Isaiah 47

Kituba (BIBILIYA NA KITUBA)

← Chapter 46 Jump to: Chapter 48 →

1Kulumuka, vwanda na zulu ya fundu-fundu, nge ndumba ya Babilone vwanda na ntoto, vwanda na ntoto kondwa kiti ya kintinu, ndumba ya ba-Kalede, ba ke bokila dyaka nge ve «Kento ya kitoko mpe yina zola nsayi ya kinsuni.»

2Baka matadi zole yina ba ke sadilaka, samu na kunika bambuma ya faline, katula kitambala ya nge, benda dizwela ya nge, lakisa mabunda ya nge, mpe sabuka mwila.

3Na yina kimpene ya nge ke talana na ngaanda mpe nge ke tala nsoni na meso ya bantu. Mu ke vutudila nge mambu ya nge ya yimbi, mpe ata muntu ke kabikisa munu.

4Muntu yina ke na kiyeko ya kukuula beto nkumbu ya yandi kele Mfumu ya Binwani, muntu ya Longo ya Isayeli.

5Vwanda mpe dingama, bumbama na kitombe, kento ya ba-Kalede, samu ti ba ke bokila nge dyaka ve, «Mfumu ya kento ya bayinsi ya kintinu.»

6Mu dasukilaka bantu ya munu, mu vwezaka mvwilu ya munu, mu yekudilaka nge yawu, kasi nge me nyokola bawu kondwa kyadi, nge me tula kizitu ya nge ya dema na zulu ya biboba,

7mpe nge me tuba: «Mu ke vwanda mfumu ya kento ya bantangu nyonso!» Na nyonso yina nge me kanisa ve, mpe nge me yindula ve, wapi mutindu ya ke manisa.

8Na ntangu yayi, kuwa nge kento ke zolaka nsayi ya kinsuni, nge kento ke yalaka na kivuvu, mpe ke tubaka na ntima ya nge: «Munu, kaka munu, muntu ya nkaka ve! Mu ke vwanda ve mufwidi, mpe mu ke wombisa ve bana ya munu!»

9Ya tsyelika, mambu zole ya bampasi ke kumina na ntangu mosi mpe na kilumbu mosi: «Ba ke botola nge bana mpe bufwidi. Mpasi yango ke bwidila nge ngolo ya yawu nyonso, ata ti nge sadila bampandu ya mutindu na mutindu, ata ti nge sadila lulendo ya bansalulu ya nge ya bakisi.»

10Nge vwandaka tula kivuvu ya nge na yimbi yina nge vwandaka sala, mpe nge vwandaka tuba: «Ata muntu ke na kutala munu.» Ndwenga mpe luzabu me zimbisa nge, nge vwandaka tuba na ntima ya nge: «Munu, kaka munu, muntu ya nkaka ve!»

11Kasi mambu ya kyadi ke kumina nge mpe nge ke zaba ve wapi mutindu ya kusala samu ti yawu kumina nge ve, mwangusulu yina nge ke na kubanza ve, ke kumina nge na mpamukunu, kondwa nge zaba yawu.

12Tatamana na kusadila bampandu ya nge, mpe na bakisi ya nge, yina nge ke sadilaka ntangu nyonso katuka bumwana ya nge! Kuzaba ve kana nge ke kuzwa ndandu na yawu, kuzaba ve kana nge ke kuma muntu ya nsisi!

13Nge me lemba mingi na kusosaka bayina ke talaka mambu. Bika ti bawu kutalana mpe bawu kuvuukisa nge, bantu ya ndwenga bayina ke tangaka bizunga ya dizulu mpe bambwetete, bayina ke zabisaka nge konso mbandukulu ya ngonda mambu, yina ke kwiza na mantwala!

14Bawu nyonso me kuma mutindu nyanga yina tiya ke yokaka, bawu lenda kuvuukisa ve luzingu ya bawu na milaka ya tiya, ya kele ve makala ya tiya, yina ba ke lambilaka mampa, to mwa tiya yina bantu ke yotilaka.

15Tala mpasi yina ke kumina bayina nge vwandaka kwenda tala ntangu nyonso, mpe bayina vwandaka sala mumbungu na nge katuka bumwana ya nge. Bawu ke kwenda dyengila konso muntu na lweka ya yandi, mpe nge ke vwanda ve na muntu yina ke vuukisa nge!

← Chapter 46 Jump to: Chapter 48 →