Isaiah 38

Kituba (BIBILIYA NA KITUBA)

← Chapter 37 Jump to: Chapter 39 →

1Na bantangu yina, ntinu Ezekyase kuzwaka kimbevo ya lufwa. Mumbikudi Esaya, mwana ya Amose, kwisaka tala yandi mpe yandi tubaka: «Yave ke na kutuba: Pesa bantumunu na dikanda ya nge samu ti nge ke kufwa, nge ke zinga dyaka ve.»

2Ezekyase balulaka kizizi ya yandi na kibaka mpe yandi sambilaka Yave mutindu yayi:

3«Aa! Yave, mulemvo ya nge, bambuka moyo ti mu tambulaka na mantwala ya nge na butsyelika nyonso mpe na ntima ya munu nyonso. Mu salaka mambu ya mbote na mantwala ya nge!» Na manima, Ezekyase dilaka mingi.

4Esaya vwandaka me basika ntete ve na ngaanda ya lupangu ya ntinu mpe Yave tubaka na yandi:

5«Kwenda tuba na Ezekyase: Yave ke na kutuba mutindu yayi, Nzambi ya nkooko ya nge Davidi: “Mu me kuwa lusambulu ya nge mpe mu me tala mansangasa ya nge. Mu me bwela nge bamvula kumi na tanu na bilumbu ya luzingu ya nge.

6Mu ke kuula beno, nge mpe mbanza yayi ya Yelusalemi, na maboko ya ntinu ya Asili. Mu ke keba mbanza yayi.”»

7Yayi ni kidimbu yina me katuka na Yave samu na nge, samu na kuzabisa nge ti Yave ke lungisa mambu yina yandi me tuba:

8Na kikada ya Akaze, mu ke vutula na manima, mpewo ya bitezo kumi mpe Yave vutulaka na manima, mpewo ya bitezo kumi na kisika yina ntangu vwandaka.

9Mukunga ya Ezekyase, ntinu ya Yuda ntangu ya yandi vwandaka na kimbemvo mpe lunyakusu ya yandi.

10Mu vwandaka tuba na ntima ya munu: Mu me zinga kaka ndambu ya ntangu ya luzingu ya munu, na manima mu fwana kwenda ya munu, mu ke lutila na mwelo ya yinsi ya bafwa. Mu ke tala dyaka ve bamvula yina me bikana na munu na kuzinga!

11Mu vwandaka tuba mpe na ntima na munu: Mu ke tala dyaka ve Yave, Yave, awa na ntoto ya bantu ya moyo, mu ke tala dyaka ve muntu mosi ya moyo, na kati ya bantu ya yinza.

12Ba me baka yinzo ya munu, ba me nata yawu ntama na munu, mutindu yinzo ya lele ya mvungi, mutindu yinti yina ke sadilaka bantu yina ke tungaka balele, yina me zungama na lele yina. Mu me kuma na nsukunu ya luzingu ya munu. Ba me zenga bayinti ya fyoti. Ntete bwisi kuyila, nge Yave, nge ke manisa munu na mbala mosi.

13Ntete bwisi kutsya, mu ke vwanda dyaka ve. Mutindu nkosi, Yave me nika mikwa ya munu nyonso, ntete bwisi kuyila, nge ke manisa munu na mbala mosi!

14Kulooka ya munu me kuma mutindu ya ndeke yina ba ke bokilaka yilondele, kuyawula ya munu me kuma mutindu ya dibembe. Meso ya munu me lemba na kutalaka na zulu. Yave, mu me lemba ya munu, kwiza sadisa munu.

15Yinki mu lenda tuba? Yandi me pesa munu mvutu, mpe ni yandi mosi Yave ke na kusala. Mu ke tambula na kukuluka nyonso, bilumbu nyonso ya luzingu ya munu, samu na mpasi ya kulutila yina kele na munu.

16Yave, ni na bumbote ya nge beto ke na kuzinga, ni na bumbote ya nge mu ke ntete na kiwumunu, nge me vutula munu ngolo yina mu vwandaka na yawu, nge me sala ti mu zinga.

17Mpasi ya munu ke kituka kizunu, na luzolo ya nge. Nge me zola munu, mpe nge me katula munu na lufwa, nge me losa masumu ya munu nyonso ntama na nge.

18Ya tsyelika, yinsi ya bafwa lenda kembila nge ve, bantu ya kufwa lenda yimbidila ve mikunga ya nzitusu, bantu yina me kota na ndyamu, bawu ke tula dyaka ve kivuvu na kukwikama ya nge.

19Kaka ni muntu ya moyo, muntu ya moyo lenda kembila nge, mutindu munu bubu yayi, bibuti ke longisa bana ya bawu kukwikama ya nge.

20Yave, nge me vuukisa munu! Beto ke sika bansambi ya beto, bilumbu nyonso ya luzingu ya beto, na kati ya Yinzo ya Yave.

21Esaya tubaka: «Beno baka maboke ya bambuma ya fike ya kuyuma, beno nika yawu.» Ba tulaka yawu na kisika yina vwandaka kimbevo mpe Ezekyase belukaka.

22Ezekyase tubaka na Esaya: «Wapi kidimbu yina ke lakisa ti Yave me nyakisa munu, mpe ti na manima ya bilumbu zole, mu ke kwenda na Yinzo ya Yave?»

← Chapter 37 Jump to: Chapter 39 →