudyata na makulu na dibulu ya mboloso.

11Na kati ya dibulu yina, yandi ke lambulaka diboko ya yandi, mutindu ke salaka muntu yina ke kusaya na kati ya maza. Kasi Yave ke bwisa lunangu ya yandi, mambu ya yimbi yina maboko ya yandi ke salaka.

12Yave ke bwisaka, yandi ke kululaka bibaka ya nge ya lukengolo yina kele ya kuzangama. Yandi ke lalisaka yawu na ntoto, yandi ke bwisaka yawu na kati ya fundu-fundu.

← Chapter 24 Jump to: Chapter 26 →