Isaiah 23

Kituba (BIBILIYA NA KITUBA)

← Chapter 22 Jump to: Chapter 24 →

1Mambu yina me tadila nsembolo ya Tile ni yayi: Beno looka, beno babwatu ya Talesise, samu ti yawu me mwangana. Bayinzo kele dyaka ve, nkotolo kele dyaka ve! Ba lakisaka yandi yawu katuka kuna na Kitime.

2Beno vwanda mababa samu na boma beno bayina ke zingaka na ndilu ya mubu, mpe beno bantu ya mumbungu ya Sidone yina ke tambulaka na ndilu ya mubu!

3Bambuma ya faline yina ba kundaka na ndilu nyonso ya Nile, bambuma yina ba yonzikaka pene-pene ya nzadi, ni yawu vwandaka ndandu ya yawu, yawu kumaka zandu ya bantu ya bayinsi ya nkaka.

4Nge Sidone, tala nsoni! Samu ti mubu me zonza, kiswamunu ya mubu ke na kutuba: «Mu me kuzwa ve misongo, mu me buta ve, mu me kulisa ve matoko, mu me kulisa ve bandumba.»

5Ntangu bantu ya Ngipiti ke kuwa mambu yina mpe ntangu ba ke kuwa nsangu ya nsembolo ya Tile, bantu ke kubwa.

6Beno kima tii na Talesise, beno yina ke zingaka na ndilu ya mubu, beno looka.

7Yayi ni mbanza ya beno yina beno ke tadilaka kilengi? Mbanza yina kele katuka bantangu ya ntama? Bantu ya mbanza yayi vwandaka kwenda zinga na bayinsi ya nzenza yina kele ntama.

8Tile vwandaka kabula bayimpu ya kintinu, bantu ya yandi yina vwandaka sala mumbungu, bawu vwandaka mutindu bana ya bantinu. Bantu ya yandi yina ke salaka mumbungu, ni bawu bantu yina ba vwandaka zitisa na yinza. Nani bakaka lukanu ya kumwangisa mbanza yayi?

9Ni Yave Nzambi ya Binwani salaka mambu yina. Yandi salaka mutindu yina samu na kubwisa lunangu ya nyonso yina ba ke zitisaka, samu na kukulula nyonso yina ba ke sadilaka nsangu awa na ntoto.

10Nge ndumba ya Talesise, sala bilanga na yinsi ya nge mutindu Nile, samu ti dibungu kele dyaka ve.

11Yave me yalumuna diboko ya yandi na zulu ya mubu, yandi me tekitisa bayinsi ya bintinu, yandi me pesa ntumunu na Kaana, samu na kumwangisa bisika yina kele ya kutungama na bibaka ya lukengolo.

12Yandi tubaka mutindu yayi: «Nge Sidone ndumba ya kitoko, nge yina ba bebisaka, nge ke sakana dyaka ve! Telama, luta pene-pene ya yinsi ya Kitime! Ata ti nge luta kuna, nge ke kuzwa ve kizunu.

13Tala yinsi ya ba-Kalede, yawu ke dyaka ve na bantu, ba-Asili salaka ti yinsi ya ba-Kalede kukuma ya bantu yina ke zingaka na yinsi ya kuyuma, bawu ke tungaka bayinzo ya mitela ya yinda, bawu mwangisaka bayinzo ya bantinu ya Tile, bawu kitulaka bayinzo yango kikunku ya matadi.

14Beno babwatu ya Talesise, beno yawula! Ya tsyelika kiswamunu ya beno me mwangana!»

15Na kilumbu yina, ba ke zimbana mbanza Tile na bamvula makumi nsambwadi, mutindu kele yinda ya luzingu ya ntinu. Na manima ya bamvula makumi nsambwadi, mpasi yina ke kumina Tile ke vwanda mutindu mosi na mpasi yina ke kuminaka kento ya kindumba:

16Nge kento ya kindumba yina ba zimbanaka, baka nsambi, kwenda zungidila mbanza nyonso! Sika mbote nsambi, sala miningu ya mutindu na mutindu, samu ti ba kubambukila nge moyo!

17Na manima ya bamvula makumi nsambwadi, Yave ke telama samu na Tile mpe Tile ke vutukila na kusadila mambu ya yandi ya busafu. Yandi ke banda na kusala kindumba na bayinsi ya bintinu ya yinza na ntoto nyonso.

18Kasi ndandu ya Tile mpe difuta ya busafu ya yandi, ba ke pesa yawu na Yave. Ba ke kutikisa ve yawu mpe ba ke bumba ve yawu. Difuta ya Tile ke vwanda samu na bayina ke zingaka ma mantwala ya Yave. Samu na bawu ya kele madya yina ke yukutisaka mpe bilele ya minkembo.

← Chapter 22 Jump to: Chapter 24 →