Isaiah 27

Kituba (BIBILIYA NA KITUBA)

← Chapter 26 Jump to: Chapter 28 →

1Na kilumbu yina, Yave ke baka mbele ya mvita ya ngolo, ya nene, mpe ya lulendo. Yave ke baka yawu mpe yandi ke sadila yawu samu na kunwanisa nyoka yina ke kwendaka kima, nyoka yina ke na mayela ya yimbi. Yandi ke kufwa kibulu ya nsisi yina kele na kati ya mubu.

2Na kilumbu yina, beno yimbila mukunga mosi, samu na bilanga ya bayinti ya vinu yina ke pesaka vinu ya kitoko.

3«Ni munu Yave ke kebaka yawu. Mu ke tulaka yawu maza konso ntangu, samu ti ba nwanisa ve yawu, mpimpa na ntangu, mu ke kebaka bilanga ya munu ya bayinti ya vinu.

4Mu kele dyaka ve na nkele na yandi, kasi kana mu tala bansende mpe matiti ya bansende, mu ke nwanisa yawu! Mu ke dyata yawu mpe mu ke yoka yawu.

5Kasi muntu yina ke sala munu kibumbamanu ya yandi, yandi ke sala kiwisa na munu, ya tsyelika, yandi ke vwanda na kizunu na munu!»

6Na bilumbu yina ke kwiza, Yakobi ke basisa myanzi, Isayeli ke basisa bifulu mpe bintala, mpe yandi ke fulusa kizizi ya yinza na bambuma ya yandi.

7Yave me bula yandi mutindu yandi mpe vwandaka bula bayina vwandaka bula yandi? Yave me kufwa yandi, mutindu yandi mpe kufwaka bayina yandi kufwaka?

8Ve! Yandi fundisaka bawu na kubingisa bawu, na kufidisa bawu na ngolo na yinsi ya nzenza, Yave bingisaka bawu na mupepe ya yandi ya ngolo, na kilumbu yina ke salamaka kitembo yina ke katukaka na esete.

9Ni ngwisani yina mu ke sala na bawu ntangu mu ke katula masumu ya Yakobi. Yandi ke mwangisa matadi ya biyokolo nyonso, yawu ke kuma mutindu matadi ya mpamba-mpamba ya kufuluka na fundu-fundu, makunzi ya longo ya nzambi Asela mpe biyokolo ya maaka ya nsunga ya mbote ke vwanda dyaka ve.

10Mbanza ya kutungama na bibaka ya lukengolo ke dyaka ve na bantu, yawu me kuma kisika ya mpamba, yawu me bikana mutindu yinsi ya kuyuma. Bana ya ngombe ke kwiza kudya kuna, bawu ke lala kuna mpe bawu ke kudya matiti mpe makasa.

11Ntangu bintala ke yumaka, ba ke zengaka yawu. Mpe bakento ke yokaka yawu na tiya. Ya vwandaka dikanda mosi yina kele ve na mayela. Ni yawu yina, kiyidiki ya yawu ke na kulakisa ve bumbote ya yandi, yina yidikaka yandi talaka ve yandi kyadi.

12Na kilumbu yina, Yave ke zenga bayinti, kubanda na nzadi ya Efalate tii na muzumba ya Ngipiti, mpe ba ke lokota beno, mosi na mosi, beno bana ya Isayeli.

13Na kilumbu yina, ba ke wakisa muningu ya mpungi ya nene, na yina, bayina zimbanaka kuna na Asili, bawu ke kwiza, bayina mwanganaka tii na Ngipiti, bawu ke fukama na ntadisi ya Yave kuna na mongo ya longo, na Yelusalemi.

← Chapter 26 Jump to: Chapter 28 →