Isaiah 45

Kituba (BIBILIYA NA KITUBA)

← Chapter 44 Jump to: Chapter 46 →

1Yave tubaka mutindu yayi na Siluse, ntinu yina yandi byekaka: Mu simbaka nge na diboko ya munu ya lubakala, samu ti nge kudyata makanda ya bantu ya bayinsi na mantwala ya nge, samu ti nge kubwisa lutumu ya bantinu, mpe samu na kufungula myelo yina kele ya kukangama na mantwala ya nge, samu ti myelo ya bambanza kuvwanda dyaka ve ya kukangama.

2Munu mosi, mu ke tambula na mantwala ya nge, mu ke katula bikaku na nzila, mu ke mwangisa myelo ya kisengo ya mbwaki, mu ke zenga bikangulu ya bisengo.

3Mu ke pesa nge bimvwama yina kele ya kubumbama, bimvwama yina ba me bumba na biswekolo, samu ti nge ke zaba ti ni munu kele Yave, me bokila nge na nkumbu ya nge, mpe mu kele Nzambi ya Isayeli.

4Samu na kisyelo ya munu, Yakobi mpe Isayeli bantu ya munu, yina mu me soola, mu me bokila nge na nkumbu ya nge, mu me pesa nge nkumbu ya buzitu, ata ti nge me zaba ntete munu ve.

5Mu kele Yave, kana munu ve, Nzambi ya nkaka kele ve. Mu me kubika nge na mvita ata ti nge ma zaba munu ve.

6Samu ti bantu kuzaba yawu katuka kisika yina ntangu ke basikaka tii kisika yina ntangu ke lalaka, kana munu ve, ya nkaka kele kima ya mpamba, mu kele Yave mpe ya nkaka kele ve.

7Mu me sala nsemo, mpe mu me yidika kitombe, mu me sala kizunu, mu me sala mpe ti mpasi kuvwanda, ni munu Yave me sala nyonso yina.

8Katuka kuna na mazulu, kulumuna ludedomo mutindu kinoko, bika ti matuti kulumuna ludedomo mutindu mvula! Bika ti ntoto funguka, samu ti mpulusu kutalana, mpe ti ludedomo kubasika mutindu mutwikila! Munu Yave, mu me yidika bima nyonso yayi.

9Kyadi na muntu yina ke swanisa yina me yidika yandi, na kutala mbote, yandi kele kaka mbungu na kati-kati ya bambungu ya ntoto, ntoto ya kulamba lenda tuba na kisadi-bambinda ti: «Yinki nge ke na kusala? Mpe ti kisalu yina nge kele ya mpamba!»

10Kyadi na muntu yina ke tuba na tata ya yandi mutindu yayi: Samu na yinki nge butaka munu? To na kento: Samu na yinki nge ke butaka?

11Yave Nzambi ya longo ya Isayeli yina yidikaka nge ke na kutuba mutindu yayi: Nge zola kuyufula munu na mambu yina ke kwiza? To kupesa munu bantumunu samu na bana ya munu, mpe samu na yina mu ke yidika na maboko ya munu?

12Ni munu yidikaka ntoto, mpe na zulu ya yawu, mu yidikaka muntu, mu tandaka mazulu na maboko ya munu, ni munu ke pesa bantumunu na binwani ya yawu nyonso.

13Ni munu me basisa Siluse samu na ludedomo ya munu, ni munu ke sungika banzila ya yandi nyonso. Yandi ke tunga dyaka mbanza ya munu, mpe yandi ke bika ti bantu ya munu yina ba nataka na ngolo, na yinsi ya nzenza kuvutuka na yinsi ya bawu, ba ke futa kima ve, bawu ke pesa ata dikabu, ni Yave Mfumu ya Binwani me tuba yawu.

14Yave ke na kutuba: Ndandu ya kisalu ya bantu ya Ngipiti, mbongo ya bantu ya mumbungu ya Kuse, bantu ya yinsi ya Seba, bantu yayi ya yinda mingi, nyonso yina ke lutila na sika ya nge ke kuma ya nge, bantu yayi ke landa nge bawu ke vwanda ya kukangama na bampanga, bawu ke fukama na mantwala ya nge, bawu ke sambila mutindu yayi: «Nzambi kele kaka na sika ya beno, Nzambi ya nkaka kele ve. Banzambi ya nkaka kele mpamba!»

15Nzambi ya Isayeli, nge yina ke vuukisaka, ya tsyelika, nge kele Nzambi ya kubumbama.

16Bawu ke tala nsoni, bawu ke kufwa nsoni, bawu nyonso ke kwenda na kati ya nsoni ya kulutila, bayina ke yidikaka biteki.

17Na yina me tadila Isayeli, ni na Yave bawu ke kuzwa mpulusu ya mankululu. Kilumbu mosi ve beno ke tala dyaka nsoni, beno ke kufwa dyaka nsoni ata fyoti ve.

18Na yina, Yave ke na kutuba, yandi yina yidikaka mazulu, ni yandi Nzambi yina salaka ntoto mutindu yawu kele, yandi salaka ti yawu kusyama, yandi salaka ve ti yawu kuvwanda mpamba, kasi yandi yidikaka ntoto mpe salaka ti bantu kuzinga na ntoto: «Mu kele Yave, Nzambi ya nkaka kele ve.

19Mu me zonza ve na mansweki mpe na kisika mosi ya kitombe na ntoto. Mu ke tuba ve na dikanda ya Yakobi ti: Beno sosa munu na kati ya mpamba! Munu Yave mu ke zonzaka mambu ya kusungama, mu ke samunaka mambu ya kudedama.»

20Beno bayina ke ntete moyo na kati ya makanda ya bantu, beno yonzama mpe beno kwiza, Beno nyonso, beno belama! Bawu kele ve na luzabu, bayina kele na biteki yina ba yidika na yinti, bawu ke sambilaka nzambi, yina lenda vuukisa bawu ve.

21Beno samuna yawu, beno talisa mambu ya beno, beno yonzama! Beno vukana mpe kintwadi, beno solola. Nani zabisaka mambu yina ke kwiza ntete ti yawu kusalama ntangu yayi. Nani zonzilaka mambu yango ntama? Ya kele ve ni munu Yave? Na mantwala ya munu, Nzambi ya nkaka kele ve. Nzambi ya kusungama, Nzambi yina ke vuukisaka, Nzambi ya nkaka kele ve.

22Beno nyonso bayina ke zingaka na bandilu ya ntoto, beno baluka na sika ya munu mpe beno ke vuuka! Ya tsyelika mu kele Nzambi, mpe Nzambi ya nkaka kele ve.

23Mu me kudya ndefi na Nkumbu ya munu mosi, mambu ya kusungama, ke basikaka na yinwa ya munu, dyambu yina ba lenda soba ve. Bantu nyonso ke fukama na mantwala ya munu, bantu nyonso ke kudya ndefi na Nkumbu ya munu,

24bawu ke tuba na yina me tadila munu ti: «Ya tsyelika, kaka ni na Yave kele na kusungama mpe lulendo.» Bayina nyonso me dasukila yandi, bawu ke kwiza na mantwala ya yandi na nsoni.

25Bantu nyonso ya Isayeli ke vwanda ya kusungama samu na Yave, mpe bawu ke vwanda na fyele.

← Chapter 44 Jump to: Chapter 46 →