Isaiah 31

Kituba (BIBILIYA NA KITUBA)

← Chapter 30 Jump to: Chapter 32 →

1Kyadi na bayina ke kwendaka na Ngipiti samu na kusosa lusalusu, bawu ke tulaka ntima na bampunda ya bawu. Bawu ke salaka kivuvu ya bawu na lutangu ya bapusu-pusu ya bawu ya mvita mpe bima ya yawu, samu ti bawu kele na ngolo mingi, kasi bawu ke talaka ve na sika ya Nzambi ya longo ya Isayeli mpe bawu ke sosaka ve Yave!

2Na kutala mbote, yandi mpe, yandi kele Nzambi ya ndwenga, yandi lenda nata mpasi, yandi ke sobaka ve mambu ya yandi, yandi ke tediminaka dikanda ya bantu ya yimbi mpe lusalusu ya bantu ya yimbi.

3Mu-Ngipiti kele muntu kasi Nzambi ve. Bampunda ya yandi ke kaka ya kinsuni, ya kele ve ya kimpeve. Ntangu Yave ke fula lulendo ya yandi, muntu yina ke nataka lusalusu ke bula mabaku, muntu yina ke sadisaka bantu ke kubwa, mpe bawu nyonso ke zimbana.

4Yave ke na kutuba mutindu yayi: «Ntangu nkosi to mwana ya nkosi ke wakisaka ndinga ya yandi na zulu ya madya ya yandi, ata ti mimvungi nyonso kuyonzama samu na kuyimina yandi, yandi ke tala ve boma ya bandinga ya bawu, to yandi ke tekita ve na lutangu ya bawu ya mingi, ni mutindu yina mpe Yave Mfumu ya Binwani ke kulumuka na zulu ya mongo ya Siyone mpe na mongo ya yandi ya fyoti, samu na kunwana mvita.»

5Mutindu bandeke ke fungulaka mapapu ya bawu, ni mutindu yina mpe Yave Mfumu ya Binwani ke kengidila Yelusalemi, yandi ke kenga mpe ke kuula, yandi ke katula na mpasi mpe yandi ke vuukisa.

6Beno vutuka ya tsyelika na sika ya Yave yina beno pesaka manima, beno bana ya Isayeli!

7Na kilumbu yina, muntu-muntu ke losa banzambi ya yandi ya luvunu ya palata mpe banzambi ya yandi ya luvunu ya wolo. Bawu kulosa banzambi ya bawu ya luvunu yina maboko ya bawu yidikilaka beno.

8Mu-Asili ke kufwa na mbele ya mvita, na mbele ya mvita yina kele ve ya muntu, mbele ya mvita yina kele ve ya muntu ke kufwa yandi, yandi ke kima, samu ti mbele bwidila yandi ve, binwani ya yandi ya bantwenya, ba ke kwika bawu bisalu ya ngolo.

9Bayina vwandaka ngolo mutindu ditadi, bawu ke kima na boma nyonso, bamfumu ya bawu ke tekita na mantwala ya kidimbu ya yinsi ni Yave me tuba yawu, yandi yina ke basisaka tiya na Siyone, yandi yina ke na kifule ya yandi na Yelusalemi.

← Chapter 30 Jump to: Chapter 32 →