Isaiah 44

Kituba (BIBILIYA NA KITUBA)

← Chapter 43 Jump to: Chapter 45 →

1Ntangu yayi, Yakobi kisyelo ya munu kuwa, nge Isayeli, yina mu me soola!

2Yave ke na kutuba, yandi yina salaka nge, yandi yina yidikaka nge katuka na kivumu ya mama ya nge, yandi kele lusalusu ya nge, kutala boma ve, Yakobi kisyelo ya munu, Yesulume, nge yina mu me soola.

3Mu ke mwangisa maza na ntoto yina me kondwa maza, mu ke tula miila na ntoto yina kele ya kukawuka, mu ke tula Mpeve ya munu na zulu ya bana ya nge, mpe mu ke sakumuna bana ya bana ya nge.

4Bawu ke mena mutindu matiti na kati ya bilanga, bawu ke kula mutindu bayinti pene-pene ya maza.

5Mosi na kati ya bawu ke tuba mutindu yayi: Mu kele ya Yave! Ya nkaka ke baka nkumbu ya Yakobi. Ya nkaka ke sonika na diboko ya yandi, mu kele ya Yave, na kilengi nyonso, yandi ke baka nkumbu ya Isayeli.

6Yave, ntinu ya Isayeli, kikuudi ya yandi, Yave Nzambi ya Binwani ke na kutuba: Mu kele muntu ya ntete, mu kele mpe ya nsuka, kana munu ve, Nzambi ya nkaka kele ve.

7Nani yina kele mutindu munu? Yandi looka! Yandi samuna yawu, yandi zabisa munu mambu nyonso yina me salama, katuka ntangu yina mu yidikaka bantu ya ntete! Yandi tuba mpe mambu yina ke salama na bilumbu yina ke kwiza.

8Beno bantu ya munu, beno vwanda ve na boma, beno tekita ve, mu zabisaka beno yawu ntama, mu salaka ti beno kuzaba yawu? Beno kele bambangi ya munu. Ya kele dyaka na Nzambi ya nkaka kana munu ve? Ve, mu kele ditadi ya nene, mu zaba Nzambi ya nkaka ve.

9Bantu yina ke yidikaka banzambi ya biteki, bawu nyonso kele kaka mpamba, biteki ya bawu ya ntalu ke na ndandu ve, yawu mosi kele bambangi ya bawu, yawu ke talaka ve, yawu zaba kima ve, bawu ke tala nsoni.

10Kuyidika nzambi ya kiteki, to kusulumuna kisengo samu na kuyidika kiteki, ya kele kaka buzoba.

11Bantu nyonso yina kele ya kukangama na biteki, bawu ke fuluka na nsoni. Bayina ke yidikaka yawu ke kaka bantu. Bawu kuvukana bawu nyonso, bawu kwiza talana, bawu ke tala boma mpe bawu ke safuka.

12Na kuyidika soka, kisadi-bisengo ke sadilaka na makala ya tiya, yandi ke bulaka yawu kikonkoto, yandi ke salaka na ngolo nyonso, kasi kana yandi me kuma na nsatu, yandi me lemba. Kana yandi me kunwa ve maza, yandi me lemba.

13Muntu yina ke yidikaka biteki ke tezaka kibuku ya yinti na singa, yandi ke fikulaka kiteki ya nzambi ya luvunu na kisonokono, yandi ke bongisaka yinti na mbele, yandi ke yidikaka yawu mbote-mbote na lime, yandi ke bongisaka kiteki mutindu kele muntu, yandi ke yidika yawu na kifwani ya muntu, mpe yandi ke tulaka yawu na kati ya yinzo ya nzambi.

14Yandi ke zenga yinti ya mbote ya sedele, yandi ke soola yinti ya telebinte yina kele ngolo to yinti ya nkaka ya nene. Yandi me bika ti yawu kula na kati ya bayinti ya mfinda, yandi ke kunda bayinti ya pine mpe mvula ke sala ti yawu kula.

