Isaiah 28

Kituba (BIBILIYA NA KITUBA)

← Chapter 27 Jump to: Chapter 29 →

1Kyadi samu na Samaliya! Bayina ke kolaka malafu kuna na ntoto Efalayime, bawu kele na mayama ya mbanza yayi, yina kele na kifwani ya yimpu ya kintinu. Na mongo ya fyoti yina ke na kuyala mudimba ya ntoto ya mbote, ya kele kitoko. Kasi ya ke na kifwani na bifulu yina me yuma na yintu ya bantu, yina me kola malafu mpe me lala mpongi samu na vinu.

2Tala, muntu ya nene mpe ya ngolo ke na kwiza sadila Yave. Mutindu mvula ya matadi, ya mupepe ya ngolo yina ke mwangisaka, mutindu mupepe ya ngolo yina ke na kunata maza. Na ngolo nyonso, yandi me bwisa nyonso na ntoto.

3Mbanza yayi ke mwangana, mbanza yayi yina kele na kifwani ya yimpu ya kintinu, lunangu ya bayina ke kolaka malafu na ntoto ya Efalayime.

4Ba ke dyata yawu, bifulu ya kuyuma yina vwandaka sala kitoko ya Efalayime, na zulu ya mongo ya fyoti yina vwandaka yala mudimba ya ntoto ya mbote, Samaliya ke vwanda mutindu mbuma ya ntete ya fike yina me yela ntete ti ntangu ya kulokota bambuma kukuma, kaka na ntangu yina muntu ke tala yawu, yandi ke buka mpe ke kudya yawu na mbala mosi.

5Na kilumbu yina, Yave Mfumu ya Binwani ke vwanda yimpu ya kitoko ya kintinu mpe musanga ya nkembo yina ba ke tulaka mbunzu, samu na bantu ya yandi yina ke bikana ya moyo.

6Yandi ke vwanda mpeve ya ludedomo na bazuzi, yandi ke fulusa na ngolo, bayina ke vutulaka bambeni na manima, na ntwala ya nkotolo ya mbanza.

7Banganga Nzambi na mimbikudi ke na kuzonza mambu ya kidi-kidi samu na vinu. Malafu ke na kusala ti ba tambula tengu-tengu. Samu na malafu ba ke na kuzonza kidi-kidi. Vinu me balula bawu yintu, malafu me sala ti ba tambula tengu-tengu, bawu ke na kuzonza mambu ya kidi-kidi, na ntangu bawu ke na kuzwa balumoni, bawu ke na kutala mbote ve ntangu bawu ke na kusala lufundusu.

8Ba mesa nyonso me fuluka na bilusi, nyonso me kuma mvindu! Kisika ya kuvedila kele dyaka ve.

9Bantu yina ke kolaka malafu tubaka mutindu yayi: Na nani Esaya zola kupesa bandongosolo? Na nani yandi ke bangudila mambu? Na bana yina ba me yimina mabene? Na bana ya fyoti yina me bika mabene ya mama ya bawu?

10Ntumunu na ntumunu, ntumunu na ntumunu, musiku na musiku, musiku na musiku, fyoti awa, fyoti kuna.

11Ni yawu yina, Yave ke zonzila bantu yayi, na ndinga ya nzenza, na bampova yina ba lenda bakula ve.

12Yandi zabisaka bawu, awa ni kisika ya kizunu. Beno bika yina me lemba kupema. Awa, ni kisika ya kudingama. Kasi bawu me zola ve kuwa Yave.

13Ni yawu yina, samu na bantu yayi, mambu ya Yave ke vwanda mutindu yayi: Ntumunu na ntumunu, ntumunu na ntumunu, musiku na musiku, musiku na musiku, fyoti awa, fyoti kuna. Kuna, na kutambula, bawu ke kubwa na mukongo mpe bawu ke zengana mikwa, bawu ke bakama na mutambu mpe bawu ke kangama.

