Isaiah 6

Kituba (BIBILIYA NA KITUBA)

← Chapter 5 Jump to: Chapter 7 →

1Na mvula yina ntinu Ozyase kufwaka, mu talaka na lumoni, Mfumu ya kuvwanda na kiti ya yandi ya kintinu ya kuzanguka, yisi ya kinkuti ya yandi fulusaka Yinzo nyonso ya Nzambi.

2Baselafime vwandaka na zulu ya yandi. Konso selafime vwandaka na mapapu sambanu: Zole samu na kubumba kizizi, zole samu na kubumba makulu mpe zole samu na kudumukaka.

3Ba vwandaka tuba bawu na bawu: «Ya longo, ya longo, ya longo, Yave Nzambi ya Binwani! Ntoto nyonso kele ya kufuluka na nkembo ya yandi.»

4Bandinga ya bawu vwandaka ningisa myelo na balufulu ya yawu. Mpe Yinzo ya Nzambi fulukaka na mulinga.

5Na yina mu tubaka: «Kyadi samu na munu! Mu me zimbana, samu ti bikoba ya munu kele ya kuvedila ve, mu ke zingaka na kati ya bantu yina ke na bikoba ya kuvedila ve, mpe meso ya munu me tala Ntinu, Yave Nzambi ya Binwani!»

6Kasi mosi na baselafime dumukaka na sika ya munu. Na diboko ya yandi, yandi vwandaka na dikala ya tiya yina yandi bakaka na kiyokolo ya minkayulu na musoma.

7Yandi simbaka yinwa ya munu mpe yandi tubaka: «Mutindu dikala yayi me botana na bikoba ya nge, yimbi ya nge me katuka, ba me fuka disumu ya nge.»

8Mu kuwaka Mfumu tubaka mutindu yayi: «Nani mu ke fidisa? Nani ke kwenda samu na beto?» Mu vutulaka: «Munu yandi yayi, fidisa munu!»

9Mfumu tubaka na munu: «Kwenda zonzila bantu yayi: “Beno ke kuwa mbote, kasi beno ke bakula ve! Beno ke fungula meso mbote, kasi beno ke tala ve!”

10Sala ti bantima ya bantu yayi kukuma ngolo, kanga makutu mpe meso ya bawu, samu ti bawu kuwa ve na makutu ya bawu, bawu tala ve na meso ya bawu, mpe bawu kuvisa ve na bantima ya bawu. Na yina, bawu ke vutuka ve na sika ya munu, samu ti mu belusa bawu.»

11Mu yufulaka: «Tii wapi ntangu Mfumu? Yandi vutulaka: Tii ntangu yina bambanza ke mwangana, ntangu yawu ke bikana kondwa bantu, ntangu bayinzo ke bikana ya mpamba, mpe bilanga ke kuma yinsi ya kuyuma mpe ya kyadi.

12«Tii ntangu yina Yave ke fidisa bantu ya yinsi ntama, mpe yinsi ke bikana kaka yawu mosi.

13Kana ya bikana nkonga mosi na kati ya bankonga kumi ya bantu, bawu ke manisa na kufwa na tiya, kasi mutindu batelembente mpe bayinti ya nkaka ya nene yina ba me zenga ke bikaka bisinza ya yawu, ni mutindu yina mpe bisinza ya bantu yayi ke buta dikanda ya longo.»

← Chapter 5 Jump to: Chapter 7 →