15Bantu ke sadila bankuni samu na kusala tiya, ba ke sadila yawu samu na kuzwa tiya to samu na kulambila madya ya bawu. Bawu lenda sadila yawu mpe samu na kuyidika nzambi yina bawu ke bondila. Bawu ke yidika kiteki, mpe bawu ke fukama samu na kusambila yawu.

16Bawu ke baka ndambu ya yinti samu na kutula yawu na tiya, bawu ke yoka musuni na tiya yina, bawu ke kudya yawu mpe na manima, nsatu me manisa to bawu ke kuzwa tiya mpe bawu ke tuba: «Yinti yayi ke na kupesa tiya, tiya ya yawu kele ya mbote!»

17Na yinti yina me bikana, yandi ke yidika nzambi ya kiteki, yandi ke fukama na mantwala ya yawu, yandi ke sambila yawu na kutuba mutindu yayi: «Nge kele nzambi ya munu, vuukisa munu.»

18Bawu zaba kima mosi ve, bawu kele ve na mayela, meso ya bawu kele ya kukangama, samu ti bawu kutala ve, mutindu mosi mpe bantima ya bawu samu ti bawu kusimba ata dyambu.

19Muntu ve ke na kuyindula na yandi mosi, muntu ve ke na ntima ya mbote mpe mayela samu na kutuba: «Mu me yoka ndambu ya yinti, mu me lamba madya na zulu ya makala, mpe mu me yoka musuni yina mu ke na kudya. Mu ke yidika kima ya busafu na ndambu ya nkaka! Mu ke fukama na mantwala ya kibuku ya yinti samu na kusambila kibuku yawu?»

20Ve, bantu ya mutindu yina me kangama na kima yina ke kaka bombi, bawu ke na kuvunama na bantima ya bawu mpe bawu me zimbana nzila, bawu ke vuukisa ve luzingu ya bawu, mosi ve na kati ya bawu ke tuba: «Kima yina kele na diboko ya munu kele nzambi ya luvunu.»

21Isayeli, dikanda ya Yakobi bambuka moyo na mambu yayi: Nge kele kisyelo ya munu, mu me yidika nge, samu ti nge sadila munu. Isayeli, mu me zimbana nge ve.

22Mu me kombola masumu ya nge mutindu dituti, mu me bingisa masumu ya nge mutindu dituti ya suka. Vutuka na sika ya munu, samu ti mu kele kikuudi ya nge.

23Mazulu, yimbila na nsayi, samu ti Yave me sala! Kati-kati ya yisi ya ntoto, sala milolo ya nsayi! Beno myongo, beno looka na nsayi! Beno mpe mfinda na bayinti ya beno nyonso! Ya tsyelika, Yave me kuula Yakobi, yandi me lakisa nkembo ya yandi na Isayeli.

24Yave ke na kutuba mutindu yayi: «Yave kele kikuudi ya nge, yandi yidikaka nge katuka kivumu ya mama ya nge: “Munu Yave, mu ke salaka nyonso. Mu me tanda mazulu munu mosi, mu me yalumuna ntoto kondwa lusalusu ya muntu.

25Ntangu yayi, mu me katula bidimbu ya mimbikudi ya luvunu, mu ke sala ti bantu yina ke talaka mambu yina ke kwiza, bawu kuzonza kidi-kidi, mu ke kanga yinwa ya bantu ya ndwenga, mu ke lakisa ti mayela ya bawu kele kaka buzoba.

26Mu ke lungisa mambu yina kisadi ya munu me tuba, mu ke sala ti makani ya bantumwa ya munu kununguswa. Na yina me tadila Yelusalemi, bantu ke zinga dyaka kuna, na yina me tadila bambanza ya Yuda ba ke tunga dyaka yawu, Mu ke tunga dyaka nyonso yina mwanganaka”.

27Mu ke tuba na mubu ya sunda: “Kawuka, mu ke sala ti miila kukawuka.

28Mu ke tuba mutindu yayi samu na Siluse: Yandi kele mvungi ya bantu ya munu! Yandi ke sala ti nyonso yina mu zola, yawu kubonga. Yandi ke tumisa ti ba tunga dyaka Yelusalemi mpe kutula lufulu ya Yinzo ya Nzambi.”»

← Chapter 43 Jump to: Chapter 45 →