14Na yina, beno kuwa mambu ya Yave, beno bayina ke sekaka bampangi, beno bayina kele bantwadisi ya bantu ya Yelusalemi,

15Beno ke tubaka: Beto me sala ngwisani na lufwa, beto me sala kindiku na yinsi ya bafwa, ntangu mpasi ya nene ya mwangusulu ke kwiza, yawu ke kuma ve na sika ya beto, samu ti luvunu kele kiswamunu ya beto, mambu ya kulunga ve kele kibumbamanu ya beto.

16Ni yawu yina, Yave Mfumu ke na kutuba: Mu me tula na Siyone ditadi ya lufulu ya ngolo, ditadi yina ba me soola, ya ntalu mpe ya mfunu, ditadi ya nsongi yina lenda ningana ve, ditadi yina me vwanda na ngolo nyonso. Konso muntu yina ke tula kivuvu ya yandi na yawu, yandi ke kubwa ve.

17Kitezolo ya munu ya kutezila, ni kusungama, singa yina ba ke sadilaka samu na kutelemisa bibaka ni ludedomo, kasi mvula ya matadi ke nata kibumbamanu ya beno ya luvunu, maza ke nata kiswamunu ya beno.

18Ngwisani ya beno na lufwa ke beba, kindiku ya beno na yinsi ya bafwa ke tatamana ve, ntangu kiyoolo ya ngolo ke luta, yawu ke dyata beto.

19Konso ntangu yina yawu ke luta, yawu ke simba beno, yawu ke luta konso suka, mpimpa na ntangu, kaka makelele ya yawu ke talisa beno boma mingi.

20Mfulu ke vwanda fyoti samu ti muntu kulala kuna, lele ke vwanda fyoti samu ti muntu kufukila na yawu.

21Ya tsyelika, Yave ke telama mutindu yandi telamaka na mongo ya Pelasime, Yandi ke lakisa nkele ya yandi mutindu yandi salaka yawu na mudimba ya Ngabawone, samu na kusala kisalu ya yandi, kisalu ya ngitukulu, samu na kulungisa kisalu ya yandi, kisalu yina yandi me salaka ntete ve.

22Ntangu yayi beno bika lunangu, kana ve basinga ya beno ke lutila kukangama, ya tsyelika, Nzambi me baka yimeni nzengolo samu na mwangusulu ya yinsi nyonso, ni Yave Mfumu ya binwani, me zabisa munu yawu.

23Beno fungula makutu, beno kuwa munu! Beno sala keba mpe beno kuwa mambu ya munu!

24Kisadi-bilanga yina zola kukunda ke lutisaka ntangu ya yandi nyonso ve na kubalula kaka ntoto? Yandi ke yidikaka kaka mikala mpe kusadilaka na sengo ntangu nyonso?

25Yandi ke bongisa ntete ntoto, na manima yandi ke banda na kukunda bambuma ya nizele mpe bambuma ya kumine, yandi ke tula mpe bambuma ya faline, bambuma ya mile, ya Oloze, mpe na manima, ya kunda bambuma ya nkaka na ndilu ya bilanga.

26Ni Nzambi ya yandi ke na kulakisa yandi musiku yayi ya kusadila, mpe ke na kulwengisa yandi.

27Samu ti ba ke kabulaka ve bambuma ya nizele na kusadila na sengo, mpe ba ke lutisaka ve dikalu ya kipusu-pusu na zulu ya bambuma ya kumine, kasi ba ke bulaka bambuma ya nizele na yinti, mpe bambuma ya kumine na yinti ya fyoti.

28Bantu fwana kunika bambuma ya faline samu na kuyidikila mampa, ba ke bulaka yawu ve ntangu nyonso, kana ba nengumuna dikalu ya kipusu-pusu, na bibulu yina ke nataka yawu, yawu ke nika ve bambuma.

29Mutindu ya kusala yayi me katuka na Yave Mfumu ya Binwani, yandi kele kipesi-malongi ya mbote, ndwenga ya yandi kele nene mingi.

← Chapter 27 Jump to: Chapter 29 →

Recommended Reading

Commentary Isaiah Commentaries → Devotional Isaiah Devotional Guide → Get This Bible Kituba (BIBILIYA NA KITUBA) Study Bible →